《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第27章

作者 巴克禮普世版小組 2011.10.16

1, Kàu thiⁿ-kng, só͘-ū ê tsè-si-thâu kap jîn-bîn ê tiúⁿ-ló saⁿ-kap kè-bô͘ kong-kik Iâ-so͘, ài hō͘ I sí.
2, Í-king pa̍k I, tsiū tuà-khì kau hō͘ tsóng-tok Pí-lia̍p-to.
3, Hit sî bē I ê Iû-tāi khuàⁿ-tio̍h Iâ-so͘ siū tīng-tsuē, tsiū hō͘-hué, tsiong hiah-ê saⁿ-tsa̍p gûn hîng tsiah-ê tsè-si-thâu kap tiúⁿ-ló,
4, kóng, Guá bē bô tsuē ê ê huih, ū tsuē à. In kóng, Kap guán siáⁿ kan-sia̍p? Lí ka-kī táⁿ-sǹg.
5, Iû-tāi hiat hiah-ê gûn tī tiān-ni̍h, thè-khì ka-kī tiàu-sí.
6, Hiah-ê tsè-si-thâu the̍h hit ê gûn, kóng, Tse sī huih ê kè, m̄-thang lok tī khò͘-pâng.
7, In tsiū tsham-siông, tsiong hit ê gûn khì bué sio-huî lâng ê hn̂g, thang bâi-tsòng tshut-guā lâng.
8, Só͘-í hit khu hn̂g kàu taⁿ tshing tsò Huih-hn̂g.
9, Tuì án-ne ìng-giām tsá thok sian-ti Iâ-lī-bí só͘ kóng ê, kóng, In the̍h siū-kó͘-ê ê kè-gûn saⁿ-tsa̍p, tsiū-sī Í-sik-lia̍t ê kiáⁿ-sun tiong ū lâng só͘ kó͘ ê;
10, īng i lâi bué sio-huî-ê ê hn̂g, tsiàu Tsú só͘ bīng-līng guá ê.
11, Iâ-so͘ khiā tī tsóng-tok ê bīn-tsîng; tsóng-tok mn̄g I kóng, Lí sī Iû-thài lâng ê ông mah? Iâ-so͘ kā i kóng, Lí kóng, tsiū-sī.
12, I hō͘ hiah-ê tsè-si-thâu tiúⁿ-ló kò, I iā bô ìn.
13, Hit sî Pí-lia̍p-to kā I kóng, Hiah-ê lâng kiàn-tsìng lí kàu hiah tsuē hāng, lí bô thiaⁿ-tio̍h mah?
14, Iâ-so͘ bô ìn i tsi̍t kù uē, tì-kàu tsóng-tok tuā kî-kuài.
15, Kàu tsueh-kî tsóng-tok tsiàu-lē pàng tsi̍t-ê huān-lâng hō͘ tsìng lâng, sī tsiàu in só͘ ài ê.
16, Hit sî ū tshut-miâ ê huān-lâng, miâ kiò Pa-lia̍p-pa.
17, In í-king tsū-tsi̍p, Pí-lia̍p-to kā in kóng, Lín ài guá pàng siáⁿ-lâng hō͘ lín? sī Pa-lia̍p-pa, á-sī tshing tsò Ki-tok ê Iâ-so͘?
18, In-uī tsai in uī-tio̍h uàn-tò͘ tsiah kè/2-sàng Iâ-so͘.
19, I tsē tn̂g ê sî, i ê bó͘ tshe lâng kā i kóng, Tsit-ê gī lâng lí m̄-thang kan-sia̍p-tio̍h; in-uī guá kin-á-ji̍t tī bîn-bāng tiong uī-tio̍h I tsē-tsē kan-khó͘.
20, Tsiah-ê tsè-si-thâu kap tiúⁿ-ló kiau-so tsìng lâng, kiû pàng Pa-lia̍p-pa, bia̍t Iâ-so͘.
21, Tsóng-tok ìn kóng, Tsit nn̄g lâng lín ài guá pàng tó-uī tsi̍t-ê hō͘ lín? In kóng, Pa-lia̍p-pa. Pí-lia̍p-to kā in kóng,
22, Án-ne, tsiū tshing tsò Ki-tok ê Iâ-so͘, guá tio̍h tsáiⁿ-iūⁿ pān I? In lóng kóng, Tìng I si̍p-jī-kè.
