《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第九章

作者 巴克禮普世版小組 2013.06.09

Iâ-so͘ Tshe-phài Tsa̍p-jī Sù-tô͘ (Mt 10:21, 5-15; Mk 6:27-13)
1 Iâ-so͘ kiò tsa̍p-jī sù-tô͘ lóng lâi, hō͘ in ū lîng-li̍k kah kuân-pìng, thang tsè-ap lóng-tsóng ê siâ-sîn, koh i-tī só͘-ū ê pēⁿ-tsìng. 2 Jiân-āu tshe in khì thuân Siōng-Tsú Kok-tō͘ ê Hok-im, koh i-hó pēⁿ-lâng. 3 Koh kau-tài in kóng, " M̄-thang tuà lō͘-huì, m̄-thang tuà kuái-á, m̄-thang tuà hîng-lí-tē, m̄-thang tuà kan-niû, m̄-thang tuà tsîⁿ-gîn, mā m̄-thang tuà nn̄g niá saⁿ. 4 Lín bô-lūn ji̍p-khì tó tsi̍t-king tshù, tio̍h tuà tī hia, mā tio̍h tuì hia tshut-huat. 5 Lâng nā bô tsiap-la̍p lín, lín lī-khui in ê siâⁿ ê sî, tio̍h kā lín kha-ni̍h ê thô͘-hún puāⁿ-tiāu, lâi kā in kíng-kò." 6 Bûn-tô͘ tsiū tshut-khì, tī hiah-ê tsng-siā kiâⁿ thàu-thàu lâi thuân Hok-im, koh tī ta̍k só͘-tsāi i-hó pēⁿ-lâng.

Hi-lu̍t-ông ê Put-an (Mt 14:1-12; Mk 6:14-29)
7 Hun-hong ê ông Hi-lu̍t thiaⁿ-tio̍h só͘-ū huat-sing ê tāi-tsì, sim-lāi hui-siông put-an, in-uī ū-lâng kóng, Iok-hān tuì sí-lâng tiong koh-ua̍h. 8 Mā ū-lâng kóng sī Í-lī-a tshut-hiān. Koh ū-lâng kóng sī kó͘-tsá sian-ti tiong-kan ê tsi̍t-ê koh-ua̍h. 9 M̄-koh Hi-lu̍t kóng, " Iok-hān guá í-king kā i tsām-thâu à. Taⁿ guá thiaⁿ-tio̍h lín teh kóng tsit-ê tàu-té sī siáⁿ-lâng?" I tsiū tshuē ki-huē ài-beh kìⁿ Iâ-so͘.

Iâ-so͘ Hō͘ Gō͘-tshing Lâng Tsia̍h Pá (Mt 14:13-21; Mk 6:30-44; Ih 6:1-14)
10 Sù-tô͘ tńg-lâi, tsiong in só͘ tsò ê tāi-tsì pò-kò hō͘ Iâ-so͘ thiaⁿ. Iâ-so͘ tsiū tshuā in siám-phiah, khì-kàu tsi̍t-ê kiò-tsò Pik-sài-tāi ê siâⁿ. 11 M̄-koh kûn-tsiòng tsi̍t-ē tsai tsiū koh tuè I khì. Iâ-so͘ kā in huan-gîng, kóng Siōng-Tsú Kok-tō͘ ê Hok-im hō͘ in thiaⁿ. Koh i-hó hiah-ê su-iàu i-tī ê lâng. 12 Thiⁿ beh àm ê sî, tsa̍p-jī sù-tô͘ lâi kā Iâ-so͘ kóng, " Tshiáⁿ kā kûn-tsiòng kái-sàn, hō͘ in khì sì-tsiu-uî ê tsng-siā, siat-huat tuà kah tsia̍h, in-uī lán tsia sī phian-phiah ê só͘-tsāi." 13 Iâ-so͘ tuì in kóng, " Lín tio̍h siat-huat hō͘ in tsia̍h." In kóng, " Lán tsia kan-tāⁿ ū gō͘-tè piáⁿ, nn̄g-bué hî. Guán nā bô khì bé, ná ū kàu tsiah-ê kûn-tsiòng tsia̍h?" 14 In-uī kûn-tsiòng tsha-put-to ū gō͘-tshing lâng. Iâ-so͘ tuì bûn-tô͘ kóng, " Kiò kûn-tsiòng hun tso͘ tsē lo̍h-khì, muí tso͘ tsha-put-to gō͘-tsa̍p lâng." 15 Bûn-tô͘ tsiàu án-ne tsò, hō͘ kûn-tsiòng lóng tsē lo̍h-khì. 16 Iâ-so͘ the̍h gō͘-tè piáⁿ kah nn̄g bué hî, ǹg thiⁿ kám-siā liáu-āu peh-khui, the̍h hō͘ bûn-tô͘ khì pun hō͘ kûn-tsiòng. 17 Ta̍k-ke lóng tsia̍h kàu pá. Bûn-tô͘ khioh só͘ tshun ê piáⁿ-sut-á, lóng-tsóng ū tsa̍p-jī nâ.

