《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第二十一章

作者 巴克禮普世版小組 2013.09.01

Kuáⁿ-hū ê Hōng-hiàn (Mk 12:41-44)
1 Iâ-so͘ gia̍h thâu khuàⁿ-tio̍h hó-gia̍h-lâng tsiong in ê hiàn-kim hiat lo̍h-khì hiàn-kim-siuⁿ. 2 Koh khuàⁿ-tio̍h tsi̍t-ê sàn-tshiah-ê kuáⁿ-hū tsiong nn̄g-ê tâng-tsîⁿ-á hiat lo̍h-khì. 3 Iâ-so͘ kóng, " Guá si̍t-tsāi kā lín kóng, tsit-ê sàn-tshiah-ê kuáⁿ-hū só͘ hiàn ê pí kî-tha tsìng-lâng só͘ hiàn ê khah-tsē. 4 In-uī kî-tha tsìng-lâng sī tuì in só͘ tshun ê hiat lo̍h-khì hiàn, m̄-koh tsit-ê hū-jîn-lâng sui-jiân tsin sàn, iáu-koh tsiong sing-ua̍h-huì tsuân-pō͘ hiàn lo̍h-khì."

Iâ-so͘ Ī-giân sìng-tiān Siū Huí-huāi (Mt 24:1-2; Mk 13:1-2)
5 Ū-lâng teh kóng-khí, sìng-tiān sī īng hó tsio̍h kah só͘ hiàn ê mi̍h lâi tsong-hông. Hit sî Iâ-so͘ kóng, 6 " Lín teh khuàⁿ tsiah-ê it-tshè, ji̍t-tsí beh kàu, tī tsia bô kah tsi̍t-tè tsio̍h ē sio-tha̍h, lóng ē tó kah pêⁿ-pêⁿ-pêⁿ."

Tsai-lān kah Pik-hāi (Mt 24:3-14; Mk 13:3-13)
7 Bûn-tô͘ mn̄g Iâ-so͘ kóng, " Lāu-su ah, tsiah-ê tāi-tsì tang-sî ē huat-sing? Koh tsiah-ê tāi-tsì beh huat-sing tsìn-tsîng, ū siáⁿ-mi̍h tiāu-thâu?" 8 Iâ-so͘ kóng, " Tio̍h kín-sīn, m̄-thang khì hō͘ lâng bê-hi̍k, in-uī ē ū tsin-tsē lâng lī-iōng Guá ê miâ lâi kóng, ' Guá tsiū-sī Ki-tok'; koh kóng, ' Sî-ki teh-beh kàu à'. Lín m̄-thang tuè in khì. 9 Lín ē thiaⁿ-tio̍h kau-tsiàn kah jiáu-luān ê tāi-tsì, hit sî lín m̄-bián tio̍h-kiaⁿ, in-uī tsiah-ê tāi-tsì it-tīng ē tāi-sing huat-sing, m̄-koh bua̍t-ji̍t bē suî-sî kàu." 10 Iâ-so͘ kè-sio̍k kā in kóng, " Bîn-tso̍k ē khí-lâi kong-kik bîn-tso̍k, kok-ka mā ē khí-lâi kong-kik kok-ka. 11 Ū tuā tē-tāng, mā tsin-tsē só͘-tsāi ū ki-hng kah un-i̍k; koh ū tuì thiⁿ-tíng lâi thang kiaⁿ ê kíng-siōng kah tuā ê sîn-jiah. 12 Tsiah-ê tāi-tsì huat-sing tsìn-tsîng, lâng ē hē-tshiú kā lín lia̍h, kā lín pik-hāi, koh kā lín kau hō͘ huē-tn̂g kah kaⁿ-ga̍k. Lín mā ē uī-tio̍h Guá ê iân-kò͘ hō͘ lâng lia̍h khì kun-ông kah tsóng-tok ê bīn-tsîng. 13 Tse sī lín tsò kiàn-tsìng ê ki-huē. 14 Só͘-í lín tio̍h sim-tsì lia̍h hō͘ tiāⁿ. M̄-bián sing tshau-huân beh án-tsuáⁿ piān-kái. 15 In-uī Guá ē siúⁿ-sù lín kháu-tsâi kah tì-huī, hō͘ lín ê tuì-ti̍k lóng bē-tàng tuì-khòng kah piān-pok. 16 Liân lín pē-bú, hiaⁿ-tī, tshin-tsiâⁿ, pîng-iú mā ē kā lín tshut-bē, lín tiong-kan ū-lâng ē hō͘ in hāi-sí. 17 Lín in-uī Guá ê iân-kò͘ ē hō͘ tsìng-lâng uàn-hūn. 18 M̄-koh lín liân tsi̍t ki thâu-mn̂g mā bē sit-lo̍h. 19 Lín tio̍h jím-nāi kàu-té, tsiah ē tit-tio̍h ua̍h-miā."

