《巴克禮普世版聖經（試讀本）》

 | | | 轉寄

巴克禮普世版（試讀本） 約翰一書第一章

作者 巴克禮普世版小組 2016.11.14

Ua̍h-miā ê Tō
1 Guán beh lâi siá kuan-hē ua̍h-miā ê Tō kā lín suat-bîng. Tsit-ê Tō tuì guân-khí-thâu to̍h tsûn-tsāi. Guán ū thiaⁿ-tio̍h, tshin-ba̍k khuàⁿ-tio̍h, ū siông-sè kuan-khuàⁿ, mā ū tshin-tshiú bong-tio̍h. 2 Tsit-ê ua̍h-miā í-king tshut-hiān, guán ū khuàⁿ-tio̍h, tsit-má lâi tsò kiàn-tsìng, mā pò lín tsai hit-ê íng-uán ê ua̍h-miā pún-lâi to̍h kah Thiⁿ-Pē tông-tsāi, taⁿ tuì guán hián-hiān. 3 Guán tsiong só͘ khuàⁿ-tio̍h kah só͘ thiaⁿ-tio̍h ê thuân-pò hō͘ lín tsai, thang hō͘ lín kah guán ū thuân-khè ê kuan-hē. Tsit-ê thuân-khè sī guán kah Thiⁿ-Pē í-ki̍p I ê Kiáⁿ Iâ-so͘ Ki-tok tiong-kan ê thuân-khè. 4 Guán siá tsiah-ê tāi-tsì hō͘ lín, sī beh hō͘ lán tāi-ke tshiong-muá hí-lo̍k.

Siōng-Tsú sī Kng
5 Taⁿ guán tsiong tuì Siōng-Tsú ê Kiáⁿ thiaⁿ-tio̍h ê uē thuân hō͘ lín ê sìn-sit sī án-ne: Siōng-Tsú sī kng, tī I uân-tsuân bô o͘-àm. 6 Lán nā kóng lán kah Siōng-Tsú ū thuân-khè kuan-hē, iáu-koh kè-sio̍k tī o͘-àm-tiong sing-ua̍h, sī teh kóng pe̍h-tsha̍t, bô tsiàu tsin-lí teh kiâⁿ. 7 M̄-koh lán nā tī kng-bîng-tiong sing-ua̍h, tshin-tshiūⁿ Siōng-Tsú tī kng-bîng-tiong, lán tsiū hō͘-siōng ū thuân-khè kuan-hē, I ê Kiáⁿ Iâ-so͘ ê hueh mā ē kè-sio̍k sé-tû lán it-tshè ê tsuē. 8 Lán nā kóng ka-kī bô tsuē, sī teh khi-phiàn ka-kī, lán ê sim-lāi bô tsin-lí. 9 Lán nā sîng-jīn lán ê tsuē, Siōng-Tsú sī tsin-si̍t koh kong-gī, I ē sià-bián lán ê tsuē, sé-tû lán it-tshè ê put-gī. 10 Lán nā kóng m̄-bat huān-tsuē, sī kā Siōng-Tsú khuàⁿ-tsò kóng pe̍h-tsha̍t, I ê tō-lí bô tī lán ê sim-lāi.