《巴克禮普世版聖經（試讀本）》

 | | | 轉寄

巴克禮普世版（試讀本） 馬可福音第三章

作者 巴克禮普世版小組 2012.12.23

1 Iâ-so͘ koh ji̍p-khì huē-tn̂g; tī hia ū tsi̍t-ê khuê-tshiú ê lâng.

2 Ū tsi̍t-kuá lâng tán teh khuàⁿ Iâ-so͘ tī An-hioh-ji̍t ū beh i-tī tsit-ê lâng á bô, ì-sù ài beh kā I kò.

3 Iâ-so͘ tsiū kā khuê-tshiú ê kóng, " Lâi khiā tuà tiong-ng.

4 Jiân-āu mn̄g kûn-tsiòng kóng, " An-hioh-ji̍t tsò hó tāi-tsì á-sī tsò pháiⁿ tāi-tsì; kiù lâng ê sèⁿ-miā, á-sī hāi lâng ê sèⁿ-miā, tó tsi̍t hāng khah ha̍p-huat?" In lóng tsīng-tsīng bô ìn puàⁿ-kù.

5 Iâ-so͘ siū-khì, tsi̍t-ê tsi̍t-ê kā in khuàⁿ, uī-tio̍h in ê sim ngē iu-būn. Tsiū tuì hit-ê lâng kóng, " Kā lí ê tshiú tshun tshut-lâi." Hit lâng tsi̍t-ē tshun tshut-khì, tshiú tsiū ho̍k-guân.

6 Huat-lī-sài-phài ê lâng tsiū uì huē-tn̂g tshut-khì, suî-sî kah Hi-lu̍t-tóng ê lâng tsò-hué kè-bô͘, khuàⁿ thang án-tsuáⁿ lâi hāi-sí Iâ-so͘.


7 Iâ-so͘ kah bûn-tô͘ thè-khì Ka-lī-lī-ô͘ piⁿ, ū tsi̍t tuā-tīn ê Ka-lī-lī-lâng tuè I khì.

8 Mā ū tsi̍t tuā-tīn lâng thiaⁿ-tio̍h Iâ-so͘ só͘ tsò ê tāi-tsì, tsiū tuì Iû-thài, Iâ-lō͘-sat-líng, Í-thó͘-mái, Iok-tàn-hô guā, kah Tshui-lô Se-tùn kíng-lāi lâi tshuē I.

9 In-uī lâng e-e-tīn-tīn tsin-tsē, Iâ-so͘ tsiū huan-hù bûn-tô͘ tio̍h tsún-pī tsi̍t tsiah tsûn-á lâi hō͘ I tsē, tsiah bián-tit hō͘ lâng kā I kheh píⁿ khì.

10 In-uī Iâ-so͘ ū i-hó tsin-tsē pēⁿ-lâng, só͘-í ū pēⁿ ê lâng lóng pik uá-lâi ài beh kā I bong.

11 Liân hiah-ê siâ-sîn tsi̍t-ē khuàⁿ-tio̍h Iâ-so͘ tsiū phak tī I ê bīn-tsîng, tuā-siaⁿ huah kóng, " Lí sī Siōng-Tsú ê Kiáⁿ."

12 Iâ-so͘ tsia̍p-tsia̍p kíng-kài in: m̄-thang kong-khai kóng-khí I ê tāi-tsì.


13 Iâ-so͘ tsiūⁿ suaⁿ, tiàu-tsi̍p I só͘ kah-ì ê lâng. In tsiū lâi-kàu I hia.

14 I tsiū siat-li̍p tsa̍p-jī lâng tsò I ê sù-tô͘, thang kah I siông-siông tsò-hué, mā thang tshe in khì suan-iông tō-lí,

15 koh hō͘ in ū kuáⁿ kuí ê kuân-pìng.

