《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第一章

作者 巴克禮普世版小組 2013.09.29

Ua̍h-miā Tsi Tō
1 Siōng-Tsú tshòng-tsō ú-tiū í-tsîng tsiū ū Tō, Tō kah Siōng-Tsú tông-tsāi, Tō tsiū-sī Siōng-Tsú. 2 Tuì guân-khí-thâu, tsit-ê Tō tsiū kah Siōng-Tsú tông-tsāi. 3 Siōng-Tsú thong-kuè Tō lâi tshòng-tsō bān-bu̍t. It-tshè siū tshòng-tsō ê lóng sī thong-kuè Tō lâi tshòng-tsō. 4 Tō pún-sin ū ua̍h-miā, tsit-ê ua̍h-miā sī jîn-luī ê kng. 5 Tsit-ê kng tsiò tī o͘-àm tiong. M̄-koh o͘-àm m̄ tsiap-la̍p kng. 6 Siōng-Tsú tshe-phài tsi̍t-ê lâng lâi, i ê miâ-kiò-tsò Iok-hān. 7 Tsit-ê lâng lâi beh uī kng tsò kiàn-tsìng, thang hō͘ tsuân jîn-luī thiaⁿ i ê uē lâi sìn. 8 I pún-sin m̄-sī hit-ê kng, kan-taⁿ beh uī hit-ê kng tsò kiàn-tsìng. 9 Hit-ê sī tsin ê kng, beh lâi tsit-ê sè-kan kā tsuân jîn-luī tsiò-kng. 10 Tō í-king tī sè-kan, sè-kan thong-kuè Tō lâi tshòng-tsō. M̄-koh sè-kan-lâng m̄-bat tsit-ê Tō. 11 Tō lâi-kàu ka-kī ê pún só͘-tsāi, ka-kī ê lâng mā bô tsiap-la̍p I. 12 Hiah-ê tsiap-la̍p I, tsiū-sī sìn I ê lâng, I tsiū siúⁿ-sù in ū kuân tsiâⁿ-tsò Siōng-Tsú ê kiáⁿ-jî. 13 In m̄-sī tuì hiat-thóng, m̄-sī tuì jio̍k-thé, mā m̄-sī tuì lâng ê ì-sù lâi tshut-sì. In sī Siōng-Tsú ê kiáⁿ-jî. 14 Tō tsiâⁿ jio̍k-thé, tiàm tī lán tiong-kan, tshiong-muá un-tián kah tsin-lí. Lán ū khuàⁿ-tio̍h I ê îng-iāu, he sī Thiⁿ-Pē ê to̍k-seⁿ Kiáⁿ tsiah ū ê îng-iāu. 15 Iok-hān uī-tio̍h I tsò kiàn-tsìng, tuā-siaⁿ huah kóng, " Tsit-ê tsiū-sī guá só͘ kóng, tuè guá āu-bīn lâi ê, khiok pí guá khah uí-tāi. In-uī guá iáu-buē tshut-sì I tsiū tsûn-tsāi. 16 I í-king tsiong hong-sīng ê un-tián tsiok-hok lán tāi-ke. Hō͘ lán un-siōng ka-un. 17 Lu̍t-huat sī Siōng-Tsú thong-kuè Mô͘-se lâi pan-pò͘; un-tián kah tsin-lí sī thong-kuè Iâ-so͘ Ki-tok lâi ê. 18 Bô-lâng bat khuàⁿ-kìⁿ Siōng-Tsú. Kan-taⁿ tī Thiⁿ-Pē sim-huâi tiong ê to̍k-seⁿ Kiáⁿ ū kā I hián-bîng tshut-lâi.

