《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第二章

作者 巴克禮普世版小組 2011.04.03

1) Tng Hi-lu̍t tsò-ông ê sî, Iâ-so͘ tī Iû-thài-síng ê Pik-lī-hîng-siâⁿ tshut-sì, ū kuí-nā ê tsheⁿ-siōng-ka tuì tang-hng lâi kàu Iâ-lō͘-sat-líng,
2) kóng, Tshut-sì bueh tsò Iû-thài-lâng ê ông ê âng-eⁿ-á tī tó-uī? in-uī guán tī tang-hng ū khuàⁿ-tio̍h I ê tsheⁿ tshut-hiān, só͘-í guán bueh lâi pài I.
3) Hi-lu̍t ông thiaⁿ-tio̍h tsiū sim-sîn put-an, tsuân Iâ-lō͘-sat-líng iā sī án-ne.
4) Tsiū tsū-tsi̍p só͘-ū ê tsè-si-thâu, kap bîn-kan ê king-ha̍k-kàu-su, mn̄g in Ki-tok ing-kai tī sím-mi̍h só͘-tsāi tshut-sì.
5) In ìn kóng, Tī Iû-thài ê Pik-lī-hîng-siâⁿ; in-uī sian-ti ê tsheh ū án-ne kì-tsài,
6) Iû-thài tē-khu, Pik-lī-hîng-siâⁿ ah, Tī Iû-thài tsiah ê siâⁿ ê thâu-lâng tiong, lí m̄ sī siōng sè ê; In-uī ū tsi̍t ê jîn-kun bueh tuì lí hia tshut-lâi, I bueh bo̍k-ióng Guá ê tsú-bîn Í-sik-lia̍t.
7) Hi-lu̍t tsiū thau-thau-á tiàu hit kuí-ê tsheⁿ-siōng-ka lâi, siông-sè mn̄g in hit lia̍p tsheⁿ sím-mi̍h sî tshut-hiān.
8) Tsiū tshe in khì Pik-lī-hîng-siâⁿ kóng, Lín khì siông-sè thàm-thiaⁿ hit ê eⁿ-á ê sū; tshuē-tio̍h tsiū lâi kā guá kóng, hō͘ guá iā thang khì pài I.
9) In thiaⁿ ông ê uē tsiū khì; hut-jiân tang-hng só͘ khuàⁿ-tio̍h ê tsheⁿ tī thâu-tsîng tshuā in, lâi kàu eⁿ-á ê só͘-tsāi, tsiū thîng tī hit tíng-bīn. 10) In khuàⁿ-tio̍h hit lia̍p tsheⁿ, hui-siōng huaⁿ-hí.
11) In ji̍p-khì tshù-lāi, khuàⁿ-tio̍h eⁿ-á kap I ê lāu-bú Má-lī-a; tsiū kuī lo̍h-khì pài eⁿ-á; khui in ê pó-a̍p, tsiong n̂g-kim, jú-hiuⁿ, bu̍t-io̍h tsò lé-mi̍h hiàn hō͘ I.
12) Siōng-tsú koh tī in ê bîn-bāng-tiong tsí-sī in m̄-thang tò-tńg khì Hi-lu̍t hia, tsiū tuì pa̍t tiâu lō͘ tńg-khì in pún-kok.
13) In tńg-khì liáu-āu, Tsú ê thiⁿ-sài lâi kā Iok-sik tī bîn-bāng-tiong tshut-hiān kóng, Khí-lâi, tshuā eⁿ-á kap I ê lāu-bú tô-tsáu khì Ai-ki̍p, tuà hia kàu guá koh kā lí thong-ti; in-uī Hi-lu̍t bueh tshuē eⁿ-á lâi kā I thâi-sí.
14) Iok-sik tsiū khí-lâi, thàu-mê tshuā eⁿ-á kap I ê lāu-bú khì Ai-ki̍p.; tī hia tuà kàu Hi-lu̍t sí-khì;
15) Tse sī bueh ìng-giām Tsú thok sian-ti só͘ kóng ê uē, kóng, Guá ū tiàu guá ê kiáⁿ tshut Ai-ki̍p.
16) Hi-lu̍t tsi̍t-ē tsai-iáⁿ hō͘ tsheⁿ-siōng-ka siat-kè khì, tsiū tuā siū-khì, hā-līng tsiong Pik-lī-hîng-siâⁿ kap tsiu-uî só͘ ū ê tsa-po͘ gín-á, tsiàu i tuì tsheⁿ-siōng-ka siông-sè tshâ-mn̄g ê sî sǹg-khí, nn̄g huè í-hā ê lóng thâi-sí.
17) Tse tsiū-sī ìng-giām tsá-tsîng thok sian-ti Iâ-lī-bí só͘ kóng ê uē,
18) Tī La̍h-má thiaⁿ-tio̍h siaⁿ, Thî-khàu koh tuā pi-siong, Luí-kiat uī i ê kiáⁿ-jî teh khàu; M̄-khíng siū an-uì, in-uī in lóng sí-khì à.
19) Hi-lu̍t sí liáu-āu, Tsú ê thiⁿ-sài tī Ai-ki̍p, kā Iok-sik thok-bāng kóng,
20) Khí-lâi, tshuā eⁿ-á kap I ê lāu-bú khì Í-sik-lia̍t tē; in-uī hiah-ê bueh sat-hāi eⁿ-á ê lâng í-king sí à.
21) I tsiū khí-lâi, tshuā eⁿ-á kap I ê lāu-bú tńg-khì Í-sik-lia̍t-tē.
22) Iok-sik tsi̍t-ē thiaⁿ-tio̍h A-ki-ló suà-tsiap i ê lāu-pē Hi-lu̍t tī Iû-thài tsò ông, tsiū m̄-káⁿ tńg-khì hia; i koh tī bîn-bāng-tiong tit-tio̍h tsí-sī, tsiū siám-pī khì kàu Ka-lī-lī-síng ê kíng-lāi.
23) Khì kàu tsi̍t ê kiò-tsò Ná-sat-li̍k ê siâⁿ, tiàm hia khiā-khí; sī bueh ìng-giām tsá-tsîng thok sian-ti só͘ kóng ê uē, I bueh kiò tsò Ná-sat-li̍k-lâng.