《巴克禮普世版聖經（試讀本）》

 | | | 轉寄

巴克禮普世版（試讀本） 馬可福音第二章

作者 巴克禮普世版小組 2011.11.06

1, Kuè kuí-nā ji̍t Iâ-so͘ koh ji̍p Ka-pik-lông;
2, lâng thiaⁿ-tio̍h I tī tshù-lāi tsiū tsē-tsē lâng tsū-tsi̍p tì-kàu bô khàng-tē, liân mn̂g-kháu iā bô; I tsiū kóng tō-lí hō͘ in thiaⁿ.
3, Ū tuà tsi̍t ê piàn-suī ê tsiū-kūn I, sī sì lâng kng i lâi.
4, In-uī lâng tsuē, buē-uē kūn-uá, tsiū tī Iâ-so͘ tiàm ê só͘-tsāi, thiah tshù-tíng hō͘ i kui khang; tsiū tsiong piàn-suī ê tó tī pho͘-á tuī-lo̍h-khì.
5, Iâ-so͘ khuàⁿ-tio̍h in ê sìn, tsiū kā piàn-suī ê kóng, Suè-kiáⁿ, lí ê tsuē sià-bián à.
6, Ū kuí-nā ê king-ha̍k-kàu-su tsē tī hia, sim-lāi gī-lūn kóng, Tsit-ê lâng tsáiⁿ-iūⁿ án-ne kóng ah?
7, I sī tshiàm-kuân lām-sám; tû Siōng-tsú í-guā, siáⁿ-lâng ē sià-bián tsuē ah?
8, Iâ-so͘ sim-lāi liâm-piⁿ tsai in ū tsit tsióng ê gī-lūn, tsiū kā in kóng, Lín siáⁿ-sū tī sim-lāi gī-lūn tsiah-ê ah?
9, Kā piàn-suī ê kóng, Lí ê tsuē sià à, á-sī kóng, Khí-lâi, giâ lí ê pho͘-á lâi kiâⁿ, tó-uī tsi̍t hāng khah khuài?
10, Tsí-ū bueh hō͘ lín tsai Jîn-tsú tī tē-ni̍h ū kuân thang sià tsuē, (tsiū kā piàn-suī ê kóng),
11, Guá kā lí kóng, Khí-lâi, giâ lí ê pho͘-á tńg-khì lí ê tshù.
12, I tsiū khí-lâi, tī tsìng lâng ê bīn-tsîng suî-sî giâ i ê pho͘-á tshut-khì; tì-kàu tsìng lâng lóng gông-ngia̍h, kui îng-kng Siōng-tsú kóng, Guán tsiông-lâi bē bat khuàⁿ-tio̍h án-ne-siⁿ.
13, Iâ-so͘ koh tshut-khì kàu hái-kîⁿ; tsìng lâng lóng tsiū-kūn I, tsiū kà-sī in.
14, King-kue3e5 sî khuàⁿ-tio̍h A-li̍k-hui ê kiáⁿ Lī-bī tsē tī hiòng-kuan, tsiū kā i kóng, Tè guá. I tsiū khí-lâi tuè I. 15, Iâ-so͘ tsē toh tī Lī-bī ê tshù, ū tsē-tsē thiu-suè ê kap pháiⁿ lâng kap Iâ-so͘ tsham I ê bûn-tô͘ tâng tsē, in-uī hiah-ê lâng sī tsuē, iā teh tè I.
16, Huat-lī-sài ê king-ha̍k-kàu-su khuàⁿ-tio̍h I kap pháiⁿ lâng í-ki̍p thiu-suè ê saⁿ-kap tsia̍h, tsiū kā I ê bûn-tô͘ kóng, I kap thiu-suè ê í-ki̍p pháiⁿ lâng saⁿ-kap lim-tsia̍h ah.
17, Iâ-so͘ thiaⁿ-tio̍h, tsiū kā in kóng, Ióng-kiāⁿ ê bô khiàm i-sing, tān-sī phuà-pēⁿ ê tsiū tio̍h; guá lâi m̄-sī bueh tsio gī lâng, sī bueh tsio pháiⁿ lâng.
18, Iok-hān ê bûn-tô͘ kap Huat-lī-sài-phài ê lâng tng teh kìm-tsia̍h; in tsiū-kūn lâi kā I kóng, Iok-hān ê bûn-tô͘ kap Huat-lī-sài-phài ê lâng ê bûn-tô͘ kìm-tsia̍h, lí ê bûn-tô͘ bô kìm-tsia̍h, sī tsáiⁿ-iūⁿ?
19, Iâ-so͘ kā in kóng, Sin-kiáⁿ-sài kap hō-tshuā ê lâng tī-teh ê sî, in kiám ē kìm-tsia̍h mah? sin-kiáⁿ-sài iáu tâng tī-teh, in buē-uē kìm-tsia̍h.
20, Tān-sī sî-ji̍t bueh kàu, sin-kiáⁿ-sài bueh tuì in tiong-kan sí-khì, hit ji̍t in tsiū bueh kìm-tsia̍h.
21, Bô lâng īng sin pò͘ pó͘ kū saⁿ; nā ū, tsiū só͘ pó͘ ê hit tè ē kiù-li̍h i, tsiū-sī sin ê kiù-li̍h kū ê, i ê phuà-khang koh khah tuā.
22, Iā bô lâng īng sin tsiú té tī kū phuê-lông; nā ū, tsiū sin tsiú ē piak-li̍h phuê-lông, tsiú lāu, lông iā phah-pháiⁿ. Tsí-ū sin tsiú tio̍h ji̍p tī sin phuê-lông.
23, Iâ-so͘ tī an-hioh-ji̍t tuì be̍h-hn̂g king-kè, I ê bûn-tô͘ kiâⁿ lō͘ ê sî tiah be̍h-suī.
24, Huat-lī-sài-phài ê lâng kā I kóng, Lí khuàⁿ, in tī an-hioh-ji̍t kiâⁿ só͘ m̄ ing-kai kiâⁿ ê, sī tsáiⁿ-iūⁿ?
25, Iâ-so͘ kā in kóng, Tāi-pi̍t kap kun-tè ê lâng, tng khiàm-kheh koh iau ê sî só͘ kiâⁿ ê, lín bē tha̍k-tio̍h mah?
26, Tsiū-sī tng A-pí-a-thah tsò tsè-si-thâu ê sî i ū tsáiⁿ-iūⁿ ji̍p Siōng-tsú ê tshù, tsia̍h pâi-lia̍t ê piáⁿ, suà hō͘ kun-tè i ê lâng; tsi̍t hō piáⁿ, nā m̄-sī tsè-si, tsiū m̄ thang tsia̍h.
27, Koh kā in kóng, An-hioh-ji̍t uī-tio̍h lâng lâi siat-li̍p, m̄-sī lâng uī-tio̍h an-hioh-ji̍t.
28, Só͘-í Jîn-tsú iā sī an-hioh-ji̍t ê Tsú.