《巴克禮普世版聖經（試讀本）》

 | | | 轉寄

巴克禮普世版（試讀本） 馬可福音第十六章

作者 巴克禮普世版小組 2013.04.07

Iâ-so͘ ê Koh-ua̍h (Mt 28:1-8;Lk 24:1-12;Ih 20:1-10) 1 An-hioh-ji̍t kuè liáu-āu, Bua̍t-tāi-lia̍p ê Má-lī-a kah Ngá-kok ê lāu-bú Má-lī-a í-ki̍p Sat-lô-bí, ū bé phang-liāu beh lâi buah Iâ-so͘ ê sin-si. 2 Lé-pài-ji̍t thàu-tsá, ji̍t tú-á tshut ê sî, in lâi-kàu bōng-tē. 3 In iân-lō͘ kiâⁿ iân-lō͘ kóng, " Siáⁿ-lâng beh thè lán kā hit-tè bōng-kháu ê tsio̍h-thâu kō khui?" In-uī hit-tè tsio̍h-thâu hui-siông tuā tè. 4 In lâi kàu-uī gia̍h ba̍k tsi̍t-khuàⁿ, tsiū khuàⁿ-tio̍h hit-tè tsio̍h-thâu í-king kō khui. 5 In ji̍p-khì bōng lāi, khuàⁿ-tio̍h tsi̍t-ê siàu-liân-lâng tsē tī tsiàⁿ-pîng, tshīng pe̍h saⁿ, in tsiū tio̍h-kiaⁿ koh kî-kuài. 6 Siàu-liân lâng kā in kóng, " M̄ bián kiaⁿ, lín teh tshuē tìng si̍p-jī-kè ê Ná-sat-li̍k-lâng Iâ-so͘. I í-king koh-ua̍h, bô tī tsia. Lí khuàⁿ, tsia sī I bâi-tsòng ê só͘-tsāi. 7 Taⁿ lín tio̍h khì kā I ê bûn-tô͘, ti̍k-pia̍t tio̍h kā Pí-tik kóng, ' I ē pí lín tāi-sing khì kàu Ka-lī-lī-síng. Tsiàu I só͘ kā lín kóng ê, lín tī hia ē khuàⁿ-tio̍h I.'" 8 Hiah-ê hū-jîn-lâng lī-khui bōng, tsiū ti̍t-ti̍t tsáu, in-uī in kiaⁿ kah phi̍h-phi̍h-tshuah suah gāng khì. In mā bô kā lâng kóng siáⁿ-mi̍h, in-uī in tsin kiaⁿ.

Iâ-so͘ Tuì Bua̍t-tāi-lia̍p ê Má-lī-a Hián-hiān (Mt 38:9-10;Ih 20:11-18)
9 Lé-pài-ji̍t thàu-tsá, Iâ-so͘ koh-ua̍h liáu-āu, tāi-sing tuì Bua̍t-tāi-lia̍p ê Má-lī-a hián-hiān. Iâ-so͘ tsîng bat kā i kuáⁿ-tshut tshit-ê kuí. 10 Má-lī-a khì kā pîng-sî kin-tuè Iâ-so͘ ê lâng pò-kò. Hit sî hiah-ê lâng teh iu-būn thî-khàu. 11 In thiaⁿ-tio̍h Iâ-so͘ koh ua̍h, koh ū hō͘ Má-lī-a khuàⁿ-tio̍h, kìng-jiân iáu m̄ siong-sìn.

Iâ-so͘ Tuì Nn̄g-ê Bûn-tô͘ Hián-hiān (Lk 24:13-35)
12 Āu-lâi in tiong-kan nn̄g-ê bûn-tô͘ khì tsng-kha. Teh kiâⁿ ê sî, Iâ-so͘ īng bô kāng-khuán ê hîng-siōng tuì in hián-hiān. 13 In tńg-khì kā kî-tha ê lâng pò-kò, m̄-koh in hiah-ê lâng mā m̄ siong-sìn.

Iâ-so͘ Tuì Tsa̍p-it Ê Sù-tô͘ Hián-hiān (Mt 28:16-20;Lk 24:36-49;Ih 20:19-23;St 1:6-8)
14 Āu-lâi tsa̍p-it ê sù-tô͘ tsē teh tsia̍h-pn̄g ê sî, Iâ-so͘ tuì in hián-hiān, tsik-pī in ê m̄ sìn kah ngē-sim, in-uī in m̄ siong-sìn hiah-ê khuàⁿ-tio̍h Iâ-so͘ koh-ua̍h ê lâng kā in kóng ê uē. 15 Iâ-so͘ koh kā in kóng, " Lín tio̍h khì phó͘ thiⁿ-ē thuân Hok-im hō͘ bān-bîn thiaⁿ. 16 Ū sìn lâi niá-siū sé-lé ê lâng, ē tit-tio̍h kiù, m̄ sìn ê lâng ē siū tīng-tsuē. 17 Ū sìn ê lâng ē-tàng hōng Guá ê miâ kuáⁿ-kuí, koh ē kóng sin ê giân-gí. 18 In lia̍h tsuâ, á-sī lim-tio̍h siáⁿ-mi̍h to̍k, mā lóng bē siū siong-hāi. In kā pēⁿ-lâng huāⁿ-tshiú, pēⁿ-lâng ē tit-tio̍h i-hó."

Iâ-so͘ Tsiūⁿ-thiⁿ (Lk 24:50-53;St 1:9-11)
19 Tsú Iâ-so͘ kā in kóng tsiah-ê uē liáu-āu, tsiū siū tsiap tsiūⁿ-thiⁿ, tsē tī Siōng-Tsú ê tsiàⁿ-pîng. 20 Jiân-āu hiah-ê sù-tô͘ tshut-khì ta̍k só͘-tsāi thuân Hok-im, ū Tsú kah in tâng-kang, īng in só͘ kiâⁿ ê sîn-jiah lâi tsìng-bîng in só͘ thuân ê tō-lí.