《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第一章

作者 巴克禮普世版小組 2013.04.14

Sī-giân—Siá hō͘ Thê-o-hui-lô
1 Kìng-ài ê Thê-o-hui-lô tāi-jîn, Ū tsin-tsē lâng í-king kā guán tiong-kan só͘ huat-sing ê tāi-tsì, tsíng-lí kì-lo̍k lo̍h-lâi. 2 In tsiàu hiah-ê thuân tō-lí ê lâng, tuì khí-thâu tshin-ba̍k khuàⁿ-tio̍h ê tāi-tsì, lâi kì-lo̍k thuân hō͘ guán. 3 Guá ū tuì khí-thâu siông-sè tsa-khó tsuân-pō͘ ê tāi-tsì, só͘-í siūⁿ-beh tsiàu sūn-sī siá tshut-lâi, kià hō͘ lí. 4 Hō͘ lí thang bîng-pi̍k, lí só͘ niá-siū ê tō-lí sī khak-si̍t ê.

Ī-kò Kiâⁿ-sé-lé Iok-hān ê Tshut-sì
5 Hi-lu̍t tsò Iû-thài-ông ê sî, ū tsi̍t-ê miâ-kiò Sat-ka-lī-a ê A-pí-a pan ê tsè-si, i ê bó͘ sī A-lûn ê kiáⁿ-sun, miâ-kiò Í-lī-sa-pi̍k. 6 In nn̄g ang-á-bó͘ hō͘ Siōng-Tsú khuàⁿ-tsò sī gī-lâng, in-uī in tsun-siú Siōng-Tsú só͘-ū ê kài-bīng kah lé-gî lâi kiâⁿ. 7 M̄-koh in bô kiáⁿ, in-uī Í-lī-sa-pik bē huâi-īn, nn̄g lâng ê nî-huè iū-koh lāu à. 8 Ū tsi̍t ji̍t, Sat-ka-lī-a tsiàu i ê lûn-pan tī Siōng-Tsú ê bīn-tsîng teh tsip-hîng tsè-si ê tsit-bū. 9 Tsiàu tsè-si tsit-hūn ê lē, i thiu-khau tit-tio̍h ji̍p-khì Tsú ê sìng-tiān sio hiuⁿ. 10 Tng i teh sio hiuⁿ ê sî, huē-tsiòng kui tuā-tīn tī guā-bīn teh kî-tó. 11 Ū tsi̍t-ê Tsú ê thiⁿ-sài tuì i hián-hiān, khiā tī hiuⁿ-tuâⁿ ê tsiàⁿ-pîng. 12 Sat-ka-lī-a khuàⁿ-tio̍h, tsiū tio̍h-kiaⁿ koh kî-kuài, hui-siông put-an. 13 Thiⁿ-sài tuì i kóng, " Sat-ka-lī-a ah, m̄-bián kiaⁿ, in-uī Siōng-Tsú í-king thiaⁿ-tio̍h lí ê kî-tó. Lí ê bó͘ Í-lī-sa-pik beh seⁿ kiáⁿ, lí tio̍h kā i hō miâ-kiò-tsò Iok-hān. 14 Lí ē huaⁿ-hí koh khuài-lo̍k, tsin-tsē lâng mā ē uī-tio̍h i ê tshut-sì lâi huaⁿ-hí. 15 In-uī i tī Tsú ê bīn-tsîng beh tsò tuā jîn-bu̍t, phû-tô tsiú kah it-tshè ê tsiú lóng m̄-thang hō͘ i lim. I tī bó-thai tsiū hō͘ Sìng-Sîn tshiong-muá. 16 I ē hō͘ Í-sik-lia̍t kiáⁿ-sun, tsin-tsē lâng ua̍t-tńg lâi kui-hiòng Tsú, tsiū-sī in ê Siōng-Tsú. 17 I ē īng Í-lī-a ê tsing-sîn kah tsâi-lîng tsò Tsú ê sian-hong, hō͘ pē-bú kah kiáⁿ-jî hô-hó, hō͘ puē-gi̍k ê lâng huê-sim tsuán-ì lâi kin-tuè gī-lâng ê tì-huī, hō͘ jîn-bîn tsún-pī sim lâi gîng-tsiap Tsú." 18 Sat-ka-lī-a tuì thiⁿ-sài kóng, " Kám tsiâⁿ-si̍t ē án-ne? In-uī guá í-king lāu à, guá ê bó͘ nî-huè mā tsin tuā à." 19 Thiⁿ-sài ìn kóng, " Guá sī teh ho̍k-sāi Siōng-Tsú ê Ka-pik-lia̍t, hōng tshe-phài lâi kah lí kóng-uē, tuì lí pò-kò tsit-ê hó siau-sit. 20 In-uī lí m̄ siong-sìn guá ê uē, tsiū-sī kàu sî ē ìng-giām ê uē, lí ē piàn-tsiâⁿ é-káu bē kóng-uē, it-ti̍t kàu tsiah-ê tāi-tsì tit-tio̍h ìng-giām ê ji̍t." 21 Huē-tsiòng teh thìng-hāu Sat-ka-lī-a, in kám-kak kî-kuài, i tī sìng-tiān lāi ná-ē hiah-ni̍h kú. 22 I tshut-lâi suah bē-tàng kah in kóng-uē, in tsiū tsai i tī sìng-tiān ni̍h ū khuàⁿ-tio̍h īⁿ-siōng. I tuì in it-ti̍t pí tshiú-gí, i kìng-jiân sī é-káu. 23 Sat-ka-lī-a ho̍k-sāi ê ji̍t-kî muá, tsiū tńg-khì in tshù. 24 Bô juā kú liáu-āu, i ê bó͘ Í-lī-sa-pik ū-sin, gō͘ gue̍h ji̍t kú bô tshut-mn̂g. 25 Í-lī-sa-pik kóng, " Tsú hiah-ni̍h khuàⁿ-kò͘ guá, hō͘ guá m̄-bián koh hō͘ lâng thí-tshiò bē seⁿ-kiáⁿ."

