《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第25章

作者 巴克禮普世版小組 2011.09.18

1, Hit sî Thian-kok bueh pí-phīng tsa̍p ê tsāi-sik-lú, kia̍h in ê ting, tshut-khì gîng-tsiap sin-kiáⁿ-sài.
2, Kî-tiong gō͘-ê gōng ê, gō͘ -ê tì-sik ê.
3, Gōng ê kia̍h in ê ting, bô līng-guā tuà iû.
4, Tsí-ū tì-sik ê kia̍h in ê ting līng-guā tuà iû tī in ê khì-kū lāi.
5, Sin-kiáⁿ-sài iân-tshiân, tsiū lóng tuh-ka-tsē teh khùn.
6, Puàⁿ mî, ū tuā siaⁿ kiò kóng, Sin-kiáⁿ-sài lâi à; lín tshut-lâi tsiap i.
7, Hit sî tsiah-ê tsāi-sik-lú lóng khí-lâi, siu-tsíng in ê ting.
8, Gōng ê kā tì-sik ê kóng, tshiáⁿ tsiong lín ê iû pun guán, in-uī guán ê ting bueh hua à.
9, Tì-sik ê ìn kóng, Kiaⁿ-liáu lín guán lóng bô kàu; khah hó khì tuì bē ê lâng ka-kī bué.
10, Khì bué ê sî, sin-kiáⁿ-sài kàu, hiah-ê piān-ê kap i ji̍p hun-in ê iân-toh; mn̂g tsiū kuaiⁿ.
11, Jiân-āu kî-û ê tsāi-sik-lú iā lâi, kóng, Tsú ah, Tsú ah, kā guán khui.
12, Tān-sī i ìn kóng, Guá si̍t-tsāi kā lín kóng, Guá m̄ bat lín.
13, Só͘-í tio̍h tiuⁿ-tî, in-uī lín m̄ tsai hit ê ji̍t, hit ê sî.
14, In-uī tshin-tshiūⁿ tsi̍t lâng bueh khì guā-kok; tsiū tiàu i ka-kī ê lô͘-po̍k tsiong só͘ ū ê kau-tāi in.
15, Tsi̍t-ê hō͘ i gûn gō͘ tshing, tsi̍t-ê hō͘ i nn̄g tshing, tsi̍t-ê hō͘ i tsi̍t tshing; kok tsiàu in ê tsâi-tiāu; tsiū khì guā-kok.
16, Niá gō͘ tshing ê, suî-sî khì tsò sing-lí, koh thàn gō͘ tshing.
17, Niá nn̄g tshing ê iā sī án-ne, koh thàn nn̄g tshing.
18, Tsí-ū hit-ê niá tsi̍t tshing ê khì, tsiū ku̍t tē, lâi khǹg-ba̍t i ê tsú-lâng ê gûn.
19, Kue3ku2-kú tsiah-ê lô͘-po̍k ê tsú-lâng kàu, kap in sǹg-siàu.
20, Niá gō͘ tshing ê lâi, koh tuà gō͘ tshing, kóng, Tsú ah, lí kau-tāi guá gō͘ tshing; lí khuàⁿ, guá ū koh thàn gō͘ tshing.
21, I ê tsú-lâng kā i kóng, Hó ah, hó koh tsīn-tiong ê lô͘-po̍k, lí tī tsió-ê í-king tsīn-tiong, guá bueh siat-li̍p lí lâi kuán tsuē-ê; thang ji̍p lí ê tsú-lâng ê khuài-lo̍k.
22, Niá nn̄g tshing ê iā lâi, kóng, Tsú ah, lí kau-tāi guá nn̄g tshing; lí khuàⁿ, guá ū koh thàn nn̄g tshing.
23, I ê tsú-lâng kā i kóng, Hó ah, hó koh tsīn-tiong ê lô͘-po̍k, lí tī tsió-ê í-king tsīn-tiong, guá bueh siat-li̍p lí lâi kuán tsuē-ê; thang ji̍p lí ê tsú-lâng ê khuài-lo̍k.
24, Niá tsi̍t tshing ê iā lâi, kóng, Tsú ah, guá tsai lí sī giâm-ha̍t ê lâng; bē iā ê só͘-tsāi, tsiū bueh siu-kuah; bē hun-suàⁿ ê só͘-tsāi, tsiū bueh khioh tsò tui.
25, Só͘-í guá kiaⁿ, tsiū tsiong lí tsi̍t tshing gûn khì tâi tī tē-ni̍h; taⁿ lí ê guân-mi̍h hîng lí.
26, I ê tsú-lâng tsiū ìn i kóng, Pháiⁿ koh pîn-tuāⁿ ê lô͘-po̍k ah, lí kì-jiân tsai guá bē iā ê só͘-tsāi, tsiū bueh siu-kuah, bē hun-suàⁿ ê só͘-tsāi, tsiū bueh khioh tsò tui.
