《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第七章

作者 巴克禮普世版小組 2013.11.17

Iâ-so͘ Kah I ê Hiaⁿ-tī 1 Hiah-ê tāi-tsì í-āu, Iâ-so͘ khì Ka-lī-lī-síng sì-kè kiâⁿ. I bô ài khì Iû-thài-síng, in-uī Iû-thài-lâng ài-beh kā I thâi. 2 Iû-thài-lâng ê Tah-liâu-tseh teh-beh kàu. 3 Só͘-í Iâ-so͘ ê hiaⁿ-tī kā I kóng, " Lí tio̍h lī-khui tsia, khì Iû-thài-síng, hō͘ lí ê bûn-tô͘ mā thang khuàⁿ Lí teh tsò ê tāi-tsì. 4 Lâng nā ài tshut-miâ tsiū bē tiām-tiām-á tsò tāi-tsì. Lí kì-jiân teh tsò tsiah-ê tāi-tsì, tio̍h khì tsò hō͘ sè-kan-lâng khuàⁿ." 5 In-uī liân I ê hiaⁿ-tī mā m̄ sìn I. 6 Iâ-so͘ tsiū kā in kóng, " Guá ê sî iáu-buē kàu, m̄-koh lín ê sî tshìn-tshái sî to ū. 7 Sè-kan-lâng bē uàn-hūn lín. In uàn-hūn Guá, in-uī Guá put-sî teh tsí-tshut in ê siâ-ok tsok-uî. 8 Lín tsò lín khì siú lín ê tseh. Guá bô ài tsiūⁿ-khì siú tsit-ê tseh, in-uī Guá ê sî iáu-buē kàu." 9 Iâ-so͘ kóng tsiah-ê uē liáu-āu iû-guân lâu tī Ka-lī-lī-síng.

Iâ-so͘ Kuè Tah-liâu-tseh
10 Iâ-so͘ ê hiaⁿ-tī khì siú tseh, I mā khì, m̄-koh m̄-sī kong-khai, sī tiām-tiām-á khì. 11 Iû-thài-lâng tī tseh-kî tiong teh tshuē Iâ-so͘. Mn̄g lâng kóng, " Hit-ê lâng tī tó-uī?" 12 Tsìng-lâng tiong-kan tsin-tsē lâng su-hā teh gī-lūn Iâ-so͘ ê tāi-tsì. Ū-lâng kóng, " I sī hó lâng, mā ū-lâng kóng, " M̄-sī, I sī teh siàn-tōng kûn-tsiòng." 13 M̄-koh in kiaⁿ Iû-thài-lâng ê iân-kò͘, bô-lâng káⁿ kong-khai kóng-khí Iâ-so͘ ê tāi-tsì. 14 Kàu tseh-kî ê tiong-tsām, Iâ-so͘ tsiah tsiūⁿ-khì sìng-tiān kà-sī lâng. 15 Iû-thài-lâng tsiū kî-kuài, kóng, " Tsit-ê lâng bô siū kàu-io̍k, ná-ē hiah-ni̍h ū ha̍k-būn?" 16 Iâ-so͘ tsiū kā in kóng, " Guá ê kà-sī m̄-sī tuì ka-kī lâi ê, sī tuì tshe-phài Guá lâi Hit-uī ê kà-sī. 17 Lâng nā guān-ì tsiàu Siōng-Tsú ê tsí-ì lâi tsò, tsiū ē tsai Guá ê kà-sī sī tuì Siōng-Tsú lâi, á-sī tsiàu Guá ka-kī ê ì-sù teh kóng. 18 Uá-khò ka-kī teh kóng ê sī kiû ka-kī ê îng-kng. Kiû tshe-phài I Hit-uī ê îng-kng ê lâng sī tsin-si̍t. I ê lāi-bīn mā lóng bô put-gī. 19 Mô͘-se kám bô hō͘ lín lu̍t-huat? M̄-koh lín tiong-kan bô kah tsi̍t-ê lâng siú lu̍t-huat. Lín ná-ē siūⁿ-beh thâi Guá?" 20 Tsìng-lâng ìn kóng, " Lí m̄ teh khí-kông, siáⁿ-lâng ài beh thâi Lí?" 21 Iâ-so͘ ìn kóng, " Guá kan-taⁿ tsò tsi̍t hāng tāi-tsì, lín tsiū lóng kám-kak kî-kuài. 22 Mô͘-se bīng-līng lín kiâⁿ kat-lé. Lín mā tī An-hioh-ji̍t kā lâng kiâⁿ kat-lé. Sū-si̍t-siōng, tsit-ê kat-lé m̄-sī tuì Mô͘-se, sī tuì lín tsó͘-sian to̍h khai-sí. 23 Kì-jiân lín uî-gi̍k Mô͘-se ê lu̍t-huat, tī An-hioh-ji̍t kiâⁿ kat-lé, án-neGua2 tī An-hioh-ji̍t kā tsi̍t-ê pēⁿ-lâng uân-tsuân i-hó, lín ná-ē hiah siū-khì? 24 M̄-thang tsiàu guā-māu lâi phuàⁿ-tuàn lâng, tio̍h tsiàu kong-tō lâi phuàⁿ-tuàn."

