《巴克禮普世版聖經（試讀本）》

 | | | 轉寄

巴克禮普世版（試讀本） 啟示錄第十二章

作者 巴克禮普世版小組 2017.03.27

Hū-jîn-lâng Kah Liông
Tī thiⁿ-tíng koh ū tsi̍t-ê tuā tiāu-thâu tshut-hiān: tsi̍t-ê hū-jîn-lâng sing-khu tshīng ji̍t-thâu, kha-ta̍h gue̍h-niû, thâu-khak tì tsa̍p-jī-lia̍p tsheⁿ ê bián-liû. 2 I ū huâi-īn teh-beh seⁿ-kiáⁿ, tshui-tsūn ê kan-khó͘ kah thàng-thiàⁿ hō͘ i tuā-siaⁿ kiò-khó͘. 3 Tī thiⁿ-tíng koh ū līng-guā tsi̍t-ê tiāu-thâu tshut-hiān: tsi̍t-bué tshiah-sik ê tuā-bué liông, ū tshit-ê thâu, tsa̍p-ki kak, thâu-khak tì tshit-tíng ông-kuan. 4 Hit-bué liông īng bué-liu kā thiⁿ-tíng saⁿ-hūn tsi-it ê tsheⁿ sàu lo̍h-khì tē-tsiūⁿ. Liông khiā tī teh-beh seⁿ-kiáⁿ ê hū-jîn-lâng bīn-tsîng, thìng-hāu i seⁿ-liáu thang thun-tsia̍h i ê kiáⁿ. 5 Hit-ê hū-jîn-lâng seⁿ tsi̍t-ê tsa-po͘-kiáⁿ, tsiū-sī tsiong-lâi beh īng thih-kuái thóng-tī bān-kok ê, m̄-koh i ê kiáⁿ hō͘ lâng tsiap-khì Siōng-Tsú ê bīn-tsîng, lâi-kàu I ê pó-tsō hia. 6 Hū-jîn-lâng tô-tsáu khì khòng-iá, Siōng-Tsú tī hia ū uī-tio̍h i tsún-pī tsi̍t-ê só͘-tsāi, thang hō͘ i tī hia siū tsiàu-kò͘ tsi̍t-tshing nn̄g-pah la̍k-tsa̍p ji̍t. 7 Tī thiⁿ-tíng tsiū huat-sing tsiàn-tsing: Bí-ka-li̍k tuà i ê sù-tsiá khì kah liông kau-tsiàn, liông mā tuà i ê sù-tsiá khí-lâi ìng-tsiàn. 8 Liông tsiàn-su, i kah i ê sù-tsiá tī thiⁿ-tíng tsiū bô só͘-tsāi thang tuà. 9 Hit bué tuā-bué liông tsiū hō͘ lâng hiat tshut-lâi. I tsiū-sī hit-bué lāu-tsuâ, kiò-tsò Mô͘-kuí, mā kiò-tsò Sat-tàn, tsuân sè-kài siū i bê-hi̍k. I hō͘ lâng hiat lo̍h-lâi tē-tsiūⁿ, i ê sù-tsiá mā kah i tsò-hué hiat lo̍h-lâi. 10 Hit-sî guá thiaⁿ-tio̍h tī thiⁿ-tíng ū tuā-siaⁿ, kóng, "Lán Siōng-Tsú ê tsín-kiù, kuân-lîng kah kok-tō͘ í-king si̍t-hiān à. I siat-li̍p ê Ki-tok mā teh hián-sī I ê kuân-pìng, in-uī mê-ji̍t tī lán ê Siōng-Tsú bīn-tsîng teh khòng-kò lán ê hiaⁿ-tī tsí-muē hit-ê, taⁿ í-king hō͘ lâng hiat lo̍h-khì à. 11 In khò Iûⁿ-ko ê hueh kah in só͘ kiàn-tsìng ê sìn-sit í-king iâⁿ-kuè hit-bué liông. In sīm-tsì guān-ì hi-sing in ê sèⁿ-miā. 12 Só͘-í tsiah-ê thiⁿ kah tuà tī hit tiong-kan ê lâng, lín lóng tio̍h huaⁿ-hí! M̄-koh tē kah hái ū tsai-hō, in-uī Mô͘-kuí í-king tuā siū-khì lo̍h khì-kàu lín hia, i tsai-iáⁿ ka-kī ê sî bô juā kú à. 13 Hit-bué liông tsi̍t-ē tsai-iáⁿ ka-kī hō͘ lâng hiat lo̍h-khì tē-tsiūⁿ, tsiū khì jiok hit-ê seⁿ tsa-po͘-kiáⁿ ê hū-jîn-lâng. 14 Hit-ê hū-jîn-lâng ū tit-tio̍h tuā ing-tsiáu ê nn̄g-ki si̍t thang hō͘ i pue-khì khòng-iá, kàu i ka-kī ê só͘-tsāi, tī hia tit-tio̍h tsiàu-kò͘ it-ti̍t kàu Siōng-Tsú khuàⁿ-tsò sik-tòng ê sî-kî, bô koh siū hit-bué lāu-tsuâ ê kong-kik. 15 Hit-bué tsuâ tī hū-jîn-lâng ê āu-bīn, tuì tshuì thò͘-tshut tshin-tshiūⁿ tuā-hô ê tsuí, beh kā hū-jîn-lâng tshiong-khì. 16 Tāi-tē lâi pang-tsō͘ hū-jîn-lâng, khui-tshuì kā liông thò͘-tshut ê hô-tsuí thun lo̍h-khì. 17 Liông tuì hū-jîn-lâng huat siū-khì, tsiū khì kah hū-jîn-lâng kî-tha ê kiáⁿ-sun, tsiū-sī tsun-siú Siōng-Tsú ê kài-bīng kah uī Iâ-so͘ tsò kiàn-tsìng ê lâng kau-tsiàn. Hit sî, liông tsiū khiā tī hái-piⁿ ê sua-tíng.