《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第六章

作者 巴克禮普世版小組 2013.11.10

Iâ-so͘ Hō͘ Gō͘-tshing Lâng Tsia̍h Kah Pá (Mt 14:13-21;Mk 6:30-44;Lk 9:10-17) Tsiah-ê tāi-tsì í-āu, Iâ-so͘ kuè-khì Ka-lī- 1 lī-ô͘, tsiū-sī Thê-pì-lí-a -ô͘ ê hit pîng. 2 Ū tsin-tsē lâng tuè Iâ-so͘ khì, in-uī in ū khuàⁿ-tio̍h I i-hó pēⁿ-lâng ê sîn-jiah. 3 Iâ-so͘ peh-tsiūⁿ suaⁿ, kah I ê bûn-tô͘ tsò-hué tsē tī hia. 4 Iû-thài-lâng ê Puâⁿ-kuè-tseh teh-beh kàu. 5 Iâ-so͘ gia̍h thâu khuàⁿ-tio̍h tsin-tsē lâng tuì I kiâⁿ uá-lâi, tsiū kā Hui-li̍k kóng, " Lán beh khì tó-uī bé piáⁿ lâi hō͘ tsiah-ê lâng tsia̍h?" 6 Iâ-so͘ kóng án-ne sī teh tshì-thàm Hui-li̍k, in-uī Iâ-so͘ ka-kī tsai teh-beh tsò ê tāi-tsì. 7 Hui-li̍k ìn kóng, " Īng nn̄g-pah ê gîn-á lâi bé piáⁿ mā bô kàu hō͘ in ta̍k-lâng tsia̍h tām-po̍h-á." 8 Līng-guā tsi̍t-ê bûn-tô͘, tsiū-sī Se-bûn Pí-tik ê sió-tī An-tik-lia̍t, kā Iâ-so͘ kóng, 9 " Tsia ū tsi̍t-ê gín-á, i ū gō͘-tè tuā-be̍h-piáⁿ kah nn̄g bué hî, m̄-koh tsiong tsiah-ê hō͘ hiah-tsē lâng tsia̍h ná ū kàu?" 10 Iâ-so͘ kóng, " Lín kiò hiah-ê lâng tsē lo̍h-khì." Hit só͘-tsāi tsin-tsē tsháu. Tsìng-lâng tsiū lóng tsē lo̍h-khì. Kan-taⁿ tsa-po͘-lâng tsiū ū gō͘-tshing lâng. 11 Iâ-so͘ the̍h hiah-ê piáⁿ lâi tsiok-siā liáu-āu, tsiū pun hō͘ tsē tī hia ê lâng. Hî mā sī án-ne pun, tshut-tsāi in tsia̍h. 12 Tsìng-lâng lóng tsia̍h pá liáu-āu, Iâ-so͘ kā bûn-tô͘ kóng, " Kā tsia̍h tshun ê sut-á khioh khí-lâi, m̄-thang phah-sńg." 13 In tsiū tsiong tsia̍h tshun ê piáⁿ-sut-á khioh khí-lâi, lóng-tsóng muá tsa̍p-jī nâ. 14 Tsìng-lâng khuàⁿ-tio̍h Iâ-so͘ só͘ kiâⁿ ê sîn-jiah tsiū kóng, " Tsit-ê tsin-tsiàⁿ sī teh-beh lâi tsit sè-kan ê sian-ti." 15 Iâ-so͘ tsai-iáⁿ tsìng-lâng teh-beh lâi kiông-pik I tsò ông, tsiū ka-kī tsi̍t-ê thè-khì suaⁿ-ni̍h.

