《巴克禮普世版聖經（試讀本）》

 | | | 轉寄

巴克禮普世版（試讀本） 希伯來書第四章

作者 巴克禮普世版小組 2016.06.05

1 Kì-jiân Siōng-Tsú hō͘ lán tsìn-ji̍p I ê an-hioh ê ìng-ín iáu tī-teh, lán tio̍h ū kìng-uì ê sim, tsiah bián-tit lín tiong-kan kiám-tshái ū-lâng siūⁿ-kóng tit bē-tio̍h tsit-ê ìng-ín. 2 Hok-im pêⁿ-pêⁿ ū thuân hō͘ in, mā ū thuân hō͘ lán, m̄-koh in só͘ thiaⁿ ê sìn-sit tuì in bô lī-ik, in-uī thiaⁿ ê lâng bô īng sìn-sim lâi niá-siū. 3 Lán tsiah-ê sìn ê lâng ē-tàng tsìn-ji̍p Siōng-Tsú só͘ siúⁿ-sù ê an-hioh. Tsiàu I só͘ kóng: Guá tsiū tī siū-khì tiong tsiù-tsuā kóng: In tsua̍t-tuì bē-tàng tsìn-ji̍p Guá ê an-hioh.( tsù: SPh 95:11) Kî-si̍t Siōng-Tsú tī tshòng-tsō ú-tiū ê sî, I ê kang-tsok í-king uân-sîng. 4 Sìng-king ū tsi̍t-ê só͘-tsāi lūn-kàu "tē tshit ji̍t" ū án-ne kóng, "Siōng-Tsú tī tē tshit ji̍t suah I it-tshè ê kang-tsok lâi an-hioh."( tsù: CSK 2:2) 5 Kāng tsit-hāng tāi-tsì ū koh kóng, "In tsua̍t-tuì bē-tàng tsìn-ji̍p Guá ê an-hioh."( tsù: SPh 95:11) 6 Hiah-ê tāi-sing tit-tio̍h hok-im ê lâng in-uī m̄ sūn-ho̍k suah bē-tàng tsìn-ji̍p an-hioh, Siōng-Tsú tsiū uī kî-tha ê lâng pó-liû tsit-ê an-hioh. 7 Kuí-nā-nî āu, tī Tāi-pi̍t ê tsheh ū kì-tsài: Siōng-Tsú koh līng-guā tīng tsi̍t ji̍t, kiò-tsò "Kin-á-ji̍t", tshin-tshiūⁿ tíng-bīn só͘ kóng: Kin-á-ji̍t lín nā thiaⁿ-tio̍h Siōng-Tsú ê siaⁿ, M̄-thang ngē lín ê sim.( tsù: SPh 95:7-8) 8 Iok-su-a nā ū tuà-niá jîn-bîn tsìn-ji̍p an-hioh, āu-lâi Siōng-Tsú it-tīng bē koh kóng-khí pa̍t-ji̍t. 9 Án-ne khuàⁿ khí-lâi, Siōng-Tsú iáu uī-tio̍h I ê tsú-bîn pó-liû tsi̍t-ê An-hioh-ji̍t. 10 In-uī tsìn-ji̍p Siōng-Tsú só͘ sù an-hioh ê lâng, tshin-tshiūⁿ Siōng-Tsú suah I ê kang-tsok, mā suah in it-tshè ê kang-tsok lâi an-hioh. 11 Só͘-í lán tio̍h tsīn-la̍t lâi tsìn-ji̍p tsit-ê an-hioh, tsiah bián-tit ū-lâng tshin-tshiūⁿ hiah-ê m̄-sìn ê lâng pua̍h-tó sit-pāi. 12 Siōng-Tsú ê uē sī ua̍h ê, koh sī ū kong-hāu ê, pí it-tshè siang-bīn-lāi ê kiàm khah lāi, ē-tàng tshah-ji̍p, sīm-tsì phuà-khui lâng ê lîng kah hûn í-ki̍p kut-tsat kah kut-tshué, koh ē-tàng phuàⁿ-tuàn lâng sim-lāi ê io̍k-bōng kah sim-su ì-liām. 13 Só͘-ū ê pī-tsō-bu̍t bô tsi̍t-hāng ē-tàng tuì Siōng-Tsú ún-ba̍t, tsiū-sī bān-bu̍t lóng po̍k-lō͘ tī I ê ba̍k-tsiu tsîng. Lán ê kiâⁿ-ta̍h lóng tio̍h tuì I kau-tài tshing-tshó.

Tsè-si-tiúⁿ Iâ-so͘
14 Lán kì-jiân ū tsi̍t-uī uí-tāi ê tsè-si-tiúⁿ, tsiū-sī Siōng-Tsú ê Kiáⁿ Iâ-so͘. I í-king tsiūⁿ-thiⁿ tī Siōng-Tsú ê bīn-tsîng, lán tio̍h tshî-siú lán só͘ kong-khai sîng-jīn ê sìn-gióng. 15 Lán tsit-uī tsè-si-tiúⁿ m̄-sī bē thé-thiap lán ê luán-jio̍k. I tī ta̍k-hāng tāi-tsì lóng kah lán kāng-khuán ū siū tshì-thàm, m̄-koh bô huān-tsuē. 16 Só͘-í lán tio̍h hó-táⁿ lâi tsiū-kīn Siōng-Tsú un-tián ê pó-tsō, thang niá-siū liân-bín, mā thang tit-tio̍h un-tián, tsò lán ki̍p-sî ê pang-tsō͘.