16 Tsa̍p-jī sù-tô͘ tsiū-sī: Se-bûn, Iâ-so͘ kā i hō-tsò Pí-tik.

17 Koh ū Se-pí-thài ê kiáⁿ Ngá-kok kah i ê hiaⁿ-tī Iok-hān. Iâ-so͘ kā tsit nn̄g lâng hō-tsò Puàn-nî-kî, ì-sù tsiū-sī " Luî-kong ê kiáⁿ",

18 koh ū An-tik-lia̍t, Hui-li̍k, Pa-to-lô-mái, Má-thài, To-má, A-li̍k-hui ê kiáⁿ Ngá-kok, Ta̍t-thài, kah Kik-tsìn-tóng-uân ê Se-bûn,

19 kah hit uī tshut-bē Iâ-so͘ ê Ka-lio̍k-lâng Iû-tāi.


20 Iâ-so͘ tńg-khì tshù-ni̍h. Tsìng-lâng koh tsū-tsi̍p uá-lâi, Iâ-so͘ kah bûn-tô͘ suah bē kò͘-tit tsia̍h-pn̄g.

21 I ê tshin-lâng thiaⁿ-tio̍h tsiū tshut-lâi beh kā I ap-tsè. In-uī ū-lâng kóng I ê tsing-sîn sit-siông.

22 Tuì Iâ-lō͘-sat-líng lo̍h-lâi ê king-ha̍k kàu-su kóng, " I sī hō͘ kuí-ông Pia̍t-se-pok hū-sin." koh kóng, " I sī uá-khò hit-ê kuí-ông lâi kuáⁿ kuí."

23 Iâ-so͘ kiò in lâi, tsiū īng phì-jū kā in kóng, " Sat-tàn ná-ē kuáⁿ Sat-tàn?"

24 Kok-ka nā hun-tsing lāi-luān, hit-ê kok-ka it-tīng ē bia̍t-bông.

25 Ka-tîng nā ka-kī khí hun-tsing, hit-ê ka-tîng mā it-tīng khiā bē tiâu.

26 Sat-tàn nā ka-kī hō͘-siōng kong-kik, i mā sī khiā bē tiâu, it-tīng ē bia̍t-bông.

27 " Bô-lâng ē-tàng ji̍p-khì ióng-sū ê tshù lâi tshiúⁿ i ê tsâi-bu̍t. Tio̍h tāi-sing kā hit-ê ióng-sū pa̍k khí-lâi, jiân-āu tsiah ē-tàng kiap i tshù-lāi ê tsâi-bu̍t.

28 " Guá si̍t-tsāi kā lín kóng, " Sè-kan-lâng bô-lūn huān sím-mi̍h tsuē, kóng sím-mi̍h huí-pòng ê uē, lóng ē tit-tio̍h sià-bián.

29 M̄-koh bô-lūn siáⁿ-lâng huí-pòng Sìng-Sîn, tsua̍t-tuì bē-tàng tit-tio̍h sià-bián, in-uī i sī huān-tio̍h íng-uán bē-tàng sià-bián ê tsuē."

30 Iâ-so͘ kóng tsiah-ê uē sī in-uī ū-lâng kóng, "I hō͘ siâ-sîn hū-sin."


31 Iâ-so͘ ê lāu-bú kah I ê hiaⁿ-tī lâi khiā tī guā-bīn, tshe lâng khì kiò I.

32 Kûn-tsiòng tsē tī Iâ-so͘ ê sì-tsiu-uî. ū-lâng kā I kóng, " Lí khuàⁿ, lí ê lāu-bú kah lí ê hiaⁿ-tī tī guā-bīn beh tshuē lí."

33 Iâ-so͘ ìn kóng, " Siáⁿ-lâng sī guá ê lāu-bú, guá ê hiaⁿ-tī?"

34 Jiân-āu I tsiū kā hiah-ê tsē tī sì-tsiu-uî ê lâng khuàⁿ tsi̍t liàn, kóng, " Lín tsiah-ê tsiū-sī guá ê lāu-bú kah guá ê hiaⁿ-tī.

35 Tsun-hîng Siōng-Tsú tsí-ì ê lâng tsiū-sī guá ê hiaⁿ-tī, tsí-muē kah lāu-bú."