《巴克禮普世版聖經（試讀本）》

 | | | 轉寄

巴克禮普世版（試讀本） 希伯來書第十三章

作者 巴克禮普世版小組 2016.08.07

Siōng-Tsú Só͘ Kah-ì ê Ho̍k-sāi
1 Lín tio̍h tshin-tshiūⁿ hiaⁿ-tī tsí-muē kè-sio̍k sio-thiàⁿ. 2 M̄-thang bē kì-tit tsiap-thāi tshut-guā-lâng, in-uī án-ne tsò ē tī bô-ì-tiong tsiap-thāi-tio̍h thiⁿ-sài. 3 Tio̍h kuan-huâi hiah-ê siū kuaiⁿ-kaⁿ ê lâng, tshin-tshiūⁿ kah in tâng kuaiⁿ-kaⁿ. Tio̍h kuan-huâi hiah-ê siū gi̍k-thāi ê lâng, tshin-tshiūⁿ lín mā teh siū gi̍k-thāi. 4 Tāi-ke tio̍h tsun-tiōng hun-in, hu-tshe tio̍h hō͘-siōng tiong-si̍t, in-uī Siōng-Tsú ē sím-phuàⁿ su-thong kiâⁿ-îm ê lâng. 5 Tsò-lâng m̄-thang tham tsâi, ka-kī só͘ ū ê tio̍h ti-tsiok, in-uī Siōng-Tsú ū kóng, "Guá tsua̍t-tuì bē pàng-sak lí, tsua̍t-tuì bē lī-khui lí."( tsù: SBK 31:6; CSK 28:15) 6 Só͘-í lán ē-tàng hó-táⁿ kóng: Tsú sī guá ê pang-tsō͘. Guá bô kiaⁿ-hiâⁿ lâng tuì guá án-tsuáⁿ?( tsù: SPh 118:6) 7 Tio̍h siàu-liām tsîng ín-tshuā lín, thuân Siōng-Tsú ê hok-im hō͘ lín ê lâng, tsim-tsiok khuàⁿ in hîng-uî ê kiat-kio̍k, lâi ha̍k-si̍p in ê sìn-gióng. 8 Iâ-so͘ Ki-tok kuè-khì kàu kin-á-ji̍t, it-ti̍t kàu íng-uán lóng bē kái-piàn. 9 Lín m̄-thang hō͘ ta̍k-khuán kî-īⁿ ê kàu-gī tshuā khì bê-lō͘, in-uī sim-lîng khah-hó sī khò Siōng-Tsú ê un-tián lâi kian-kò͘. M̄-thang khò hiah-ê tsia̍h-mi̍h kui-kí, in-uī tsun-siú tsia̍h-mi̍h kui-kí ê lâng pīng bô tit-tio̍h lī-ik. 10 Lán ū lán ê tsè-tuâⁿ, tī huē-bō͘ ho̍k-sāi ê Iû-thài tsè-si bô kuân thang tsia̍h lán tsè-tuâⁿ-tíng ê tsè-mi̍h. 11 Iû-thài-lâng ê tsè-si-tiúⁿ tuà tsing-seⁿ ê hueh ji̍p-khì Tsì-sìng-só͘ lâi sio̍k tsuē, khiok kā tsing-seⁿ ê sin-thé tī iâⁿ-guā sio-tiāu. 12 Só͘-í uī-tio̍h beh īng ka-kī ê hueh hō͘ tsìng-lâng tsiâⁿ-tsò sìng-kiat, Iâ-so͘ mā tī iâⁿ-guā siū-khó͘ lâi hi-sing. 13 Án-ne lán mā tio̍h tshut-khì iâⁿ-guā kah I tsò-hué jím-siū lîng-jio̍k. 14 In-uī tī tē-tsiūⁿ lán bô íng-kú ê siâⁿ, lán sī teh tshuē hit-ê teh-beh lâi ê siâⁿ. 15 Só͘-í lán tio̍h thong-kuè Iâ-so͘ kè-sio̍k īng o-ló ê tsè hiàn hō͘ Siōng-Tsú. Tse tsiū-sī kong-khai sîng-jīn Tsú ê miâ ê lâng ê tshuì-tûn só͘ kiat ê kué-tsí. 16 Tio̍h ē-kì-tit tsò hó-sū kah hō͘-siōng pang-tsō͘, in-uī tse sī Siōng-Tsú só͘ huaⁿ-hí ê tsè-mi̍h. 17 Tio̍h sūn-ho̍k ín-tshuā lín ê lâng, tio̍h thiaⁿ in ê uē, in-uī in put-sî teh khuàⁿ-kò͘ lín ê lîng-hûn thang tuì Siōng-Tsú ū kau-tài. Lín tio̍h hō͘ in huaⁿ-hí lâi kang-tsok. Nā bô in ē líng-sim thó͘-khuì, án-ne tuì lín bô lī-ik. 18 Lín tio̍h kè-sio̍k uī guán kî-tó. Guán khak-sìn ka-kī ū tshing-pi̍k ê liông-sim, ta̍k-hāng tāi-tsì ài beh kiâⁿ tsìng-ti̍t ê lō͘. 19 Guá koh-khah khún-kiû lín uī guá kî-tó, hō͘ guá thang khah kín koh khì lín hia.

Tsiok-hok kah Tsuè-āu ê Tshíng-an
20 Taⁿ Siōng-Tsú hō͘ lán ê Tsú Iâ-so͘ koh ua̍h khí-lâi. Thong-kuè Iâ-so͘ só͘ lâu ê hueh lâi khak-li̍p íng-uán ê bîng-iok, hō͘ Iâ-so͘ tsiâⁿ-tsò ín-tshuā iûⁿ-kûn ê Tuā-bo̍k-tsiá. 21 Guān sù pîng-an ê Siōng-Tsú siúⁿ-sù lín ta̍k-hāng hó tāi-tsì lâi tsun-hîng I ê tsí-ì. Guān I thong-kuè Iâ-so͘ Ki-tok tī lán ê sim-lāi tsò tāi-tsì lâi hō͘ I huaⁿ-hí. Guān îng-kng kui tī Ki-tok kàu tāi-tāi bô suah. Amen. 22 Hiaⁿ-tī tsí-muē ah, guá siá té-té ê phue hō͘ lín, khǹg lín nāi-sim thiaⁿ guá khuàn-bián ê uē. 23 Guá ài pò lín tsai, lán ê hiaⁿ-tī Thê-mô͘-thài í-king tshut kaⁿ. I nā khah kín lâi, guá ē kiò i kah guá tsò-hué khì lín hia. 24 Tshiáⁿ lín thè guán kā hiah-ê ín-tshuā lín ê lâng kah tsìng sìng-tô͘ tshíng-an. Tuì Ì-tāi-lī lâi ê sìn-tô͘ mā beh kā lín tshíng-an. 25 Guān Siōng-Tsú ê un-tián kah lín tsìng-lâng tông-tsāi.Amen.