Ī-giân Iâ-lō͘-sat-líng ê Bia̍t-bông (Mt 24:15-21; Mk 13:14-19)
20 " Lín nā khuàⁿ-tio̍h Iâ-lō͘-sat-líng hō͘ kun-ping pau-uî ê sî, tsiū tsai tsit-ê siâⁿ teh-beh bia̍t-bông ā. 21 Hit sî tī Iû-thài-síng ê lâng tio̍h tô-tsáu khì suaⁿ-ni̍h, tī siâⁿ-lāi ê lâng tio̍h tshut-lâi, tī tsng-kha ê lâng m̄-thang ji̍p-khì tsit-ê siâⁿ-lāi. 22 In-uī tse sī 'Hîng-hua̍t ê Ji̍t-tsí', sī beh ìng-giām Sìng-king só͘ kì-tsài ê it-tshè. 23 Tī hiah-ê ji̍t-tsí, ū sin-īn kah hō͘ eⁿ-á tsia̍h-ling ê hū-jîn-lâng tsin put-hīng, in-uī ū tuā tsai-lān teh-beh lîm-kàu tsit-ê tē-hng. Siōng-Tsú ê tuā siū-khì mā teh-beh lîm-kàu tsiah-ê jîn-bîn. 24 In ē hō͘ to-kiàm thâi-sí, mā ē hō͘ lâng lia̍h khì sè-kài kok-kok. Iâ-lō͘-sat-líng beh hō͘ Guā-pang-lâng thún-ta̍h, ti̍t kàu guā-pang tsiàm-niá ê kî-hān muá."

Jîn-tsú ê Kàng-lîm (Mt 24:29-31; Mk 13:24-27) 25 " Tī thiⁿ-tíng, ji̍t, gue̍h kah tsheⁿ lóng ē hián-tshut tiāu-thâu, tī tē-tsiūⁿ bān-bîn in-uī hái-íng huā-huā-háu, lâi kiaⁿ-hiâⁿ put-an. 26 Lâng in-uī tsit sè-kài teh-beh huat-sing ê tāi-tsì kiaⁿ kah hūn-khì, in-uī thiⁿ-tíng ê kng-thé lóng ē iô-tāng. 27 Hit sî, lâng ē khuàⁿ-tio̍h Jîn-tsú tshiong-muá kuân-lîng kah tuā îng-kng, tsē hûn kàng-lîm. 28 Tsiah-ê tāi-tsì teh-beh huat-sing ê sî, lín tio̍h gia̍h-thâu thíng-hing, in-uī lín ê tit-kiù teh-beh kàu ā."

Bû-hua-kó-tshiū ê Kà-sī (Mt 24:32-35; Mk 13:28-31)
29 Iâ-so͘ koh īng phì-jū kā in kóng, " Lín khuàⁿ bû-hua-kó-tshiū kah só͘-ū ê tshiū. 30 Lín tsi̍t-ē khuàⁿ-tio̍h tsiah-ê tshiū teh puh-íⁿ, tsiū tsai hē-thiⁿ teh-beh kàu à. 31 Tshin-tshiūⁿ án-ne, lín khuàⁿ-tio̍h tsiah-ê tiāu-thâu huat-sing ê sî, tsiū tsai Siōng-Tsú Kok-tō͘ teh-beh kàu à. 32 Guá si̍t-tsāi kā lín kóng, tsit sè-tāi iáu-buē kuè-khì, tsiah-ê tāi-tsì lóng ē huat-sing. 33 Thiⁿ kah tē ē siau-sit, m̄-koh Guá ê uē tsua̍t-tuì bē siau-sit."

Tio̍h Kín-sīn
34 " Lín ka-kī tio̍h kín-sīn! M̄-thang hō͘ lín ê sim uī-tio̍h tham-tsia̍h, tsiú-tsuì kah tsit sè-kan ê tshau-huân lâi hun-bê, in-uī sè-kài ê bua̍t-ji̍t ē hut-jiân-kan lâi-lîm. 35 Tshin-tshiūⁿ ua̍h-tauh-á pia̍k tsi̍t-ē, tsiū lâi-kàu tsuân sè-kài lâng só͘ tuà ê ta̍k só͘-tsāi. 36 Só͘-í lín tio̍h ta̍k sî kíng-síng kî-tó, kî-kiû Siōng-Tsú hō͘ lín ū khuì-la̍t siám-phiah it-tshè teh-beh huat-sing ê tāi-tsì, lâi tī Jîn-tsú ê bīn-tsîng khiā tsāi-tsāi." 37 Tsit kuí ji̍t, Iâ-so͘ ji̍t-sî tī sìng-tiān kà-sī lâng, àm-sî tsiū tshut-khì hit-ê Kan-ná-suaⁿ kuè-mê. 38 Tsìng-lâng lóng thàu-tsá tsiū khì sìng-tiān thiaⁿ Iâ-so͘ kóng tō-lí.