Ī-kò Iâ-so͘ ê Tshut-sì
26 Í-lī-sa-pik ū-sin la̍k gue̍h-ji̍t ê sî, thiⁿ-sài Ka-pik-lia̍t hōng Siōng-Tsú ê tshe-phài, lâi-kàu Ka-lī-lī-síng tsi̍t-ê kiò-tsò Ná-sat-li̍k ê siâⁿ. 27 lâi tshuē tsi̍t-ê tsāi-sik-lí, miâ-kiò Má-lī-a. I í-king kah Tāi-pi̍t kiáⁿ-sun tsi̍t-ê miâ-kiò Iok-sik ê lâng tīng-hun. 28 Thiⁿ-sài khì kàu Má-lī-a hia, tuì i kóng, " Pîng-an, lí sī siōng ū hok-khì ê lâng. Siōng-Tsú kah lí tông-tsāi!" 29 Má-lī-a tuì tsiah-ê uē hui-siông tio̍h-kiaⁿ koh kî-kuài, sim-lāi it-ti̍t teh siūⁿ tsit-ê tshíng-an sī siáⁿ-mi̍h ì-sù. 30 Thiⁿ-sài kā i kóng, " Má-lī-a ah, m̄-bián kiaⁿ, in-uī lí tit-tio̍h Siōng-Tsú ê un-tián. 31 Taⁿ lí ē huâi-īn seⁿ tsi̍t-ê hāu-seⁿ, tio̍h kā I hō miâ-kiò-tsò Iâ-so͘. 32 I ē tsò tuā jîn-bu̍t, lâng ē tshing-ho͘ I Tsì-kuân Siōng-Tsú ê Kiáⁿ. Tsú, Siōng-Tsú ē tsiong I tsó͘-sian Tāi-pi̍t ê ông-uī siúⁿ-sù I. 33 I ē tsò ông íng-uán thóng-tī Ngá-kok ê kiáⁿ-sun. I ê kok mā ē bô kiông-tsīn." 34 Má-lī-a tuì thiⁿ-sài kóng, " Guá iáu-buē tshut-kè, ná-ē ū tsit-khuán tāi-tsì?" 35 Thiⁿ-sài ìn kóng, " Sìng-Sîn ē lîm-kàu lí, Tsì-kuân Siōng-Tsú ê kuân-lîng ē tì-ìm lí, só͘-í hit-ê teh-beh tshut-sì ê eⁿ-á sī Sìng ê, lâng ē tshing-ho͘ I tsò Siōng-Tsú ê Kiáⁿ. 36 Lí khuàⁿ! lí ê tshin-tsiâⁿ Í-lī-sa-pik. I sui-jiân nî lāu, mā í-king huâi-īn. Lâng kóng i bē seⁿ, m̄-koh i í-king ū-sin la̍k gue̍h-ji̍t ā. 37 In-uī Siōng-Tsú bô tsi̍t-hāng tāi-tsì tsò bē kàu." 38 Má-lī-a kóng, " Guá sī Siōng-Tsú ê lú-pī, guān tsiàu lí ê uē lâi kā guá sîng-tsuân." Thiⁿ-sài tsiū lī-khui i.

