《巴克禮普世版聖經（試讀本）》

 | | | 轉寄

巴克禮普世版（試讀本） 馬可福音第七章

作者 巴克禮普世版小組 2013.01.20

Tsó͘-sian ê Thuân-thóng (Mt 15:1-9))

1 Āu-lâi Huat-lī-sài-phài ê lâng kah tsi̍t-kuá tuì Iâ-lō͘-sat-líng lâi ê king-ha̍k kàu-su, tàu-tīn lâi tshuē Iâ-so͘.

2 In khuàⁿ-tio̍h Iâ-so͘ ê bûn-tô͘ tiong ū-ê īng bô tshing-khì ê tshiú, tsiū-sī bô sé-tshiú teh tsia̍h-pn̄g.

3 In-uī Huat-lī-sài-phài ê lâng kah só͘-ū Iû-thài-lâng, lóng tsun-siú kó͘-tsá-lâng ê thuân-thóng, nā bô kā tshiú sé kah tsin tshing-khì tsiū bô tsia̍h-pn̄g.

4 Tuì ke-lō͘ tńg-lâi nā bô sé-tshiú mā bô tsia̍h-pn̄g. In tsun-siú kî-tha tsin-tsē hāng, tshin-tshiūⁿ sé pue-á, kuàn-á kah tâng-khì ê kui-lē.

5 Huat-lī-sài-phài ê lâng kah king-ha̍k kàu-su mn̄g Iâ-so͘ kóng, " Lí ê bûn-tô͘ ná-ē bô tsun-siú tsó͘-sian ê thuân-thóng, īng bô sé tshing-khì ê tshiú teh tsia̍h-pn̄g?"

6 Iâ-so͘ ìn kóng, " Í-sài-a kóng liáu tsin tio̍h. I ī-giân lín tsiah-ê ké-hó ê lâng án-ne kóng, ' Tsiah-ê jîn-bîn īng tshuì-tûn tsun-kìng guá, in ê sim khiok lī-khui guá tsin hn̄g.

7 In īng lâng ê huat-tō͘ tòng-tsò Siōng-Tsú ê kài-bīng, lâi kà-sī lâng. In kìng-pài guá lóng bô tshái-kang.'

8 Án-ne lín sī pàng-sak Siōng-Tsú ê kài-bīng, lâi tsun-siú lâng ê thuân-thóng."

9 Iâ-so͘ koh kóng, " Lín īng kî-khiáu ê hong-huat khì-sak Siōng-Tsú ê kài-bīng, lâi beh tsun-siú lín ê thuân-thóng.

10 Mô͘-se bat kóng, ' Tio̍h tsun-kìng lí ê lāu-pē kah lí ê lāu-bú.' koh kóng, ' Mē lāu-pē á-sī mē lāu-bú ê lâng, it-tīng tio̍h tshù sí-hîng.'

11 M̄-koh lín kóng, ' Lâng nā tuì i ê lāu-pē á-sī lāu-bú kóng: Lí pún-té ē-tàng tuì guá tit-tio̍h ê hû-ióng-kim, í-king hiàn hō͘ Siōng-Tsú.

12 Án-ne lín tsiū tsún i, m̄-bián hû-ióng-kim hō͘ i ê lāu-pē á-sī lāu-bú.

13 Lín sī īng lín só͘ thuân-siū ê thuân-thóng lâi huì-tû Siōng-Tsú ê uē. Lín mā tsò tsin-tsē tsit khuán ê tāi-tsì."

Lūn Tshing-khì kah Bô Tshing-khì (Mt 15:10-20)

14 Iâ-so͘ koh kiò kûn-tsiòng lâi, kā in kóng, " Lín lóng tio̍h thiaⁿ guá ê uē, mā tio̍h liáu-kái:

15 Tuì guā-bīn ji̍p-khì lâng ê sing-khu ê, bē hō͘ lâng bô tshing-khì. Tsí-ū tuì lâng ê lāi-bīn tshut-lâi ê, tsiah ē hō͘ lâng bô tshing-khì."

16 (Ū ê tshau-pún ke tsit tsat:“Ū hī-khang thang thiaⁿ ê lâng tio̍h thiaⁿ.”)

17 Iâ-so͘ lī-khui kûn-tsiòng ji̍p-khì tshù-lāi. Bûn-tô͘ tsiū mn̄g I tsit-ê phì-jū ê ì-sù.

18 Iâ-so͘ ìn kóng, " Liân lín to bē bîng-pi̍k, sī-bô? Lín kám m̄-tsai tuì guā-bīn ji̍p-khì lâng ê sing-khu ê, bē hō͘ lâng bô tshing-khì.

