《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第六章

作者 巴克禮普世版小組 2013.05.19

An-hioh-ji̍t ê Būn-tê (Mt 12:1-8;Mk 2:23-28)
1 Ū tsi̍t-ê An-hioh-ji̍t, Iâ-so͘ tuì be̍h-hn̂g king-kuè, I ê bûn-tô͘ tiah be̍h-suī, īng tshiú juê lâi tsia̍h. 2 Ū kuá Huat-lī-sài-phài ê lâng tuì in kóng, " Lín ná-ē tī An-hioh-ji̍t, tsò lu̍t-huat kui-tīng bô ing-kai tsò ê tāi-tsì?" 3 Iâ-so͘ ìn kóng, " Lín kám bô tha̍k-tio̍h Tāi-pi̍t kah kin-tuè ê lâng, pak-tó͘ iau ê sî só͘ tsò ê tāi-tsì? 4 I ji̍p-khì Siōng-Tsú ê tiān, the̍h hiàn-tsè ê piáⁿ lâi tsia̍h, koh hō͘ i kin-tuè ê lâng tsia̍h. Tsit tsióng piáⁿ kan-tāⁿ tsè-si tsiah thang tsia̍h." 5 Iâ-so͘ koh kā in kóng, " Jîn-tsú sī An-hioh-ji̍t ê Tsú."

Iâ-so͘ I-hó Khuê-Tshiú ê Lâng (Mt 12:9-14;Mk 3:1-6)
6 Koh ū tsi̍t-ê An-hioh-ji̍t, Iâ-so͘ ji̍p-khì huē-tn̂g kà-sī. tī hia ū tsi̍t-ê tsiàⁿ-tshiú khuê-khì ê lâng. 7 Ū kuá King-ha̍k-kàu-su kah Huat-lī-sài-phài ê lâng teh tng-tán, khuàⁿ Iâ-so͘ ū tī An-hioh-ji̍t kā lâng i-pēⁿ á bô. Ì-sù sī beh tshuē khang-phāng thang kò Iâ-so͘. 8 Iâ-so͘ tsai in ê khì-tô͘, tsiū kā hit-ê khuê-tshiú ê lâng kóng, " Khí-lâi! khiā tuà tiong-ng." Hit lâng tsiū khiā khí-lâi tī hia. 9 Jiân-āu Iâ-so͘ tuì in kóng, " Guá mn̄g lín, tī An-hioh-ji̍t tsò hó-sū á-sī tsò pháiⁿ sū, kiù sèⁿ-miā á-sī hāi sèⁿ-miā, tó tsi̍t-hāng khah ha̍h lu̍t-huat?" 10 Iâ-so͘ kā kûn-tsiòng khuàⁿ tsi̍t liàn liáu-āu tuì hit lâng kóng, " Kā lí ê tshiú tshun tshut-lâi! " I tsi̍t-ē tshun tshiú, tshiú tsiū ho̍k-guân. 11 Hiah-ê lâng hui-siông siū-khì, tsò-hué tsham-siông beh án-tsuáⁿ lâi tuì-hù Iâ-so͘.

Iâ-so͘ Kíng-suán Tsa̍p-jī Sù-tô͘ (Mt 10:1-4;Mk 3:13-19)
12 Ū tsi̍t kang, Iâ-so͘ tshut-khì suaⁿ-ni̍h kî-tó, kui mê tuì Siōng-Tsú kî-kiû. 13 Kàu thiⁿ-kng tsiū kiò bûn-tô͘ lâi; tuì in tiong-kan kíng-suán tsa̍p-jī lâng, kā in kiò-tsò sù-tô͘. 14 Tsiū sī Se-bûn, Iâ-so͘ koh kā i hō-miâ tsò Pí-tik, kah i ê hiaⁿ-tī An-tik-lia̍t, koh ū Ngá-kok kah Iok-hān, Hui-li̍k kah Pa-to-lô-mái, 15 Má-thài kah To-má, A-li̍k-hui ê kiáⁿ Ngá-kok kah kiò-tsò Se-lô-tí ê Se-bûn, 16 Ngá-kok ê kiáⁿ Iû-tāi, kah tshut-bē Iâ-so͘ ê Ka-lio̍k-lâng Iû-tāi.

Iâ-so͘ ê Kà-sī kah I-pēⁿ (Mt 4:23-25)
17 Iâ-so͘ kah sù-tô͘ lo̍h-suaⁿ lâi khiā tī pêⁿ-tē, tī hia ū tsin-tsē I ê bûn-tô͘ kah kui tuā-tīn ê bîn-tsiòng. Tsiah-ê lâng sī tuì Iû-thài tsuân-tē kah Iâ-lō͘-sat-líng, í-ki̍p Tshui-lô kah Se-tùn iân-hái ê só͘-tsāi lâi. 18 In lâi beh thiaⁿ Iâ-so͘ kóng tō-lí, mā beh hō͘ I i-pēⁿ. Hiah-ê hō͘ siâ-sîn hū-sin kiáu-jiáu ê lâng, mā lóng tit-tio̍h i-tī. 19 Tsìng-lâng lóng siūⁿ-beh kā I bong, in-uī ū kuân-lîng tuì Iâ-so͘ tshut-lâi, hō͘ in lóng tit-tio̍h i-hó.