Má-lī-a Hóng-būn Í-lī-sa-pik
39 Kuè bô kuí ji̍t, Má-lī-a tshut-huat, kuáⁿ-kín khì kàu Iû-thài suaⁿ-tē ê tsi̍t-ê siâⁿ. 40 I ji̍p-khì Sat-ka-lī-a ê tshù, kā Í-lī-sa-pik tshíng-an. 41 Í-lī-sa-pik tsi̍t-ē thiaⁿ-tio̍h Má-lī-a tshíng-an, pak-tó͘ lāi ê thai-jî tsiū tiô-thiàu. Í-lī-sa-pik hō͘ Sìng-Sîn tshiong-muá, 42 I tsiū tuā-siaⁿ kóng, " Tsìng hū-jîn-lâng ê tiong-kan lí tit-tio̍h hok-khì, lí só͘ huâi-īn ê thai-jî mā tit-tio̍h hok-khì. 43 Guá ê Tsú ê lāu-bú lâi hóng-būn guá, guá ná-ē kham-tit? 44 In-uī guá tsi̍t-ē thiaⁿ-tio̍h lí tshíng-an ê siaⁿ, guá pak-tó͘ lāi ê thai-jî tsiū huaⁿ-hí tiô-thiàu. 45 Lí tsit-ê hū-jîn-lâng tsin ū hok-khì! in-uī Tsú só͘ kā lí kóng ê uē ē si̍t-hiān."

Má-lī-a ê Tsàn-bí-si
46 Má-lī-a kóng, " Guá ê sim-lîng tsun-kìng Tsú tsò tuā, 47 Guá ê sim-sîn in-uī kiù guá ê Siōng-Tsú lâi huaⁿ-hí. 48 In-uī I khuàⁿ-kò͘ lú-pī ê pi-bî, tuì taⁿ í-āu bān sè-tāi ê lâng lóng ē kóng, guá ū hok-khì. 49 In-uī tsuân-lîng ê Siōng-Tsú ū uī-tio̍h guá tsò uí-tāi ê tāi-tsì, I ê miâ sī sìng. 50 Kìng-uì I ê lâng I liân-bín in, Kàu bān sè-tāi. 51 I tshun-tshut kuân-lîng ê tshiú, kuáⁿ-suàⁿ sim-tsì kiau-ngō͘ ê lâng. 52 I kā tsiáng-kuân ê lâng, tuì i ê ông-uī thua lo̍h-lâi. Kā pi-bî ê lâng ko-sing. 53 I īng hó-mi̍h hō͘ iau-gō ê lâng tsia̍h kàu pá; I hō͘ hó-gia̍h ê lâng khang-khang tńg-khì. 54 I hû-tsō͘ I ê lô͘-po̍k Í-sik-lia̍t, ē-kì-tit kā in liân-bín, 55 Tsiàu I tuì lán tsó͘-sian ê ìng-ún, Lâi liân-bín A-pik-la̍h-hán kah i ê kiáⁿ-sun kàu bān sè-tāi." 56 Má-lī-a kah Í-lī-sa-pik tsò-hué tuà tsha-put-to ū saⁿ-gue̍h ji̍t, tsiah tńg-khì in tshù.

