《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第26章

作者 巴克禮普世版小組 2011.09.25

1, Iâ-so͘ kóng tsiah-ê ē suah, tsiū kā I ê bûn-tô͘ kóng,
2, Lín tsai kue3nng7 ji̍t puâⁿ-kè-tsueh tsiū kàu, Jîn-tsú tú-tio̍h kè/2-sàng khì tìng si̍p-jī-kè.
3, Hit sî hiah-ê tsè-si-thâu kap jîn-bîn ê tiúⁿ-ló tsū-tsi̍p tī tsè-si-thâu, miâ Kai-a-huat ê īⁿ,
4, saⁿ-kap tsham-siông īng khuí-khiat ê kue3liah8 Iâ-so͘ lâi thâi I.
5, Tān-sī kóng, Tng tsueh-kî m̄-thang, kiaⁿ-liáu jîn-bîn ê tiong-kan ū jiáu-luān.
6, Iâ-so͘ tī Pik-tāi-nî, thái-ko Se-bûn ê tshù,
7, ū hū-jîn-lâng tuà gi̍k-pân, lāi-bīn té ki̍k kuì-khì ê hiuⁿ-iû, tsiū-kūn I, tng I tsē toh ê sî piàⁿ tī I thâu-khak tíng.
8, Bûn-tô͘ khuàⁿ-tio̍h tsiū siū-khì, kóng, Án-ne phuà-huì ū siáⁿ lō͘-īng?
9, In-uī tsit-ê iû ē bē-tàng tsē-tsē gûn, lâi hō͘ sàn-tshiah lâng.
10, Iâ-so͘ tsai tsiū kā in kóng, Lín siáⁿ-sū thiau-lân tsit-ê hū-jîn-lâng ah? in-uī i só͘ kiâⁿ lâi khuán-thāi guá ê sī hó sū.
11, In-uī siông-siông ū sàn-tshiah lâng kap lín tī-teh, tān-sī guá bô siông-siông kap lín tī-teh.
12, In-uī i tò tsit-ê iû tī guá sing-khu, tsiū-sī tsún-pī guá bâi-tsòng lâi kiâⁿ ê.
13, Guá si̍t-tsāi kā lín kóng, Phó͘ thiⁿ-ē, bô lūn sím-mi̍h só͘-tsāi thuân tsit-ê hok-im, iā bueh kóng-khí tsit-ê hū-jîn-lâng só͘ kiâⁿ, lâi kì-liām i.
14, Hit sî tsa̍p-jī ê bûn-tô͘ tsi̍t-ê, miâ tsò Ka-lio̍k lâng Iû-tāi, khì kìⁿ hiah-ê tsè-si-thâu,
15, kóng, Lín bueh hō͘ guá juā tsuē, guá bueh tsiong I kau hō͘ lín? In tsiū kap i iok, hō͘ i gûn saⁿ-tsa̍p.
16, Tuì hit sî i tshuē ki-huē tsiong Iâ-so͘ kau hō͘ in.
17, Tû-kàⁿ-tsueh ê thâu-tsi̍t ji̍t, bûn-tô͘ tsiū-kūn Iâ-so͘ kóng, Ài guán tī sím-mi̍h só͘-tsāi kā lí tsún-pī tsia̍h puâⁿ-kè-tsueh?
18, I kóng, Lín ji̍p siâⁿ tshuē bó͘ lâng, kā i kóng, Sian-siⁿ kóng, Guá ê sî kūn à; guá kap guá ê bûn-tô͘ siú puâⁿ-kè-tsueh tī lí tau.
19, Bûn-tô͘ tsiàu Iâ-so͘ só͘ huan-hù ê khì kiâⁿ: tsiū tsún-pī puâⁿ-kè-tsueh.
20, Kàu ji̍t àm Iâ-so͘ kap tsa̍p-jī ê bûn-tô͘ tsē toh.
