《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第二十章

作者 巴克禮普世版小組 2013.08.25

Lūn Iâ-so͘ ê Kuân-pìng (Mt 21:23-27; Mk 11:27-33)
1 Ū tsi̍t ji̍t Iâ-so͘ tī sìng-tiān kà-sī lâng koh thuân Hok-im ê sî, hiah-ê tsè-si-tiúⁿ, king-ha̍k kàu-su kah tiúⁿ-ló tsò-hué lâi, 2 mn̄g Iâ-so͘ kóng, " Tio̍h kā guán kóng, Lí sī khò siáⁿ-mi̍h kuân-pìng lâi tsò tsiah-ê tāi-tsì? Sī siáⁿ-lâng hō͘ Lí tsit-ê kuân-pìng?" 3 Iâ-so͘ ìn kóng, " Guá mā beh mn̄g lín tsi̍t-kù uē, lín tio̍h kā Guá ìn-tap. 4 Iok-hān kā lâng sé-lé ê kuân-pìng sī tuì thiⁿ á-sī tuì lâng lâi ê?" 5 In hō͘-siōng gī-lūn kóng, " Lán nā kóng ' Tuì thiⁿ', án-ne I ē kóng, ' Lín ná-ē bô beh sìn Iok-hān?' 6 Lán nā kóng,' Tuì lâng', jîn-bîn lóng ē īng tsio̍h-thâu kā lán tìm, in-uī tsìng-lâng lóng tshim-sìn Iok-hān sī sian-ti." 7 só͘-í in ìn kóng, " Guán m̄-tsai sī tuì tó-uī." 8 Iâ-so͘ kā in kóng, " Guá mā bô beh kā lín kóng, Guá sī khò siáⁿ-mi̍h kuân-pìng lâi tsò tsiah-ê tāi-tsì."

Pháiⁿ Tiān-lông ê Phì-jū (Mt 21:33-46; Mk 12:1-12)
9 Iâ-so͘ koh īng tsi̍t-ê phì-jū tuì tsìng-lâng kóng, " Ū tsi̍t-ê lâng khai-khún tsi̍t-tè phû-tô-hn̂g, tso͘ hō͘ tiān-lông, tsiū tshut-guā tsin kú. 10 Kàu siu-sîng ê kî, hn̂g-tsú tshe tsi̍t-ê lô͘-po̍k khì tshuē tiān-lông, beh tuì in siu hn̂g-tso͘ ê kué-tsí, m̄-koh tiān-lông phah hit-ê lô͘-po̍k, hō͘ i khang-tshiú tńg-khì. 11 Hn̂g-tsú koh tshe pa̍t-ê lô͘-po̍k khì. Tiān-lông kāng-khuán kā i phah, koh kā i bú-jio̍k, iū-koh hō͘ i khang-tshiú tńg-khì. 12 Hn̂g-tsú koh tshe tē-saⁿ ê lô͘-po̍k khì, hiah-ê tiān-lông mā sī kā i phah-siong, koh kā i kuáⁿ tshut-khì. 13 Āu-lâi hn̂g-tsú siūⁿ-kóng, ' Taⁿ guá tio̍h án-tsuáⁿ tsò tsiah hó? Guá beh tshe guá só͘ thiàⁿ ê kiáⁿ khì. In tāi-khài ē kā i tsun-tiōng.' 14 M̄-koh tiān-lông khuàⁿ-tio̍h hn̂g-tsú ê kiáⁿ lâi, tsiū hō͘-siōng tsham-siông kóng, ' Tsit-ê sī beh sîng-tsiap hn̂g-tsú tsâi-sán ê kiáⁿ. Lán lâi kā i thâi-sí. Án-ne tsiah-ê tsâi-sán tsiū piàn-tsò lán ê.' 15 In tsiū kā i hiat tshut-khì hn̂g-guā, koh kā i thâi-sí. Hn̂g-tsú beh án-tsuáⁿ lâi kā in tshù-lí? 16 Hn̂g-tsú ē lâi kā hiah-ê tiān-lông tsâu-bia̍t, kā i ê hn̂g tso͘ hō͘ pa̍t-lâng." In thiaⁿ-tio̍h tsiah-ê uē liáu-āu tsiū kóng, "Tshian-bān m̄-thang án-ne." 17 Iâ-so͘ ba̍k-tsiu kim-kim kā in khuàⁿ, kóng, " Sìng-king ū kì-tsài: Sai-hū só͘ khì-sak ê tsio̍h, Tsiâⁿ-tsò tshù-kak-thâu ê ki-tsio̍h.( tsù: SPh 118:22) Tsit-kù uē sī siáⁿ-mi̍h ì-sù? 18 Só͘-ū pua̍h lo̍h-khì hit-tè tsio̍h-thâu tíng ê lâng, lóng ē tshuì-kut hun-si; hō͘ hit-tè tsio̍h-thâu teh-tio̍h ê lâng, lóng ē tshuì-kô͘-kô͘."

