《巴克禮普世版聖經（試讀本）》

 | | | 轉寄

巴克禮普世版（試讀本） 啟示錄第十六四章

作者 巴克禮普世版小組 2017.04.24

Siōng-Tsú Tuā-siū-khì ê Uáⁿ
1 Āu-lâi guá koh thiaⁿ-tio̍h ū tuā-siaⁿ tuì sìng-tiān tshut-lâi, kā tshit-ê thiⁿ-sài kóng, "Lín khì, tsiong hit tshit uáⁿ Siōng-Tsú ê tuā-siū-khì piàⁿ lo̍h-khì tē-tsiūⁿ." 2 Thâu-tsi̍t-ê thiⁿ-sài tsiū khì, tsiong i hit uáⁿ piàⁿ lo̍h-khì tē-tsiūⁿ, hiah-ê ū bíng-siù ê kì-hō kah pài i ê tsō-siōng ê lâng tsiū seⁿ tshàu koh to̍k ê tshng. 3 Tē-jī ê thiⁿ-sài tsiong i ê uáⁿ piàⁿ lo̍h-khì hái-ni̍h, hái tsiū piàn-tsò tshin-tshiūⁿ sí-lâng ê hueh, hái-tiong ê ua̍h-mi̍h lóng sí-khì. 4 Tē-saⁿ-ê thiⁿ-sài tsiong i ê uáⁿ piàⁿ lo̍h-khì kang-hô kah tsuí tsuâⁿ, tsuí tsiū piàn-tsò hueh. 5 Guá thiaⁿ-tio̍h tsiáng-kuán tsiah-ê tsuí ê thiⁿ-sài kóng, "Hiān-tsāi tsûn-tsāi, tsá tsûn-tsāi, tsì-sìng ê Siōng-Tsú, Lí sī kong-gī, Lí ê sím-phuàⁿ kong-tsìng. 6 In-uī in ū lâu sìn-tô͘ kah sian-ti ê hueh, taⁿ Lí īng hueh hō͘ in lim. Tse sī in ing-kai siū ê pò-ìng." 7 Jiân-āu guá koh thiaⁿ-tio̍h tsè-tuâⁿ ū siaⁿ kóng, "Sī ah, Tsú, tsuân-lîng ê Siōng-Tsú, Lí ê sím-phuàⁿ tsin-si̍t koh kong-gī." 8 Tē-sì-ê thiⁿ-sài tsiong i hit-ê uáⁿ piàⁿ lo̍h-khì ji̍t-thâu, ji̍t-thâu tsiū tit-tio̍h kuân-pìng īng hué sio lâng. 9 Lâng hō͘ tuā iām-jia̍t ê hué sio-tio̍h tsiū siat-to̍k hit-ê ū kuân tsiáng-kuán tsiah-ê tsai-hō ê Siōng-Tsú ê miâ, iû-guân m̄-khíng hué-kái lâi kui îng-kng hō͘ Siōng-Tsú. 10 Tē-gō͘-ê thiⁿ-sài tsiong i hit-ê uáⁿ piàⁿ lo̍h-khì bíng-siù ê tsō-uī, bíng-siù ê kok-tō͘ suî-sî piàn o͘-àm, lâng tsiū kan-khó͘ kah kā-tsi̍h. 11 Koh in-uī in ê kan-khó͘ kah tshng-to̍k, tsiū siat-to̍k thiⁿ-tíng ê Siōng-Tsú, iû-guân bô hué-kái lâi kái-piàn in ê kiâⁿ-ta̍h. 12 Tē-la̍k-ê thiⁿ-sài tsiong i hit-ê uáⁿ piàⁿ lo̍h-khì Iù-huat-la̍h-tí tuā-hô, hô-tsuí suî-sî ta-khì, uī-tio̍h tuì tang-hng lâi ê lia̍t-ông tsún-pī tsi̍t-tiâu lō͘. 13 Guá koh khuàⁿ-tio̍h ū saⁿ-ê bô tshing-khì ê sîn-lîng, tshin-tshiūⁿ tshân-kap-á tuì liông ê tshuì, bíng-siù ê tshuì kah ké-sian-ti ê tshuì tshut-lâi. 14 In tsiū-sī ē kiâⁿ kî-tsik ê ok-mô͘ ê siâ-sîn, tshut-khì tsio-tsi̍p tsuân sè-kài ê kun-ông, tī tsuân-lîng Siōng-Tsú só͘ tiāⁿ-tio̍h hit-ê tuā ji̍t-tsí tshut-lâi kau-tsiàn. 15 " Lí tio̍h tsù-ì! Guá ē tshin-tshiūⁿ tsha̍t lâi. Hit-ê suî-sî kíng-síng kā saⁿ tshīng piān-piān ê lâng si̍t-tsāi ū hok-khì, in-uī i m̄-bián hō͘ tsìng-lâng khuàⁿ-tio̍h i thǹg-pak-theh ê kiàn-siàu." 16 Hiah-ê siâ-mô͘ tsiū tsio-tsi̍p lia̍t-ông tī tsi̍t-ê Hi-pik-lâi-uē kiò-tsò A-má-gi̍k-tùn ê só͘-tsāi. 17 Tē-tshit-ê thiⁿ-sài tsiong i hit-ê uáⁿ piàⁿ lo̍h-khì khong-tiong, tsiū ū tuā-siaⁿ tuì sìng-tiān ê pó-tsō tshut-lâi, kóng, "Uân-sîng à!" 18 Hit-sî ū sih-nà, ū hiáng-siaⁿ, ū luî tân kah tuā tē-tāng, tē-tsiūⁿ ū jîn-luī í-lâi m̄-bat ū tsiah-ni̍h tuā ê tē-tāng. 19 Hit-ê Pa-pí-lûn tuā-siâⁿ tsiū li̍h-tsò saⁿ-tè, lia̍t-kok ê siâⁿ-tshī mā lóng tó-huāi. Siōng-Tsú mā ē-kì-tit Pa-pí-lûn tuā-siâⁿ ê tāi-tsì, tsiū hō͘ i lim té-muá Siōng-Tsú ki̍k-tuā siū-khì ê tsiú. 20 Só͘-ū ê hái-tó kah suaⁿ lóng siau-sit khì. 21 Jiân-āu tuì thiⁿ-tíng kàng-lo̍h tuā-lia̍p pha̍uh, ta̍k-lia̍p ê tāng-liōng lóng ū kuí-nā-tsa̍p kong-kin. Lâng uī-tio̍h pha̍uh ê tsai-hō tsiū siat-to̍k Siōng-Tsú, in-uī hit-ê tsai-hō hui-siông giâm-tiōng.