21, Tsia̍h ê sî, Iâ-so͘ kóng, Guá si̍t-tsāi kā lín kóng, lín tiong-kan tsi̍t lâng bueh bē guá.
22, Tsìng lâng tsin iu-būn, tsi̍t-ê tsi̍t-ê kā I kóng, Tsú ah, tsóng bô sī guá o͘h?
23, I ìn kóng, Kap guá tshun tshiú tī puâⁿ-ni̍h ê, hit-ê bueh bē guá.
24, Jîn-tsú tńg-khì tsiàu só͘ kì-tsài tsí I ê uē; tān-sī bē Jîn-tsú ê ū tsai-ē ah! hit lâng bô tshut-sì khah hó.
25, Buē I ê Iû-tāi kóng, Lia̍p-pí, tsóng bô sī guá o͘h? Kā i kóng, Lí í-king kóng à.
26, In teh tsia̍h ê sî, Iâ-so͘ the̍h piáⁿ, tsiok-siā peh-phuà, pun hō͘ bûn-tô͘, kóng, The̍h-khì tsia̍h; tsit-ê sī guá ê sing-khu.
27, Koh phâng pue tsiok-siā hō͘ in, kóng, Lín lóng tio̍h lim i;
28, tsit-ê sī guá ê huih, tsiū-sī bîng iok ê huih, uī-tio̍h tsē-tsē lâng lâi lâu-tshut ê, tì-kàu tsuē tit-tio̍h sià-bián.
29, Tān-sī guá kā lín kóng, taⁿ liáu-āu guá bô lim tsit-ê phû-tô ê tsiap, thìng-hāu hit ji̍t guá kap lín lim hit ê sin-ê tī guá ê Pē ê kok.
30, Í-king gîm si, tsiū tshut-lâi, khì Kaⁿ-ná suaⁿ.
31, Hit sî Iâ-so͘ kā in kóng, Kim-mî lín lóng bueh uī-tio̍h guá lâi siū that-gāi, in-uī ū kì-tsài kóng, Guá bueh phah bo̍k-tsiá, tsiū iûⁿ-kûn sì-suàⁿ.
32, Tān-sī guá koh-ua̍h liáu-āu bueh tāi-sing lín khì Ka-lī-lī-síng.
33, Pí-tik ìn I kóng, Tsìng lâng sui-jiân uī-tio̍h lí lâi siū that-gāi, iā guá íng-íng bô siū that-gāi.
34, Iâ-so͘ kā i kóng, Guá si̍t-tsāi kā lí kóng, kim-mî kue iáu-bē thî, lí bueh saⁿ pái m̄ jīn guá.
35, Pí-tik kā I kóng, Guá tsiū nā tio̍h kap lí sí, iā tsua̍t-tuì bô m̄ jīn lí. Tsìng bûn-tô͘ iā lóng sī án-ne kóng.
36, Iâ-so͘ kap in kàu tsi̍t só͘-tsāi, miâ Khik-se-má-nî, kā I ê bûn-tô͘ kóng, Lín tsiah-ê tsē tsia, thìng-hāu guá khì hia kî-tó.
37, Tsiah tshuā Pí-tik kap Se-pí-thài nn̄g ê kiáⁿ saⁿ-kap khì; tsiū iu-būn, tshám-tshueh.
38, Kā in kóng, Guá ê sim tsin iu-būn kàu bueh sí, lín tuà tsia kap guá kíng-síng.
39, Lio̍h-lio̍h-á tsìn-tsîng, bīn phak tī tē-ni̍h, kî-tó, kóng, Guá ê Pē ah, nā ē tsò-tit, tio̍h hō͘ tsit-ê pue lī-khui guá; tān-sī m̄-sī tsiàu guá só͘ ài, sī tsiàu lí só͘ ài.
