《巴克禮普世版聖經（試讀本）》

 | | | 轉寄

巴克禮普世版（試讀本） 希伯來書第七章

作者 巴克禮普世版小組 2016.06.26

Bi̍k-ki-sé-tik Tsè-si
1 Tsit-ê Bi̍k-ki-sé-tik sī Sat-líng-ông, mā sī tsì-kuân Siōng-Tsú ê tsè-si. A-pik-la̍h-hán thâi-iâⁿ lia̍t-ông tńg-lâi ê sî, Bi̍k-ki-sé-tik ū khì kā i gîng-tsiap koh kā i tsiok-hok. 2 A-pik-la̍h-hán ū tsiong it-tshè só͘ tit-tio̍h ê tsa̍p-hun tsi-it hō͘ i. (Bi̍k-ki-sé-tik tsit-ê miâ ê ì-sù sī "tsìng-gī ê ông", i koh sī Sat-líng-ông, tsit-ê miâ mā ū " pîng-an-ông" ê ì-sù.) 3 Bô Bi̍k-ki-sé-tik ê tso̍k-phó͘ thang tsai i ê pē-bú sī sím-mi̍h-lâng, mā bô tshut-sì kah sí-bông ê kì-tsài. I kah Siōng-Tsú ê Kiáⁿ kāng-khuán, kú-tn̂g teh tsò tsè-si. 4 Lín khuàⁿ, tsit-ê lâng ū juā-ni̍h uí-tāi! Liân lán ê sian-tsó͘ A-pik-la̍h-hán to tio̍h tsiong só͘ tit-tio̍h siōng-tíng ê mi̍h thiu tsa̍p-hun tsi-it hiàn hō͘ i. 5 Hiah-ê tam-tng tsè-si-tsit ê Lī-bī ê kiáⁿ-sun, sui-jiân kah Í-sik-lia̍t jîn-bîn lóng sī A-pik-la̍h-hán ê kiáⁿ-sun, pêⁿ-pêⁿ sī hiaⁿ-tī, iáu-koh tio̍h hōng bīng-līng tsiàu lu̍t-huat tuì jîn-bîn tsing-siu in siu-ji̍p ê tsa̍p-hun tsi-it. 6 Bi̍k-ki-sé-tik m̄-sī sio̍k Lī-bī ê sè-hē, m̄-koh i ū tuì A-pik-la̍h-hán the̍h tsa̍p-hun tsi-it, koh kā tit-tio̍h Siōng-Tsú ìng-ín ê A-pik-la̍h-hán tsiok-hok. 7 Sī-sè siū sī-tuā ê tsiok-hok sī lí-só͘ tong-jiân. 8 Hiah-ê tsing-siu tsa̍p-hun tsi-it ê lóng sī ē sí ê lâng, m̄-koh kāng-khuán ū siu tsa̍p-hun tsi-it ê Bi̍k-ki-sé-tik, Sìng-king tsìng-si̍t i iáu ua̍h-teh. 9 Án-ne lán mā thang kóng, liân kā jîn-bîn tsing-siu tsa̍p-hun tsi-it ê Lī-bī mā bat thong-kuè A-pik-la̍h-hán lâi la̍p tsa̍p-hun tsi-it. 10 In-uī Bi̍k-ki-sé-tik gîng-tsiap A-pik-la̍h-hán ê sî, Lī-bī iáu-buē tshut-sì, m̄-koh lán thang kóng i sī tī in tsó͘-sian A-pik-la̍h-hán ê sing-khu lāi-bīn. 11 Í-sik-lia̍t-lâng ê lu̍t-huat sī kin-kì Lī-bī-tso̍k ê tsè-si tsè-tō͘ pan-pò͘. Nā tuì tsit-ê tsè-tō͘ ē-tàng hō͘ lâng tit-tio̍h uân-tsuân, tsiū m̄-bián līng-guā koh siat-li̍p tsi̍t-ê Bi̍k-ki-sé-tik hē-thóng ê tsè-si, tse m̄-sī tsiàu A-lûn hē-thóng siat-li̍p-.ê. 12 Tsè-si tsè-tō͘ kì-jiân ū kái-piàn, lu̍t-huat mā tio̍h kái-piàn. 13 In-uī tsiah-ê tāi-tsì só͘ tsí Hit-uī sī sio̍k tī pa̍t-ê tsi-tso̍k, in m̄-bat ū-lâng tī tsè-tuâⁿ tsîng sū-hōng. 14 Lán ê Tsú bîng-bîng sī Iû-tāi tsi-tso̍k ê kiáⁿ-sun. Kuan-hē tsit-ê tsi-tso̍k, Mô͘-se m̄-bat thê-khí tsè-si ê tsit-hūn.

