《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第七章

作者 巴克禮普世版小組 2013.05.26

Iâ-so͘ I-hó Lô-má Kun-kuaⁿ ê Lô͘-po̍k (Mt 8:5-13;Ih 4:43-54)
1 Iâ-so͘ kóng hō͘ bîn-tsiòng thiaⁿ ê uē kóng-suah liáu-āu, tsiū ji̍p-khì Ka-pik-lông. 2 Ū tsi̍t-ê Lô-má ê liân-tiúⁿ só͘ tiōng-iōng ê lô͘-po̍k, phuà-pēⁿ kah teh-beh sí. 3 Tsit-ê kun-kuaⁿ thiaⁿ-tio̍h Iâ-so͘ ê tāi-tsì, tsiū tshe kuí-nā-ê Iû-thài-lâng ê tiúⁿ-ló, khì kiû Iâ-so͘ lâi i-tī i ê lô͘-po̍k. 4 In lâi kìⁿ Iâ-so͘ tsiū pik-tshiat kiû I kóng, " Tsit-ê lâng ē kham-tit Lí kā i pang-tsō͘, 5 in-uī i ài-hō͘ lán Iû-thài-lâng, koh pún-sin uī lán khí huē-tn̂g." 6 Iâ-so͘ tsiū kah in khì. Lī liân-tiúⁿ ê tshù bô juā hn̄g ê sî, liân-tiúⁿ ū tshe kuí-nā-ê pîng-iú lâi kā Iâ-so͘ kóng, " Tsú ah, m̄-thang kā Lí lô-huân. guá bē kham-tit Lí lâi guá ê tshù. 7 Guá mā siūⁿ-kóng ka-kī bē kham-tit lâi tshuē Lí. Lí nā kóng tsi̍t-kù uē, guá ê lô͘-po̍k tsiū ē hó-khì. 8 In-uī guá mā sī hō͘ lâng kuán ê lâng, mā ū ping hō͘ guá kuán. Guá kā tsit-ê kóng, ' Khì', i tsiū khì; kā hit-ê kóng, ' Lâi', i tsiū lâi; kā guá ê lô͘-po̍k kóng, ' Án-ne tsò', i tsiū án-ne khì tsò." 9 Iâ-so͘ thiaⁿ-tio̍h tsiah-ê uē tsiū kám-kak kî-kuài, ua̍t-tńg-sin kā tuè I ê kûn-tsiòng kóng, " Guá kā lín kóng, liân Í-sik-lia̍t-lâng ê tiong-kan, Guá to m̄-bat khuàⁿ-tio̍h tshin-tshiūⁿ tsit-khuán ê sìn-sim." 10 Siū tshe ê lâng tńg-khì kàu tshù, khuàⁿ-tio̍h lô͘-po̍k í-king hó-khì à.

Iâ-so͘ Hō͘ Kuáⁿ-hū ê Kiáⁿ Koh-ua̍h
11 Koh bô juā kú, Iâ-so͘ khì tsi̍t-ê siâⁿ miâ-kiò Ná-in. I ê bûn-tô͘ kah kui tuā-tīn lâng, tuè I tsò-hué kiâⁿ. 12 Beh kàu siâⁿ-mn̂g ê sî, tú-hó ū-lâng kng tsi̍t-ê sí-lâng tshut-lâi. Sí-lâng ê lāu-bú ko͘-ko͘ seⁿ tsit-ê kiáⁿ, koh sī kuáⁿ-hū. Siâⁿ-lāi ū tsin-tsē lâng teh kā i sàng-tsòng. 13 Iâ-so͘ tsi̍t-ē khuàⁿ-tio̍h, tsiū kā i liân-bín, kóng, " M̄-thang háu." 14 Iâ-so͘ tsiū kiâⁿ uá-khì, bong hit-ê kng sin-si ê kè, kng ê lâng tsiū thîng-kha. Iâ-so͘ kóng, " Siàu-liân lâng, Guá kā lí kóng, ' Khí-lâi!'" 15 Sí-lâng tsiū peh khí-lâi tsē, suà khui-tshuì kóng-uē. 16 Iâ-so͘ tsiū kā tsit-ê siàu-liân-lâng kau hō͘ i ê lāu-bú. Tsìng-lâng lóng kiaⁿ-hiâⁿ, kui îng-kng hō͘ Siōng-Tsú, kóng, " Lán tiong-kan ū hing-khí tsi̍t-ê tuā sian-ti ." koh kóng, " Siōng-Tsú ū teh khuàⁿ-kò͘ I e tsú-bîn." 17 Tsiū án-ne, Iâ-so͘ tsit-ê miâ-siaⁿ thuân kàu Iû-thài kah sì-tsiu-uî ê ta̍k só͘-tsāi.