Pí-tik Sîng-jīn Iâ-so͘ Sī Ki-tok (Mt 16:13-19; Mk 8:27-29)
18 Ū tsi̍t pái, Iâ-so͘ ka-kī teh kî-tó ê sî, bûn-tô͘ kah I tī hia. Iâ-so͘ mn̄g in kóng, " Tsìng-lâng kóng Guá sī siáⁿ-lâng?" 19 Bûn-tô͘ ìn kóng, " Ū-lâng kóng, Lí sī kiâⁿ-sé-lé Iok-hān; mā ū-lâng kóng, Lí sī Í-lī-a; koh ū-lâng kóng, Lí sī kó͘-tsá tsi̍t-ê sian-ti koh-ua̍h." 20 Iâ-so͘ koh mn̄g in kóng, " Á lín ê khuàⁿ-huat lè. Lín kóng Guá sī siáⁿ-lâng?" Pí-tik ìn kóng, " Lí sī Siōng-Tsú só͘ siat-li̍p ê Ki-tok."

Iâ-so͘ Ī-giân I ê Sí-bông kah Koh-ua̍h (Mt 16:20-28; Mk 8:30-9.11)
21 Iâ-so͘ bīng-līng in m̄-thang tsiong tsit hāng tāi-tsì kā lâng kóng. 22 Iâ-so͘ suà lo̍h-khì koh kóng, " Jîn-tsú it-tīng tio̍h siū tsin-tsē kan-khó͘, ē hō͘ tiúⁿ-ló, tsè-si-tiúⁿ, king-ha̍k kàu-su só͘ khì-sak, koh hō͘ in hāi-sí, tē-saⁿ ji̍t Siōng-Tsú hō͘ I koh-ua̍h." 23 Iâ-so͘ koh tuì kûn-tsiòng kóng, " Lâng nā beh ài tuè guá, tio̍h pàng-sak ka-kī, ta̍k-ji̍t giâ i ê si̍p-jī-kè lâi tuè guá. 24 In-uī ài beh kiù ka-kī sèⁿ-miā ê lâng ē sòng-sit sèⁿ-miā, m̄-koh nā uī-tio̍h Guá lâi sòng-sit sèⁿ-miā ê lâng tian-tó ē kiù-tio̍h ka-kī ê sèⁿ-miā. 25 Lâng tit-tio̍h tsuân sè-kài suah sòng-sit ka-kī, á-sī sún-huāi ka-kī, ū siáⁿ-mi̍h lī-ik lè? 26 Tuì Guá kah Guá ê uē kám-kak kiàn-siàu ê lâng, Jîn-tsú tī ka-kī kah Thiⁿ-Pē í-ki̍p sìng thiⁿ-sài ê îng-kng tiong lâi-lîm ê sî, mā ē uī-tio̍h hit-ê lâng kám-kak kiàn-siàu. 27 Guá si̍t-tsāi kā lín kóng, " Khiā tī tsia ê lâng, ū-ê iáu-buē sí í-tsîng, ē khuàⁿ-tio̍h Siōng-Tsú Kok-tō͘."