Līng-guā Tsi̍t-uī Tshin-tshiūⁿ Bi̍k-ki-sé-tik ê Tsè-si
15 Taⁿ guá teh kóng ê tāi-tsì koh-khah bîng-hián, in-uī līng-guā tsi̍t-uī tshin-tshiūⁿ Bi̍k-ki-sé-tik ê tsè-si í-king tshut-hiān. 16 Tsit-uī tsè-si m̄-sī kin-kì lâng ê kui-tsik á-sī tiâu-lē lâi siat-li̍p, sī tsiàu bē huí-huāi ê ua̍h-miā ê kuân-lîng. 17 In-uī Sìng-king ū án-ne tsò-tsìng kóng: Tsiàu Bi̍k-ki-sé-tik ê pâi-pan sūn-sī, Lí íng-uán tsò tsè-si.( tsù: SPh 110:4) 18 Kū ê tiâu-lē in-uī bô la̍t koh bô lō͘-īng, suah siū huì-tû. 19 Mô͘-se ê lu̍t-huat bô huat-tō͘ sîng-tsuân puàⁿ-hāng tāi-tsì. Līng-guā tsi̍t hong-bīn, koh-khah hó ê ǹg-bāng í-king tsún-pī hó-sè, hō͘ lán thang thong-kuè I lâi tshin-kīn Siōng-Tsú. 20 Tsit-hāng tāi-tsì mā ū Siōng-Tsú ê tsiù-tsuā lâi siat-li̍p. Lī-bī hē-thóng ê tsè-si siat-li̍p bô thong-kuè tsiù-tsuā. 21 Tsí-ū tsit-ê Iâ-so͘ siū siat-li̍p tsò tsè-si ū king-kuè tsiù-tsuā. Kā I siat-li̍p ê Siōng-Tsú ū tuì I kóng: Tsú kì-jiân tsiù-tsuā, bē kái-piàn sim-ì, Lí íng-uán tsò tsè-si.( tsù: SPh 110:4) 22 Tsiū-sī in-uī tsit-ê tsha-pia̍t, Iâ-so͘ tsiâⁿ-tsò koh-khah hó ê bîng-iok pó-tsìng-jîn. 23 Līng-guā ū tsi̍t-ê tsha-pia̍t: Lī-bī hē-thóng tsò tsè-si ê lâng tsin-tsē, in-uī sí-bông ê tsó͘-tòng suah bē-tàng kú-tn̂g tsò tsè-si. 24 Tsí-ū Iâ-so͘ m̄-bián tsiong tsè-si ê tsit kau hō͘ pa̍t-lâng, in-uī I íng-uán ua̍h-teh. 25 Só͘-í thong-kuè Iâ-so͘ lâi-kàu Siōng-Tsú bīn-tsîng ê lâng, I put-sî to ē-tàng kā in tsín-kiù, in-uī I íng-uán ua̍h-teh lâi thè in tuì Siōng-Tsú kî-kiû. 26 Tsit-tsióng ê tsè-si-tiúⁿ tú ha̍h lán ê su-iàu. I sī sìng-kiat, bô tsò pháiⁿ, bô lah-sap, tuì tsuē-jîn tiong-kan hun-pia̍t tshut-lâi, pī ko-sing kàu pí thiⁿ khah kuân. 27 I m̄ bián tshin-tshiūⁿ kî-tha ê tuā-tsè-si, tio̍h ta̍k-ji̍t tāi-sing uī-tio̍h ka-kī ê tsuē, āu-lâi koh uī-tio̍h jîn-bîn ê tsuē hiàn-tsè. I hiàn pún-sin tsò tsè, tsi̍t-pái tsiū uân-sîng. 28 Mô͘-se ê lu̍t-huat siat-li̍p bô uân-tsuân ê lâng tsò tsè-si-tiúⁿ, m̄-koh ū lu̍t-huat liáu-āu, Siōng-Tsú īng tsiù-tsuā lâi siat-li̍p I ê Kiáⁿ íng-uán tsò uân-tsuân ê tsè-si-tiúⁿ.