Kiâⁿ-sé-lé Iok-hān ê Tshut-sì
57 Í-lī-sa-pik sing-sán ê kî kàu, tsiū seⁿ tsi̍t-ê hāu-seⁿ. 58 Tshù-piⁿ keh-piah kah tshin-tsiâⁿ, thiaⁿ-tio̍h Tsú tuì i ū tuā liân-bín, tsiū kah i tsò-hué huaⁿ-hí. 59 Kàu eⁿ-á tshut-sì tē-peh ji̍t, in lâi beh kā eⁿ-á kiâⁿ kat-lé, koh tsiàu i ê lāu-pē ê miâ, kā i hō-tsò Sat-ka-lī-a. 60 I ê lāu-bú ìn kóng, " M̄-thang án-ne, tio̍h kā i hō-tsò Iok-hān." 61 Tāi-ke tsiū tuì i kóng, " Lí ê tshin-tsiâⁿ bô-lâng hō tsit-ê miâ." 62 In tsiū pí tshiú-gí mn̄g eⁿ-á ê lāu-pē, ài beh kā i hō siáⁿ-mi̍h miâ. 63 Sat-ka-lī-a thó tsi̍t tè siá-jī ê pán, siá kóng, " I ê miâ sī Iok-hān." Tāi-ke kám-kak kî-kuài. 64 Hit sî Sat-ka-lī-a suî-sî khui-tshuì kóng-uē, o-ló Siōng-Tsú. 65 Tshù-piⁿ keh-piah ê lâng lóng tio̍h-kiaⁿ. Tsuân Iû-thài ê suaⁿ-tē lóng teh tâm-lūn tsit hāng tāi-tsì. 66 Thiaⁿ-tio̍h ê lâng lóng siūⁿ kóng, " Án-ne, tsit-ê eⁿ-á tsiong-lâi ē tsiâⁿ-tsò siáⁿ-khuán ê lâng? In-uī ū Tsú ê kuân-lîng kah i tông-tsāi.

Sat-ka-lī-a ê Ī-giân
67 Iok-hān ê lāu-pē Sat-ka-lī-a hō͘ Sìng-Sîn tshiong-muá, tsiū ī-giân kóng, 68 Tio̍h o-ló Tsú, Í-sik-lia̍t ê Siōng-Tsú! In-uī I ū khuàⁿ-kò͘ koh kiù-sio̍k I e tsú-bîn. 69 Ū tuì I ê lô͘-po̍k Tāi-pi̍t ê ke, thè lán siat-li̍p ū tuā lîng-li̍k ê tsín-kiù-tsiá, 70 Tsiàu I tī kó͘-tsá thong-kuè sîn-sìng ê sian-ti ê tshuì íng-ún kóng, 71 I ē tsín-kiù lán thuat-lī tuì-ti̍k kah só͘-ū uàn-hūn lán ê lâng ê tshiú, 72 I ē liân-bín lán ê tsó͘-sian, koh kì-liām I sîn-sìng ê bîng-iok, 73 Tsiū-sī kah lán ê tsó͘-sian A-pik-la̍h-hán só͘ li̍p ê bîng-iok, 74 Hō͘ lán ē-tàng thuat-lī tsiah-ê tuì-ti̍k ê tshiú, 75 Hō͘ lán tsi̍t-sì-lâng tī I ê bīn-tsîng, īng sìng īng gī, bô kiaⁿ-hiâⁿ lâi ho̍k-sāi I. 76 Guá ê kiáⁿ ah, lí ē hō͘ lâng kiò-tsò Tsì-kuân ê Siōng-Tsú ê sian-ti, in-uī lí beh tsò Tsú ê sian-hong, lâi tsún-pī I ê lō͘, 77 Hō͘ I e tsú-bîn tuì tit-tio̍h sià-tsuē, lâi bîng-pi̍k Siōng-Tsú ê tsín-kiù. 78 Lán ê Siōng-Tsú tshiong-muá liân-bín ê sim, só͘-í hō͘ tsá-khí-sî ê ji̍t, tuì thiⁿ-tíng lâi tsiò lán. 79 Lâi tsiò lán tsiah-ê tiàm tī o͘-àm kah sí-ìm tiong ê lâng, Ín-tshuā lán ê kha, kiâⁿ-ji̍p pîng-an ê lō͘. 80 Eⁿ-á tsiām-tsiām tuā-hàn, sim-lîng mā ji̍t-ji̍t ióng-tsòng. I tiàm tī khòng-iá it-ti̍t kàu, i tī Í-sik-lia̍t tiong-kan kong-khai tshut-hiān hit ji̍t.