Iâ-so͘ Kái-piàn Hîng-siōng (Mt 17:1-8; Mk 9:2-8)
28 Kóng tsiah-ê uē liáu tsha-put-to peh ji̍t āu, Iâ-so͘ tuà Pí-tik, Iok-hān, Ngá-kok tsò-hué tsiūⁿ suaⁿ khì kî-tó. 29 Kî-tó ê sî, Iâ-so͘ ê bīn-māu ū kái-piàn. I ê saⁿ piàn kah pe̍h-siak-siak koh kng-iàⁿ-iàⁿ. 30 Hut-jiân-kan ū nn̄g-ê lâng, tsiū-sī Mô͘-se kah Í-lī-a, lâi kah Iâ-so͘ kóng-uē, . 31 In tī îng-kng tiong tshut-hiān, tâm-lūn Iâ-so͘ teh-beh tī Iâ-lō͘-sat-líng sí-khì, lâi uân-sîng Siōng-Tsú ê tsí-ì. 32 Pí-tik kah tâng-phuāⁿ lóng thiám kah khùn-khì. In tsing-sîn ê sî tsiū khuàⁿ-tio̍h Iâ-so͘ ê îng-kng, í-ki̍p kah I khiā tsò-hué hit nn̄g lâng. 33 Hit nn̄g lâng teh-beh lī-khui Iâ-so͘ ê sî, Pí-tik kā Iâ-so͘ kóng, " Lāu-su, Lán tī tsia tsin hó. Guán lâi tah saⁿ-king liâu-á, tsi̍t king hō͘ Lí, tsi̍t king hō͘ Mô͘-se, tsi̍t king hō͘ Í-lī-a." I si̍t-tsāi m̄-tsai ka-kī teh kóng siáⁿ-mi̍h. 34 Kóng tsiah-ê uē ê sî, ū hûn kā in tà teh. In hō͘ hûn pau-uî teh, tsiū khí kiaⁿ-hiâⁿ. 35 Ū siaⁿ tuì hûn-ni̍h tshut-lâi kóng, " Tsit-ê sī guá ê Kiáⁿ, guá só͘ kíng-suán ê. Lín tio̍h thiaⁿ I ê uē." 36 Hit-ê siaⁿ kóng liáu, tsiū tshun khuàⁿ-tio̍h Iâ-so͘ ka-kī tī hia. Bûn-tô͘ tiām-tiām bô tsiong só͘ khuàⁿ-tio̍h ê tāi-tsì kā lâng kóng.

Iâ-so͘ I-hó Siâ-sîn Hū-sin ê Gín-á (Mt 17:14-18; Mk 9:14-27)
37 Keh-tńg-ji̍t, in tuì suaⁿ-tíng lo̍h-lâi ê sî, ū kui tuā-tīn lâng lâi gîng-tsiap Iâ-so͘. 38 Kûn-tsiòng tiong-kan ū tsi̍t-ê lâng tuā-siaⁿ huah kóng, " Lāu-su ah, kiû Lí lâi khuàⁿ guá ê kiáⁿ, i sī guá ê ko͘-seⁿ-kiáⁿ. 39 I nā hō͘ siâ-sîn hū-sin tsiū suî-sî tuā-siaⁿ huah, hō͘ i thiu-tshuah kah phū pe̍h-pho nuā, koh tāng-tāng kā i siong-hāi, lóng bô beh pàng i suah. 40 Guá ū tshiáⁿ Lí ê bûn-tô͘ kuáⁿ siâ-sîn, m̄-koh in lóng bô huat-tō͘." 41 Iâ-so͘ ìn kóng, " Ài ah, m̄ sìn koh puē-gi̍k ê sè-tāi! Guá tio̍h koh kah lín tuà juā kú? Tio̍h koh jím-nāi lín juā kú? Kā lí ê hāu-seⁿ tshuā lâi tsia!" 42 Gín-á hō͘ lâng tshuā lâi ê sî, siâ-sîn kā i siak tó, hō͘ i tuā thiu-tshuah. Iâ-so͘ tsiū tsik-pī siâ-sîn, i-hó hit-ê gín-á, kau hō͘ i ê lāu-pē.

Tsìng-lâng tuì Siōng-Tsú ê tuā ui-giâm, lóng kám-kak tio̍h-kiaⁿ koh kî-kuài .

Iâ-so͘ Tē-jī Pái Ī-giân I ê Sí-bông (Mt 17:22, 23; Mk 9:30-32)
43 Tsìng-lâng iáu teh kî-kuài Iâ-so͘ só͘ tsò ê tāi-tsì, hit sî Iâ-so͘ tuì bûn-tô͘ kóng, 44 " Tsiah-ê uē lín tio̍h tsù-ì thiaⁿ, in-uī Jîn-tsú teh-beh hō͘ lâng tshut-bē, kau khì hō͘ lâng ê tshiú-thâu ā." 45 M̄-koh bûn-tô͘ bē bîng-pi̍k tsit-kù uē ê ì-sù, in-uī ū tuì in am-khàm tsit-kù uē ê ì-sù hō͘ in bē-tàng liáu-kái. Bûn-tô͘ mā m̄-káⁿ mn̄g Iâ-so͘ tsit-kù uē ê ì-sù.