I Sī Ki-tok á M̄-sī?
25 Ū kuá Iâ-lō͘-sat-líng ê lâng teh kóng, " Tsit-ê kám m̄-sī in siūⁿ-beh sat-hāi ê lâng? 26 Lí khuàⁿ, I hó-táⁿ teh kóng, mā bô-lâng tuì I kóng sím-mi̍h. Kám kóng tsiah-ê kuaⁿ-hú tsin-tsiàⁿ tsai-iáⁿ tsit-ê sī Ki-tok? 27 M̄-koh lán tsai tsit-ê lâng tuì tó-uī lâi. Ki-tok lâi ê sî bô-lâng tsai I tuì tó-uī lâi." 28 Iâ-so͘ tī sìng-tiān kà-sī ê sî tuā-siaⁿ huah kóng, " Lín bat guá, mā tsai guá tuì tó-uī lâi. Guá m̄-sī tsiàu ka-kī ê ì-sù lâi. Tshe-phài Guá lâi ê Hit-uī sī tsin-si̍t, lín khiok m̄-bat I. 29 Guá bat I, in-uī Guá tuì I hia lâi, mā sī I tshe-phài Guá lâi." 30 Hiah-ê lâng siūⁿ-beh kā I lia̍h khí-lâi, m̄-koh bô-lâng hē-tshiú, in-uī I ê sî iáu-buē kàu. 31 Kûn-tsiòng tiong-kan tsin-tsē lâng sìn I, kóng, " Ki-tok lâi ê sî, kám ē pí tsit-ê lâng kiâⁿ khah tsē sîn-jiah?"

Kíng-uē Siū Phài Khì Lia̍h Iâ-so͘
32 Huat-lī-sài-phài ê lâng thiaⁿ-tio̍h kûn-tsiòng án-ne teh gī-lūn Iâ-so͘ ê tāi-tsì. tsè-si-tiúⁿ kah Huat-lī-sài-phài ê lâng tsiū tshe kíng-uē khì lia̍h Iâ-so͘. 33 Iâ-so͘ tsiū kóng, " Guá koh kah lín tsò-hué bô juā kú tsiū beh tńg-khì tshe-phài Guá lâi Hit-uī hia. 34 Lín beh tshuē guá, m̄-koh tshuē bē-tio̍h, in-uī Guá beh khì ê só͘-tsāi, lín bē-tàng khì." 35 Iû-thài-lâng tsiū hō͘-siōng kóng, " Tsit-ê lâng beh khì tó-uī hō͘ lán tshuē bē-tio̍h? Kám siūⁿ-beh khì sì-suàⁿ tī Hi-lia̍p siâⁿ-tshī ê Iû-thài kiâu-bîn hia, khì kà-sī Hi-lia̍p-lâng sī-bô? 36 I kóng, 'Lín beh tshuē guá, m̄-koh tshuē bē-tio̍h, in-uī Guá beh khì ê só͘-tsāi, lín bē-tàng khì.' Tse sī sím-mi̍h ì-sù?"