Kiâⁿ-sé-lé Iok-hān Tshe Bûn-tô͘ Khì Kìⁿ Iâ-so͘ (Mt 11:2-19)
18 Iok-hān ê bûn-tô͘ kā tsiah-ê tāi-tsì lóng-tsóng pò hō͘ in ê lāu-su tsai. 19 Iok-hān tsiū kiò nn̄g-ê bûn-tô͘ lâi, tshe in khì mn̄g Iâ-so͘: " Lí kám sī teh-beh lâi ê Hit-uī? Á-sī guán tio̍h koh thìng-hāu pa̍t-lâng?" 20 Hit nn̄g lâng lâi kìⁿ Iâ-so͘ tsiū kóng, " Si-se-tsiá Iok-hān tshe guán lâi tshiáⁿ-mn̄g Lí, ' Lí kám sī teh-beh lâi ê Hit-uī? Á-sī guán tio̍h koh thìng-hāu pa̍t-lâng?'" 21 Hit sî Iâ-so͘ ū i-hó tsin-tsē sin-khó͘ pēⁿ-thiàⁿ kah hō͘ siâ-sîn hū-sin ê lâng, koh hō͘ tsin-tsē tsheⁿ-mê-ê koh-tsài khuàⁿ-kìⁿ. 22 Iâ-so͘ tsiū ìn kóng, " Lín tio̍h khì, kā lín só͘ khuàⁿ-tio̍h kah só͘ thiaⁿ-tio̍h ê tāi-tsì pò Iok-hān tsai, tsiū-sī tsheⁿ-mê-ê koh khuàⁿ-kìⁿ, pái-kha-ê kiâⁿ-lō͘, thái-ko ê tshing-khì, tshàu-hīⁿ-lâng ê koh thiaⁿ-kìⁿ, sí-lâng koh-ua̍h, sàn-tshiah lâng ē-tàng thiaⁿ Hok-im. 23 Tuì Guá bô sit-khì sìn-sim ê lâng, si̍t-tsāi ū hok-khì." 24 Iok-hān só͘ tshe ê lâng tńg-khì liáu-āu, Iâ-so͘ tsiah thê-khí Iok-hān ê tāi-tsì, tuì kûn-tsiòng kóng, " Lín tsîng tshut-khì khòng-iá, beh khuàⁿ siáⁿ-mi̍h? Kám sī lô͘-tik hō͘ hong teh tshue tín-tāng? 25 Án-ne lín tshut-khì beh khuàⁿ siáⁿ-mi̍h? Kám sī beh khuàⁿ lâng tshīng tshia-hua ê saⁿ-khò͘? Lí khuàⁿ, tshīng saⁿ îng-huâ hù-kuì koh hióng-siū iàn-lo̍k ê lâng sī tī ông-kiong. 26 Án-ne, lín tshut-khì beh khuàⁿ siáⁿ-mi̍h? Kám sī sian-ti? Sī, m̄-koh guá kā lín kóng kuè, I pí sian-ti koh-khah uí-tāi. 27 Sìng-king ū kì-tsài kuan-hē Iok-hān, kóng, " Lí khuàⁿ, Guá tshe sù-tsiá tsò Lí ê tsiân-hong, I beh tī lí ê thâu-tsîng tsún-pī Lí ê tō-lō͘.( tsù: MLK 3:1) 28 Guá kā lín kóng, hū-jîn-lâng só͘ seⁿ ê bô tsi̍t-ê pí Iok-hān khah uí-tāi, m̄-koh tī Siōng-Tsú Kok-tō͘ lāi bî-sè ê iáu pí i khah uí-tāi." 29 Thiaⁿ-tio̍h tsiah-ê uē ê bîn-tsiòng, liân thiu-suè-ê mā lóng sîng-jīn Siōng-Tsú sī kong-gī, in-uī in lóng ū niá-siū Iok-hān ê sé-lé. 30 M̄-koh Huat-lī-sài-phài ê lâng kah lu̍t-huat-kàu-su, kī-tsua̍t Siōng-Tsú uī in só͘ an-pâi ê tsí-ì, in-uī in lóng bô siū Iok-hān ê sé-lé. 31 Iâ-so͘ koh kóng, " Tsit sè-tāi ê lâng, Guá beh īng siáⁿ-mi̍h lâi pí-phīng? In tshin-tshiūⁿ siáⁿ-khuán ê lâng? 32 In ná tshin-tshiūⁿ gín-á tsē tī ke-lō͘-kháu, hō͘-siōng tuā-siaⁿ huah kóng, ' Guán tuì lín pûn phín-á, lín bô thiàu-bú! Guán tuì lín tshiùⁿ tsòng-sik ê ai-kua, lín bô thî-khàu. 33 In-uī kiâⁿ-sé-lé Iok-hān lâi, bô tsia̍h piáⁿ bô lim tsiú, lín tsiū kóng, ' I hō͘ siâ-sîn hū-sin.' 34 Jîn-tsú lâi mā tsia̍h mā lim, lín tsiū kóng, ' I sī tham-tsia̍h hò͘ⁿ-tsiú ê lâng, sī thiu-suè-ê kah pháiⁿ-lâng ê pîng-iú.' 35 M̄-koh tsìng-bîng Siōng-Tsú ê tì-huī sī tsin-si̍t, sī hiah-ê tsun-siú Siōng-Tsú tì-huī ê lâng."

