《巴克禮普世版聖經（試讀本）》

 | | | 轉寄

巴克禮普世版（試讀本） 馬可福音第四章

作者 巴克禮普世版小組 2012.12.30

1 Iâ-so͘ koh tsi̍t pái tī Ka-lī-lī-ô͘ piⁿ kà-sī lâng. Ū tsi̍t tuā-tīn lâng tsū-tsi̍p uá-lâi, I suah tio̍h tsiūⁿ-tsûn khì tsē tuà phû tī tsuí-bīn ê tsûn-tíng. Kûn-tsiòng lóng uá-lâi khiā tī ô͘ ê huāⁿ-piⁿ.

2 Iâ-so͘ īng phì-jū kà-sī in tsin-tsē hāng sū. I kà-sī in ê sî kóng,

3 " Tio̍h tsù-ì thiaⁿ! Ū tsi̍t-ê tsoh-sit-lâng tshut-khì iā tsíng-tsí.

4 I iā ê sî, ū-ê ka-la̍uh tī lō͘-piⁿ. Tsiáu-á pue lâi, tsiū kā tsíng-tsí tsia̍h liáu-liáu.

5 Ū-ê ka-la̍uh tī tsio̍h-thâu-á tē, thô͘-bah tshián ê só͘-tsāi. In-uī thô͘-bah bô tshim, tsin kín tsiū huat-gê.

6 M̄-koh ji̍t-thâu tsi̍t-ē tshut tsiū pha̍k-tio̍h tsíng-tsí. In-uī bô kin tsiū ta-khì.

7 Ū-ê ka-la̍uh tī tshì-á lāi, tshì-á tsi̍t-ē tuā-tsâng tsiū kā tsíng-tsí hip sí, só͘-í bô kiat kué-tsí.

8 Ū-ê ka-la̍uh tī hó ê thó͘-tē, tsiū huat-gê tuā-tsâng khí

9 Iâ-so͘ koh kóng, " Ū hīⁿ-khang thang thiaⁿ ê lâng tio̍h thiaⁿ! "

10 Iâ-so͘ tan-to̍k tī hia ê sî, kûn-tsiòng kah tsa̍p-jī sù-tô͘ uá-lâi mn̄g I tsiah-ê phì-jū ê ì-sù.

11 Iâ-so͘ tsiū kā in kóng, " Siōng-Tsú Kok-tō͘ ê ò-biāu í-king hō͘ lín tsai. M̄-koh tuì hiah-ê it-puaⁿ lâng, ta̍k-hāng lóng tio̍h īng phì-jū lâi kā in kóng.

12 Tse sī beh ìng-giām Sìng-king só͘ kì-tsài kóng:『In khuàⁿ ū teh khuàⁿ, m̄-koh lóng bē bîng-pi̍k, In thiaⁿ ū teh thiaⁿ, m̄-koh lóng bē liáu-kái. In nā uì phì-jū lâi bîng-pi̍k liáu-kái, tsiū ē huê-sim tsuán-ì kui-hiòng Siōng-Tsú.In ê tsuē tsiū ē tit-tio̍h sià-bián.』」

13 Iâ-so͘ koh mn̄g in kóng, " Lín liân tsit-ê phì-jū to bē liáu-kái sī-bô? Án-ne ná-ē tsai kî-tha ê phì-jū?

14 Iā tsíng-tsí ê lâng sī teh pò-iông Siōng-Tsú ê hok-im.

15 Iā tī lō͘-piⁿ sī tsí pò-iông hok-im ê só͘-tsāi, tsiū-sī lâng thiaⁿ hok-im liáu-āu, Sat-tàn suî-sî lâi tsiong só͘ iā tī in sim-lāi ê hok-im tshiúⁿ-khì.

16 Iā tī tsio̍h-thâu-á tē ê sī tsí in thiaⁿ-tio̍h hok-im tsiū suî-sî huaⁿ-hí lâi tsiap-siū.

17 M̄-koh hok-im tī in ê sim-lāi bô tìng-kin, put-kò sī tsiām-sî niā-niā. Nā uī-tio̍h hok-im tú-tio̍h huān-lān á-sī pik-hāi, ē suî-sî pàng-sak.

18 Iā tī tshì-á lāi ê sī tsí lâng thiaⁿ-tio̍h hok-im liáu-āu,

19 suah in-uī ū sè-kan ê khuà-lī, tsîⁿ-tsâi ê bê-hi̍k, kah kî-tha ta̍k-tsióng ê su-io̍k ji̍p-khì sim-lāi kā hok-im jia-khàm teh, suah lóng bē kiat-si̍t.

20 Hiah-ê iā tī hó thó͘-tē ê sī tsí lâng thiaⁿ hok-im ū tsiap-siū tsiū kiat-si̍t, ū-ê saⁿ-tsa̍p puē, ū-ê la̍k-tsa̍p puē, ū-ê tsi̍t-pah puē."