La̍p-suè ê Būn-tê (Mt 22:12-22; Mk 12:13-17)
19 Hit sî hiah-ê king-ha̍k kàu-su kah tsè-si-tiúⁿ tsai, Iâ-so͘ tsit-ê phì-jū sī teh tsí in, tsiū ài beh tong-tiûⁿ hē-tshiú lia̍h Iâ-so͘, m̄-koh kiaⁿ tsìng-lâng huán-tuâⁿ. 20 In tsiū tshuē ki-huē, phài bi̍t-thàm ké-tsò gī-lâng, beh lia̍h Iâ-so͘ ê uē-phāng, thang kā I kau hō͘ tsóng-tok, lâi i-huat pān-lí. 21 Tsiah-ê bi̍t-thàm lâi mn̄g Iâ-so͘ kóng, " Lāu-su ah, guán tsai Lí só͘ kóng só͘ kà-sī ê sī tsìng-ti̍t, Lí mā bô khuàⁿ lâng ê bīn-sik, tsiū-sī tiong-si̍t kà-sī Siōng-Tsú ê tō-lí. 22 Guán la̍p-suè hō͘ Lô-má ê hông-tè,ū ha̍h lán ê lu̍t-huat á bô?" 23 M̄-koh Iâ-so͘ khuàⁿ-tshut in ê kuí-kè, tsiū tuì in kóng, 24 " The̍h tsi̍t-ê gîn-á hō͘ Guá khuàⁿ. Tsit-ê siōng kah jī-hō sī siáⁿ-lâng?" In kóng, " Sī Lô-má hông-tè ê." 25 Iâ-so͘ tsiū tuì in kóng, " Án-ne, lín tio̍h kā hông-tè ê mi̍h la̍p hō͘ hông-tè, kā Siōng-Tsú ê mi̍h la̍p hō͘ Siōng-Tsú." 26 In tī tsìng-lâng ê bīn-tsîng bē-tàng lia̍h-tio̍h Iâ-so͘ ê uē-phāng, koh tuì I ê ìn-tap tsin tio̍h-kiaⁿ, suah tsiū án-ne tiām-khì.