40, Tsiū lâi bûn-tô͘ hia, khuàⁿ-tio̍h in teh khùn, kā Pí-tik kóng, Án-tsáiⁿ-iūⁿ, lín buē-uē kap guá kíng-síng puàⁿ-sî kú ah?
41, Tio̍h kíng-síng, tio̍h kî-tó, bián-tit ji̍p tī bê-hi̍k; sim-sîn kam-guān, tān-sī jio̍k-thé nńg-tsiáⁿ.
42, Tē jī pái koh khì kî-tó, kóng, Guá ê Pē ah, tsit-ê pue nā bē-tàng lī-khui guá, tik-khak tio̍h guá lim i, tsiū guān lí ê tsí-ì tit tsiâⁿ.
43, Koh-tsài lâi khuàⁿ-tio̍h in iū teh khùn, in-uī in ê ba̍k-tsiu siap.
44, Lī-khui in koh khì, tē saⁿ pái kî-tó, iā sī kóng hiah-ê uē.
45, Hit tia̍p koh tsiū-kūn bûn-tô͘, kā in kóng, Taⁿ thang khùn lâi an-hioh à. Sî kūn à, Jîn-tsú siū bē tī tsuē-jîn ê tshiú.
46, Khí-lâi saⁿ-kap kiâⁿ; bē guá ê lâng kūn à.
47, Iáu teh kóng ê sî, hut-jiân tsa̍p-jī ê bûn-tô͘ ê tsi̍t ê, Iû-tāi, lâi, iā ū kui tīn lâng kia̍h to kap thuî-á, tuì tsiah-ê tsè-si-thâu kap jîn-bîn ê tiúⁿ-ló hia saⁿ-kap lâi.
48, Buē I ê bat kap in thò àm-hō, kóng, Guá kā I tsim ê, hit lâng tsiū-sī, lín thang lia̍h I.
49, Tsik-sî tsiū-kūn Iâ-so͘, kóng, Lia̍p-pí, pîng-an; tsiū ti̍t-ti̍t kā I tsim.
50, Iâ-so͘ kā i kóng, Pîng-iú ah, lí bueh lâi tsò ê, tsiū tsò. Hiah-ê lâng tsiū tsìn-tsîng, khí tshiú lia̍h Iâ-so͘.
51, Hut-jiân ū kap Iâ-so͘ tī-teh ê tsi̍t lâng tshun tshiú pui̍h to, thâi tsè-si-thâu ê lô͘-po̍k, siah-khì i tsi̍t ê hī-á.
52, Iâ-so͘ tsiū kā i kóng, Siu lí ê to ji̍p guân-uī, in-uī huān-nā kia̍h to ê bueh tuì to sí.
53, Á-sī lí phah-sǹg guá buē-uē kiû guá ê Pē, tsiū I tī tsit tia̍p bueh kā guá tshe tsa̍p-jī iâⁿ khah ke ê thiⁿ-sài mah?
54, Nā án-ne, tsiū sìng-king só͘ kóng tsit-ê tāi-tsì tik-khak ū ê, tsáiⁿ-iūⁿ ē ìng-giām ah?
55, Hit sî Iâ-so͘ kā in hiah-ê lâng kóng, Lín kia̍h to kap thuî-á tshut-lâi lia̍h guá, tshin-tshiūⁿ bueh lia̍h tsha̍t mah? Guá ji̍t-ji̍t tsē tī tiān-lāi kà-sī lâng, iā lín bô lia̍h guá.
56, Tān-sī tsit-ê sū lóng tsiâⁿ, sī bueh ìng-giām sian-ti só͘ kì-tsài ê. Hit sî bûn-tô͘ lóng lī-khui I tsáu.
57, Lia̍h Iâ-so͘ ê tuà I kàu tsè-si-thâu Kai-a-huat ê só͘-tsāi, tī hia hiah-ê king-ha̍k-kàu-su kap tiúⁿ-ló í-king tsū-tsi̍p.
