《巴克禮普世版聖經（試讀本）》

 | | | 轉寄

巴克禮普世版（試讀本） 雅各書第二章

作者 巴克禮普世版小組 2016.08.21

M̄-thang Ū Phian-kiàn
1 Tshin-ài ê hiaⁿ-tī tsí-muē, lín kì-jiân sìn lán îng-kng ê Tsú Iâ-so͘ Ki-tok to̍h m̄-thang īng guā-māu lâi tshú lâng. 2 Nā ū hó-gia̍h-lâng kuà kim tshiú-tsí, tshīng suí saⁿ ji̍p-lâi lín ê huē-tn̂g, koh ū tshīng phuà-saⁿ ê sàn-tshiah-lâng ji̍p-lâi, 3 lín kan-taⁿ tsù-ì hit-ê tshīng suí saⁿ ê lâng tuì i kóng, "Tshiáⁿ lí lâi tsē tuā-uī. " Khiok tuì hit-ê sàn-tshiah-lâng kóng, "Lí khiā tiàm hia." á-sī kóng, "Tsē guá ê kha-ta̍h piⁿ-á." 4 Án-ne lín kám m̄-sī ū phian-sim, īng pháiⁿ liām-thâu lâi teh phuàⁿ-tuàn lâng? 5 Tshin-ài ê hiaⁿ-tī tsí-muē, lín tio̍h thiaⁿ! Siōng-Tsú ū kíng sè-kan ê sàn-tshiah-lâng, hō͘ in tī sìn-gióng-siōng hù-tsiok lâi sîng-tsiap I só͘ ìng-ín beh hō͘ thiàⁿ I ê lâng ê kok-tō͘. 6 M̄-koh lín khuàⁿ-khin sàn-tshiah-lâng. Kî-si̍t kā lín khi-ap koh thua lín khì huat-tîng ê kám m̄-sī hiah-ê hó-gia̍h-lâng? 7 Huí-pòng Siōng-Tsú siúⁿ-sù lín tsun-kuì ê miâ kám m̄-sī kāng-khuán hiah-ê lâng? 8 Lín nā tsun-siú Sìng-king só͘ kì-tsài: Tio̍h thiàⁿ tshù-piⁿ tshin-tshiūⁿ ka-kī( tsù: LBK 19:18) hit-ê Siōng-Tsú kok-tō͘ ê lu̍t-huat, án-ne tsiū tio̍h. 9 M̄-koh lín nā īng guā-māu lâi tshú lâng tsiū-sī huān-tsuē, ē siū lu̍t-huat tīng-tsuē. 10 Lâng nā bô tsun-siú lu̍t-huat tiong ê tsi̍t tiâu, tsiū-sī bô tsun-siú tsuân-pō͘ ê lu̍t-huat. 11 In-uī bīng-līng " M̄-thang kan-îm" ê Hit-uī mā kóng," M̄-thang thâi-sí lâng".( tsù: CAK 20:13, 15 LXX; SBK 5:17-18) Sui-jiân bô huān kan-îm, nā-sī thâi-sí lâng tsiū sǹg-tsò huān-tio̍h lu̍t-huat ê lâng. 12 Lín kì-jiân beh tsiàu ē hō͘ lâng tsū-iû ê lu̍t-huat lâi siū sím-phuàⁿ, tio̍h tsiàu lu̍t-huat lâi kóng-uē, lâi kiâⁿ-ta̍h. 13 In-uī nā bô īng tsû-pi tuì-thāi lâng, tī sím-phuàⁿ ê sî Siōng-Tsú mā bē īng tsû-pi tuì-thāi i. Tsû-pi iâⁿ-kuè sím-phuàⁿ.

Sìn-gióng Kah Hîng-uî
14 Tshin-ài ê hiaⁿ-tī tsí-muē, sìn-gióng nā bô si̍t-hiān, ū sím-mi̍h lī-ik? Tsit-tsióng sìn-gióng kám ē-tàng kiù i? 15 Lín tiong-kan nā ū hiaⁿ-tī á-sī tsí-muē bô saⁿ thang tshīng, bô pn̄g thang tsia̍h, 16 Lín kan-taⁿ tuì in kóng, "Tsiok lín pîng-an, tio̍h tshīng hō͘ sio, tsia̍h hō͘ pá!" Nā bô hō͘ in sing-khu só͘ su-iàu ê mi̍h-kiāⁿ, án-ne ū sím-mi̍h lō͘-īng? 17 Sìn-gióng nā bô hîng-tōng tsiū-sī sí-.ê. 18 Kiám-tshái ū-lâng ē kóng, "Lí ū sìn-gióng, guá ū hîng-tōng." Guá ē ìn-kóng, "Lí hō͘ guá khuàⁿ bô hîng-tōng ê sìn-gióng, guá tsiū īng hîng-tōng hō͘ lí khuàⁿ guá ê sìn-gióng." 19 Lí sìn Siōng-Tsú tsí-ū tsi̍t-uī, án-ne sī tio̍h. Liân hiah-ê kuí mā sìn, koh kiaⁿ kah phi̍h-phi̍h-tshuah. 20 Phòng-hong koh hàm-kó͘ ê lâng, lí ài tsai bô? Bô hîng-tōng ê sìn-gióng lóng bô lō͘-īng. 21 Lán ê tsó͘-sian A-pik-la̍h-hán hiàn i ê kiáⁿ Í-sat tī tuâⁿ-tíng, kám m̄-sī tuì tsit-ê hîng-tōng lâi hō͘ Siōng-Tsú kā i kiò-tsò gī-lâng? 22 Khó-kiàn i ê sìn-gióng kah hîng-tōng tsò-hué tsìn-hîng, i ê sìn-gióng sī thong-kuè hîng-tōng lâi uân-sîng. 23 Tse sī ìng-giām Sìng-king só͘ kóng: A-pik-la̍h-hán sìn Siōng-Tsú, tsiū án-ne Siōng-Tsú kā i tsiap-la̍p tsò gī-lâng,( tsù: CSK 15:6) i mā kiò-tsò Siōng-Tsú ê pîng-iú. 24 Khó-kiàn, lâng tit-tio̍h kiò-tsò gī-lâng sī tuì hîng-tōng, m̄-sī kan-taⁿ tuì sìn-gióng. 25 Ki-lí Lat-ha̍p tsiap-la̍p Iû-thài-lâng ê sù-tsiá, hō͘ in tuì pa̍t-tiâu lō͘ tshut-khì, kám m̄-sī kāng-khuán tuì hîng-tōng lâi tit-tio̍h kiò-tsò gī-lâng? 26 Tú tshin-tshiūⁿ sing-khu nā bô lîng-hûn tsiū-sī sí-khì, sìn-gióng nā bô hîng-tōng mā sī sí-khì.