《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第十章

作者 巴克禮普世版小組 2013.06.16

10 Iâ-so͘ Tshe-phài Tshit-tsa̍p Lâng Tsiah-ê tāi-tsì liáu-āu, Tsú koh tshe-phài tshit-tsa̍p lâng, tsi̍t tuì tsi̍t tuì, tshe in tsò I ê thâu-tsîng, khì I só͘ beh khì ê ta̍k-ê siâⁿ kah ta̍k-ê só͘-tsāi. 2 Iâ-so͘ kā in kóng, " Thang siu-sîng ê tsin-tsē, tsò-kang ê lâng tsin tsió. Só͘-í lín tio̍h khì kiû hn̂g-tsú phài khah-tsē kang-lâng khì siu-sîng. 3 Lín khì! Guá tshe lín tshut-khì tsò-kang, tshin-tshiūⁿ iûⁿ-á ji̍p-khì tshâi-lông ê tiong-kan. 4 M̄-thang tuà tsîⁿ-tē, m̄-thang tuà hîng-lí-tē, m̄-thang tshīng-ê, tī lō͘-ni̍h m̄-thang kā lâng tshíng-an. 5 Lín bô-lūn ji̍p-khì siáⁿ-lâng ê tshù, tio̍h tāi-sing kóng, ' Guān lín tsit ke ê lâng pîng-an!' 6 Tī hia nā ū ì-ài pîng-an ê lâng, in tsiū ē tit-tio̍h lín kā in tshíng-an ê ' pîng-an'. Nā bô, hit-ê 'pîng-an' tsiū ē tò tńg-lâi kui lín. 7 Tio̍h tiàm hit ke, lim-tsia̍h in só͘ kiong-kip ê mi̍h, in-uī tsò-kang lâng kham-tit tit-tio̍h i ê kang-tsîⁿ. M̄-thang tuì tsit ke suá kuè-khì hit ke. 8 Lín bô-lūn ji̍p-khì siáⁿ-mi̍h siâⁿ, lâng nā tsiap-la̍p lín, tio̍h tsia̍h in só͘ pâi tī lín bīn-tsîng ê mi̍h. 9 Siâⁿ-lāi ū pēⁿ ê lâng, tio̍h kā in i-hó, suà kā in kóng, ' Siōng-Tsú Kok-tō͘ teh-beh kàu à.' 10 M̄-koh bô-lūn ji̍p-khì siáⁿ-mi̍h siâⁿ, lâng nā m̄ tsiap-la̍p lín, lín tio̍h tshut-khì in ê tuā ke-lō͘ kóng, 11 ' Liân lín ê siâⁿ tiâu tī guán kha-té ê thô͘-hún, guán to beh puāⁿ-tiāu, m̄-koh lín tio̍h tsai, Siōng-Tsú Kok-tō͘ beh kàu à!' 12 Guá kā lín kóng, sím-phuàⁿ ê ji̍t-tsí nā kàu, Só͘-to-má só͘ siū ê hîng-hua̍t, pí hit-ê siâⁿ iáu khah hó jím-siū." 13 M̄ Hué-kái ê Siâⁿ-tshī (Mt 11:20-24) Ko-lia̍p-sìn ah, lí ū tsai-hō! Pik-sài-tāi ah, lí ū tsai-hō! in-uī Guá tī lín tiong-kan só͘ kiâⁿ tsiah-ê kuân-lîng, nā kiâⁿ tī Tshui-lô kah Se-tùn, in tsá to̍h tshīng muâ-saⁿ, sám hué-hu tsē-teh lâi hué-kái. 14 M̄-koh tī sím-phuàⁿ ê sî, Tshui-lô kah Se-tùn tio̍h siū ê hîng-hua̍t pí lín iáu khah hó jím-siū. 