Iâ-so͘ Kiâⁿ Tsuí-bīn (Mt 14:22-33;Lk 6:45-52)
16 Hông-hun ê sî, Iâ-so͘ ê bûn-tô͘ lo̍h-khì kàu ô͘-piⁿ. 17 In tsē tsûn beh kuè ô͘ khì Ka-pik-lông hit pîng. Thiⁿ í-king àm, Iâ-so͘ iáu-buē kàu in hia. 18 In-uī thàu tuā-hong, hong-íng ná lâi ná tuā. 19 Bûn-tô͘ kò tsûn tsha-put-to kiâⁿ gō͘ la̍k kong-lí ê sî, khuàⁿ-tio̍h Iâ-so͘ tī ô͘-bīn teh kiâⁿ, ná lâi ná uá-kīn tsûn, in tsiū khí kiaⁿ. 20 M̄-koh Iâ-so͘ tuì in kóng, " Sī Guá là, m̄-bián kiaⁿ!" 21 Bûn-tô͘ tsiū huaⁿ-hí tsiap I tsiūⁿ-tsûn. Tsûn liâm-piⁿ to̍h kàu in beh khì ê só͘-tsāi.

Tsìng-lâng Tshuē Iâ-so͘
22 Keh-tńg-ji̍t, iáu tī ô͘ hit-pîng huāⁿ ê kûn-tsiòng khuàⁿ-tio̍h hit uī kan-taⁿ tsi̍t tsiah tsûn-á. Iâ-so͘ mā bô kah bûn-tô͘ tsò-hué tsē hit tsiah tsûn. Tsí-ū bûn-tô͘ ka-kī khì. 23 M̄-koh ū kuí tsiah tsûn-á tuì Thê-pì-lí-a lâi, kàu uá-kīn tsîng Tsú tsiok-siā liáu-āu pun piáⁿ hō͘ kûn-tsiòng tsia̍h ê só͘-tsāi. 24 Kûn-tsiòng khuàⁿ-tio̍h Iâ-so͘ kah bûn-tô͘ lóng bô tī hia, tsiū tsē hit kuí tsiah tsûn-á kuè-khì Ka-pik-lông tshuē Iâ-so͘.

Iâ-so͘ Sī Sèⁿ-miā ê Piáⁿ
25 Kûn-tsiòng tī ô͘ ê hit-pîng huāⁿ tshuē-tio̍h Iâ-so͘ tsiū mn̄g kóng, " Lāu-su, lí sím-mi̍h sî kàu tsia?" 26 Iâ-so͘ ìn kóng, " Guá si̍t-tsāi kā lín kóng, lín tsiah-ê lâng tshuē guá, sī in-uī tsia̍h piáⁿ tsia̍h kàu pá, m̄-sī in-uī khuàⁿ-tio̍h sîn-jiah. 27 M̄-thang uī-tio̍h ē pāi-huāi ê tsia̍h-mi̍h lâi lô-khó͘, tio̍h uī kú-tn̂g tī-teh íng-uán ua̍h-miā ê tsia̍h-mi̍h lâi phah-piàⁿ, tsiū-sī Jîn-tsú beh hō͘ lín ê, in-uī Thiⁿ-Pē Siōng-Tsú í-king kā I khap-ìn jīn-tīng." 28 Kûn-tsiòng tsiū mn̄g Iâ-so͘ kóng, " Guán beh uân-sîng Siōng-Tsú ê kang-tsok ing-kai tio̍h án-tsuáⁿ lâi tsò?" 29 Iâ-so͘ ìn kóng, " Sìn Siōng-Tsú tshe-phài lâi ê Hit-uī tsiū-sī tsò Siōng-Tsú ê kang." 30 Kûn-tsiòng tsiū kóng, " Lí kiâⁿ sím-mi̍h sîn-jiah hō͘ guán khuàⁿ thang lâi sìn Lí? Lí beh tsò sím-mi̍h? 31 Guán ê tsó͘-sian-sian tī khòng-iá tsia̍h má-ná. Tú-tú tsiàu Sìng-king só͘ kì-tsài: Īng tuì thiⁿ lâi ê piáⁿ hō͘ in tsia̍h."