《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第二十四章

作者 巴克禮普世版小組 2013.09.22

Iâ-so͘ ê Koh-ua̍h (Mt 28:1-10;Mk 16:1-8;Ih 20:1-10)
1 Tshit-ji̍t ê thâu tsi̍t-ji̍t, thiⁿ-phú-kng, hiah-ê hū-jîn-lâng tuà só͘ tsún-pī ê phang-liāu lâi-kàu bōng-tē. 2 In khuàⁿ-tio̍h tsio̍h-thâu í-king tuì bōng-kháu kō khui. 3 In ji̍p-khì bōng-lāi, bô khuàⁿ-tio̍h Tsú ê sin-si. 4 In uī-tio̍h án-ne iáu teh tiû-tû ê sî, hut-jiân ū nn̄g-ê lâng tshīng kng-iàⁿ-iàⁿ ê saⁿ khiā tī in sin-piⁿ. 5 Hū-jîn-lâng tuā tio̍h-kiaⁿ, bīn phak lo̍h thô͘-kha. Hit nn̄g-ê lâng kā in kóng, " Lín ná-ē tī sí-lâng tiong teh tshuē ua̍h-lâng? 6 I bô tī tsia, I í-king koh-ua̍h ā. Lín tio̍h kì-tit I iáu tī Ka-lī-lī-síng ê sî kā lín kóng ê uē: 7 ' Jîn-tsú it-tīng ē hông tshut-bē kau tī tsuē-jîn ê tshiú, hō͘ in tìng tī si̍p-jī-kè, tē-saⁿ ji̍t koh-ua̍h.' 8 Hiah-ê hū-jîn-lâng tsiū siūⁿ-khí Iâ-so͘ ê uē. 9 In lī-khui bōng-tē tńg-khì, tsiong tsiah-ê tāi-tsì lóng pò hō͘ tsa̍p-it ê sù-tô͘ kah kî-tha ê kûn-tsiòng tsai. 10 Tuì sù-tô͘ pò-kò tsiah-ê tāi-tsì ê, tsiū-sī Bua̍t-tāi-lia̍p ê Má-lī-a kah Iok-a-ná, Ngá-kok ê lāu-bú Má-lī-a, í-ki̍p kî-tha kah in tsò-tīn ê hū-jîn-lâng. 11 Sù-tô͘ siūⁿ-kóng hiah-ê hū-jîn-lâng só͘ kóng ê uē bô-iáⁿ bô-tsiah, só͘-í m̄ siong-sìn. 12 M̄-koh Pí-tik khí-lâi tsáu khì bōng-ni̍h, àⁿ lo̍h-khì tsi̍t khuàⁿ, tsí-ū khuàⁿ-tio̍h iù-tē-pò͘. I tsiū tńg-khì, tuì só͘ huat-sing ê tāi-tsì kám-kak tsin kî-kuài.

