《巴克禮普世版聖經（試讀本）》

 | | | 轉寄

巴克禮普世版（試讀本） 啟示錄第六章

作者 巴克禮普世版小組 2017.02.13

Thiah-khui Hong-ìn
1 Iûⁿ-ko khui tshit-ê ìn tiong-kan ê tsi̍t-ê ê sî, guá teh khuàⁿ, ū thiaⁿ-tio̍h sì-ê ua̍h-mi̍h ê tsi̍t-ê īng ná tshin-tshiūⁿ luî ê siaⁿ kóng, "Lâi!" 2 Guá tsi̍t-ē khuàⁿ tsiū khuàⁿ-tio̍h tsi̍t-tsiah pe̍h-bé, khiâ-bé ê lâng gia̍h king, mā ū niá-siū bián-liû, tshut-huat tsing-tsiàn, tik-sìng koh-tsài tik-sìng. 3 Iûⁿ-ko thiah-khui tē-jī-ê hong-ìn ê sî, guá thiaⁿ-tio̍h tē-jī-ê ua̍h-mi̍h kóng, "Lâi!" 4 Hit-sî koh ū tsi̍t-tsiah tshiah-sik ê bé tshut-lâi. Khiâ-bé ê lâng ū niá-siū kuân-pìng thang tuì tē-tsiūⁿ tshiúⁿ-tua̍t hô-pîng, hō͘ jîn-luī hō͘-siōng sat-hāi. I koh ū niá-siū tsi̍t-ki tuā-ki kiàm. 5 Iûⁿ-ko thiah-khui tē-saⁿ-ê hong-ìn ê sî, guá thiaⁿ-tio̍h tē-saⁿ-ê ua̍h-mi̍h kóng, "Lâi!" Guá tsi̍t-ē khuàⁿ tsiū khuàⁿ-tio̍h tsi̍t-tsiah o͘-bé, khiâ-bé ê lâng tshiú giâ tshìn-á. 6 Guá thiaⁿ-tio̍h káh-ná ū siaⁿ tuì sì-ê ua̍h-mi̍h ê tiong-kan huat-tshut kóng, "Tsi̍t-kang ê kang-tsîⁿ kan-taⁿ ē-tàng bé tsi̍t-kong-sing ê sió-be̍h, nā-sī tuā-be̍h ē-tàng bé saⁿ-kong-sing, iû kah tsiú m̄-thang phah-sńg." 7 Iûⁿ-ko thiah-khui tē-sì-ê hong-ìn ê sî, guá thiaⁿ-tio̍h tē-sì-ê ua̍h-mi̍h kóng, "Lâi! " 8 Guá tsi̍t-ē khuàⁿ tsiū khuàⁿ-tio̍h tsi̍t-tsiah hué-hu-sik ê bé. Khiâ-bé ê lâng miâ-kiò-tsò Sí-bông, im-hú tuè tī i ê āu-bīn. i ū niá-siū kuân-pìng thang tī-lí tē-tsiūⁿ ê sì-hūn tsi-it, īng to-kiàm, ki-hng, un-i̍k kah tē-tsiūⁿ ê iá-siù lâi sat-hāi lâng. 9 Iûⁿ-ko thiah-khui tē-gō͘-ê hong-ìn ê sî, guá khuàⁿ-tio̍h tsè-tuâⁿ ē-bīn ū uī-tio̍h Siōng-Tsú ê tō-lí kah tiong-si̍t tsò kiàn-tsìng lâi siū sat-hāi hiah-ê lâng ê lîng-hûn. 10 In tuā-siaⁿ huah: "Sìng-kiat koh tsin-si̍t ê Tsú-tsáiⁿ ah, tio̍h koh juā-kú Lí tsiah beh sím-phuàⁿ tē-tsiūⁿ ê lâng, thang uī-tio̍h guá só͘ lâu ê hueh sin-uan?" 11 In ta̍k-lâng lóng niá-siū tsi̍t-niá pe̍h-saⁿ, koh ū siaⁿ kā in kóng, "Tio̍h koh hioh tsi̍t-sî-á kú, thìng-hāu pêⁿ-pêⁿ tsò lô͘-po̍k ê kah in ê hiaⁿ-tī tsí-muē, tsiū-sī teh-beh kah in kāng-khuán siū sat-hāi ê jîn-sò͘ kàu-gia̍h. 12 Āu-lâi guá khuàⁿ-tio̍h Iûⁿ-ko thiah-khui tē-la̍k-ê hong-ìn ê sî, hut-jiân tuā tē-tāng, ji̍t-thâu piàn kah tshin-tshiūⁿ o͘-muâ-pò͘ hiah-ni̍h o͘, kui-ê gue̍h-niû piàn kah tshin-tshiūⁿ hueh hiah-ni̍h âng; 13 thiⁿ-tíng ê tsheⁿ tuī-lo̍h tē, tshin-tshiūⁿ bû-hua-kó-tshiū hō͘ tuā-hong sàu-kuè, iáu-buē si̍k ê kué-tsí lak liáu-liáu. 14 Thiⁿ tshin-tshiūⁿ teh kńg tsheh siau-sit khì, suaⁿ kah hái-tó lóng iô-tsuah lī-khui guân-uī. 15 Tē-tsiūⁿ ê kun-ông, tuā-kuaⁿ, kun-tiúⁿ, hó-gia̍h-lâng, ū sè-li̍k ê, í-ki̍p só͘-ū tsò lô͘-po̍k ê kah tsū-iû ê, lóng khì bih tiàm suaⁿ-tōng kah suaⁿ-giâm. 16 In tuì suaⁿ-niá kah suaⁿ-giâm huah: "Tó lo̍h-lâi kā guán khàm-teh, hō͘ guán thang siám-phiah Hit-uī tsē tī pó-tsō ê bīn kah Iûⁿ-ko ê siū-khì. 17 In-uī in siū-khì ê tuā ji̍t-tsí í-king kàu à, siáⁿ-lâng khiā ē-tiâu?"