58, Pí-tik hn̄g-hn̄g tè I kàu tsè-si-thâu ê īⁿ, ji̍p lāi-bīn kap hiah-ê tshe-ia̍h saⁿ-kap tsē, bueh khuàⁿ hit ê kiat-kio̍k.
59, Tsiah-ê tsè-si-thâu kap tsuân kong-huē tshuē lām-sám ê kiàn-tsìng kong-kik Iâ-so͘, ài hō͘ I sí.
60, Sui-jiân tsē-tsē lām-sám kiàn-tsìng ê lâi, iā bô tit-tio̍h. Āu-lâi ū nn̄g-ê kàu, kóng,
61, Tsit-ê lâng bat kóng, Guá ē huí-huāi Siōng-tsú ê tiān, saⁿ ji̍t tsiū khí i.
62, Tsè-si-thâu khí-lâi kā I kóng, Lí lóng bô ìn mah? Tsiah-ê lâng só͘ kiàn-tsìng lí ê sī sím-mi̍h?
63, Tān-sī Iâ-so͘ tsīng-tsīng. Tsè-si-thâu kā I kóng, Tng tsit-ê tsin-ua̍h Siōng-tsú, guá bīng-līng lí tsiù-tsuā lâi kā guán kóng, lí kó-jiân sī Siōng-tsú ê Kiáⁿ, Ki-tok, á m̄-sī.
64, Iâ-so͘ kā i kóng, Lí í-king kóng à; tān-sī guá kā lín kóng, Tuì tsit tia̍p liáu-āu lín bueh khuàⁿ-tio̍h Jîn-tsú tsē tī ū kuân-lîng ê ê tuā pîng, tsē thiⁿ ê hûn lâi.
65, Tuì án-ne tsè-si-thâu thiah-li̍h ka-kī ê saⁿ, kóng, I kóng-tshut tshiàm-kuân siat-to̍k ê uē; lán iáu-kú khiàm sím-mi̍h kiàn-tsìng ah? Taⁿ lín í-king thiaⁿ-tio̍h I ê tshiàm-kuân siat-to̍k à.
66, Lín phah-sǹg tsáiⁿ-iūⁿ? Ìn kóng, I kai sí.
67, Tsiū phuì-nuā tī I ê bīn, īng kûn-thâu-bú tsing I; iā ū-ê īng tshiú siàn I,
68, kóng, Ki-tok ah, lí sī sian-ti, tio̍h kā guán kóng, phah lí ê sī siáⁿ-lâng.
69, Pí-tik tsē tī guā īⁿ; ū tsi̍t ê lú-pī kūn-uá i kóng, Lí iā bat kap Ka-lī-lī-síng lâng Iâ-so͘ tsò tīn.
70, Pí-tik tng tsìng lâng ê bīn-tsîng m̄ jīn kóng, Guá m̄ tsai lí teh kóng sím-mi̍h.
71, Tshut-khì kàu īⁿ mn̂g, koh tsi̍t ê lú-pī khuàⁿ-tio̍h i, kā tī hia ê lâng kóng, Tsit-ê iā bat kap Ná-sat-li̍k-lâng Iâ-so͘ tsò tīn.
72, Pí-tik koh m̄ jīn, suà tsiù-tsuā kóng, Guá m̄ bat hit ê lâng.
73, Ū hiah kú, piⁿ-á teh khiā ê lâng kūn-uá kā Pí-tik kóng, Lí si̍t-tsāi iā sī in ê tóng, in-uī tuì lí ê khiuⁿ-kháu lō͘-tshut.
74, I tsiah tsiù-mē, koh tsiù-tsuā, kóng, Guá m̄ bat hit ê lâng. Kue tsiū thî.
75, Pí-tik tsiū kì-tit Iâ-so͘ ê ē kóng, Kue iáu-bē thî, lí bueh saⁿ pái m̄ jīn guá. Tsiū tshut-khì guā-bīn, tuā thî-khàu.