《巴克禮普世版聖經（試讀本）》

 | | | 轉寄

巴克禮普世版（試讀本） 馬可福音第八章

作者 巴克禮普世版小組 2013.01.27

Iâ-so͘ Hō͘ Sì-tshing Lâng Tsia̍h Pá(Mt 15:32-39)

1 Kuè bô kuí ji̍t, kûn-tsiòng koh tuā tsū-tsi̍p, bô siáⁿ-mi̍h thang tsia̍h, Iâ-so͘ kiò bûn-tô͘ lâi kā in kóng,

2 " Guá khó-liân tsit tīn kûn-tsiòng, in í-king kah guá tsò-hué saⁿ ji̍t, tsit-má bô mi̍h thang tsia̍h.

3 Guá nā hō͘ in iau-iau tńg-khì in tshù, in tī lō͘-tiong ē hūn tò-khì, in-uī in tiong-kan ū-ê tuì tsin-hn̄g ê só͘-tsāi lâi."

4 Bûn-tô͘ ìn kóng, " Tī tsit-ê phian-phiah ê só͘-tsāi, beh khì tó-uī tshuē hiah-tsē piáⁿ lâi hō͘ tsiah-ê lâng tsia̍h pá?"

5 Iâ-so͘ mn̄g in kóng, " Lín ū juā-tsē piáⁿ?" In kóng, " Tshit tè."

6 Iâ-so͘ tsiū huan-hù kûn-tsiòng tsē tuà thô͘-kha, jiân-āu the̍h khí hit tshit-tè piáⁿ, kám-siā Siōng-Tsú liáu-āu, peh khui, kau hō͘ bûn-tô͘ khì pun hō͘ kûn-tsiòng.

7 In mā ū kuí-bué-á sè-bué hî. Iâ-so͘ kāng-khuán kám-siā liáu-āu, kiò bûn-tô͘ the̍h-khì pun.

8 Tsìng-lâng lóng tsia̍h kàu pá, koh khioh só͘ tshun ê piáⁿ-tshuì muá tshit láng.

9 Jîn-sò͘ tsha-put-to ū sì-tshing. Iâ-so͘ tsiū hō͘ in sì-suàⁿ khì.

10 Jiân-āu Iâ-so͘ suî-sî kiò bûn-tô͘ tsē tsûn, khì kàu Tāi-má-lô͘-tāi ê kíng-lāi.

Huat-lī-sài-phài ê Lâng Iau-kiû Sîn-jiah (Mt 16:1-4)

11Huat-lī-sài-phài ê lâng lâi tshuē Iâ-so͘, khai-sí kah I piān-lūn. In siūⁿ-beh kā I tshì-thàm,iau-kiû I kiâⁿ tsi̍t-ê tuì thiⁿ-tíng lâi ê sîn-jiah.

12 Iâ-so͘ tuì sim-té thó͘ tsi̍t-ê tuā-khuì kóng, " Tsit sè-tāi ê lâng beh án-tsuáⁿ kiû sîn-jiah lè? Guá si̍t-tsāi kā lín kóng, tsua̍t-tuì bô koh ū sîn-jiah hō͘ tsit sè-tāi ê lâng."

13 Iâ-so͘ tsiū lī-khui in, koh tsē tsûn kuè-khì ô͘ ê hit-pîng huāⁿ.

Huat-lī-sài-phài kah Hi-lu̍t ê Kàⁿ-bó (Mt 16:5-12)

14 Bûn-tô͘ bē kì-tit tuà piáⁿ, tsûn-lāi tsí-ū tsi̍t-tè piáⁿ niā-niā.

15 Iâ-so͘ kā in kíng-kài kóng, " Lín tio̍h kín-sīn, tî-hông Huat-lī-sài-phài ê lâng ê kàⁿ-bó kah Hi-lu̍t ê kàⁿ-bó."

16 Bûn-tô͘ hō͘-siōng gī-lūn kóng, " Kám sī lán bô tuà piáⁿ, I tsiah án-ne kóng?"

17 Iâ-so͘ tsai-iáⁿ in ê ì-sù, tsiū kā in kóng, " Lín sī án-tsuáⁿ teh gī-lūn bô tuà piáⁿ ê tāi-tsì? Lín kám iáu-koh bē liáu-kái, bē bîng-pi̍k? Lín ê sim ná-ē hiah-ni̍h tūn?

18 Lín ū ba̍k-tsiu kám bô khuàⁿ-kìⁿ? ū hīⁿ-khang kám bô thiaⁿ-kìⁿ? lín kám bē kì-tit?

19Guá peh gō͘-tè piáⁿ pun hō͘ gō͘-tshing lâng tsia̍h, lín ū khioh piáⁿ-tshuì muá kuí nâ ?" In kóng, " Tsa̍p-jī nâ."

20 Iâ-so͘ koh mn̄g, " Guá peh tshit-tè piáⁿ pun hō͘ sì-tshing lâng tsia̍h, lín khioh piáⁿ-tshuì muá kuí láng ?" In kóng, " Tshit láng."