21 Iâ-so͘ koh kā in kóng," Kám ū-lâng gia̍h ting lâi hē tī bí-táu ē-bīn á-sī bîn-tshn̂g-kha? Kám m̄-sī ē tshāi tī ting-tâi tíng?

22 In-uī ún-ba̍t ê bô tsi̍t hāng bē hián-tshut, am-khàm ê bô tsi̍t hāng bē lō͘-hiān.

23 Ū hīⁿ-khang thang thiaⁿ ê lâng tio̍h thiaⁿ."

24 Iâ-so͘ koh kā in kóng, " Tio̍h tsù-ì lín só͘ thiaⁿ ê. Lín īng sím-mi̍h niû-khì lâi niû hō͘ lâng, Siōng-Tsú mā beh īng kāng-khuán ê niû-khì niû hō͘ lín, sīm-tsí ē koh-khah ke-thiⁿ hō͘ lín.

25 Tuì ū īng un-sù sū-hōng Tsú ê lâng, Siōng-Tsú ē siúⁿ-sù koh-khah tsē hō͘ i; tuì bô īng un-sù sū-hōng Tsú ê lâng, liân i só͘ ū ê tsi̍t-sut-á un-sù mā beh kā i tshiúⁿ-khì.

26 Iâ-so͘ koh kóng, " Siōng-Tsú ê Kok-tō͘ tshin-tshiūⁿ lâng iā tsíng-tsí tuà i ê thó͘-tē.

27 I àm-sî khì khùn, ji̍t-sî khí-lâi, hit-ê tsíng-tsí huat-gê koh tsiām-tsiām tuā-tsâng, i m̄-tsai án-tsuáⁿ ē án-ne.

28 Thó͘-tē tsū-jiân sing-sán ngó͘-kok. Khí-thâu sī ng-á puh-gê, āu-lâi thò͘-suī, tsuè-āu tsiū pá-suī kiat-tsiâⁿ ngó͘-kok.

29 Ngó͘-kok si̍k ê sî, tsiū īng liâm-li̍k-á siu-kuah, in-uī siu-kuah ê sî-kî kàu à."

30 Iâ-so͘ iū-koh kóng, " Siōng-Tsú ê Kok-tō͘ lán beh án-tsuáⁿ lâi hîng-iông? Tio̍h īng sím-mi̍h phì-jū lâi suat-bîng?

31 Siōng-Tsú ê Kok-tō͘ tshin-tshiūⁿ tsi̍t lia̍p kuà-tshài-tsí, sui-jiân sī tē-tsiūⁿ tsíng-tsí tiong-kan siōng sè lia̍p,

32 m̄-koh iā lo̍h-tē liáu-āu, tsiū tsiām-tsiām tuā-tsâng khí-lâi, pí só͘-ū ê tshài-se khah tuā-tsâng, koh huat-tshut tuā ki tshiū-ue, khong-tiong ê tsiáu to ē-tàng tī tshiū-ńg-ē tsò siū."

33 Iâ-so͘ īng tsin-tsē tshin-tshiūⁿ tsit-tsióng ê phì-jū tuì kûn-tsiòng thuân hok-im, lóng īng in ē-tàng liáu-kái ê phì-jū.

34 Sū-si̍t-siōng I ta̍k-pái lóng īng phì-jū tuì in kóng. M̄-koh kan-taⁿ kah bûn-tô͘ tsò-hué ê sî, tsiah ta̍k-hāng siông-sè kā in suat-bîng.

35 Hit ji̍t ê àm-thâu-á, Iâ-so͘ kā bûn-tô͘ kóng, " Lán kuè lâi-khì hit-pîng huāⁿ."

36 In lī-khui kûn-tsiòng tsiūⁿ-tsûn, kah tī tsûn-tíng ê Iâ-so͘ tsò-hué khì. Iáu ū pa̍t tsiah tsûn mā tsò-hué khì.

37 Hut-jiân-kan khí tuā-hong, tsuí-íng phuah ji̍p-lâi tsûn-ni̍h, tì-kàu tsuí teh-beh muá tsûn.

38 M̄-koh Iâ-so͘ tī tsûn-bué tó tī tsím-thâu teh khùn. Bûn-tô͘ kā I kiò tshéⁿ, kóng, " Lāu-su, guán teh-beh bô miā lò͘, Lí kám bô iàu-kín?"

39 Iâ-so͘ tsiū tshéⁿ khí-lâi, tsik-pī hong, koh bīng-līng tsuí-íng kóng, " Tsīng lo̍h-lâi!" Hong tsiū thîng, tsuí-íng mā tiāⁿ lo̍h-lâi.

40 Iâ-so͘ tsiū kā in kóng, " Lín ná-ē hiah kiaⁿ? Lín iáu-bô sìn-sim sī-bô?"

41 In tsiū tuā kiaⁿ hō͘-siōng kóng-lâi kóng-khì, "Tsit-ê sī siáⁿ-lâng, liân hong kah tsuí-íng to lóng sūn-ho̍k I?"