《巴克禮普世版聖經（試讀本）》

 | | | 轉寄

作者 2017.05.01

Tuā Îm-hū
1 Hiah-ê the̍h tshit-tè uáⁿ ê tshit-ê thiⁿ-sài kî-tiong tsi̍t-ê lâi kah guá kóng-uē, kóng, "Lâi, guá beh hō͘ lí khuàⁿ hit-ê tuā îm-hū, tsiū-sī khí-tsō tī tsin-tsē tiâu hô hit-ê tuā siâⁿ-tshī só͘ tio̍h-siū ê sím-phuàⁿ. 2 Tē-tsiūⁿ ê kun-ông bat kah i kiâⁿ-îm; tē-tsiūⁿ ê tsū-bîn í-king mā bat lim i îm-luān ê tsiú lim kah tsiú-tsuì. 3 Guá siū Sìng-Sîn kám-tōng, hō͘ thiⁿ-sài tshuā khì khòng-iá. Guá ū khuàⁿ-tio̍h tsi̍t-ê tsa-bó͘-lâng khiâ tsi̍t-tsiah tsu-âng-sik koh sī tshiong-muá siat-to̍k miâ-hō ê bíng-siù. Hit-tsiah bíng-siù ū tshit-ê thâu, tsa̍p-ki kak. 4 Tsa-bó͘-lâng tshīng tsí-sik kah tsu-âng-sik ê saⁿ, kui-sing-khu tsng kah lóng-sī kim, pó-tsio̍h kah tsin-tsu, tshiú-ni̍h phâng kim-pue, té-muá tsiah-ê khó-ò͘ⁿ ê mi̍h kah îm-luān ê ù-uè. 5 I ê thâu-hia̍h siá tsi̍t-ê ū ún-ba̍t ì-sù ê miâ, tsiū-sī "Tuā Pa-pí-lûn, tē-tsiūⁿ ê îm-hū kah khó-ò͘ⁿ ê mi̍h ê lāu-bú." 6 Guá khuàⁿ-tio̍h tsi̍t-ê tsa-bó͘-lâng teh lim sìn-tô͘ kah uī-tio̍h Iâ-so͘ tsò kiàn-tsìng lâi sûn-kàu ê lâng ê hueh, lim kàu tsuì. Guá khuàⁿ-tio̍h i ê sî tsiū tuā tio̍h-kiaⁿ. 7 Hit-ê thiⁿ-sài kā guá kóng, "Lí án-tsuáⁿ teh tio̍h-kiaⁿ? Guá beh tsiong tsit-ê tsa-bó͘-lâng kah i só͘ khiâ hit-tsiah ū tshit-ê thâu-khak kah tsa̍p-ki kak ê bíng-siù ê pì-bi̍t kā lí kóng. 8 Lí só͘ khuàⁿ-tio̍h hit-tsiah bíng-siù, khah-tsá ū teh ua̍h, tsit-má bô teh-ua̍h, teh-beh koh tuì bô-té tshim-kheⁿ khí-lâi, khì siū tsuè-āu ê bia̍t-bông. Tē-tsiūⁿ hiah-ê tuì tshòng-sè í-lâi miâ bô kì tī ua̍h-miā-tsheh ê lâng, khuàⁿ-tio̍h hit-tsiah bíng-siù ē tio̍h-kiaⁿ, in-uī tsit-tsiah bíng-siù khah-tsá ū teh ua̍h, tsit-má bô teh-ua̍h, tsiong-lâi ē koh-tsài tshut-hiān. 9 " Tuì tsit-tiám su-iàu īng tì-huī lâi lí-kái. Hit tshit-ê thâu-khak tsiū-sī tsa-bó͘-lâng só͘ tsē ê tshit-tsō suaⁿ, mā-sī tshit-ê ông. 10 Kî-tiong gō͘-ê í-king tó lo̍h-khì, tsi̍t-ê hiān-tsāi iáu tsûn-tsāi, līng-guā tsi̍t-ê iáu-buē kàu, i nā kàu, mā sī tsù-tiāⁿ tsiām-sî tsûn-tsāi. 11 Hit-ê khah-tsá ū teh ua̍h, tsit-má bô teh-ua̍h ê bíng-siù tsiū-sī tē-peh ê ông, mā sī hit tshit-ê ông tiong-kan ê tsi̍t-ê, i mā tio̍h khì siū huí-bia̍t. 12 " Lí só͘ khuàⁿ-tio̍h ê tsa̍p-ki kak tsiū-sī hit tsa̍p-ê iáu m̄-bat thóng-tī ê kun-ông, m̄-koh in ē tit-tio̍h ông-kuân lâi kah hit-tsiah bíng-siù tsò-hué thóng-tī tsi̍t-tiám-tsing kú. 13 Tsit tsa̍p-ê ông lóng tông-ì tsiong ka-kī ê tsâi-lîng kah kuân-pìng kau hō͘ hit-tsiah bíng-siù. 14 In beh kah Iûⁿ-ko kau-tsiàn, Iûⁿ-ko ē tsiàn-iâⁿ, in-uī I sī bān-tsú ê Tsú, bān-ông ê Ông. Kah I tsò-hué hiah-ê siū ho͘-tiàu, siū kíng-suán ê tiong-si̍t sìn-tô͘ mā ē tik-sìng." 15 Hit-ê thiⁿ-sài koh kā guá kóng, "Lí só͘ khuàⁿ-tio̍h hit-ê îm-hū teh tsē ê hô-liû, tsiū-sī tsí ta̍k-ê bîn-tso̍k, ta̍k-ê kûn-tsiòng, ta̍k-ê pang-kok kah ta̍k-tsióng gí-giân ê lâng. 16 Lí só͘ khuàⁿ-tio̍h hit tsa̍p-ki kak kah hit-tsiah bíng-siù ē uàn-hūn hit-ê îm-hū, mā ē tshiúⁿ-tua̍t i ê tsâi-bu̍t hō͘ i thǹg-pak-theh, koh ē tsia̍h i ê bah, īng hué kā i sio-bia̍t. 17 In-uī Siōng-Tsú hō͘ hit tsa̍p-ê ông ê sim-lāi ū tsit-tsióng ê ì-liām lâi si̍t-hîng I ê tsí-ì, hō͘ in tâng-sim tsiong in ê kok kau-hō͘ bíng-siù, ti̍t-kàu Siōng-Tsú ê uē ìng-giām. 18 Lí só͘ khuàⁿ-tio̍h hit-ê tsa-bó͘-lâng, tsiū-sī teh tsiáng-kuán tē-tsiūⁿ hiah-ê kun-ông ê hit-tsō tuā-siâⁿ."