19 In-uī m̄-sī ji̍p-khì lâng ê sim, sī ji̍p-khì lâng ê pak-tó͘, āu-lâi tsiū pàng lo̍h-khì sái-ha̍k. (I kóng án-ne sī tsí ta̍k-hāng ê tsia̍h-mi̍h lóng sī tshing-khì.)

20 Koh kóng, " Tuì lâng ê lāi-bīn tshut-lâi ê tsiah ē hō͘ lâng bô tshing-khì.

21 In-uī tuì lāi-bīn, tsiū-sī tuì lâng ê sim tshut-lâi ê pháiⁿ liām-thâu ē ín-khí lâng ê su-thong, thau-the̍h, thâi lâng, kan-îm

22 tham-sim, siâ-ok, kan-tsà, hò͘ⁿ-sik, tsi̍t-tò͘, huí-pòng, kiau-ngō͘, sī-hui put-hun.

23 Tsiah-ê pháiⁿ tāi-tsì lóng sī tuì lāi-bīn tshut-lâi, ē hō͘ lâng bô tshing-khì."

Tsi̍t-ê Hū-jîn-lâng ê Sìn-sim ( Mt 15:21-28)

24 Iâ-so͘ tuì hia tshut-huat khì kàu Tshui-lô kah Se-tùn ê kau-kài, ji̍p-khì tsi̍t-king tshù. I bô ài hō͘ lâng tsai, m̄-koh bih bô lō͘.

25 Suî-sî ū tsi̍t-ê hū-jîn-lâng, i ê sè-hàn tsa-bó͘-kiáⁿ hō͘ siâ-sîn hū-sin, thiaⁿ-tio̍h Iâ-so͘ ê tāi-tsì, tsiū lâi phak tī I ê kha-tsîng.

26 Tsit-ê hū-jîn-lâng sī tshut-sì tī Sū-lī-a Hui-nî-ki ê Hi-lia̍p-lâng, i kiû Iâ-so͘ kā i ê tsa-bó͘-kiáⁿ kuáⁿ kuí.

27 Iâ-so͘ kā i kóng, " Tio̍h hō͘ gín-á tāi-sing tsia̍h pá, in-uī the̍h gín-á ê piáⁿ hiat hō͘ káu tsia̍h sī m̄ hó."

28 Hū-jîn-lâng ìn kóng, " Tsú ah, sī à, m̄-koh toh-kha ê káu-á mā tsia̍h sè-hàn-gín-á ê piáⁿ-tshuì."

29 Iâ-so͘ kā i kóng, " In-uī lí kóng tsit kù uē, lí thang tńg-khì, kuí í-king lī-khui lí ê tsa-bó͘-kiáⁿ à."

30 Hū-jîn-lâng tńg-kàu tshù, khuàⁿ-tio̍h tsa-bó͘-kiáⁿ tó tī bîn-tshn̂g, kuí í-king tshut-khì à.

Iâ-so͘ I-hó Tsi̍t-ê Tshàu-hīⁿ Koh É-káu ê Lâng

31 Iâ-so͘ koh tuì Tshui-lô ê tē-khu king-kuè Se-tùn kah Te-ka-pho-lī tē-khu, lâi-kàu Ka-lī-lī-ô͘.

32 Ū-lâng tshuā tsi̍t-ê tshàu-hīⁿ koh é-káu ê lâng, lâi tshuē Iâ-so͘, khún-kiû Iâ-so͘ kā i huāⁿ-tshiú.

33 Iâ-so͘ tshuā hit-ê lâng lī-khui kûn-tsiòng khì piⁿ-á, tsiū īng tsíng-thâu-á tshng ji̍p-khì i siang-pîng ê hīⁿ-khang, koh phuì nuā lâi buah i ê tshuì-tsi̍h.

34Jiân-āu Iâ-so͘ ǹg thiⁿ thó͘-khuì, kā i kóng, " Í-huat-tāi". Ì-sù sī kóng, " Khui!"

35 HIt lâng ê siang-pîng hīⁿ-khang tsiū khui, tsi̍h-kun mā tháu līng khì, kóng-uē tsin tshing-tshó.

36Iâ-so͘ kíng-kài in m̄-thang kā lâng kóng tsit-ê tāi-tsì, m̄-koh I jú kíng-kài, in jú pò-iông.

37 Kûn-tsiòng put-tsí kî-kuài kóng, " I só͘ tsò ê tāi-tsì lóng sī hó, hō͘ tshàu-hī-lâng ē thiaⁿ-kìⁿ, é-káu ê lâng ē kóng-uē."