Kiâⁿ sé-lé Iok-hān ê Kiàn-tsìng (Mt 3:1-12;Mk 1:1-8;Lk 3:1-18)
19 Ē-bīn sī Iok-hān ê kiàn-tsìng: Iâ-lō͘-sat-líng ê Iû-thài-kàu tong-kio̍k tshe-phài tsè-si kah Lī-bī-lâng lâi mn̄g Iok-hān kóng, " Lí sī siáⁿ-lâng?" 20 Hit sî Iok-hān thán-pi̍k kong-khai sîng-jīn kóng, " Guá m̄-sī Ki-tok." 21 Hiah-ê lâng koh mn̄g i kóng, " Án-ne lí sī Í-lī-a sī-bô?" Iok-hān ìn kóng, " M̄-sī." In koh mn̄g i kóng, " Lí sī hit-ê sian-ti sī-bô?" Iok-hān ìn kóng, " M̄-sī." 22 In tsiū kā i kóng, " Lí sī siáⁿ-lâng? Tshiáⁿ lí kā guán kóng, thang hō͘ guán huê-tap tshe-phài guán lâi ê lâng. Lí ka-kī kóng lí sī siáⁿ-lâng?" 23 Iok-hān ín-iōng sian-ti Í-sài-a ê uē kóng, " Guá tsiū-sī khòng-iá teh huah ê siaⁿ, kóng, Tio̍h uī Tsú siu-ti̍t tō-lō͘."( tsù: ISA 40:3) 24 Hiah-ê lâng tsiū-sī Huat-lī-sài-phài ê lâng tshe-phài ê. 25 In koh mn̄g Iok-hān kóng, " Lí nā m̄-sī Ki-tok, mā m̄-sī Í-lī-a, mā m̄-sī hit-ê sian-ti, lí ná-ē kā lâng sé-lé?" 26 Iok-hān ìn kóng, " Guá sī īng tsuí kā lâng sé-lé. M̄-koh ū tsi̍t uī lín m̄-bat ê khiā tī lín tiong-kan. 27 I tī guá ê āu-bīn teh lâi. Guá liân kā I tháu ê-tuà to bē kham-tit." 28 Tsiah-ê tāi-tsì tī Iok-tàn-hô tang-huāⁿ ê Pik-tāi-nî huat-sing. Iok-tàn-hô tsiū-sī Iok-hān kā lâng sé-lé ê só͘-tsāi.

Siōng-Tsú ê Iûⁿ-ko
29 Keh-tńg-ji̍t, Iok-hān khuàⁿ-tio̍h Iâ-so͘ kiâⁿ uá-lâi, tsiū kóng, " Lí khuàⁿ, Siōng-Tsú ê Iûⁿ-ko, I beh lâi siau-tû sè-kan-lâng ê tsuē. 30 Kuan-hē I ê tāi-tsì guá bat kā lín kóng, I pí guá khah bān lâi, m̄-koh I pí guá khah uí-tāi. In-uī guá iáu-buē tshut-sì I tsiū tsûn-tsāi. 31 Guá ka-kī mā m̄-bat I. M̄-koh guá lâi īng tsuí sé-lé sī beh hō͘ Í-sik-lia̍t-lâng jīn-bat I." 32 Iok-hān koh kiàn-tsìng kóng, " Guá bat khuàⁿ-tio̍h Sìng-Sîn tshin-tshiūⁿ hún-tsiáu tuì thiⁿ kàng lo̍h-lâi hioh tī I tíng-bīn. 33 Guá ka-kī mā m̄-bat I. M̄-koh tshe guá lâi īng tsuí kā lâng sé-lé Hit-uī Siōng-Tsú ū kā guá kóng, ' Lí khuàⁿ Sìng-Sîn kàng-lîm hioh tī I tíng-bīn. I tsiū-sī beh īng Sìng-Sîn kā lâng sé-lé Hit-uī.' 34 Guá ū tshin-ba̍k khuàⁿ-tio̍h. Só͘-í guá lâi kiàn-tsìng Tsit-uī tsiū-sī Siōng-Tsú ê Kiáⁿ."