Tī Í-má-ngó͘ ê Lō͘-tiong (Mk 16:12-13)
13 Siāng hit ji̍t, bûn-tô͘ tiong ū nn̄g lâng khì tsi̍t-ê kiò-tsò Í-má-ngó͘ ê tsng-siā, lī Iâ-lō͘-sat-líng iok tsa̍p-it kong-lí. 14 In ná kiâⁿ ná teh tâm-lūn só͘ huat-sing ê tāi-tsì. 15 In tng teh tâm-lūn lâi tâm-lūn khì ê sî, Iâ-so͘ tshin-sin uá-lâi kah in tsò-tīn kiâⁿ. 16 M̄-koh kah-ná ū mi̍h-kiāⁿ teh that-gāi in ê ba̍k-tsiu, suah bē jīn-tit Iâ-so͘. 17 Iâ-so͘ tuì in kóng, " Lín ná kiâⁿ ná teh piān-lūn ê sī sím-mi̍h tāi-tsì?" In tsiū thîng lo̍h-lâi, muá-bīn iu-tshiû. 18 Kî-tiong tsi̍t-ê kiò Kik-liû-pa ìn Iâ-so͘ kóng, " Tsit kuí ji̍t tī Iâ-lō͘-sat-líng só͘ huat-sing ê tāi-tsì, sī án-tsuáⁿ kan-taⁿ Lí m̄-tsai?" 19 Iâ-so͘ mn̄g kóng, " Sī sím-mi̍h tāi-tsì?" In ìn kóng, " Tsiū-sī Ná-sat-li̍k-lâng Iâ-so͘ ê tāi-tsì. I sī sian-ti, tī Siōng-Tsú kah tsìng-lâng ê bīn-tsîng só͘ kóng só͘ tsò lóng tsin ū kuân-lîng. 20 Hiah-ê tsè-si-tiúⁿ kah thâu-lâng kā I ah khì hō͘ lâng phuàⁿ sí-hîng, tìng si̍p-jī-kè. 21 I tsiū-sī guán só͘ kî-thāi teh-beh lâi tsín-kiù Í-sik-lia̍t ê Hit-uī. M̄-nā án-ne, tsiah-ê tāi-tsì huat-sing kàu taⁿ í-king saⁿ ji̍t ā. 22 Koh guán tiong-kan kuí-nā-ê hū-jîn-lâng hō͘ guán tsin tio̍h-kiaⁿ koh kî-kuài. In-uī in phah-phú-kng to̍h kàu bōng-tē. 23 M̄-koh in tshuē bô Iâ-so͘ ê sin-si, tsiū tńg-lâi kóng, in ū khuàⁿ-tio̍h thiⁿ-sài tshut-hiān kā in kóng, Iâ-so͘ í-king koh-ua̍h à. 24 Guán tiong-kan mā ū kuí-nā-ê lâng khì bōng-tē, khuàⁿ-tio̍h ê it-tshè lóng kah hū-jîn-lâng só͘ kóng ê kāng-khuán. M̄-koh in mā bô khuàⁿ-tio̍h Iâ-so͘. 25 Iâ-so͘ tuì in kóng, " Ai-ah, lín ná-ē tsiah-ni̍h gōng, sim ná-ē tsiah-ni̍h tūn, bē siong-sìn sian-ti só͘ kóng it-tshè ê uē!? 26 Ki-tok kám m̄-sī tio̍h siū tsiah-ê khó͘-lān tsiah lâi ji̍p I ê îng-kng?" 27 Iâ-so͘ tsiū tuì Mô͘-se kah tsìng sian-ti khai-sí kóng khí, tsiong Sìng-king tiong só͘-ū kuan-hē Iâ-so͘ ê kì-tsài, lóng tuì in suat-bîng. 28 In teh-beh kàu só͘ beh khì ê tsng-siā, Iâ-so͘ ná tshin-tshiūⁿ beh kè-sio̍k kiâⁿ. 29 M̄-koh hit nn̄g lâng kiông lâu Iâ-so͘ kóng, " Ji̍t-thâu lo̍h-suaⁿ à, thiⁿ í-king àm. Tshiáⁿ kah guán tuà." Iâ-so͘ tsiū ji̍p-khì kah in tuà. 30 Iâ-so͘ kah in tsē-toh ê sî, the̍h piáⁿ tsiok-siā, jiân-āu peh-khui pun hō͘ in. 31 In ê ba̍k-tsiu khui tsiū jīn-tshut I sī Iâ-so͘. I suî-sî tuì in tiong-kan siau-sit. 32 In tsiū hō͘-siōng kóng, " I tī lō͘-ni̍h kah lán kóng-uē, kā lán suat-bîng Sìng-king ê sî, lán ê sim kám bô tshin-tshiūⁿ hué teh to̍h?" 33 In suî-sî tshut-huat tńg-khì Iâ-lō͘-sat-líng, tú-tio̍h hit tsa̍p-it ê sù-tô͘ kah kî-tha ê lâng tsū-tsi̍p teh tâm-lūn, 34 kóng, " Tsú kó-jiân koh-ua̍h ā, I í-king tshut-hiān hō͘ Se-bûn khuàⁿ." 35 Hit nn̄g-ê lâng tsiū kóng-khí tī lō͘-ni̍h só͘ tú-tio̍h ê tāi-tsì, kah Iâ-so͘ peh piáⁿ ê sî in án-tsuáⁿ jīn-tshut I ê it-tshè lóng kóng hō͘ in thiaⁿ.

