《巴克禮普世版聖經（試讀本）》

 | | | 轉寄

巴克禮普世版（試讀本） 希伯來書第十二章

作者 巴克禮普世版小組 2016.07.31

Lán ê Thiⁿ-Pē Siōng-Tsú
1 Kì-jiân ū hiah-tsē kiàn-tsìng-jîn tshin-tshiūⁿ hûn kā lán pau-uî teh, lán tio̍h pâi-tû it-tshè ê tsó͘-gāi kah it-ti̍t kā lán tîⁿ-puàⁿ ê tsuē, kian-jím pháu-tsáu lán thâu-tsîng ê lō͘-tsām. 2 Tio̍h tsù-sîn khuàⁿ Iâ-so͘. I sī lán sìn-gióng ê kin-guân kah bo̍k-phiau. I uī-tio̍h pâi tī I thâu-tsîng ê khuài-lo̍k, bô kā lîng-jio̍k khuàⁿ tsāi gán-lāi, jím-siū si̍p-jī-kè-tíng ê khó͘-lān. Taⁿ I tsē tī Siōng-Tsú pó-tsō ê tsiàⁿ-pîng. 3 Lín tio̍h siūⁿ I ê king-li̍k, I jím-siū tsuē-jîn tuì I ê hîng-gi̍k, án-ne lín tsiah bē kha-tshiú-nńg lâi ià-siān. 4 Lín kah tsuē-ok tò͘-tsing iáu-buē tí-khòng kàu lâu hueh ê thîng-tō͘. 5 Lín kám bē kì-tit Siōng-Tsú kā lín tòng-tsò kiáⁿ lâi khuàn-bián ê uē án-ne kóng: Guá ê kiáⁿ ah, Tsú ê kíng-kài m̄-thang khuàⁿ-khin, hō͘ I tsik-pī m̄-thang sit-tsì. 6 In-uī Tsú kuán-kà I só͘ thiàⁿ ê, piⁿ phah I só͘ tsiap-la̍p ê kiáⁿ-jî.( tsù: TsG 3:11-12) 7 Lín tio̍h jím-siū kuán-kà. Siōng-Tsú khuán-thāi lín tshin-tshiūⁿ kiáⁿ-jî. Kám ū kiáⁿ-jî bô siū pē-bú ê kuán-kà? 8 Lín nā bô kah kî-tha ê kiáⁿ-jî kāng-khuán siū kuán-kà, tsiū-sī su-sing-tsú, m̄-sī tsin-tsiàⁿ ê kiáⁿ-jî. 9 Lán ū tsun-tiōng sè-kan ê pē-bú kā lán kuán-kà, hô-hòng sio̍k-lîng ê Thiⁿ-Pē kā lán kuán-kà, kám m̄-sī koh-khah tio̍h sūn-ho̍k lâi tit-tio̍h ua̍h-miā? 10 Sè-kan ê pē-bú tsiām-sî-kú tsiàu ka-kī ê ì-sù lâi kā lán kuán-kà, m̄-koh Siōng-Tsú ê kuán-kà sī beh hō͘ lán tit-tio̍h lī-ik, hō͘ lán ū hūn tī I ê sìng-kiat. 11 Lán ta̍k-pái siū kuán-kà lóng kám-kak bô huaⁿ-hí koh iu-būn, m̄-koh king-kuè kuán-kà ê thuàn-liān liáu-āu ē kiat-tshut pîng-an ê kué-tsí, kuè tsìng-ti̍t ê sing-ua̍h.