27, Tsiū tio̍h tsiong guá ê gûn hē tī tsîⁿ-tiàm; guá lâi ê sî thang tit-tio̍h guá ê pún-gûn kap lī-sik.
28, Só͘-í tio̍h tuì i the̍h hit tsi̍t tshing, lâi hō͘ hit ê ū tsa̍p tshing(=tsi̍t bān) ê.
29, In-uī kìⁿ-nā ū ê, bueh hō͘ i, hō͘ i ū tshun; bô ê, liân i só͘ ū ê, iā bueh the̍h i.
30, Ia̍h hit ê bô lī-ik ê lô͘-po̍k, kuáⁿ i tī guā-bīn o͘-àm ê só͘-tsāi; tī hia bueh ū thî-khàu, kā-gê tshiat-khí.
31, Tng Jîn-tsú tī I ê îng-kng, kap lóng-tsóng ê thiⁿ-sài lâi ê sî, I bueh tsē I îng-kng ê tsō-uī,
32, tsū-tsi̍p bān pang tī I ê bīn-tsîng; I tsiū bueh hun-piat in, tshin-tshiūⁿ bo̍k-tsiá hun-piat mî-iûⁿ lī-khui suaⁿ-iûⁿ.
33, Tsiong mî-iûⁿ hē tī I ê tsiàⁿ-pîng, suaⁿ-iûⁿ hē tī I ê tò-pîng.
34, Hit sî Ông bueh kā tsiàⁿ-pîng ê kóng, Lín tuì guá ê Pē tit-tio̍h un-tián ê, tsìn-tsîng lâi sîng-tsiap kok, tsiū-sī tuì tshòng-tsō sè-kan í-lâi kā lín tsún-pī ê.
35, In-uī guá iau, lín bat hō͘ guá tsia̍h; guá tshuì-ta, lín hō͘ guá lim; guá tshut-guā, lín hō͘ guá tuà; guá thǹg-pak-theh, lín hō͘ guá tshīng;
36, guá phuà-pēⁿ, lín khuàⁿ-kò͘ guá; guá tī kaⁿ-ni̍h, lín lâi tshuē guá.
37, Hit sî gī lâng bueh ìn I kóng, Tsú ah, guán sím-mi̍h sî khuàⁿ-tio̍h lí iau, lâi hō͘ lí tsia̍h? tshuì-ta, lâi hō͘ lí lim?
38, Sím-mi̍h sî khuàⁿ-tio̍h lí tshut-guā, lâi hō͘ lí tuà? thǹg-pak-theh, lâi hō͘ lí tshīng?
39, Sím-mi̍h sî khuàⁿ-tio̍h lí phuà-pēⁿ, á-sī tī kaⁿ-ni̍h, lâi tshuē lí?
40, Ông bueh ìn i kóng, Guá si̍t-tsāi kā lín kóng, Lín kì-jiân kiâⁿ i tī guá ê hiaⁿ-tī siōng-sè ê ê tsi̍t-ê, tsiū-sī kiâⁿ i tī guá.
41, Koh bueh kā tò-pîng ê kóng, Lín siū tsiù-tsó͘ ê, tio̍h lī-khui guá, ji̍p íng-uán ê hué, tsiū-sī uī-tio̍h Mô͘-kuí kap i tsiah-ê sù-tsiá só͘ tsún-pī ê.
42, In-uī guá iau, lín m̄ bat hō͘ guá tsia̍h; guá tshuì-ta, lín m̄ bat hō͘ guá lim; guá tshut-guā, lín m̄ bat hō͘ guá tuà;
43, guá thǹg-pak-theh, lín m̄ bat hō͘ guá tshīng; guá phuà-pēⁿ kap tī kaⁿ-ni̍h, lín m̄ bat khuàⁿ-kò͘ guá.
44, In iā bueh ìn kóng, Tsú ah, guán sím-mi̍h sî khuàⁿ-tio̍h lí iau, á-sī tshuì-ta, á-sī tshut-guā, á-sī thǹg-pak-theh, á-sī phuà-pēⁿ, á-sī tī kaⁿ-ni̍h, lâi bô ho̍k-sāi lí ah?
45, I tsiū bueh ìn i kóng, Guá si̍t-tsāi kā lín kóng, Lín kì-jiân bô kiâⁿ i tī tsiah-ê siōng-sè ê ê tsi̍t ê, tsiū-sī bô kiâⁿ i tī guá.
46, Tsiah-ê lâng bueh khì ji̍p íng-uán ê hîng-hua̍t; tān-sī gī ê lâng ji̍p íng-uán ua̍h.