《巴克禮普世版聖經（試讀本）》

 | | | 轉寄

巴克禮普世版（試讀本） 啟示錄第十八章

作者 巴克禮普世版小組 2017.05.08

Pa-pí-lûn ê Bia̍t-bông
1 Jiân-āu guá khuàⁿ-tio̍h līng-guā tsi̍t-ê thiⁿ-sài tuì thiⁿ lo̍h-lâi. I ū tuā kuân-pìng, i ê îng-kng kā tsuân-tē tsiò-kng. 2 I tuā-siaⁿ huah, "Tó lo̍h-khì lò͘! Tuā Pa-pí-lûn tó lo̍h-khì à! Taⁿ tsit-ê siâⁿ tsiâⁿ-tsò kuí teh tuà ê só͘-tsāi, it-tshè ù-uè siâ-sîn ê kaⁿ-lô, í-ki̍p só͘-ū bô tshing-khì koh khó-ò͘ⁿ ê tsiáu-luī ê tsiáu-siū. 3 In-uī bān-kok lóng ū lim-tio̍h tsit-ê îm-hū îm-luān ê tsiú lâi jiá-khí Siōng-Tsú ê siū-khì, tē-tsiūⁿ ê kun-ông lóng bat kah i kiâⁿ kan-îm, tē-tsiūⁿ tsiah-ê sing-lí-lâng lóng ū tuì i ê tshia-hua hòng-tōng lâi huat-tsâi. 4 Guá koh thiaⁿ-tio̍h līng-guā tsi̍t-ê siaⁿ tuì thiⁿ-tíng huat-tshut, kóng, "Guá ê tsú-bîn ah, tio̍h tuì îm-hū hia tshut-lâi, tsiah bián bak-tio̍h i ê tsuē, mā bián kah i tsò-hué siū tsai-hō. 5 In-uī i ê tsuē í-king luí-tsik tú thiⁿ, Siōng-Tsú ē-kì-tit i ê siâ-ok hîng-uî. 6 Tio̍h tsiàu i khuán-thāi lán ê thāi-tō͘ lâi kā i khuán-thāi, tsiàu i ê só͘-tsò ê ka-puē kā i pò-ìng, īng i tiâu-tsiú ê pue, tiâu ka-puē kiông ê tsiú hō͘ i. 7 I bat án-tsuáⁿ îng-kng ka-kī lâi tshia-hua, tio̍h tsiàu án-ne hō͘ i kan-khó͘ pi-ai, in-uī i sim-lāi ka-kī kóng: Guá tsò lí-ông tsē tī ông-uī, pīng m̄-sī kuáⁿ-hū, guá tsua̍t-tuì bē tú-tio̍h pi-siong ê tāi-tsì. 8 Só͘-í tī tsi̍t-ji̍t ê tiong-kan, i ê tsai-hō ē lóng kàu: ū sí-bông, pi-ai, ki-hng, i mā ē hō͘ hué sio-bia̍t, in-uī sím-phuàⁿ i ê Tsú Siōng-Tsú ū tuā khuì-la̍t. 9 Tē-tsiūⁿ hiah-ê kah i kiâⁿ kan-îm koh kuè tshia-hua sing-ua̍h ê kun-ông, khuàⁿ-tio̍h siâⁿ teh hué-sio ê ian, ē uī-tio̍h siâⁿ pi-siong thî-khàu. 10 In kiaⁿ khuàⁿ-tio̍h Pa-pí-lûn só͘ siū ê kan-khó͘ tsiū khiā hn̄g-hn̄g kóng, "Tshám ah! tsit-ê tuā-siâⁿ Pa-pí-lûn tshám ah! kian-kò͘ ê siâⁿ tshám ah! in-uī koh tsi̍t-sî-á kú lí tsiū ē siū sím-phuàⁿ!" 