23, Tsóng-tok kóng, Tsáiⁿ-iūⁿ, I ū kiâⁿ sím-mi̍h pháiⁿ? In tuā siaⁿ huah kóng, Tìng I si̍p-jī-kè.
24, Pí-lia̍p-to khuàⁿ-tio̍h bô tshái-kang, tian-tò ná jiáu-luān, tsiū phâng tsuí, tī tsìng lâng ê bīn-tsîng sué tshiú, kóng, Tī tsit-ê gī lâng ê huih guá bô tsuē, lín ka-kī táⁿ-sǹg.
25, Peh-sìⁿ lóng ìn i kóng, I ê huih kui tī guán kap guán ê kiáⁿ-sun.
26, I tsiū pàng Pa-lia̍p-pa hō͘ in. Í-king piⁿ-phah Iâ-so͘, tsiū huat-kau khì tìng si̍p-jī-kè.
27, Hit sî tsóng-tok ê ping tuà Iâ-so͘ ji̍p kong-tn̂g, tsū-tsi̍p tsuân iâⁿ uî I.
28, Thǹg I ê saⁿ, tsiong âng phàu kā I tshīng;
29, īng tshì-á pēⁿ bián-liû, tì tī I ê thâu-khak, īng lô͘-tik hē tī I ê tsiàⁿ-tshiú, kuī tī I ê bīn-tsîng hì-lāng I kóng, Iû-thài lâng ê ông, pîng-an.
30, Tsiū kā I phuì-nuā, kia̍h hit ki lô͘-tik, lâi sut I ê thâu-khak.
31, Hì-lāng suah, hit niá phàu tsiū kā I thǹg-khí-lâi, tsiong I ka-kī ê saⁿ kā I tshīng, tuà I khì tìng si̍p-jī-kè.
32, Tshut-lâi ê sî tú-tio̍h tsi̍t ê Kó͘-lī-nāi lâng miâ Se-bûn, bián-kióng i saⁿ-kap khì, hō͘ i giâ Iâ-so͘ ê si̍p-jī-kè.
33, Kàu tsi̍t só͘-tsāi, miâ Kok-kok-thaⁿ, tsiū-sī thâu-khak-uáⁿ ê só͘-tsāi, tsiū īng khó͘-táⁿ só͘ tiâu-hô ê tsiú hō͘ I lim;
34, I tshì-khuàⁿ, tsiū m̄ lim.
35, Í-king tìng I tī si̍p-jī-kè, tsiū tsò-khau pun I ê saⁿ-khò͘;
36, koh tsē tī hia kò͘-siú I.
37, Tsiū hē tsám-tiâu tī I ê thâu-khak ê tíng-bīn, siá kóng, Tsit-ê sī Iû-thài lâng ê ông, Iâ-so͘.
38, Hit sî ū nn̄g ê tsha̍t kap I tâng tìng tī si̍p-jī-kè, tsi̍t-ê tī tsiàⁿ-pîng, tsi̍t-ê tī tò-pîng.
39, King-kue3e5 lâng ki-tshì I, iô thâu kóng,
40, Lí huí-huāi tiān, saⁿ ji̍t koh khí ê, tio̍h kiù ka-kī; lí nā sī Siōng-tsú ê Kiáⁿ, tio̍h tuì si̍p-jī-kuè lo̍h-lâi.
41, Hiah-ê tsè-si-thâu kap king-ha̍k-kàu-su í-ki̍p tiúⁿ-ló iā sī án-ne hì-lāng I, kóng,
42, I bat kiù pa̍t lâng, buē-uē kiù ka-kī. I tsò Í-sik-lia̍t ê ông, taⁿ tio̍h tuì si̍p-jī-kue3loh8-lâi, guán tsiū bueh sìn I.
43, I uá-khò Siōng-tsú, Siōng-tsú nā huaⁿ-hí I, taⁿ tsiū tio̍h kiù I; in-uī I kóng, Guá tsiū-sī Siōng-tsú ê Kiáⁿ.
44, Kap I tâng tìng hit nn̄g ê tsha̍t iā sī án-ne mē I.
45, Tuì ji̍t-tiong-tàu kàu saⁿ tiám, piàn tē o͘-àm.
