《巴克禮普世版聖經（試讀本）》

 | | | 轉寄

巴克禮普世版（試讀本） 約翰一書第五章

作者 巴克禮普世版小組 2016.12.12

Iâⁿ-kuè Sè-kan
1 Sìn Iâ-so͘ sī Ki-tok ê lâng lóng sī Siōng-Tsú ê kiáⁿ-jî. Thiàⁿ pē-bú ê mā ē thiàⁿ i só͘ seⁿ ê kiáⁿ-jî. 2 Lán nā thiàⁿ Siōng-Tsú koh tsun-siú I ê kài-bīng, án-ne lán tsiū tsai lán ū teh thiàⁿ Siōng-Tsú ê kiáⁿ-jî. 3 Tsun-siú Siōng-Tsú ê kài-bīng tsiū-sī thiàⁿ Siōng-Tsú. I ê kài-bīng m̄-sī oh tsun-siú-.ê. 4 In-uī Siōng-Tsú ê kiáⁿ-jî lóng ē-tàng iâⁿ-kuè sè-kan. Lán ê sìn-gióng hō͘ lán iâⁿ-kuè sè-kan. 5 Iâⁿ-kuè sè-kan ê sī siáⁿ-lâng? Kám m̄-sī hiah-ê siong-sìn Iâ-so͘ sī Siōng-Tsú ê Kiáⁿ ê lâng?

Kiàn-tsìng Iâ-so͘ Ki-tok
6 Tsit-ê Iâ-so͘ Ki-tok sī tuì tsuí kah hueh lâi-.ê. M̄-sī kan-taⁿ īng tsuí, sī īng tsuí kah hueh. 7 Sìng-Sîn tshin-tsū kiàn-tsìng tsit-ê sū-si̍t, in-uī Sìng-Sîn tsiū-sī tsin-lí. 8 Ū saⁿ-ê teh tsò kiàn-tsìng, tsiū-sī Sìng-Sîn, tsuí kah hueh. Tsit saⁿ-ê kiàn-tsìng lóng ū it-tì. 9 Lâng ê kiàn-tsìng lán to tsiap-siū, Siōng-Tsú ê kiàn-tsìng koh-khah ū hāu-li̍k, in-uī tsit-ê sī Siōng-Tsú uī-tio̍h I ê Kiáⁿ só͘ tsò ê kiàn-tsìng. 10 Sìn Siōng-Tsú ê Kiáⁿ ê lâng tī sim-lāi ū tsit-ê kiàn-tsìng. M̄ sìn Siōng-Tsú ê lâng tsiū-sī lia̍h-tsò Siōng-Tsú teh kóng pe̍h-tsha̍t, in-uī i m̄ sìn Siōng-Tsú uī-tio̍h I ê Kiáⁿ só͘ tsò ê kiàn-tsìng. 11 Tsit-ê kiàn-tsìng tsiū-sī: Siōng-Tsú í-king ū siúⁿ-sù íng-uán ê ua̍h-miā hō͘ lán, tsit-ê ua̍h-miā sī tuì I ê Kiáⁿ lâi-.ê. 12 Ū kah Siōng-Tsú ê Kiáⁿ kiat-liân ê lâng tsiū ū tsit-ê ua̍h-miā. Bô kah Siōng-Tsú ê Kiáⁿ kiat-liân ê lâng tsiū bô tsit-ê ua̍h-miā.

Íng-uán ê Ua̍h-miā
13 Guá siá tsiah-ê tāi-tsì sī beh hō͘ lín sìn Siōng-Tsú ê Kiáⁿ ê lâng tsai-iáⁿ, lín ū íng-uán ê ua̍h-miā. 14 Lán tī Siōng-Tsú ê bīn-tsîng ióng-kám bô kiaⁿ, in-uī lán khak-sìn nā tsiàu I ê tsí-ì bô-lūn kiû sím-mi̍h, I ē thiaⁿ lán ê kî-kiû. 15 Kì-jiân lán khak-sìn I ē thiaⁿ lán ê kî-kiû, lán tsiū án-ne tsai-iáⁿ lán tuì I kî-kiû ê í-king tit-tio̍h. 16 Lâng nā khuàⁿ-tio̍h hiaⁿ-tī á-sī tsí-muē huān-tio̍h bē tì-kàu sí ê tsuē, tio̍h ǹg Siōng-Tsú kî-kiû, Siōng-Tsú ē sù i ua̍h-miā. Lâng só͘ huān ê nā-sī tio̍h tì-kàu sí ê tsuē, guá bô kóng tio̍h uī tsit-tsióng tsuē-jîn kî-tó. 17 Só͘-ū put-gī ê hîng-uî lóng sī huān-tsuē, m̄-koh mā ū bián tì-kàu sí ê tsuē. 18 Lán tsai Siōng-Tsú ê kiáⁿ-jî bē kè-sio̍k huān-tsuē, in-uī ū Siōng-Tsú ê Kiáⁿ teh kā in pó-siú, hit-ê Mô͘-kuí kha̍p i bē-tio̍h. 19 Lán tsai lán sī sio̍k Siōng-Tsú, m̄-koh tsuân sè-kan lóng siū hit-ê Mô͘-kuí kuán-hat. 20 Lán mā tsai Siōng-Tsú ê Kiáⁿ í-king lîm-kàu, koh hō͘ lán hiáu-ngō͘ lâi jīn-bat Hit-uī tsin-sîn Siōng-Tsú. Lán kah tsin-sîn Siōng-Tsú kiat-liân, in-uī lán kah I ê Kiáⁿ Iâ-so͘ Ki-tok mā ū kiat-liân. Tsit-uī sī tsin-sîn Siōng-Tsú, mā sī íng-uán ê ua̍h-miā. 21 Sè-kiáⁿ, lín tio̍h kín-sīn siám-phiah ngó͘-siōng.