《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第28章

作者 巴克禮普世版小組 2011.10.23

1, An-hioh-ji̍t āu, tshit ji̍t ê thâu tsi̍t ji̍t, thiⁿ phú-kng. Bua̍t-tāi-lia̍p ê Má-lī-a kap pa̍t ê Má-lī-a lâi bueh khuàⁿ hit ê bōng.
2, Hut-jiân tē tuā tín-tāng, in-uī Tsú ê thiⁿ-sài tuì thiⁿ lo̍h-lâi, kō khui hit tè tsio̍h, lâi tsē tī tíng-bīn.
3, I ê bīn-māu tshin-tshiūⁿ sih-nà, saⁿ pe̍h tshin-tshiūⁿ seh.
4, Kò͘-siú ê lâng in-uī kiaⁿ, tsiū ngia̍uh-ngia̍uh-tshuah, piàn tshin-tshiūⁿ sí.
5, Thiⁿ-sài ìn hiah-ê hū-jîn-lâng kóng, Lín m̄ bián kiaⁿ, in-uī guá tsai lín teh tshuē tìng si̍p-jī-kue3e5 Iâ-so͘.
6, I bô tī tsia, in-uī I í-king koh-ua̍h, tsiàu I só͘ kóng ê; lín lâi khuàⁿ Tsú só͘ tó ê só͘-tsāi.
7, Iā tio̍h kín-kín khì kā I ê bûn-tô͘ kóng, I tuì sí-lâng tiong koh-ua̍h, iā bueh tāi-sing lín khì Ka-lī-lī-síng, tī hia lín bueh khuàⁿ-tio̍h I; guá í-king kā lín kóng à.
8, In kín-kín lī-khui bōng, iā kiaⁿ iā tuā huaⁿ-hí, tsáu khì pò I ê bûn-tô͘.
9, Hut-jiân Iâ-so͘ tú-tio̍h in, kóng, Pîng-an. In tsìn-tsîng, phō I ê kha, pài I.
10, Iâ-so͘ tsiū kā in kóng, M̄ bián kiaⁿ, khì pò guá ê hiaⁿ-tī, kah in khì Ka-lī-lī-síng, tī hia bueh khuàⁿ-tio̍h guá.
11, Hū-jîn-lâng khì ê sî, kò͘-siú ê ping ū-ê ji̍p siâⁿ, īng só͘ king-kue3e5 sū tsuân-pō͘ pò tsiah-ê tsè-si-thâu.
12, In tsiū kap tiúⁿ-ló tsū-tsi̍p, saⁿ-kap tsham-siông, īng tsē-tsē gûn hō͘ ping, kóng,
13, Lín tio̍h kóng, Guán teh khùn ê sî, I ê bûn-tô͘ mî-sî lâi thau-khì.
14, Siat-sú tsit-ê tāi-tsì hō͘ tsóng-tok thiaⁿ-tio̍h, guán tsiū bueh khǹg i, hō͘ lín bô sū.
15, In the̍h hiah-ê gûn, tsiàu só͘ kà in ê khì kiâⁿ; tsit-ê ē tsiū piàn thuân Iû-thài lâng tiong, kàu tī kin-á-ji̍t.
16, Tān-sī tsa̍p-it ê bûn-tô͘ khì Ka-lī-lī-síng, kàu Iâ-so͘ só͘ bat kā in tiāⁿ-tio̍h ê suaⁿ.
17, Khuàⁿ-kìⁿ I, tsiū pài I; tān-sī ū-ê giâu-gî.
18, Iâ-so͘ kūn-uá lâi tuì in kóng uē, kóng, Thiⁿ-tíng tē-ē ê kuân, í-king lóng-tsóng hō͘ guá.
19, Só͘-í lín tio̍h khì tsio bān jîn-bîn lâi tsò bûn-tô͘, kā in kiâⁿ sé-lé, hō͘ in kui tī Pē, Kiáⁿ, Sìng Lîng ê miâ;
20, kìⁿ-nā guá só͘ ū bīng-līng lín ê, tio̍h kà-sī in siú; koh guá ji̍t-ji̍t kap lín tī-teh, kàu sè-kan ê lō͘-bé.