46, Tsha-put-to saⁿ tiám, Iâ-so͘ tuā siaⁿ âu-kiò kóng, Í-lī, Í-lī, la̍h-má sat-pok-tāi-nî, tsiū-sī kóng, Guá ê Siōng-tsú, guá ê Siōng-tsú, lí siáⁿ-sū pàng-lī guá?
47, Piⁿ-thâu khiā ê ū lâng thiaⁿ-tio̍h tsiū kóng, I teh kiò Í-lī-a.
48, Tiong-kan tsi̍t lâng tsik-sî tsáu-khì, the̍h hái-jiông, tsìm tshò͘, hâ tī lô͘-tik-á bé, hō͘ I suh.
49, Kî-û ê kóng, Tshiáⁿ bān, khuàⁿ Í-lī-a lâi kiù I á bô.
50, Iâ-so͘ koh tuā siaⁿ âu-kiò, tsiū tn̄g khuì.
51, Hut-jiân tiān-lāi ê tiùⁿ, tuì tíng kàu ē, li̍h tsò nn̄g pîng; tē tāng, tsio̍h-puâⁿ li̍h;
52, bōng khui, í-king teh khùn ê sìng-tô͘, in ê sin-khu tsē-tsē khí-lâi, tuì in ê bōng tshut;
53, kàu Iâ-so͘ koh-ua̍h liáu-āu, in ji̍p sìng siâⁿ, tshut-hiān tī tsē-tsē lâng.
54, Pé-tsóng kap saⁿ-tâng kò͘-siú Iâ-so͘ ê, khuàⁿ-tio̍h tē-tāng, kap só͘ king-kue3e5 sū, put-tsí kiaⁿ, kóng, Tsit-ê kó-jiân sī Siōng-tsú ê Kiáⁿ.
55, Ū tsē-tsē hū-jîn-lâng tī hia hn̄g-hn̄g teh khuàⁿ; in tsiū-sī tuì Ka-lī-lī-síng kun-tè Iâ-so͘ lâi ho̍k-sāi I ê;
56, tsiông-tiong ū Bua̍t-tāi-lia̍p ê Má-lī-a, Ngá-kok Iok-se ê lāu-bú Má-lī-a, kap Se-pí-thài ê kiáⁿ ê lāu-bú.
57, Í-king àm, ū A-lī-má-thài ê hó-gia̍h lâng lâi, miâ tsò Iok-sik, i iā sī Iâ-so͘ ê bûn-tô͘.
58, Hit lâng khì kìⁿ Pí-lia̍p-to, kiû Iâ-so͘ ê sin-si; Pí-lia̍p-to huan-hù tio̍h hō͘ i.
59, Iok-sik siu hit ê sin-si, īng tshing-khì ê iù-pò͘ pau i;
60, hē tī i ka-kī ê sin bōng, tsiū-sī i tī tsio̍h-puâⁿ só͘ phah ê; tsiū kō tuā tè tsio̍h tī bōng-mn̂g, tsiah khì.
61, Ū Bua̍t-tāi-lia̍p ê Má-lī-a kap pa̍t ê Má-lī-a tī hia, tsē tī bōng ê tuì-bīn.
62, Keh ji̍t, tsiū-sī tsún-pī tsueh āu ê tsi̍t ji̍t, hiah-ê tsè-si-thâu kap Huat-lī-sài-phài ê lâng tsū-tsi̍p kìⁿ Pí-lia̍p-to kóng,
63, Tāi-jîn ah, guán kì-tit hit ê bê-hi̍k lâng ê, ua̍h-teh ê sî bat kóng, Saⁿ ji̍t āu guá bueh koh-ua̍h.
64, Só͘-í tshiáⁿ lí bīng-līng kò͘-siú hit ê bōng, kàu tē saⁿ ji̍t; kiaⁿ-liáu I ê bûn-tô͘ lâi thau I khì, iā kā jîn-bîn kóng, I tuì sí-lâng tiong koh-ua̍h; án-ne, tsiū āu-lâi ê tsha-biū, pí tāi-sing khah lī-hāi.
65, Pí-lia̍p-to kā in kóng, Lín niá ping khì, tsiàu lín só͘ tsai-iáⁿ ê khì kò͘-siú.
66, In tsiū khì, hong tsio̍h kap siat ping, lâi kò͘-siú hit ê bōng.