《巴克禮普世版聖經（試讀本）》

 | | | 轉寄

巴克禮普世版（試讀本） 彼得後書第三章

作者 巴克禮普世版小組 2016.11.07

Tsú Tsài-lîm ê Ìng-ún
1 Tshin-ài ê hiaⁿ-tī tsí-muē, guá tsit-má siá hō͘ lín ê sī tē-jī-tiuⁿ phue. Tsit nn̄g-tiuⁿ phue lóng sī beh kā lín thê-tshéⁿ, kik-lē lín sûn-kiat ê sim-tsì. 2 Guá ài lín ē-kì-tit sîn-sìng sian-ti ī-giân ê uē í-ki̍p Kiù-Tsú thong-kuè sù-tô͘ thuân hō͘ lín ê bīng-līng. 3 Siōng iàu-kín lín tio̍h tsai, tī bua̍t-ji̍t ū tsi̍t-kuá hòng-tshiòng su-io̍k ê lâng tshut-hiān, kā lín thí-tshiò, 4 kóng, "Tsú ìng-ín beh tsài-lîm, taⁿ tī tó-uī? Lán ê tsó͘-sian lóng sí-khì à, m̄-koh tuì tshòng-tsō ú-tiū í-lâi it-tshè lóng kāng-khuán." 5 Hiah-ê lâng tiâu-kò͘-ì bē kì-tit tsit-ê sū-si̍t, tsiū-sī tsū-tsá tuì Siōng-Tsú ê uē tshòng-tsō thiⁿ, tē tuì tsuí mā īng tsuí lâi hîng-sîng. 6 Tong-sî ê sè-kài hō͘ tuā-tsuí siau-bia̍t. 7 M̄-koh tsiah-ê thiⁿ kah tē mā-sī tuì Siōng-Tsú ê uē pó-liû lo̍h-lâi, ti̍t-kàu hiah-ê bô kìng-khiân ê lâng siū sím-phuàⁿ kah hō͘ hué sio bia̍t-bông ê ji̍t-tsí. 8 Tshin-ài ê hiaⁿ-tī tsí-muē, ū tsi̍t-hāng tāi-tsì tshiáⁿ lín m̄-thang bē kì-tit, tsiū-sī Tī Tsú ê gán-tiong, tsi̍t ji̍t kah-ná tsi̍t-tshing nî, tsi̍t-tshing nî kah-ná tsi̍t ji̍t. 9 Ū-lâng siūⁿ-kóng Tsú teh iân-tshiân I ê ìng-ín. Kî-si̍t sī teh khuan-iông lín, I bô ài ū-lâng bia̍t-bông, sī ài ta̍k-lâng lóng hué-kái. 10 M̄-koh Tsú tsài-lîm ê ji̍t ē tshin-tshiūⁿ tsha̍t-á hut-jiân lîm-kàu. Hit ji̍t hiah-ê thiⁿ ē tī tuā ê hiáng-siaⁿ-tiong siau-bia̍t, hiah-ê thian-thé hō͘ hué sio iûⁿ-khì, tē kah kî-tiong ê bān-bu̍t mā lóng huí-bia̍t khì. 11 Bān-bu̍t kì-jiân ē án-ne siau-bia̍t, lín tio̍h án-tsuáⁿ tsò-lâng? Lín ê sing-ua̍h tio̍h sìng-kiat koh kìng-khiân, 12 lâi thìng-hāu Siōng-Tsú ê ji̍t kuáⁿ-kín kàu. Tī hit ji̍t, tsiah-ê thiⁿ ē hō͘ hué siau-bia̍t, thian-thé ē hō͘ hué sio-iûⁿ khì. 13 M̄-koh lán teh thìng-hāu ê sī Siōng-Tsú só͘ ìng-ín ê sin thiⁿ kah sin tē, tī hia ū íng-uán ê kong-gī. 14 Só͘-í, tshin-ài ê hiaⁿ-tī tsí-muē, lín kì-jiân teh thìng-hāu tsiah-ê tāi-tsì, tio̍h tī Siōng-Tsú ê bīn-tsîng tsīn-la̍t tui-kiû sìng-kiat, kuè bô khuat-tiám ê sing-ua̍h, thang kah I hô-hó. 15 Tio̍h tsiong lán ê Tsú ê khuan-iông khuàⁿ-tsò tsín-kiù ê ki-huē. Lán tshin-ài ê hiaⁿ-tī Pó-lô īng Siōng-Tsú siúⁿ-sù hō͘ i ê tì-huī siá phue hō͘ lín mā ū án-ne kóng. 16 I só͘-ū ê phue lóng ū thê-khí tsiah-ê tāi-tsì. I ê phue ū tsi̍t-kuá oh-tit liáu-kái ê só͘-tsāi hō͘ hiah-ê bô ha̍k-būn kah bô tīng-sìng ê lâng khiok-kái, tshin-tshiūⁿ in khiok-kái kî-tha ê king-bûn. Kiat-kó in ka-kī tsū-thó bia̍t-bông. 17 Tshin-ài ê hiaⁿ-tī tsí-muē, án-ne lín kì-jiân tāi-sing tsai tsiah-ê tāi-tsì, tio̍h kíng-kài tsiah bián-tit hō͘ hiah-ê pháiⁿ-lâng īng tshò-gō͘ ê giân-lūn tshuā lín kiâⁿ-ji̍p bê-lō͘, lâi sit-lo̍h lín kian-kò͘ ê sìn-gióng. 18 Tio̍h uá-khò lán ê Kiù-Tsú Iâ-so͘ Ki-tok ê un-tián, lâi hō͘ lán tuì I ê jīn-bat kè-sio̍k tsìn-pō͘. Guān îng-kng kui hō͘ I, tuì tsit-má ti̍t-kàu íng-uán! Amen!