Iâ-so͘ Tuì Bûn-tô͘ Hián-hiān (Mt 28:16-20; Mk 16:14-18; Ih 20:19-23; St 1:6-8)
36 Hit nn̄g-ê bûn-tô͘ teh kóng tsiah-ê uē ê sî, Iâ-so͘ tshin-sin khiā tī in tiong-kan, kā in kóng, " Guān lín pîng-an!" 37 In tio̍h-kiaⁿ koh kám-kak kî-kuài, lia̍h-tsò sī khuàⁿ-tio̍h kuí. 38 Iâ-so͘ tsiū kā in kóng, " Lín ná-ē teh put-an, sim-lāi teh khí giâu-gî? 39 Lâi khuàⁿ guá ê tshiú, guá ê kha, khak-si̍t sī Guá pún-sin. Lín bong tsiū tsai, in-uī kuí bô kut bô bah. Lín bong khuàⁿ, Guá lóng ū!" 40 Iâ-so͘ án-ne kóng liáu tsiū tsiong tshiú kah kha hō͘ in khuàⁿ. 41 Bûn-tô͘ huaⁿ-hí kah iáu-koh m̄-káⁿ siong-sìn, iáu-teh bo̍k-bîng kî-biāu ê sî, Iâ-so͘ kā in kóng, " Lín tsia ū sím-mi̍h thang tsia̍h bô?" 42 In tsiū the̍h tsi̍t tè hang hó ê hî hō͘ Iâ-so͘. 43 Iâ-so͘ tsiap kuè-lâi, tng in ê bīn-tsîng tsia̍h hō͘ in khuàⁿ. 44 Iâ-so͘ koh tuì in kóng, " Guá iáu kah lín tsò-hué ê sî ū kā lín kóng kuè. Mô͘-se ê lu̍t-huat, kah sian-ti ê tsheh, í-ki̍p Si-phian só͘ kì-tsài kuan-hē Guá ê tāi-tsì lóng it-tīng ē ìng-giām." 45 Iâ-so͘ khui in ê sim-khiàu, hō͘ in ē-tàng liáu-kái Sìng-king. 46 Koh tuì in kóng, " Sìng-king ū án-ne kì-tsài, Ki-tok tio̍h siū khó͘-lān, tē-saⁿ ji̍t tuì sí-lâng tiong koh-ua̍h. 47 Koh ū kì-tsài: Lín tio̍h hōng I ê miâ thuân hué-kái lâi tit-tio̍h sià-tsuē ê tō-lí, tuì Iâ-lō͘-sat-líng khai-sí thuân kàu tsuân sè-kài. 48 Lín tsiū-sī tsiah-ê tāi-tsì ê kiàn-tsìng-jîn. 49 Guá tsiong Guá ê Thiⁿ-Pē só͘ ìng-ín ê kau hō͘ lín. M̄-koh lín tio̍h tī tsit-ê siâⁿ thìng-hāu kàu tit-tio̍h tíng-bīn lâi ê kuân-lîng."

Iâ-so͘ Tsiūⁿ-thiⁿ (Mt 16:19-20; St 1:9-11)
50 Iâ-so͘ tshuā in tshut-khì kàu Pik-tāi-nî, jiân-āu gia̍h-khí siang-tshiú kā in tsiok-hok. 51 Teh kā in tsiok-hok ê tiong-kan tsiū lī-khui in, siū tsiap tsiūⁿ-thiⁿ. 52 In tsiū phak lo̍h-khì kā I pài. Jiân-āu huaⁿ-huaⁿ hí-hí tńg-khì Iâ-lō͘-sat-líng, 53 kè-sio̍k ta̍k-ji̍t tī sìng-tiān lāi o-ló Siōng-Tsú.