《巴克禮普世版聖經（試讀本）》

 | | | 轉寄

巴克禮普世版（試讀本） 啟示錄第十三章

作者 巴克禮普世版小組 2017.04.03

Nn̄g-tsiah Bíng-siù
1 Guá koh khuàⁿ-tio̍h tsi̍t-tsiah bíng-siù tuì hái-ni̍h khí-lâi, ū tsa̍p-ki kak, tshit-ê thâu. Ta̍k-ki kak lóng ū tì tsi̍t-tíng ông-kuan, thâu-khak-tíng ū huí-pòng Siōng-Tsú ê miâ-hō. 2 Guá só͘ khuàⁿ-tio̍h ê hit-tsiah bíng-siù tshin-tshiūⁿ pà, i ê kha tshin-tshiūⁿ hîm ê kha, tshuì tshin-tshiūⁿ sai ê tshuì. Hit-bué liông īng i ê tsâi-lîng, tsō-uī kah tuā kuân-pìng hō͘ hit-tsiah bíng-siù. 3 Hit-tsiah bíng-siù ê tsi̍t-ê thâu-khak ná tshin-tshiūⁿ ū siū-kuè tì-miā-siong, m̄-koh i ê tì-miā-siong ū tit-tio̍h i-hó. Tsuân sè-kài ê lâng lóng kám-kak kî-kuài, tsiū lâi tuè hit-tsiah bíng-siù kiâⁿ. 4 Tsìng-lâng pún-té to̍h teh pài hit-bué liông, in-uī liông kā kuân-pìng kau hō͘ bíng-siù, in mā pài bíng-siù, kóng, "Siáⁿ-lâng ē-tàng kah tsit-tsiah bíng-siù sio pí-phīng? Siáⁿ-lâng ē-tàng kah i kau-tsiàn?" 5 Hit-tsiah bíng-siù ū tit-tio̍h tsi̍t-ê kóng tuā-uē kah huí-pòng ê tshuì, koh tit-tio̍h ín-tsún tī sì-tsa̍p-jī gue̍h-ji̍t tiong-kan lâi tsò tsiah-ê tāi-tsì. 6 I tsiū khui-tshuì kóng-tshut huí-pòng Siōng-Tsú ê uē, lâi siat-to̍k I ê miâ kah I ê huē-bō͘ í-ki̍p hiah-ê tiàm tī thiⁿ-tíng-.ê. 7 I mā ū tit-tio̍h kuân-pìng thang kah sìn-tô͘ kau-tsiàn, lâi kā in tsing-ho̍k, mā ū tit-tio̍h kuân-pìng lâi tī-lí ta̍k-ê tso̍k-kûn, ta̍k-ê jîn-bîn, ta̍k-tsióng gí-giân ê lâng kah ta̍k-e pang-kok. 8 Só͘-ū tuà tī tē-bīn-tsiūⁿ ê lâng, tsiū-sī tshòng-sè í-lâi in ê miâ bô kì-tsài tī siū sat-hāi ê Iûⁿ-ko ê ua̍h-miā-tsheh ê, lóng beh pài hit-tsiah bíng-siù. 9 Ū hīⁿ-khang ê lâng lóng tio̍h thiaⁿ: 10 Hiah-ê tsù-tiāⁿ siū-lia̍h ê lâng lóng ē hō͘ lâng lia̍h-khì; hiah-ê tsù-tiāⁿ siū sat-hāi ê lâng lóng ē siū to thâi-sí, in-uī án-ne, sìn-tô͘ lóng tio̍h ū nāi-sim kah sìn-sim. 11 Guá koh khuàⁿ-tio̍h līng-guā tsi̍t-tsiah bíng-siù tuì tē-tsiūⁿ khí-lâi, ū nn̄g-ki tshin-tshiūⁿ iûⁿ ê kak, kóng-uē tshin-tshiūⁿ liông. 12 I tī thâu-tsi̍t-tsiah bíng-siù ê bīn-tsîng tsip-hîng thâu-tsi̍t-tsiah bíng-siù ê kuân-pìng. I kiò tē kah tuà tē-tsiūⁿ ê lâng khì pài thâu-tsi̍t-tsiah bíng-siù, tsiū-sī hit-tsiah siū-tio̍h tì-miā-siong koh tit-tio̍h i-hó ê hit-tsiah bíng-siù. 13 Tsit tē-jī-tsiah bíng-siù koh kiâⁿ tuā sîn-jiah, tī lâng ê bīn-tsîng kiò hué tuì thiⁿ kàng-lo̍h tē-tsiūⁿ. 14 Koh īng tit-tio̍h ín-tsún tī thâu-tsi̍t-tsiah bíng-siù bīn-tsîng só͘ kiâⁿ ê sîn-jiah lâi bê-hi̍k tuà tī tē-tsiūⁿ ê lâng, kiò in tio̍h kā hit-tsiah tio̍h-siong iû-guân ua̍h-teh ê bíng-siù tsō ngó͘-siōng. 15 I koh tit-tio̍h ín-tsún thang īng ua̍h-khì pûn ji̍p-khì bíng-siù ê ngó͘-siōng, hō͘ bíng-siù ê siōng ē kóng-uē, koh sat-hāi só͘-ū bô pài bíng-siù ngó͘-siōng ê lâng. 16 I koh kiông-pik tsìng-lâng, bô-lūn tuā-sè, hó-gia̍h á-sī sàn-tshiah, tsū-iû ê á-sī tsò lô͘-po̍k ê, lóng tio̍h tī tsiàⁿ-tshiú á-sī thâu-hia̍h khap-ìn tsò kì-hō. 17 Khap-ìn tsò kì-hō, tsiū-sī bíng-siù ê miâ á-sī tāi-piáu i ê miâ ê sò͘-jī, nā bô tsiū bē-tàng tsò bé-bē. 18 Tī tsia su-iàu ū tì-huī. Tshong-bîng ê lâng ē-tàng sǹg-tshut hit-tsiah bíng-siù ê sò͘-jī, in-uī hit-ê sò͘-jī tāi-piáu tsi̍t-ê lâng. Hit-ê sò͘-jī tsiū-sī la̍k-pah la̍k-tsa̍p-la̍k.