Siáⁿ-lâng Siōng-tuā (Mt 18:1-5; Mk 9:33-37)
46 Bûn-tô͘ tiong-kan hō͘-siōng tsing-lūn, khuàⁿ siáⁿ-lâng beh tsò tuā. 47 M̄-koh Iâ-so͘ khuàⁿ-tshut in sim-lāi só͘ tsing-lūn ê tāi-tsì, tsiū khan tsi̍t-ê gín-á hō͘ i khiā tuà sin-piⁿ, 48 tsiah kā in kóng, " Lâng nā uī-tio̍h Guá ê miâ tsiap-la̍p tsit-ê gín-á ê, tsiū-sī tsiap-la̍p Guá; tsiap-la̍p Guá ê tsiū-sī tsiap-la̍p tshe Guá lâi ê Hit-uī, in-uī tī lín tsìng-lâng tiong-kan siōng bî-sè ê, tsiū-sī siōng uí-tāi."

Bô Huán-tuì Lín Tsiū-sī Tsàn-sîng Lín (Mk 9:38-40)
49 Iok-hān ìn kóng, " Lāu-su, guán ū khuàⁿ-tio̍h tsi̍t-ê lâng īng Lí ê miâ teh kuáⁿ-kuí. Guán kā i tsó͘-tòng, in-uī i m̄ sī kah guán kāng-khuán teh tuè Lí ê lâng." 50 Iâ-so͘ tuì i kóng, " M̄-thang kā i tsó͘-tòng, in-uī bô huán-tuì lín ê tsiū-sī uī lín."

Sat-má-lī-a-lâng Kī-tsua̍t Iâ-so͘ (Mt 8:19-22)
51 Iâ-so͘ siū tsiap tsiūⁿ-thiⁿ ê ji̍t-kî teh-beh kàu, tsiū kuat-ì beh khì Iâ-lō͘-sat-líng. 52 I tshe-phài sù-tsiá tsò I ê thâu-tsîng khì, in ji̍p-khì Sat-má-lī-a-lâng tsi̍t-ê tsng-siā, beh kā Iâ-so͘ tsún-pī it-tshè ê tāi-tsì. 53 M̄-koh hit só͘-tsāi ê lâng bô beh tsiap-la̍p Iâ-so͘, in-uī I bîng-bîng sī beh khì Iâ-lō͘-sat-líng. 54 I ê bûn-tô͘ Ngá-kok kah Iok-hān khuàⁿ-tio̍h án-ne, tsiū kóng, " Tsú ah, Lí ài guán tuì thiⁿ-tíng kiò hué kàng lo̍h-lâi kā in siau-bia̍t, sī-bô?" 55 Iâ-so͘ ua̍t-tńg-sin kā in tsik-pī. 56 Iâ-so͘ kah bûn-tô͘ tsiū khì pa̍t-ê tsng-siā.

Tsò Iâ-so͘ Bûn-tô͘ ê Iàu-kiāⁿ (Mt 8:219-22)
57 In tī lō͘-tiong, ū-lâng tuì Iâ-so͘ kóng, " Lí bô-lūn khì tó-uī, guá lóng beh tuè Lí khì." 58 Iâ-so͘ kā i kóng, " Hô͘-lî ū khang, khong-tiong ê pue-tsiáu ū siū, m̄-koh Jîn-tsú liân khuà thâu-khak ê só͘-tsāi to bô." 59 Iâ-so͘ koh tuì līng-guā tsi̍t-ê lâng kóng, " Lâi tuè guá!" Hit lâng ìn kóng, " Tsú ah, hō͘ guá tńg-khì sing bâi-tsòng guá ê lāu-pē." 60 Iâ-so͘ kā i kóng, " Tshut-tsāi hiah-ê tsing-sîn-siōng ê sí-lâng khì bâi-tsòng in jio̍k-thé-siōng ê sí-lâng, m̄-koh lí tio̍h khì thuân-pò Siōng-Tsú Kok-tō͘ ê Hok-im." 61 Koh ū tsi̍t-ê lâng kóng, " Tsú ah, guá beh tuè Lí, m̄-koh tshiáⁿ tsún guá sing khì kah ke-lāi ê lâng sio-sî." 62 Iâ-so͘ tuì i kóng, " Tshiú huāⁿ gû-lê iáu-koh it-ti̍t teh ua̍t-thâu khuàⁿ āu-bīn ê lâng, bē kham-tit tsò Siōng-Tsú Kok-tō͘ ê tsú-bîn."