( tsù: SPh 78:24) 32 Iâ-so͘ tsiū kā in kóng, " Guá si̍t-tsāi kā lín kóng, M̄-sī Mô͘-se īng tuì thiⁿ lâi ê piáⁿ hō͘ lín tsia̍h, sī Guá ê Thiⁿ-Pē īng tuì thiⁿ lâi ê tsin ê piáⁿ hō͘ lín. 33 In-uī Siōng-Tsú ê piáⁿ, tsiū-sī hit-ê tuì thiⁿ lo̍h-lâi, mā sī sù ua̍h-miā hō͘ sè-kan ê." 34 Kûn-tsiòng tsiū tuì Iâ-so͘ kóng, " Sian-siⁿ, tshiáⁿ Lí sî-siông siúⁿ-sù tsit-tsióng piáⁿ hō͘ guán." 35 Iâ-so͘ kā in kóng, " Guá tsiū-sī ua̍h-miā ê piáⁿ. Lâi Guá tsia ê lâng tsua̍t-tuì bē iau, sìn Guá ê lâng íng-uán bē tshuì-ta. 36 M̄-koh guá bat kā lín kóng, lín í-king ū khuàⁿ-tio̍h Guá, iû-guân m̄ sìn. 37 Thiⁿ-Pē só͘ kau-tài Guá ê lâng lóng ē lâi Guá tsia. Lâi Guá tsia ê lâng, Guá tsua̍t-tuì bē kā i khì-sak. 38 In-uī Guá tuì thiⁿ kàng lo̍h-lâi m̄-sī tsiàu ka-kī ê ì-sù tsò tāi-tsì, sī beh uân-sîng tshe-phài Guá lâi Hit-uī ê tsí-ì. 39 Tshe-phài Guá lâi Hit-uī ê tsí-ì tsiū-sī: I só͘ kau-tài Guá ê lâng tsi̍t-ê to bē-īng-tit sit-lo̍h. Tī bua̍t-ji̍t Guá ē hō͘ i koh-ua̍h." 40 In-uī guá ê Thiⁿ-Pē ê tsí-ì tsiū-sī kìⁿ-nā khuàⁿ-tio̍h Kiáⁿ lâi sìn I ê lâng, lóng ū íng-uán ê ua̍h-miā. Guá tī bua̍t-ji̍t mā ē hō͘ i koh-ua̍h. 41 Iû-thài-lâng in-uī Iâ-so͘ ū kóng, " Guá sī tuì thiⁿ kàng-lo̍h ê piáⁿ." tsiū tshit-tshuì peh-tshuì kóng, 42 " Tsit-ê kám m̄-sī Iok-sik ê kiáⁿ Iâ-so͘? I ê pē-bú sī lán só͘ bat ê. Tsit-má I ná-ē kóng, ' Guá sī tuì thiⁿ kàng-lo̍h ê.'?" 43 Iâ-so͘ ìn kóng, " Lín m̄-thang án-ne nga̍uh-nga̍uh-liām. 44 Nā m̄-sī tshe-phài Guá lâi ê Thiⁿ-Pē ín-tshuā, bô-lâng ē lâi Guá tsia. Lâi Guá tsia ê lâng, tī bua̍t-ji̍t Guá ē hō͘ i koh-ua̍h. 45 Sian-ti ê tsheh ū kì-tsài: Tsìng-lâng lóng ē tsiap-siū Siōng-Tsú ê kà-sī.