《巴克禮普世版聖經（試讀本）》

 | | | 轉寄

巴克禮普世版（試讀本） 希伯來書第三章

作者 巴克禮普世版小組 2016.05.29

Iâ-so͘ Pí Mô͘-se Khah Uí-tāi
1 Pêⁿ-pêⁿ siū Siōng-Tsú suán-tiàu tsiâⁿ-tsò Ki-tok-tô͘ ê hiaⁿ-tī tsí-muē, tio̍h tshim-tshim su-khó Hit-uī lán só͘ sîng-jīn tsò Sù-tsiá koh tsò Tsè-si-tiúⁿ ê Iâ-so͘. 2 Iâ-so͘ tuì kā I siat-li̍p ê Siōng-Tsú tsīn-tiong, tú tshin-tshiūⁿ Mô͘-se tī Siōng-Tsú ê ke tsīn-tiong. 3 Khí-tshù ê lâng pí i só͘ khí ê tshù khah tsun-kuì, án-ne Iâ-so͘ pí Mô͘-se tio̍h siū koh-khah tuā ê îng-kng. 4 Só͘-ū ê tshù lóng sī lâng khí ê, m̄-koh Siōng-Tsú tshòng-tsō bān-bu̍t. 5 Mô͘-se tsò lô͘-po̍k, tuì Siōng-Tsú ê tsuân-ke tsīn-tiong, uī-tio̍h Siōng-Tsú āu-lâi beh kóng ê tāi-tsì tsò-tsìng. 6 Tsóng-sī Ki-tok tsò Kiáⁿ lâi tī-lí Siōng-Tsú ê ke. Nā tshî-siú lán só͘ gióng-bōng ê sìn-liām kah ióng-khì, lán tsiū-sī Siōng-Tsú ke-lāi ê lâng. 7 Siōng-Tsú Tsú-bîn ê An-hioh Só͘-í, tsiàu Sìng-Sîn só͘ kóng: Kin-á-ji̍t lín nā thiaⁿ-tio̍h Siōng-Tsú ê siaⁿ, 8 Tsiū m̄-thang ngē lín ê sim, tshin-tshiūⁿ lín ê tsó͘-sian puē-gi̍k ê sî, Tī khòng-iá teh tshì-thàm Siōng-Tsú." 9 Siōng-Tsú kóng, "Lín ê tsó͘-sian tī khòng-iá sì-tsa̍p-nî kú, sui-jiân ū khuàⁿ-tio̍h Guá ê tsok-uî, iû-guân tī hia khó-giām Guá koh tshì-thàm Guá. 10 Só͘-í guá bô huaⁿ-hí hit tāi ê lâng, kóng, 'In ê sim siông-siông sit-bê, in m̄-bat Guá ê tō-lō͘. 11 Guá tī siū-khì tiong tsiù-tsuā kóng, 'In tsua̍t-tuì bē-tàng tit-tio̍h Guá siúⁿ-sù ê an-hioh.( tsù: SPh 95:7-11) 12 Hiaⁿ-tī tsí-muē ah, lín tio̍h kín-sīn, lín tiong-kan tsiah bián ū-lâng sim-su pāi-huāi m̄-khíng siong-sìn, suah lâi lī-khui íng-ua̍h ê Siōng-Tsú. 13 Lín tio̍h pá-ak iáu ū thang kiò-tsò 'kin-á-ji̍t' ê sî-ki, ji̍t-ji̍t hō͘-siōng khuàn-bián. Tsiah bián-tit lín tiong-kan ū-lâng hō͘ tsuē-ok bê-hi̍k, suah piàn ngē-sim. 14 Lán nā tshî-siú tong-tsho͘ ê sìn-sim kàu lō͘-bué, tsiū ē tsiâⁿ-tsò Ki-tok ê tâng-kang. 15 Sìng-king án-ne kóng: Kin-á-ji̍t lín nā thiaⁿ-tio̍h Siōng-Tsú ê siaⁿ, Tsiū m̄-thang ngē lín ê sim, tshin-tshiūⁿ lín ê tsó͘-sian puē-gi̍k ê sî.( tsù: SPh 95:7-8) 16 Thiaⁿ-tio̍h Siōng-Tsú ê siaⁿ iáu-koh puē-gi̍k ê sī siáⁿ-lâng? Kám m̄-sī tuè Mô͘-se tshut Ai-ki̍p hiah-ê lâng? 17 Siōng-Tsú sì-tsa̍p-nî kú tuì siáⁿ-lâng huat siū-khì? Kám m̄-sī hiah-ê huān-tsuē sí tī khòng-iá ê lâng? 18 Tû-liáu hiah-ê puē-gi̍k ê lâng í-guā, Siōng-Tsú kám bat tsiù-tsuā m̄-tsún lâng tsìn-ji̍p I só͘ siúⁿ-sù ê an-hioh? 19 Án-ne kóng khí-lâi, in bē-tàng tsìn-ji̍p an-hioh, sī in-uī in m̄-sìn.