《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第三章

作者 巴克禮普世版小組 2011.04.10

1) Hit tong-sî, si-sé-tsiá Iok-hān lâi kàu Iû-thài ê khòng-iá suan-káng tō-lí,
2) I suan-iông kóng, "Lín tio̍h hué-kái; in-uī Thian-kok teh-bueh kàu à."
3) Tsit-ê lâng tsiū-sī sian-ti Í-sài-a só͘ teh kóng ê , " Ū siaⁿ tī khòng-iá teh huah kóng, Tio̍h uī Tsú tsún-pī tō-lō͘, Siu ti̍t I bueh kiâⁿ ê sió-lō͘."
4) Tsit ê Iok-hān tshīng lo̍k-tô-mn̂g ê saⁿ, io hâ phuê-tuà; i só͘ tsia̍h ê sī tsháu-meh kap iá-bi̍t.
5) Hit sî Iâ-lō͘-sat-líng kap tsuân Iû-thài-síng, í-ki̍p Iok-tàn-hô sì-tsiu-uî ê tsìng lâng lóng tshut-lâi kìⁿ Iok-han;
6) in jīn-tsuē, Iok-hān tsiū tī Iok-tàn-hô kā in kiâⁿ sé-lé.
7) Iok-hān khuàⁿ-tio̍h Huat-lī-sài-phài kap Sat-thó͘-kai-phài ê lâng, tsē-tsē lâi bueh hō͘ i sé-lé, tsiū kā in kóng, Lín tsiah-ê to̍k-tsuâ ah, siáⁿ-lâng kíng-kò lín siám-pī Siōng-tsú teh-bueh huat ê siū-khì à?
8) Taⁿ lín tio̍h īng hîng-uî lâi tsìng-bîng lín tsin-tsiàⁿ ū hué-kái.
9) M̄-thang ka-kī siūⁿ kóng, Ū A-pik-la̍h-hán tsò guán ê tsó͘-sian; guá kā lín kóng, Siōng-tsú ē-tàng tuì tsiah-ê tsio̍h-thâu seⁿ-tshut A-pik-la̍h-hán ê kiáⁿ-sun.
10) Taⁿ pó͘-thâu í-king khuà tī tshiū-thâu; nā bô kiat hó kué-tsí ê tshiū , lóng bueh kā i tshò khí-lâi, hiat-lo̍h hué-ni̍h.
11) Guá īng tsuí kā lín kiâⁿ sé-lé, sī bueh piáu-bîng lín ū hué-kái; tān-sī tī guá āu-bīn teh-bueh lâi ê Hit-uī, pí guá khah ū kuân-lîng, guá liân kā I kuāⁿ-ê to bē kham-tit; I bueh īng Sìng Lîng kap hué kā lín kiâⁿ sé-lé.
12) I ê tshiú the̍h tshiah-ki, bueh tsiong be̍h-tiâⁿ tsuân-pō͘ puà tshing-khì, I ē tsiong be̍h-á siu ji̍p-khì tshng-khò͘; tān-sī be̍h-hiuⁿ tsiū īng bē hua-khì ê hué kā sio-tiāu.
13) Hit sî, Iâ-so͘ tuì Ka-lī-lī-síng lâi kàu Iok-tàn-hô Iok-hān hia, bueh hō͘ sé-lé.
14) Tān-sī Iok-hān kā I tsó͘-tsí kóng, Guá ìng-kai tio̍h tuì lí niá sé-lé, lí thài-ē tian-tò lâi tshuē guá?
15) Iâ-so͘ ìn i kóng, " Taⁿ tshiáⁿ ún guá án-ne tsò tsiah ha̍h Siōng-tsú lóng-tsóng ê iau-kiû." Iok-hān tsiū tsiàu án-ne tsò.
16) Iâ-so͘ siū sé-lé liáu-āu, tsiū suî-sî tuì tsuí-ni̍h khí-lâi. Thiⁿ hut-jiân uī-tio̍h I khui, I tsiū khuàⁿ-tio̍h Siōng-tsú ê Sìng Lîng, tshin-tshiūⁿ hún-tsiáu kàng-lîm tī I ê tíng-bīn.
17) Koh ū siaⁿ tuì thiⁿ-tíng lâi, kóng, " Tsit-ê sī Guá só͘ thiàⁿ ê Kiáⁿ, Guá tsin-tsiàⁿ kah-ì ê."