《巴克禮普世版聖經（試讀本）》

 | | | 轉寄

巴克禮普世版（試讀本） 啟示錄第十四章

作者 巴克禮普世版小組 2017.04.10

Kiù-sio̍k Tsi Kua
1 Guá koh khuàⁿ, ū khuàⁿ-tio̍h Iûⁿ-ko khiā tī Sik-an-suaⁿ, ū tsa̍p-sì-bān sì-tshing lâng kah I tsò-hué. In ê thâu-hia̍h lóng ū Iûⁿ-ko ê miâ kah I ê Thiⁿ-Pē ê miâ. 2 Guá thiaⁿ-tio̍h ū siaⁿ tuì thiⁿ-tíng tshut-lâi, tshin-tshiūⁿ tuā-tsuí teh tshiâng ê siaⁿ, mā tshin-tshiūⁿ luî teh tân ê siaⁿ. Guá só͘ thiaⁿ-tio̍h tsit-ê siaⁿ tshin-tshiūⁿ khîm-tshiú teh tuâⁿ khiā-khîm ê siaⁿ. 3 In tī pó-tsō kah sì-ê ua̍h-mi̍h í-ki̍p tiúⁿ-ló ê bīn-tsîng tshiùⁿ tsi̍t-siú sin-kua. Tsit-siú kua tû-liáu tuì tē-tsiūⁿ sio̍k-huê hit tsa̍p-sì-bān sì-tshing lâng í-guā, bô-lâng ē-hiáu o̍h. 4 Tsiah-ê lâng sī m̄-bat bak-tio̍h lí-sik ê tông-lâm, tsiah-ê lâng kin-tuè Iûⁿ-ko khì ta̍k só͘-tsāi, in sī tuì jîn-luī ê tiong-kan sio̍k-huê lâi tsò khí-thâu-si̍k ê kué-tsí hiàn hō͘ Siōng-Tsú kah Iûⁿ-ko-.ê. 5 In m̄-bat kóng pe̍h-tsha̍t, lóng bô khuat-tiám.

Saⁿ-ê Thiⁿ-sài ê Sìn-sit
6 Guá koh khuàⁿ-tio̍h līng-guā tsi̍t-ê thiⁿ-sài tī khong-tiong teh pue. I ū íng-uán ê sìn-sit beh thuân hō͘ tē-tsiūⁿ ê lâng, mā hō͘ ta̍k pang-kok, ta̍k tsióng-tso̍k, ta̍k-khuán gí-giân kah ta̍k-ê bîn-tso̍k. 7 Tsiah-ê thiⁿ-sài tuā-siaⁿ kóng, "Tio̍h kìng-uì Siōng-Tsú, kui îng-kng hō͘ I, in-uī I sím-phuàⁿ jîn-luī ê sî-khik kàu à, mā tio̍h kìng-pài tshòng-tsō thiⁿ, tē, hái kah tsuí-guân ê Siōng-Tsú." 8 Koh ū līng-guā tē-jī-ê thiⁿ-sài suà lo̍h-khì kóng, "Tó lo̍h-khì lò͘! hō͘ bān-kok lim in îm-luān lia̍t-tsiú ê Pa-pí-lûn tó lo̍h-khì lò͘!" 9 Koh ū līng-guā tē-saⁿ-ê thiⁿ-sài suà lo̍h-khì tuā-siaⁿ kóng, "Nā ū pài hit-tsiah bíng-siù kah i ê tsō-siōng, í-ki̍p tī thâu-hia̍h á-sī tshiú-ni̍h siū khap-ìn tsò kì-hō ê lâng, 10 mā tio̍h lim Siōng-Tsú tuā siū-khì ê tsiú, tsiū-sī thîn tī Siōng-Tsú siū-khì tsiú-pue ê sûn-tsiú. In ē tī sìng thiⁿ-sài kah Iûⁿ-ko ê bīn-tsîng siū-tio̍h hué kah liû-hông ê khok-hîng. 11 In siū khó͘-tshó͘ ê ian tshìng tsiūⁿ-kuân, íng-uán bô suah. Hiah-ê pài hit-tsiah bíng-siù kah i ê tsō-siōng í-ki̍p siū i ê miâ khap-ìn tsò kì-hō ê lâng mê-ji̍t lóng bô thang an-hioh." 12 In-uī án-ne, hiah-ê tsun-siú Siōng-Tsú ê kài-bīng kah tuì Iâ-so͘ tiong-si̍t ê sìn-tô͘ tio̍h ū nāi-sim. 13 Guá koh thiaⁿ-tio̍h tuì thiⁿ-tíng ū siaⁿ kóng, "Lí tio̍h siá lo̍h-lâi! Tuì taⁿ í-āu uī-tio̍h Tsú lâi sòng-sit sèⁿ-miā ê lâng si̍t-tsāi ū hok-khì!" Sìng-Sîn huê-ìng kóng, "Sī à, in ē kiat-sok in ê lô-khó͘ lâi an-hioh, in-uī in lô-khó͘ ê sîng-kó ē kin-tuè in khì."

Tē-tsiūⁿ ê Siu-sîng
14 Guá koh khuàⁿ, ū khuàⁿ-tio̍h tsi̍t-phiàn pe̍h-hûn, hûn-tíng tsē tsi̍t-ê lâng tshin-tshiūⁿ Jîn-tsú, thâu-khak tì kim ê bián-liû, tshiú gia̍h tsi̍t-ki lāi ê liâm-li̍k-á. 15 Koh ū līng-guā tsi̍t-ê thiⁿ-sài tuì sìng-tiān tshut-lâi, tuì tsē tī hûn-tíng Hit-uī tuā-siaⁿ huah: "Tio̍h īng Lí ê liâm-li̍k-á lâi siu-kuah, in-uī siu-kuah ê sî-kî í-king kàu, tē-tsiūⁿ ê lông-tsok-bu̍t lóng kàu-si̍k à." 16 Tsē tī hûn-tíng Hit-uī tsiū kā liâm-li̍k-á hiat lo̍h-khì tē-tsiūⁿ, tē-tsiūⁿ ê lông-tsok-bu̍t tsiū hō͘ I siu-kuah khí-lâi. 17 Koh ū līng-guā tsi̍t-ê thiⁿ-sài tuì thiⁿ-tíng ê sìng-tiān tshut-lâi, i mā gia̍h tsi̍t-ki lāi ê liâm-li̍k-á. 18 Koh ū līng-guā tsi̍t-ê teh tsiáng-kuán hué ê thiⁿ-sài tuì tsè-tuâⁿ tshut-lâi, tuā-siaⁿ tuì gia̍h lāi ê liâm-li̍k-á hit-ê thiⁿ-sài tuā-siaⁿ huah: "Īng lí lāi ê liâm-li̍k-á khì siu tē-tsiūⁿ kui-pha ê phû-tô, in-uī phû-tô í-king kàu-si̍k à. 19 Hit-ê thiⁿ-sài tsiū kā liâm-li̍k-á hiat lo̍h-khì tē-tsiūⁿ, kā tē-tsiūⁿ ê phû-tô kuah khí-lâi, tsiong phû-tô hiat lo̍h-khì Siōng-Tsú tuā siū-khì ê tsiú-khut. 20 Hit-ê tsiú-khut tī siâⁿ-guā hō͘ lâng thún-ta̍h, tsiū ū hueh tuì tsiú-khut lâu tshut-lâi, kuân tāi-iok nn̄g kong-tshioh, tn̂g tsha-put-to ū saⁿ-pah kong-lí.