11 Tē-tsiūⁿ hiah-ê sing-lí lâng mā uī-tio̍h i pi-siong thî-khàu, in-uī bô-lâng koh bé in ê huè, 12 tsiū-sī kim, gîn, pó-tsio̍h, tsin-tsu, iù-muâ-pò͘, si-tiû, tsí-sik kah tsu-âng-sik ê ko-kuì pò͘-liāu, tsiah-ê huè; kah ta̍k-khuán ê hiuⁿ-tshâ, ta̍k-khuán tshiūⁿ-gê tsè-phín, ta̍k-khuán kuì-khì ê tshâ, tâng, thih kah pe̍h-tsio̍h ê khì-kū, 13 mā ū jio̍k-kuì, tāu-khò͘, phang-liāu, phang-iû, jú-hiuⁿ, tsiú, iû, iù-mī, be̍h, gû, iûⁿ, bé, tshia, lô͘-po̍k, í-ki̍p sīm-tsí lâng ê lîng-hûn. 14 Hiah-ê sing-lí-lâng tuì i kóng, "Lí ê sim só͘ ì-ài hiah-ê hó-mi̍h lóng bô-khì à, lí it-tshè ê îng-huâ hù-kuì lóng siau-sit khì, íng-uán bē-tàng koh khuàⁿ-tio̍h." 15 Khò tsit-ê siâⁿ tsò sing-lí lâng huat-tsâi ê lâng, in-uī tsin kiaⁿ khuàⁿ-tio̍h tsit-ê siâⁿ só͘ siū ê kan-khó͘, lóng ē khiā hn̄g-hn̄g teh pi-siong thî-khàu, 16 kóng, "Tshám à! tsit-ê tuā-siâⁿ tshám à! pîng-sî tshīng iù-muâ-pò͘, tsí-sik kah tsu-âng-sik ê saⁿ, kui-sing-khu tsng kah lóng sī kim, pó-tsio̍h kah tsin-tsu. 17 Tsi̍t-sî-á kú, hiah-ê tsâi-hù lóng bô-khì. Só͘-ū ê tsûn-tiúⁿ, lí-kheh kah tsuí-siú í-ki̍p só͘-ū khò-hái sing-ua̍h ê lâng, lóng khiā hn̄g-hn̄g teh khuàⁿ, 18 khuàⁿ-tio̍h tsit-ê siâⁿ hué-sio ê ian, tsiū tuā-siaⁿ huah: "Ū tó tsi̍t-ê siâⁿ tshin-tshiūⁿ tsit-ê tuā-siâⁿ?" 19 In tī ka-kī ê thâu-khak-tíng sám thô͘-hún, pi-siong thî-khàu tuā-siaⁿ huah: "Tshám à! tsit-ê tuā-siâⁿ tshám à! Tī hái-ni̍h kiâⁿ-tsûn ê lâng lóng khò tsit-ê siâⁿ lâi huat-tsâi. Tsit-ê siâⁿ tsi̍t-sî-á kú to̍h to̍h huì-bô-khì!" 20 Thiⁿ ah, lín tsiah-ê sìn-tô͘ kah sian-ti tio̍h uī-tio̍h tsit-ê siâⁿ ê bia̍t-bông lâi huaⁿ-hí, in-uī Siōng-Tsú í-king thè lín sin-uan, kā tsit-ê siâⁿ tshú-hua̍t ā. 21 Jiân-āu ū tsi̍t-ê tuā khuì-la̍t ê thiⁿ-sài mo͘h tsi̍t-tè tshin-tshiūⁿ tuā-tsio̍h-bō ê tsio̍h-thâu khí-lâi, hiat lo̍h-khì hái-ni̍h, kóng, "Pa-pí-lûn tuā-siâⁿ mā ē tshin-tshiūⁿ án-ne hō͘ lâng tshut-la̍t hiat lo̍h-khì, tsua̍t-tuì bē-tàng koh khuàⁿ-tio̍h. 22 Mā bē koh thiaⁿ-tio̍h tuâⁿ-khîm, tsàu-ga̍k, pûn siau, pûn lat-pah ê siaⁿ; mā bē koh khuàⁿ-tio̍h ta̍k-tsióng kang-gē ê sai-hū; mā bē koh thiaⁿ-tio̍h e-bō ê siaⁿ; 23 mā bē koh khuàⁿ-tio̍h ting-hué ê kng; mā bē koh thiaⁿ-tio̍h sin-lông kah sin-niû ê siaⁿ. Lí ê sing-lí lâng pîng-sî tī tē-tsiūⁿ lóng sī ū sè-li̍k ê lâng; bān-kok mā lóng hō͘ lí ê siâ-su̍t bê-hi̍k khì! 24 Sian-ti, sìn-tô͘ kah tē-tsiūⁿ só͘-ū siū sat-hāi ê lâng ê hueh lóng tī tsit-ê siâⁿ tshuē-tio̍h, Pa-pí-lûn tsiah siū tshú-hua̍t."