《巴克禮普世版聖經（試讀本）》

 | | | 轉寄

巴克禮普世版（試讀本） 希伯來書第六章

作者 巴克禮普世版小組 2016.06.19

1 Só͘-í lán m̄-thang thîng-liû tī Ki-tok ê tsho͘-pō͘ tō-lí, bô koh-tsài tī thuat-lī sí ê hîng-uî lâi sìn Siōng-Tsú, sé-lé, 2 í-ki̍p huāⁿ-tshiú, sí lâng koh-ua̍h, kah íng-uán ê sím-phuàⁿ, tsiah-ê kà-sī tíng-tíng. 3 Lán tio̍h hiòng-tsîng kiû tsìn-pō͘. Siōng-Tsú nā ín-tsún, guán tsiū beh án-ne tsò. 4 Hiah-ê puē-kàu ê lâng bat tit-tio̍h Siōng-Tsú ê kng tsiò, bat tam-tio̍h sio̍k-thiⁿ ê un-sù, mā ū hun-hióng tio̍h Sìng-Sîn, 5 koh bat thé-giām Siōng-Tsú ê uē ê hó-tshù, mā bat kám-siū teh-beh lâi ê sè-kài ê kuân-lîng. 6 Án-ne in iáu-koh puē-kàu! Tsit-khuán lâng bē-tàng hō͘ in hué-kái kiâⁿ tò tńg-lâi, in-uī in koh kā Siōng-Tsú ê Kiáⁿ tìng si̍p-jī-kè, kong-jiân kā I bú-jio̍k. 7 Thó͘-tē put-sî teh khip-siu tuì thiⁿ lo̍h-lâi ê hō͘-tsuí lâi sing-sán tshài-se, tuì tsoh-sit-lâng ū lō͘-īng. Tse tsiū-sī Siōng-Tsú ê tsiok-hok. 8 M̄-koh thó͘-tē nā seⁿ tsháu-tshì-á kah tsa̍p-tsháu tsiū bô lō͘-īng, ē suî-sî hō͘ lâng tsiù-tsó͘, tsuè-āu tsiū-sī pàng hué sio. 9 Só͘ thiàⁿ ê hiaⁿ-tī tsí-muē ah! guán sui-jiân án-ne kóng, m̄-koh guán khak-sìn lín ê tsîng-hîng pí guán só͘ kóng ê khah-hó, ē-tàng tit-kiù. 10 Siōng-Tsú m̄-sī bô kong-tō, it-tīng ē-kì-tit lín só͘ tsò ê kang-tsok, tsiū-sī lín uī-tio̍h I ê miâ kè-sio̍k teh ho̍k-bū sìn-tô͘ só͘ piáu-hiān ê thiàⁿ-sim. 11 Guá ài lín ta̍k-lâng tuì-thâu kàu-bué pó-tshî jia̍t-sim, hō͘ lín só͘ ǹg-bāng ê it-tshè lóng uân-tsuân si̍t-hiān. 12 M̄-thang pîn-tuāⁿ, tio̍h o̍h hiah-ê tuì sìn kah thun-lún lâi sîng-tsiap Siōng-Tsú ìng-ín ê lâng.

Siōng-Tsú Khak-si̍t ê Ìng-ún
13 Siōng-Tsú ìng-ín A-pik-la̍h-hán ê sî, kì-jiân bô pí I khah tuā ê thang kí lâi tsiù-tsuā, tsiū kí ka-kī pún-sin lâi tsiù-tsuā kóng, 14 " Guá it-tīng beh sù-hok lí, beh ke-thiⁿ kiáⁿ-sun hō͘ lí."( tsù: CSK 22:17) 15 A-pik-la̍h-hán gâu thun-lún, só͘-í ū tit-tio̍h Siōng-Tsú só͘ ìng-ín-.ê. 16 In-uī lâng sī kí pí ka-kī khah tuā ê lâi tsiù-tsuā, mā īng tsiù-tsuā tsò tam-pó lâi kái-kuat lâng kah lâng tiong-kan ê tsing-tsip. 17 Siōng-Tsú ài hiah-ê sîng-tsiap ìng-ín ê lâng khak-si̍t tsai I ê kè-uē bē kái-piàn, tsiah īng tsiù-tsuā lâi tsò pó-tsìng. 18 Siōng-Tsú ê ìng-ín kah tsiù-tsuā tsit nn̄g-hāng tāi-tsì lóng bē kái-piàn, in-uī I bē kóng pe̍h-tsha̍t, hō͘ lán tsiah-ê tô-phiah lâi kiû pó-hō͘ ê lâng tit-tio̍h tsin-tuā ê kó͘-lē lâi tshî-siú lán thâu-tsîng ê ǹg-bāng. 19 Lán uī tsit-ê ǹg-bāng, tshin-tshiūⁿ sèⁿ-miā ê tiàⁿ pha tī sìng-só͘ ê tiùⁿ-lî lāi, an-tsuân koh khó-khò. 20 Iâ-so͘ tsò lán ê sian-hong, í-king uī-tio̍h lán ji̍p-khì hia, tsiàu Bi̍k-ki-sé-tik ê pâi-pan sūn-sī tsiâⁿ-tsò íng-uán ê Tsè-si-tiúⁿ.