Ū Tsuē ê Hū-jîn-lâng Tit-tio̍h Sià-bián
36 Ū tsi̍t-ê Huat-lī-sài-phài ê lâng tshiáⁿ Iâ-so͘ tsia̍h-pn̄g. I tsiū ji̍p-khì Huat-lī-sài-phài ê lâng ê tshù tsē toh. 37 Hit sî, siâⁿ-lāi ū tsi̍t-ê pháiⁿ tsa-bó͘-lâng, tsai Iâ-so͘ tī Huat-lī-sài-phài ê lâng ê tshù teh tsia̍h-pn̄g, tsiū tuà tsi̍t-kuàn té phang-iû ê gi̍k-kuàn lâi. 38 Hit-ê tsa-bó͘-lâng khiā tī Iâ-so͘ ê āu-bīn teh thî-khàu, ū ba̍k-sái kā Iâ-so͘ ê kha tih-tâm. I tsiū īng ka-kī ê thâu-mn̂g lâi tshit, koh tsia̍p-tsia̍p tsim Iâ-so͘ ê kha, īng phang-iû lâi buah kha. 39 Tshiáⁿ Iâ-so͘ tsia̍h-pn̄g ê Huat-lī-sài-phài ê lâng khuàⁿ-tio̍h án-ne, sim-lāi siūⁿ-kóng, tsit-ê lâng nā sī sian-ti, it-tīng ē tsai sī siáⁿ-lâng kā I bong, sī siáⁿ-khuán ê tsa-bó͘-lâng? In-uī hit-ê tsa-bó͘-lâng sī pháiⁿ tsa-bó͘. 40 Iâ-so͘ kā Se-bûn kóng, " Guá ū uē beh kā lí kóng." Se-bûn ìn kóng, " Lāu-su, tshiáⁿ kóng." 41 Iâ-so͘ kóng, " Ū nn̄g-ê lâng khiàm tsè-tsú ê tsîⁿ. Tsi̍t-ê khiàm i gō͘-pah ê gîn-á, tsi̍t-ê khiàm i gō͘-tsa̍p. 42 In-uī nn̄g-ê lóng bô huat-tō͘ hîng tsè, tsè-tsú tsiū bián-tû in nn̄g lâng ê tsè. Án-ne, tó tsi̍t-ê ē khah thiàⁿ tsè-tsú?" 43 Se-bûn ìn kóng, " Guá siūⁿ sī hit-ê hō͘ i bián-tû khah-tsē tsè-bū ê lâng." Iâ-so͘ kā i kóng, " Lí ê phuàⁿ-tuàn tsìng-khak." 44 Jiân-āu Iâ-so͘ ua̍t-thâu ǹg hū-jîn-lâng, kā Se-bûn kóng, " Lí khuàⁿ-tio̍h tsit-ê hū-jîn-lâng bô? Guá ji̍p-khì lí ê tshù, lí bô īng tsuí hō͘ Guá sé kha, m̄-koh i īng ba̍k-sái tih-tâm Guá ê kha, koh īng thâu-mn̂g lâi kā Guá tshit kha. 45 Lí bô kā Guá tsim, m̄-koh tsit-ê hū-jîn-lâng tuì Guá ji̍p-lâi ê sî to̍h it-ti̍t bô thîng tsim Guá ê kha. 46 Lí bô īng iû buah Guá ê thâu-khak, m̄-koh i īng phang-iû buah Guá ê kha. 47 Só͘-í Guá kā lí kóng, i ê thiàⁿ khah-tsē piáu-sī i tsin-tsē ê tsuē í-king tit-tio̍h sià-bián. Tit-tio̍h sià-bián tsió ê lâng, i piáu-ta̍t tshut-lâi ê thiàⁿ tsiū tsió." 48 Iâ-so͘ kā hit-ê hū-jîn-lâng kóng, " Lí ê tsuē tit-tio̍h sià-bián à." 49 Kâng-toh ê lâng sim-lāi siūⁿ, tsit-ê teh sià tsuē ê sī siáⁿ-lâng? 50 Iâ-so͘ koh tuì hit-ê hū-jîn-lâng kóng, "Lí ê sìn-sim ū kiù-tio̍h lí, tsò lí an-sim tńg-khì."