Hok-khì kah Tsai-hō (Mt 5:1-12)
20 Iâ-so͘ gia̍h thâu khuàⁿ I ê bûn-tô͘, kóng, " Lín tsiah-ê sàn-tshiah-lâng, si̍t-tsāi ū hok-khì, in-uī Siōng-Tsú Kok-tō͘ sī lín ê. 21 Lín tsit-má teh iau ê lâng, si̍t-tsāi ū hok-khì, in-uī Siōng-Tsú ē hō͘ lín tsia̍h kah pá. Lín tsit-má teh thî-khàu ê lâng, si̍t-tsāi ū hok-khì, in-uī Siōng-Tsú ē hō͘ lín tshiò. 22 Lâng uī-tio̍h Jîn-tsú ê iân-kò͘ lâi uàn-hūn lín, kū-tsua̍t lín, bú-jio̍k lín, kā lín khuàⁿ-tsò pháiⁿ lâi pâi-thik ê sî, lín si̍t-tsāi ū hok-khì. 23 Hit ji̍t lín tio̍h huaⁿ-hí tiô-thiàu; in-uī lín tī thiⁿ-tíng ê pò-siúⁿ tsin tuā. Í-tsîng hiah-ê人ê tsó͘-sian mā sī án-ne khuán-thāi sian-ti. 24 M̄-koh lín tsiah-ê hó-gia̍h-lâng, ē ū tsai-hō! in-uī lín í-king teh hióng-siū an-lo̍k ê sing-ua̍h. 25 Lín tsit-má pá-tsiok ê lâng, ē ū tsai-hō! in-uī lín teh-beh iau. Lín tsit-má teh tshiò ê lâng, ē ū tsai-hō! in-uī lín teh-beh ai-siong thî-khàu. 26 Lín tsiah-ê hō͘ kûn-tsiòng o-ló ê lâng, ē ū tsai-hō! in-uī in ê tsó͘-sian mā bat án-ne khuán-thāi ké-sian-ti."

Thiàⁿ Ti̍k-jîn (Mt 5:38-48;7:12)
27 " M̄-koh lín tsiah-ê teh thiaⁿ ê lâng, Guá kā lín kóng, tio̍h thiàⁿ lín ê tuì-ti̍k. Tio̍h hó khuán-thāi uàn-hūn lín ê lâng. 28 Tio̍h tsiok-hok pháiⁿ-tshuì mē lín ê lâng. Tio̍h thè bú-jio̍k lín ê lâng kî-tó. 29 Nā ū-lâng siàn lí tsi̍t-pîng ê tshuì-phué, līng-guā tsi̍t pîng mā hō͘ i siàn; nā ū-lâng pak lín ê guā-saⁿ, liân lāi-saⁿ mā sūn-suà hō͘ i. 30 Nā ū-lâng kā lí kiû siáⁿ-mi̍h, tio̍h hō͘ i; nā ū-lâng tshiúⁿ lí ê mi̍h-kiāⁿ, m̄-thang kā i thó tńg-lâi. 31 Lín ài lâng án-tsuáⁿ tuì-thāi lín, mā tio̍h án-ne tuì-thāi lâng. 32 Lín nā thiàⁿ hiah-ê thiàⁿ lín ê lâng, ū siáⁿ-mi̍h thang o-ló? in-uī pháiⁿ-lâng mā sī thiàⁿ hiah-ê thiàⁿ in ê lâng. 33 Lín nā hó khuán-thāi hiah-ê hó khuán-thāi lín ê lâng, ū siáⁿ-mi̍h thang o-ló? in-uī pháiⁿ-lâng mā sī án-ne teh tsò. 34 Lín nā tsioh tsîⁿ hō͘ hiah-ê ū thang ǹg-bāng hîng lí tsîⁿ ê lâng, ū siáⁿ-mi̍h thang o-ló? in-uī pháiⁿ-lâng mā káⁿ tsioh tsîⁿ hō͘ ē tsiàu siàu-gia̍h lâi hîng ê lâng. 35 M̄-koh lín tio̍h thiàⁿ lín ê tuì-ti̍k, hó khuán-thāi in. Tsioh lâng mā m̄-thang siūⁿ-beh thó tńg-lâi. Án-ne lín ē tit-tio̍h tsin tuā ê pò-siúⁿ, koh ē tsiâⁿ-tsò Tsì-kuân Siōng-Tsú ê kiáⁿ-jî, in-uī I tuì bōng-un puē-gī kah tsò pháiⁿ ê lâng tsin tsû-pi. 36 Só͘-í lín tio̍h ū liân-bín ê sim, tshin-tshiūⁿ lín ê Thiⁿ-Pē teh liân-bín lâng."