15 Ka-pik-lông ah, lí siàu-siūⁿ hō͘ lâng hû khí-lih thiⁿ-tíng? Lí ē hō͘ lâng tshia lo̍h-khì im-hú. 16 Thiaⁿ lín ê uē tsiū-sī thiaⁿ Guá, khì-sak lín ê tsiū-sī khì-sak Guá; khì-sak Guá ê tsiū-sī khì-sak tshe Guá lâi ê Hit-uī." 17 Tshit-tsa̍p Lâng Tńg-lâi Pò-kò Hiah-ê tshit-tsa̍p lâng tńg-lâi teh huaⁿ-hí kóng, " Tsú ah, guán hōng Lí ê miâ bīng-līng, siâ-sîn mā lóng khut-ho̍k." 18 Iâ-so͘ kā in kóng, " Guá ū khuàⁿ-tio̍h Sat-tàn, tshin-tshiūⁿ sih-nà tuì thiⁿ lak lo̍h-lâi. 19 Guá í-king hō͘ lín ū kuân-lîng thang ta̍h tsuâ kah giat-á, koh ū tsè-ho̍k tuì-ti̍k lóng-tsóng ê khuì-la̍t, tsua̍t-tuì bô tsi̍t-hāng ē kā lín siong-hāi. 20 M̄-koh m̄-thang in-uī tsiah-ê siâ-sîn khut-ho̍k lín lâi huaⁿ-hí, tio̍h in-uī lín ê miâ kì tī thiⁿ-tíng lâi huaⁿ-hí." 21 Iâ-so͘ ê Hí-lo̍k (Mt 11:25-27; 13:16-17) Hit sî, Iâ-so͘ hō͘ Sìng-Sîn tshiong-muá kah muá-sim huaⁿ-hí kóng, " Thiⁿ-Pē ah, thiⁿ-tē ê Tsú, Guá o-ló Lí, in-uī Lí tsiong tsiah-ê tāi-tsì tuì tì-huī tshong-bîng ê lâng am-khàm khí-lâi, khiok tuì sè-hàn-gín-á ū hián-bîng tshut-lâi. Thiⁿ-Pē ah, sī lah, in-uī tse sī Lí khuàⁿ án-ne tsò huaⁿ-hí. 22 Guá ê Thiⁿ-Pē í-king kā it-tshè lóng kau-thok Guá. Thiⁿ-Pē í-guā bô tsi̍t-ê bat Kiáⁿ sī siáⁿ-lâng; Kiáⁿ kah Kiáⁿ só͘ ài beh khé-sī ê lâng í-guā, mā bô tsi̍t-ê bat Thiⁿ-Pē sī siáⁿ-lâng." 23 Iâ-so͘ ua̍t-tńg-sin, thau-thau-á tuì bûn-tô͘ kóng, " Ū ba̍k-tsiu khuàⁿ-kìⁿ lín só͘ khuàⁿ-tio̍h ê lâng, si̍t-tsāi ū hok-khì! 24 Guá kā lín kóng, í-tsîng ū tsin-tsē sian-ti kah kun-ông, ài-beh khuàⁿ lín só͘ khuàⁿ-tio̍h ê mā bô khuàⁿ-tio̍h, ài-beh thiaⁿ lín só͘ thiaⁿ-tio̍h ê mā bô thiaⁿ-tio̍h." 25 Siáⁿ-lâng Sī Hó tshù-piⁿ Ū tsi̍t-ê lu̍t-huat-kàu-su khiā khí-lâi tshì-thàm Iâ-so͘ kóng, " Lāu-su ah, guá tio̍h án-tsuáⁿ tsò tsiah ē tit-tio̍h íng-uán ê ua̍h-miā?" 26 Iâ-so͘ ìn kóng, " Lu̍t-huat ū kì-tsài siáⁿ-mi̍h? Lí tha̍k-liáu án-tsuáⁿ?" 27 Hit lâng ìn kóng, " Lí tio̍h tsīn-sim, tsīn-sìng, tsīn-la̍t, tsīn-ì thiàⁿ Tsú lí ê Siōng-Tsú; mā tio̍h thiàⁿ tshù-piⁿ tshin-tshiūⁿ ka-kī."