21 Iâ-so͘ tsiū kā in kóng, " Án-ne lín kám iáu-buē bîng-pi̍k?"

I-hó Pik-sài-tāi ê Tsheⁿ-mê-lâng

22 Iâ-so͘ kah bûn-tô͘ lâi-kàu Pik-sài-tāi. Ū-lâng tshuā tsi̍t-ê tsheⁿ-mê-ê lâi Iâ-so͘ ê bīn-tsîng, khún-kiû Iâ-so͘ kā i bong.

23 Iâ-so͘ khan tsheⁿ-mê-ê ê tshiú, tshuā i tshut-khì tsng-guā. Jiân-āu phuì tshuì-nuā tī i ê nn̄g-luí ba̍k-tsiu, koh īng siang tshiú huāⁿ tī hit tíng-bīn, mn̄g kóng, " Lí ū khuàⁿ-tio̍h siáⁿ-mi̍h bô?"

24 Hit-ê lâng gia̍h thâu khuàⁿ, kóng, " Guá khuàⁿ-tio̍h lâng, khuàⁿ-tio̍h in tshin-tshiūⁿ tshiū-á teh kiâⁿ."

25 Iâ-so͘ koh īng siang tshiú bong i ê nn̄g-luí ba̍k-tsiu. I tsù-ba̍k tsi̍t khuàⁿ tsiū uân-tsuân ho̍k-guân, ta̍k-hāng lóng khuàⁿ kah tsin tshing-tshó.

26 Iâ-so͘ kiò i tńg-khì in tshù, kóng, " Lí m̄-thang ji̍p-khì tsit-ê tsng-siā."

Pí-tik Sîng-jīn Iâ-so͘ Sī Ki-tok (Mt 16:13-20; Lk 9:18-21)

27 Iâ-so͘ kah bûn-tô͘ khì kàu Kai-sat-lī-a Hui-li̍p-pí ê kok tsng-siā. Tī lō͘-ni̍h Iâ-so͘ mn̄g bûn-tô͘ kóng, " Lâng teh kóng guá sī siáⁿ-lâng?"

28 Bûn-tô͘ ìn kóng, " Ū-lâng kóng Lí sī kiâⁿ sé-lé Iok-hān. Mā ū-lâng kóng Lí sī Í-lī-a. Koh ū-lâng kóng, Lí sī sian-ti tiong-kan ê tsi̍t-ê."

29 Iâ-so͘ koh mn̄g in kóng, " Á lín lè. Lín kóng guá sī siáⁿ-lâng?" Pí-tik ìn kóng, " Lí sī Ki-tok."

30 Iâ-so͘ tsiū bīng-līng in, m̄-thang tsiong I ê tāi-tsì kā lâng kóng.

Iâ-so͘ Ī-giân Ka-kī ê Sí-bông Kah Koh-ua̍h (Mt 16:21-28; Lk 9:22-27)

31 Iâ-so͘ khai-sí kà-sī bûn-tô͘ kóng, " Jîn-tsú it-tīng tio̍h siū tsin-tsē khó͘-lān, hō͘ tiúⁿ-ló, tsè-si-tiúⁿ, king-ha̍k kàu-su khì-sak, koh hō͘ lâng hāi-sí, saⁿ ji̍t āu koh-ua̍h."

32 Iâ-so͘ tsiong tsiah-ê tāi-tsì tshing-tshneg tshó-tshó kā in kóng. Pí-tik tsiū giú I lâi piⁿ-á kā I tsik-pī.

33 M̄-koh Iâ-so͘ ua̍t-tńg-sin khuàⁿ bûn-tô͘, tsiū tsik-pī Pí-tik kóng, " Sat-tàn, siám-khui! Lí só͘ siūⁿ ê m̄-sī Siōng-Tsú ê tāi-tsì, sī lâng ê tāi-tsì."

34 Jiân-āu Iâ-so͘ kiò kûn-tsiòng kah bûn-tô͘ uá-lâi, kā in kóng, " Lâng ài beh tuè guá, tio̍h pàng-sak ka-kī, giâ i ê si̍p-jī-kè lâi tuè guá.

35 In-uī ài-beh kiù ka-kī sèⁿ-miā ê lâng, ē sòng-sit sèⁿ-miā; uī-tio̍h guá kah hok-im lâi sòng-sit sèⁿ-miā ê lâng, ē kiù-tio̍h i ê sèⁿ-miā.

36Lâng nā tit-tio̍h tsuân sè-kài suah lâi sòng-sit ka-kī ê sèⁿ-miā, ū siáⁿ-mi̍h lī-ik lè?

37 Lâng ē-tàng īng siáⁿ-mi̍h tāi-kè lâi kau-uāⁿ ka-kī ê sèⁿ-miā?

38 Tī tsit-ê kan-îm tsuē-ok ê sè-tāi, uī-tio̍h guá kah guá ê uē kám-kak kiàn-siàu ê lâng, Jîn-tsú tī Thiⁿ-Pē ê îng-kng kah sìng thiⁿ-sài tsò-hué tsài-lîm ê sî, mā ē in-uī i kám-kak kiàn-siàu."