Kà-sī kah Kíng-kài
12 Só͘-í lín tsiah-ê kha-sng tshiú-nńg ê lâng tio̍h hō͘ i ióng-kiāⁿ khí-lâi. 13 Tio̍h uī lín ê kha tsún-pī ti̍t-ti̍t ê lō͘, bián-tit pái-kha-.ê uai-tshua̍h, tian-tò hō͘ i tit-tio̍h i-hó. 14 Tio̍h ló͘-li̍k kah tsìng-lâng hô-bo̍k lâi kuè sìng-kiat ê sing-ua̍h, nā bô bô-lâng ē-tàng kìⁿ-tio̍h Tsú. 15 Tio̍h kín-sīn tsiah bián-tit ū-lâng sit-lo̍h Siōng-Tsú ê un-tián, mā tsiah bián-tit ū to̍k-tsháu huat khí-lâi hō͘ tsin-tsē lâng siū ù-jiám. 16 Mā tsiah bián-tit ū-lâng îm-luān bô kìng-khiân, tshin-tshiūⁿ Í-sò uī-tio̍h tsi̍t-tiám-á tsia̍h-mi̍h tshut-bē tuā-kiáⁿ ê bîng-hūn. 17 Lín tsai, i āu-lâi ài-beh niá-siū tsiok-hok ê sî hō͘ lāu-pē kī-tsua̍t, in-uī i tshuē bô pān-huat lâi kái-piàn lāu-pē sim-ì, sui-jiân lâu ba̍k-sái pik-tshiat kî-kiû, mā bē-tàng tit-tio̍h tsiok-hok. 18 Lín m̄-sī tshiūⁿ Í-sik-lia̍t-lâng lâi-kàu bong ē-tio̍h ê Se-nái-suaⁿ, tī hia ū hué-iām, ba̍t hûn, o͘-àm kah tuā-hong, 19 koh ū la-pa ê hiáng-siaⁿ kah kóng-uē ê siaⁿ. Thiaⁿ-tio̍h ê lâng khún-kiû Siōng-Tsú mài koh tuì in kóng-uē, 20 in-uī in bē-tàng jím-siū bīng-līng ê uē án-ne kóng, "Liân tsáu-siù nā kha̍p-tio̍h suaⁿ, mā tio̍h īng tsio̍h-thâu tìm sí."( tsù: CAK 19:12-13) 21 Hit-ê kíng-siōng hui-siông thang kiaⁿ, tì-kàu Mô͘-se kóng, "Guá kiaⁿ kah phi̍h-phi̍h-tshuah." 22 M̄-koh lín sī lâi Sik-an-suaⁿ, íng-ua̍h Siōng-Tsú ê siâⁿ, thiⁿ-tíng ê Iâ-lō͘-sat-líng, tī hia ū tshing-tshing bān-bān ê thiⁿ-sài. 23 Lín lâi-kàu thâu-tsi̍t-phue Ki-tok-tô͘ ū miâ kì tī thiⁿ-tíng ê tuā-kiáⁿ tsū-huē kah gī-huē ê só͘-tsāi. Lín lâi-kàu sím-phuàⁿ bān-bîn ê Siōng-Tsú bīn-tsîng. Lín lâi-kàu í-king sîng-tsuân ê gī-lâng ê lîng-hûn hia. 24 Lín lâi-kàu sin bîng-iok ê tiong-pó Iâ-so͘ bīn-tsîng kah só͘ hiù ê hueh hia. Tsit-ê hueh pí A-pik ê hueh só͘ piáu-ta̍t ê koh-khah hó. 25 Tio̍h kín-sīn, m̄-thang kī-tsua̍t tuì lín kóng-uē ê Hit-uī. Hiah-ê tī tē-tsiūⁿ kī-tsua̍t tuì in kíng-kài Hit-uī ê lâng to bē-tàng tô-siám tsuē, hô-hòng lán kī-tsua̍t tuì thiⁿ-tíng lâi kíng-kài lán ê Hit-uī? 26 Hit-sî I ê siaⁿ hō͘ tē iô-tāng, m̄-koh taⁿ I ū ìng-ín kóng, "Guá m̄-nā koh tsi̍t-pái beh hō͘ tē iô-tāng, mā beh hō͘ thiⁿ iô-tāng."( tsù: CAK 19:18) 27 Hit-kù "beh koh tsi̍t-pái" sī tsí-bîng hiah-ê siū-tsō ê mi̍h siū iô-tāng, beh siū tshian-suá, hō͘ hiah-ê bô siū iô-tāng ê kú-tn̂g lâu lo̍h-lâi. 28 Só͘-í lán tio̍h kám-siā, in-uī lán ū tit-tio̍h hit-ê bē iô-tāng ê kok-tō͘. Lán tio̍h tsiàu Siōng-Tsú só͘ huaⁿ-hí ê, īng khiân-sîng kah kìng-uì ê sim lâi ho̍k-sāi Siōng-Tsú, 29 in-uī lán ê Siōng-Tsú si̍t-tsāi sī huí-bia̍t ê hué.