《巴克禮普世版聖經（試讀本）》

 | | | 轉寄

巴克禮普世版（試讀本） 啟示錄第七章

作者 巴克禮普世版小組 2017.02.20

Hit Tsa̍p-sì-bān Sì-tshing ê Í-sik-lia̍t-lâng
1 Jiân-āu guá khuàⁿ-tio̍h sì-ê thiⁿ-sài khiā tī tē ê sì-kak-thâu, kā tē sì-bīn ê hong tòng tiâu-teh, hō͘ hong bē tshue lâi tē, hái kah it-tshè ê tshiū-ba̍k. 2 Guá koh khuàⁿ-tio̍h līng-guā tsi̍t-ê thiⁿ-sài tshiú the̍h íng-uán ua̍h-miā Siōng-Tsú ê ìn, tuì ji̍t-tshut ê só͘-tsāi khí-lâi, tuì niá-siū kuân-pìng thang siong-hāi tē kah hái hit sì-ê thiⁿ-sài tuā-siaⁿ huah, 3 kóng, "Guán iáu-buē tī lán ê Siōng-Tsú lô͘-po̍k ê thâu-hia̍h khap-ìn tsò kì-hō í-tsîng, lín m̄-thang siong-hāi tē, hái kah tshiū-ba̍k." 4 Guá ū thiaⁿ-tio̍h Í-sik-lia̍t ê kiáⁿ-sun kok tsi-tso̍k ê tiong-kan siū khap-ìn ê jîn-sò͘ tsóng-kiōng ū tsa̍p-sì-bān sì-tshing. 5 Sio̍k Iû-tāi tsi-tso̍k siū khap-ìn ê ū tsi̍t-bān nn̄g-tshing, sio̍k Liû-piān tsi-tso̍k ū tsi̍t-bān nn̄g-tshing, sio̍k Ka-tik tsi-tso̍k ū tsi̍t-bān nn̄g-tshing, 6 sio̍k A-siat tsi-tso̍k ū tsi̍t-bān nn̄g-tshing, sio̍k La̍p-tāi-lī tsi-tso̍k ū tsi̍t-bān nn̄g-tshing, sio̍k Má-ná-se tsi-tso̍k ū tsi̍t-bān nn̄g-tshing, 7 sio̍k Se-biān tsi-tso̍k ū tsi̍t-bān nn̄g-tshing, sio̍k Lī-bī tsi-tso̍k ū tsi̍t-bān nn̄g-tshing, sio̍k Í-sat-ka tsi-tso̍k ū tsi̍t-bān nn̄g-tshing, 8 sio̍k Se-pò͘-lûn tsi-tso̍k ū tsi̍t-bān nn̄g-tshing, sio̍k Iok-sik tsi-tso̍k ū tsi̍t-bān nn̄g-tshing, sio̍k Piān-ngá-bín tsi-tso̍k ū tsi̍t-bān nn̄g-tshing.

Ta̍k-só͘-tsāi Lâi ê Tsi̍t-tuā-tīn Lâng
9 Jiân-āu guá koh khuàⁿ-tio̍h tsi̍t-tuā-tīn lâng, bô-lâng sǹg ē-liáu ê sò͘-ba̍k, tuì ta̍k kok, ta̍k tso̍k, ta̍k-khuán jîn-bîn, ta̍k-tsióng gí-giân ê lâng, lóng khiā tī pó-tsō ê bīn-tsîng, tshīng pe̍h-saⁿ, tshiú giâ tsang-tshiū-ki. 10 In tuā-siaⁿ huah: Guān tsín-kiù kui hō͘ tsē tī pó-tsō ê Siōng-Tsú, mā kui hō͘ Iûⁿ-ko! 11 Tsìng thiⁿ-sài khiā tī pó-tsō kah tiúⁿ-ló í-ki̍p sì-ê ua̍h-mi̍h ê sì-tsiu-uî, phak lo̍h-khì pó-tsō tsîng kìng-pài Siōng-Tsú, 12 kóng: " Amen! Guān o-ló, îng-kng, tì-huī, kám-siā, tsun-kuì, kuân-lîng, khuì-la̍t lóng kui hō͘ lán ê Siōng-Tsú, ti̍t-kàu tāi-tāi bô tsīn. Amen!" 13 Tiúⁿ-ló tiong-kan ū tsi̍t-ê mn̄g guá kóng, "Tsiah-ê tshīng pe̍h-saⁿ ê sī siáⁿ-lâng? In sī tuì tó-uī lâi?" 14 Guá ìn kóng, "Sin-seⁿ, lí tsiah tsai-iáⁿ." I kā guá kóng, "Tsiah-ê sī king-kuè hit-ê tuā-tsai-lān tshut-lâi-.ê. In īng Iûⁿ-ko ê hueh tsiong in ê saⁿ sé kah pe̍h-pe̍h-pe̍h. 15 In tsiū-án-ne tī Siōng-Tsú ê pó-tsō tsîng, mê-ji̍t tī I ê sìng-tiān ho̍k-sāi I. Tsē tī pó-tsō ê Hit-uī ē kah in tông-tsāi lâi pó-siú in. 16 In bē koh iau, mā bē koh tshuì-ta, ji̍t-thâu kah it-tshè ê sio-jia̍t lóng bē kā in siong-hāi. 17 In-uī tsē tī pó-tsō ê Iûⁿ-ko beh tsò in ê bo̍k-tsiá, tshuā in lâi-kàu ua̍h-miā ê tsuí-tsuâⁿ. Siōng-Tsú ē tuì in ê ba̍k-tsiu tshit-khì in lóng-tsóng ê ba̍k-sái."