Phue-phîng Lâng (Mt 7:1-5;10:24;15:14)
37 M̄-thang phue-phîng lâng, tsiah bē hō͘ lâng phue-phîng. M̄-thang kā lâng phuàⁿ-tsuē, tsiah bē hō͘ lâng kā lín phuàⁿ-tsuē. Tio̍h sià-bián lâng, tsiah ē tit-tio̍h lâng ê sià-bián. 38 Tio̍h hō͘ lâng, lín tsiah ē tit-tio̍h, jî-tshiáⁿ ē tsin tshiong-tsiok, kā lín ji̍h koh iô, hō͘ i tsa̍t kah muá tshut-lâi, piàⁿ lo̍h-khì lín ê saⁿ-á-phè, in-uī lín īng siáⁿ-mi̍h niû-khì lâi niû hō͘ lâng, lâng mā ē tsiàu án-ne niû tò-tńg khì hō͘ lín." 39 Iâ-so͘ koh īng phì-jū kā in kóng, " Tsheⁿ-mê ê lâng kám ē kā tsheⁿ-mê-ê tshuā-lō͘? Kám bē nn̄g-ê lâng lóng pua̍h-lo̍h kheⁿ-kau? 40 Ha̍k-sing bē-tàng iâⁿ-kuè lāu-su, m̄-koh ha̍k-sing nā o̍h ū khí, tsiū ē tshin-tshiūⁿ i ê lāu-su." 41 " Lí ná-ē kan-tāⁿ khuàⁿ-tio̍h hiaⁿ-tī ba̍k-tsiu lāi ê kì-sut-hu, ia̍h bô tsù-ì tio̍h lí ka-kī ba̍k-tsiu lāi ê tshâ-kho͘? 42 Á-sī lí pún-sin bô khuàⁿ-kìⁿ ka-kī ba̍k-tsiu lāi ê tshâ-kho͘, ná ē-tàng kā lí ê hiaⁿ-tī kóng, ' Hiaⁿ-tī tsí-muē ah, lí ba̍k-tsiu lāi ê kì-sut-hu hō͘ guá kā i the̍h tshut-lâi'? Ké-hó ê lâng ah, tio̍h sing kā lí ka-kī ba̍k-tsiu lāi ê tshâ-kho͘ the̍h tshut-lâi, tsiah ē-tàng khuàⁿ tshing-tshó, thang kā lí hiaⁿ-tī ba̍k-tsiu lāi ê kì-sut-hu the̍h tshut-lâi."

Tshiū kah Kué-tsí (Mt 7:16-20;12:33-35)
43 In-uī hó tshiū bē kiat pháiⁿ kué-tsí, pháiⁿ tshiū mā bē kiat hó kué-tsí. 44 Khuàⁿ kué-tsí tsiū ē-tàng tsai hit tsâng tshiū ê hó-pháiⁿ. Bē-tàng tuì tshì-phè lāi bán bû-hua-kó, mā bē-tàng tuì tshì-á-tîn bán phû-tô. 45 Hó-lâng tuì i ê sim só͘ tsik-tsū ê hó, lâi huat-tshut hó; pháiⁿ-lâng tuì i só͘ tsik-tsū ê pháiⁿ, lâi huat-tshut pháiⁿ, in-uī lâng sim-lāi tshiong-muá siáⁿ-mi̍h, tshuì tsiū ē kóng tshut siáⁿ-mi̍h."

Nn̄g Tsióng Tē-ki (Mt 7:24~27)
46 Lín ná-ē tshing-ho͘ Guá, ' Tsú ah, Tsú ah,' khiok bô tsiàu Guá ê kà-sī khì tsò? 47 Lâi Guá tsia, thiaⁿ Guá ê uē koh tsiàu Guá ê uē khì tsò ê lâng, Guá pò lín tsai hit-khuán lâng tshin-tshiūⁿ siáⁿ-mi̍h. 48 I tshin-tshiūⁿ lâng teh khí tshù, ku̍t hō͘ i tshim, kā tē-ki hē tī tsio̍h-puâⁿ tíng, tuā-tsuí tsi̍t-ē kàu, khe-lâu tshiong-tio̍h tshù, tshù mā bē iô-tāng, in-uī tshù khí-liáu tsin kian-kò͘. 49 M̄-koh thiaⁿ-liáu bô khì tsò ê lâng, sī tshin-tshiūⁿ lâng khí tshù tī thô͘-tíng, bô hē tē-ki, hō͘ khe-lâu tshiong-tio̍h, tsiū suî-sî tó lo̍h-khì, hit-king tshù ē tó kah tsin siong-tiōng."