Íng-sing Ua̍h-tsuí ê Khe
37 Tseh-kî ê tsuè-āu hit ji̍t, tsiū-sī siōng tiōng-iàu ê ji̍t, Iâ-so͘ khiā khí-lâi tuā-siaⁿ huah kóng, " Tshuì-ta ê lâng tio̍h lâi Guá tsia lim. 38 Sìn guá ê lâng, tsiàu Sìng-king só͘ kóng, ' Ū ua̍h-tsuí ê khe tuì i ê pak-lāi tshìng tshut-lâi.'" 39 Iâ-so͘ án-ne kóng sī tsí sìn I ê lâng teh beh niá-siū Sìng-Sîn. Hit sî Siōng-Tsú iáu-buē siúⁿ-sù Sìng-Sîn, in-uī Iâ-so͘ iáu-buē tit-tio̍h îng-kng.

Tsìng-lâng In-uī Iâ-so͘ Khí Hun-tsing
40 Kûn-tsiòng tiong-kan ū-lâng thiaⁿ-tio̍h tsiah-ê uē tsiū kóng, " Tsit-ê lâng tsin-tsiàⁿ sī hit-uī sian-ti." 41 Koh ū-lâng kóng, " Tsit-ê lâng tsiū-sī Ki-tok." M̄-koh mā ū-lâng kóng, " Ki-tok kám ē tuì Ka-lī-lī-síng tshut? 42 Sìng-king kám bô kóng, ' Ki-tok sī Tāi-pi̍t ê kiáⁿ-sun, sī tuì Tāi-pi̍t ê kò͘-hiong Pik-lī-hîng-siâⁿ tshut?" 43 Kûn-tsiòng tsiū án-ne in-uī Iâ-so͘ lâi khí hun-tsing. 44 Kî-tiong ū kuá lâng ài beh lia̍h Iâ-so͘, m̄-koh bô-lâng hē-tshiú.

Iû-thài-kàu ê Thâu-lâng M̄-sìn Iâ-so͘
45 Sìng-tiān ê kíng-uē tńg lâi kìⁿ tsè-si-tiúⁿ kah Huat-lī-sài-phài ê lâng. In mn̄g kíng-uē kóng, " Ná-ē bô kā Iâ-so͘ ah tńg-lâi?" 46 Kíng-uē ìn kóng, " Tsiông-lâi m̄-bat ū-lâng kóng-uē tshin-tshiūⁿ tsit-ê lâng." 47 Huat-lī-sài-phài ê lâng ìn kóng, " Lín mā khì hō͘ I bê-khì sī-bô? 48 Lán ê kuaⁿ-uân á-sī Huat-lī-sài-phài ê lâng, kám ū-lâng sìn I? 49 Tsit tīn m̄-bat lu̍t-huat ê gōng-lâng tio̍h siū tsik-hua̍t." 50 In tiong-kan ū tsi̍t uī bat khì kìⁿ Iâ-so͘ ê Nî-ko-tí-bó͘ kā in kóng, 51 Tsiàu lán ê lu̍t-huat, bô sing sím-mn̄g koh tsa-bîng i ū tsò sím-mi̍h, lán kám ē-tàng kā i tīng-tsuē? 52 In tsiū ìn kóng, " Lí mā sī tuì Ka-lī-lī-síng lâi ê sī-bô? Lí khì tsa-khó Sìng-king tsiū tsai, Ka-lī-lī-síng bô tshut sian-ti."