《巴克禮普世版聖經（試讀本）》

 | | | 轉寄

巴克禮普世版（試讀本） 約翰一書第四章

作者 巴克禮普世版小組 2016.12.05

Tsin kah Ké ê Sîn-lîng
1 Tshin-ài ê hiaⁿ-tī tsí-muē, m̄-thang siong-sìn só͘-ū ê sîn-lîng, tio̍h tsa-giām sī-m̄-sī tuì Siōng-Tsú lâi-.ê, in-uī ū tsin-tsē ké-sian-ti tshut-hiān tī tsit sè-kan. 2 Lín ē-tàng īng ē-bīn ê hong-huat lâi hun-pia̍t sī-m̄-sī Siōng-Tsú ê Sìng-Sîn: Kong-khai sîng-jīn Iâ-so͘ Ki-tok tō-tsiâⁿ-jio̍k-thé lîm-kàu tsit sè-kan hit-ê sîn-lîng tsiū-sī tuì Siōng-Tsú lâi-.ê. 3 M̄ kong-khai sîng-jīn Iâ-so͘ ê sîn-lîng m̄-sī tuì Siōng-Tsú lâi. Tse mā sī kah Ki-tok tuì-ti̍k ê sîn-lîng. Lín ū thiaⁿ-tio̍h tsit-ê sîn-lîng teh-beh lâi, kî-si̍t tsit-má í-king lâi tī sè-kan à. 4 Sè-kiáⁿ, lín sī sio̍k Siōng-Tsú, koh í-king iâⁿ-kuè hiah-ê ké-sian-ti, in-uī tiàm-tī lín lāi-bīn ê Sìng-Sîn pí tiàm-tī sè-kan-lâng lāi-bīn ê sîn-lîng khah ū-la̍t. 5 Ké-sian-ti sī sio̍k sè-kan, kóng sè-kan-sū, só͘-í sè-kan-lâng tsiah thiaⁿ in ê uē. 6 Lán sī sio̍k Siōng-Tsú, jīn-bat Siōng-Tsú ê lâng thiaⁿ lán, bô sio̍k Siōng-Tsú ê lâng m̄ thiaⁿ lán, án-ne lán tsiū ē-tàng hun-pia̍t tsin-lí ê Sìng-Sîn kah tshò-gō͘ ê sîn-lîng.

Siōng-Tsú Sī Thiàⁿ
7 Tshin-ài ê hiaⁿ-tī tsí-muē, lán tio̍h sio-thiàⁿ, in-uī thiàⁿ sī tuì Siōng-Tsú lâi. Ū thiàⁿ-sim ê lâng sī Siōng-Tsú ê kiáⁿ-jî, mā bat Siōng-Tsú. 8 Bô thiàⁿ-sim ê lâng m̄-bat Siōng-Tsú, in-uī Siōng-Tsú sī thiàⁿ. 9 Siōng-Tsú tshe I to̍k-siⁿ ê Kiáⁿ lâi-kàu sè-kan, hō͘ lán tuì I lâi tit-tio̍h ua̍h-miā. Siōng-Tsú án-ne tuì lán hián-bîng I ê thiàⁿ tī lán tiong-kan. 10 M̄-sī lán thiàⁿ Siōng-Tsú, sī I ū thiàⁿ lán, tshe I ê Kiáⁿ tsò sio̍k-tsuē-tsè lâi sio̍k lán ê tsuē. Tse tsiū-sī Siōng-Tsú ê thiàⁿ. 11 Tshin-ài ê hiaⁿ-tī tsí-muē, Siōng-Tsú hiah-ni̍h thiàⁿ lán, lán mā tio̍h sio-thiàⁿ. 12 Bô-lâng bat khuàⁿ-tio̍h Siōng-Tsú, lán nā sio-thiàⁿ, Siōng-Tsú tsiū tiàm tī lán lāi-bīn. I ê thiàⁿ thong-kuè lán uân-tsuân si̍t-hiān. 13 Siōng-Tsú í-king ū tsiong Sìng-Sîn siúⁿ-sù hō͘ lán, án-ne lán ē-tàng khak-sìn lán kah Siōng-Tsú kiat-liân. 14 Thiⁿ-Pē tshe I ê Kiáⁿ lâi tsò sè-kan ê Kiù-Tsú. Guán ū khuàⁿ-tio̍h, tsit-má teh tsò kiàn-tsìng. 15 Sîng-jīn Iâ-so͘ sī Siōng-Tsú ê Kiáⁿ ê lâng, tsiū kah Siōng-Tsú kiat-liân. 16 Só͘-í lán tsai koh siong-sìn Siōng-Tsú thiàⁿ lán. Siōng-Tsú tsiū-sī thiàⁿ, sèⁿ-miā-lāi ū thiàⁿ ê lâng tsiū-sī ua̍h tī Siōng-Tsú lāi-bīn, Siōng-Tsú mā kah i kiat-liân. 17 Thiàⁿ tsiū án-ne tī lán tiong-kan uân-tsuân si̍t-hiān tshut-lâi, hō͘ lán tī sím-phuàⁿ ê ji̍t thang hó-táⁿ bô teh kiaⁿ, in-uī lán tī tsit sè-kan ū kah Iâ-so͘ kāng-khuán ê ua̍h-miā. 18 Ū thiàⁿ tsiū bô kiaⁿ-hiâⁿ, uân-tsuân ê thiàⁿ kā kiaⁿ-hiâⁿ kuáⁿ tshut-khì, in-uī kiaⁿ-hiâⁿ kah hîng-hua̍t ū kuan-liân, ū kiaⁿ-hiâⁿ ê lâng iáu-buē kā thiàⁿ uân-tsuân si̍t-hiān tshut-lâi. 19 Lán tio̍h sio-thiàⁿ, in-uī Siōng-Tsú tāi-sing thiàⁿ lán. 20 Nā ū-lâng kóng, "Guá thiàⁿ Siōng-Tsú" m̄-koh uàn-hūn hiaⁿ-tī á-sī tsí-muē, i sī teh kóng pe̍h-tsha̍t, in-uī bô thiàⁿ khuàⁿ ē-tio̍h ê hiaⁿ-tī á-sī tsí-muē ê lâng ná ē thiàⁿ khuàⁿ bē-tio̍h ê Siōng-Tsú. 21 Thiàⁿ Siōng-Tsú mā tio̍h thiàⁿ hiaⁿ-tī á-sī tsí-muē. Tse sī lán tuì Ki-tok niá-siū ê kài-bīng.