Sí-lâng Koh-ua̍h ê Būn-tê (Mt 22:23-33; Mk 12:18-27)
27 Ū tsi̍t-kuá tsú-tiuⁿ lâng bô koh-ua̍h ê Sat-to͘-kai-phài ê lâng, lâi mn̄g Iâ-so͘ kóng, 28 " Lāu-su ah, Mô͘-se kā guán kui-tīng kóng, ' Nā ū-lâng ê a-hiaⁿ sí-khì, bó͘ iáu tī-teh m̄-koh bô seⁿ kiáⁿ. I ê sió-tī tio̍h tshuā hit-ê hiaⁿ-só lâi tsò bó͘, thang seⁿ kiáⁿ lâi thè a-hiaⁿ thuân-tsong tsiap-tāi.'( tsù: SBK 25:5; CSK 38:8) 29 Bat ū tshit-ê hiaⁿ-tī, tuā-ê tshuā bó͘, bô kiáⁿ tsiū sí-khì. 30 Tē-jī ê, tē-saⁿ ê mā lóng tshuā hit-ê hiaⁿ-só. 31 Tshit-ê lóng án-ne, bô seⁿ kiáⁿ tsiū sí-khì. 32 Āu-lâi hit-ê hū-jîn-lâng mā sí-khì. 33 Án-ne, tī koh-ua̍h ê sî, tsit-ê hū-jîn-lâng beh tsò in tiong-kan tó tsi̍t-ê lâng ê bó͘? In-uī tsit tshit lâng lóng ū tshuā i tsò-bó͘." 34 Iâ-so͘ kā in kóng, " Kim-sè ê lâng ū kè ū tshuā. 35 M̄-koh ē kham-tit tuì sí-lâng tiong koh-ua̍h tsìn-ji̍p lâi-sè ê, tsiū bô kè bô tshuā. 36 In-uī in koh-ua̍h liáu-āu bē koh sí, kah thiⁿ-sài kāng-khuán, lóng sī Siōng-Tsú ê kiáⁿ-jî. 37 Kuan-hē sí-lâng koh-ua̍h ê tāi-tsì, Mô͘-se tī ' Teh To̍h ê Tshì-phè' hit phiⁿ ū tsí-bîng, tshing-ho͘ Tsú sī A-pik-la̍h-hán ê Siōng-Tsú, Í-sat ê Siōng-Tsú, Ngá-kok ê Siōng-Tsú.( tsù: CAK 3:6, 15-16) 38 I m̄-sī sí-lâng ê Siōng-Tsú, sī ua̍h-lâng ê Siōng-Tsú, in-uī lâng lóng sī uī-tio̍h Tsú teh ua̍h." 39 Ū kuí-nā-ê king-ha̍k kàu-su ìn kóng, " Lāu-su ah, Lí kóng liáu tsin hó." 40 In tsiū m̄-káⁿ koh mn̄g Iâ-so͘ siáⁿ-mi̍h būn-tê.

Kuan-hē Ki-tok ê Būn-tê (Mt 22:41-46; Mk 12:35-37)
41 Iâ-so͘ tuì in kóng, " Lâng ná-ē kóng Ki-tok sī Tāi-pi̍t ê kiáⁿ-sun? 42 In-uī Tāi-pi̍t tī Si-phian ka-kī kóng, ' Tsú kā guá ê Tsú kóng, tsē Guá ê tsiàⁿ-pîng, 43 Kàu Guá hō͘ Lí ê tuì-ti̍k tsò Lí ê kha-ta̍h.'( tsù: SPh 110:1) 44 Tāi-pi̍t kì-jiân tshing Ki-tok tsò Tsú, Ki-tok ná-ē tsò Tāi-pi̍t ê kiáⁿ-sun?"

Tio̍h Thê-hông King-ha̍k-kàu-su (Mt 23:1-36; Mk 12:38-40)
45 Tsìng-lâng teh thiaⁿ ê sî, Iâ-so͘ kā bûn-tô͘ kóng, 46 " Tio̍h thê-hông hiah-ê king-ha̍k kàu-su, in ài tshīng tn̂g-saⁿ sì-kè kiâⁿ, tsin ài tī ke-lō͘-ni̍h hō͘ lâng tshíng-an, tī huē-tn̂g lāi tsē kuân-uī, tī iàn-si̍k tsē tuā-uī. 47 In tshim-tsiàm kuáⁿ-hū ê ke-hué, thiau-kang kî-tó tsin tn̂g, in ē siū koh-khah tāng ê hîng-hua̍t."