Iâ-so͘ Ho͘-tiàu Thâu-phue Bûn-tô͘
35 Keh-tńg-ji̍t, Iok-hān kah nn̄g-ê bûn-tô͘ khiā tī hia. 36 Iok-hān khuàⁿ-tio̍h Iâ-so͘ teh kiâⁿ tsiū kóng, " Lí khuàⁿ, Siōng-Tsú ê Iûⁿ-ko!" 37 Hit nn̄g-ê bûn-tô͘ thiaⁿ-tio̍h i án-ne kóng, tsiū khì tuè Iâ-so͘. 38 Iâ-so͘ ua̍t-tńg-sin khuàⁿ-tio̍h in teh tuè I, tsiū kā in kóng, " Lín teh tshuē sím-mi̍h?" In ìn kóng, " Lia̍p-pí, Lí tuà tī tó-uī?" (Lia̍p-pí tsiū-sī Lāu-su ê ì-sù). 39 Iâ-so͘ kā in kóng, " Lín tuè Guá lâi-khì khuàⁿ." In tsiū khì khuàⁿ Iâ-so͘ tuà ê só͘-tsāi. Hit ji̍t kah I tsò-hué tuà. Hit sî tsha-put-to ē-po͘ sì tiám. 40 Thiaⁿ Iok-hān ê uē lâi tuè Iâ-so͘ hit nn̄g lâng, tsi̍t-ê sī Se-bûn Pí-tik ê sió-tī An-tik-lia̍t. 41 I sing-khì tshuē i ê hiaⁿ-ko Se-bûn, kā i kóng, " Guán í-king tú-tio̍h Ki-tok." 42 I tsiū tshuā Se-bûn lâi kìⁿ Iâ-so͘. Iâ-so͘ tsù-ba̍k kā i khuàⁿ, kóng, " Lí sī Iok-hān ê kiáⁿ Se-bûn. Guá beh kā lí kiò-tsò Ki-huat." ( Ki-huat kah Pí-tik kāng-khuán ì-sù, tsiū-sī tsio̍h-puâⁿ).

Iâ-so͘ Ho͘-tiàu Hui-li̍k kah Ná-tàn-gia̍p
43 Keh-tńg-ji̍t, Iâ-so͘ beh khì Ka-lī-lī-síng, tú-tio̍h Hui-li̍k tsiū kā i kóng, " Lâi tuè Guá." 44 Hui-li̍k sī Pik-sài-tāi-lâng , sī An-tik-lia̍t kah Pí-tik ê tông-hiong. 45 Hui-li̍k tú-tio̍h Ná-tàn-gia̍p tsiū kā i kóng, " Mô͘-se tī lu̍t-huat-su só͘ siá kah sian-ti só͘ kì-tsài ê Hit-uī, guán í-king ū tú-tio̍h, tsiū-sī Iok-sik ê kiáⁿ, Ná-sat-li̍k-lâng Iâ-so͘." 46 Ná-tàn-gia̍p kā i kóng, " Ná-sat-li̍k hit khuán só͘-tsāi kám ē tshut sím-mi̍h hó mi̍h ?" Hui-li̍k kóng, " Lí lâi-khì khuàⁿ!" 47 Iâ-so͘ khuàⁿ-tio̍h Ná-tàn-gia̍p kiâⁿ uá-lâi tsiū kóng, " Lí khuàⁿ, I sī tsin-tsiàⁿ Í-sik-lia̍t-lâng, sim bô hi-ké ê lâng." 48 Ná-tàn-gia̍p mn̄g Iâ-so͘ kóng, " Lí ná-ē bat guá?" Iâ-so͘ ìn kóng, " Hui-li̍k iáu-buē kiò lí, Guá tsiū khuàⁿ-tio̍h lí tī bû-hua-kó-tshiū kha." 49 Ná-tàn-gia̍p ìn kóng, " Lāu-su, Lí tsiū-sī Siōng-Tsú ê Kiáⁿ. Lí tsiū-sī Í-sik-lia̍t ê Ông." 50 Iâ-so͘ ìn kóng, " In-uī guá kā lí kóng, Guá ū khuàⁿ-tio̍h lí tī bû-hua-kó-tshiū kha, lí tsiū sìn Guá sī-bô? Lí ē khuàⁿ-kìⁿ pí tse koh-khah tuā ê tāi-tsì." 51 Iâ-so͘ koh kā in kóng, " Guá si̍t-tsāi kā lín kóng, Lín ē khuàⁿ-kìⁿ thiⁿ khui, Siōng-Tsú ê thiⁿ-sài tī Jîn-tsú ê tíng-bīn teh khí-khí lo̍h-lo̍h."