( tsù: SBK 6:5; LBK 19:18) 28 Iâ-so͘ kā i kóng, " Lí só͘ ìn ê sī tio̍h. Tsiàu án-ne khì tsò, tsiū ē tit-tio̍h ua̍h-miā." 29 M̄-koh hit lâng ài-beh hián-bîng ka-kī tsò liáu tsin tio̍h, tsiū koh mn̄g Iâ-so͘ kóng, " Siáⁿ-lâng sī guá ê tshù-piⁿ?" 30 Iâ-so͘ ìn kóng, " Ū tsi̍t-ê lâng tuì Iâ-lō͘-sat-líng lo̍h-khì Iâ-lī-ko-siâⁿ, tú-tio̍h thó͘-huí tshiúⁿ i ê saⁿ-khò͘, kā i phah kàu puàⁿ-sí, jiân-āu kā i pàng hē-teh, tsò in khì. 31 Tú-hó ū tsi̍t-ê tsè-si tuì hit-tiâu lō͘ lo̍h-khì, khuàⁿ-tio̍h hit-ê lâng tsiū siám tuì lō͘ ê hit-pîng kuè-khì. 32 Koh ū tsi̍t-ê Lī-bī-lâng kiâⁿ kàu hit só͘-tsāi, khuàⁿ-liáu mā kāng-khuán tuì lō͘ ê hit-pîng kuè-khì. 33 Tsóng-sī ū tsi̍t-ê Sat-má-lī-a-lâng, kiâⁿ-lō͘ tuì hia king-kuè, khuàⁿ-tio̍h tsiū kā i liân-bín. 34 Kiâⁿ uá-khì, īng tsiú sé tio̍h-siong ê khang-tshuì, īng pò͘ kā i pau-teh, jiân-āu hû i khí-lih khiâ ka-kī ê lî-á, tshuā i kàu kheh-tiàm, lâi kā i tsiàu-kò͘. 35 Keh-tńg-ji̍t, i the̍h nn̄g-ê gîn-á hō͘ tiàm-tsú, kóng, " Tshiáⁿ lí tsiàu-kò͘ tsit-ê lâng. Só͘-huì nā khah ke, guá tò tńg-lâi ê sî tsiah pó͘ lí.' 36 Tsit saⁿ lâng tiong-kan, lí siūⁿ tó tsi̍t-ê sī tú-tio̍h thó͘-huí hit lâng ê tshù-piⁿ?" 37 I ìn kóng, " Kā i liân-bín hit lâng tsiū-sī." Iâ-so͘ kā i kóng, " Lí khì, tsiàu án-ne khì tsò." 38 Iâ-so͘ Hóng-būn Má-tāi kah Má-lī-a Iâ-so͘ kah bûn-tô͘ kè-sio̍k kiâⁿ, lâi-kàu tsi̍t-ê tsng-siā. Ū tsi̍t-ê miâ-kiò Má-tāi ê hū-jîn-lâng, tsiap-thāi Iâ-so͘ ji̍p-khì in tshù. 39 Má-tāi ū tsi̍t-ê tsí-muē, kiò-tsò Má-lī-a, tsē tī Tsú ê kha-tsîng teh thiaⁿ I ê kà-sī. 40 Má-tāi in-uī tsiap-thāi in tāi-tsì tsē, suah sim-kuaⁿ luān-tshau-tshau, tsiū lâi kā Iâ-so͘ kóng, " Tsú ah, guá ê tsí-muē pàng guá ka-kī teh bô îng, Lí kám bô teh iàu-kín? Tio̍h kiò i lâi kā guá tàu-kha-tshiú." 41 M̄-koh Tsú ìn kóng, " Má-tāi ah, Má-tāi ah, lí uī-tio̍h tāi-tsì tsē teh tshau-huân. 42 M̄-koh só͘ su-iàu ê kan-tāⁿ tsi̍t-hāng. Má-lī-a í-king kíng-tio̍h hó ê hit hūn, bô-lâng ē-tàng kā i tshiúⁿ khì."