《巴克禮普世版聖經（試讀本）》

 | | | 轉寄

巴克禮普世版（試讀本） 雅各書第三章

作者 巴克禮普世版小組 2016.08.28

Khòng-tsè Tshuì-tsi̍h
1 Tshin-ài ê hiaⁿ-tī tsí-muē, lín tiong-kan m̄-thang tsin-tsē lâng tsò kàu-su, in-uī lín tsai tsò kàu-su ê lâng ē siū khah giâm-keh ê sím-phuàⁿ. 2 In-uī lán tāi-ke tiāⁿ-tiāⁿ huān tsin-tsē tshò-gō͘. Tī kóng-uē bô tshò-gō͘ tsiū-sī uân-tsuân ê lâng, mā ē-hiáu khòng-tsè ka-kī. 3 Lán īng bé-kā-kiuⁿ tàu tī bé ê tshuì hō͘ in sūn-ho̍k, tsiū ē-tàng khòng-tsè kui-tsiah bé. 4 Koh khuàⁿ, tsûn sui-jiân hiah-tuā tsiah, hō͘ tuā-hong sàu, kan-taⁿ īng tsi̍t-ki sè-sè ê tuā lâi khòng-tsè, sái-tsûn ê tsûn-tiúⁿ tsiū ē-tàng tsiàu ka-kī ê ì-sù sái-kàu bo̍k-tik-tē. 5 Tshin-tshiūⁿ án-ne, tshuì-tsi̍h sī sè-sè ê khì-kuan iáu-koh kóng tuā-uē. Lí khuàⁿ, tsi̍t-tiám-á ê hué-tsheⁿ ē hō͘ kui-ê tshiū-nâ lóng sio-khì. 6 Tsi̍h-thâu kah-ná tsi̍t-pé hué, tī lán pah-thé tiong-kan sī siâ-ok ê sè-kài, kā kui sing-khu ù-jiám. Tsit-ê tuì tē-ga̍k huat-tshut ê hué ē kā lán it-sing ê tsîng-tô͘ huí-bia̍t. 7 Jîn-luī ē-tàng tsè-ap ta̍k-tsióng ê tsáu-siù, pue-tsiáu, thâng-thuā kah tsuí-tso̍k. Kî-si̍t mā í-king lóng hō͘ jîn-luī tsè-ap. 8 M̄-koh bô-lâng ē-tàng tsè-ap tsi̍h-thâu. Tsi̍h-thâu sī bô-lâng tsè-ap ē-tiâu ê siâ-ok, tshiong-muá tì-miā ê to̍k. 9 Lán īng tshuì-tsi̍h o-ló lán ê Thiⁿ-Pē Siōng-Tsú, mā īng tshuì-tsi̍h tsiù-tsó͘ tsiàu Siōng-Tsú ê hîng-siōng lâi tshòng-tsō ê lâng. 10 O-ló kah tsiù-tsó͘ tuì kāng tsi̍t-ê tshuì-tsi̍h tshut. Tshin-ài ê hiaⁿ-tī tsí-muē, tse sī bô ing-kai. 11 Tuì kāng tsi̍t-ê tsuí-tsuâⁿ kám ē lâu-tshut tiⁿ-ê kah khó͘-ê tsuí? 12 Tshin-ài ê hiaⁿ-tī tsí-muē, bû-hua-kó-tshiū kám ē seⁿ kan-ná? Phû-tô-tshiū kám ē seⁿ bû-hua-kó? Án-ne kiâm-ê tsuí-guân mā bē lâu-tshut tsiáⁿ-tsuí!

Tuì Siōng-Tsú Lâi ê Tì-huī
13 Lín tiong-kan siáⁿ-lâng ū tì-huī kah kiàn-sik? Nā ū, tio̍h īng tshiong-muá tì-huī ê un-jiû tī sing-ua̍h-tiong piáu-hiān hó phín-hīng. 14 Lín sim-lāi nā ū ok-to̍k ê uàn-tò͘ kah sio-tseⁿ, tsiū m̄-thang khua-kháu, m̄-thang kóng pe̍h-tsha̍t lâi uî-puē tsin-lí. 15 Tsit-khuán ê tì-huī m̄-sī tuì thiⁿ-tíng lâi-.ê, sī sio̍k tī sè-kan, sio̍k tī hiat-khì, sio̍k tī Mô͘-kuí-.ê. 16 In-uī ū uàn-tò͘ kah sio-tseⁿ ê só͘-tsāi tsiū ū jiáu-luān kah it-tshè ê siâ-ok. 17 Tuì tíng-bīn lâi ê tì-huī, tē-it sī sûn-kiat, koh-lâi sī hô-pîng, un-jiû, iú-siān, tsû-pi, kiat hó-tik-hīng ê kué-tsí, bô phian-kiàn mā bô guī-siān. 18 Kong-gī sī hô-pîng só͘ kiat ê kué-tsí, sī tshiok-tsìn hô-pîng ê lâng iā ê tsìng-tsí só͘ sán-sing-.ê.