( tsù: ISA 54:13) Só͘-ū tuì Thiⁿ-Pē thiaⁿ-tio̍h lâi ha̍k-si̍p ê lâng lóng ē lâi Guá tsia. 46 Tse m̄-sī kóng ū-lâng bat khuàⁿ-tio̍h Thiⁿ-Pē, tsí ū tuì Siōng-Tsú hia lâi ê Hit-uī bat khuàⁿ-tio̍h Thiⁿ-Pē. 47 Guá si̍t-tsāi kā lín kóng, Sìn ê lâng ū íng-uán ê ua̍h-miā. 48 Guá tsiū-sī ua̍h-miā ê piáⁿ. 49 Lín ê tsó͘-sian tī khòng-iá tsia̍h má-ná, in mā sī sí-khì. 50 Tse tsiū-sī tuì thiⁿ kàng-lo̍h ê piáⁿ, hō͘ lâng tsia̍h liáu bē sí. 51 Guá tsiū-sī tuì thiⁿ kàng-lo̍h hit-ê ua̍h ê piáⁿ. Lâng nā tsia̍h tsit-ê piáⁿ tsiū ē íng-uán ua̍h-teh. Guá só͘ beh hō͘ lâng ê piáⁿ tsiū-sī guá ê bah, sī uī-tio̍h beh hō͘ sè-kan-lâng ū ua̍h-miā lâi hiàn ê." 52 In-uī án-ne, Iû-thài-lâng tsiū hō͘-siōng tsing-lūn, kóng, " Tsit-ê lâng ná-ē īng I ê bah hō͘ lán tsia̍h?" 53 Iâ-so͘ tuì in kóng, " Guá si̍t-tsāi kā lín kóng, lín nā bô tsia̍h Jîn-tsú ê bah, bô lim I ê hueh, lín ê lāi-bīn tsiū bô ua̍h-miā. 54 Tsia̍h guá ê bah, lim guá ê hueh ê lâng ū íng-uán ê ua̍h-miā. Tī bua̍t-ji̍t Guá ē hō͘ i koh-ua̍h. 55 Guá ê bah sī tsin-si̍t ê tsia̍h-mi̍h, Guá ê hueh sī tsin-si̍t ê ím-liāu. 56 Tsia̍h guá ê bah, lim guá ê hueh ê lâng, i tiàm-tī Guá lāi-bīn, guá mā tiàm-tī i lāi-bīn. 57 Íng-ua̍h ê Thiⁿ-Pē tshe-phài Guá, Guá uī Thiⁿ-Pē lâi ua̍h; tshin-tshiūⁿ án-ne, tsia̍h Guá ê bah ê lâng ē in-uī Guá lâi ua̍h. 58 Tse sī tuì thiⁿ kàng-lo̍h ê piáⁿ, m̄-sī tshin-tshiūⁿ lín tsó͘-sian só͘ tsia̍h ê má-ná, in tsia̍h liáu mā sí-khì. Tsia̍h Guá tsit-ê piáⁿ ê lâng ē íng-uán ua̍h-teh." 59 Tsiah-ê sī Iâ-so͘ tī Ka-pik-lông ê huē-tn̂g kà-sī lâng ê sî kóng ê uē.

Íng-uán-ua̍h ê Uē
60 Iâ-so͘ ê bûn-tô͘ ū tsin-tsē lâng thiaⁿ-liáu tsiū kóng, " Tsiah-ê uē tsin khùn-lān koh tsha̍k-hīⁿ, siáⁿ-lâng thiaⁿ ē lo̍h-khì?" 61 Iâ-so͘ sim-lāi tsai-iáⁿ bûn-tô͘ in-uī tsit-ê tāi-tsì teh nga̍uh-nga̍uh-liām, tsiū kā in kóng, " Tsiah-ê uē jiá-tio̍h lín sī-bô? 62 Án-ne lín nā khuàⁿ-tio̍h Jîn-tsú tsiūⁿ kàu I guân-lâi ê só͘-tsāi. Lín ē án-tsuáⁿ? 63 Sù ua̍h-miā hō͘ lâng ê sī Sìng-Sîn. Jio̍k-thé bô siáⁿ lō͘-īng. Guá kā lín kóng ê uē sī tuì sù ua̍h-miā ê Sìng-Sîn lâi ê. 64 M̄-koh lín tiong-kan ū-lâng m̄ sìn." In-uī Iâ-so͘ tuì khí-thâu tsiū tsai-iáⁿ siáⁿ-lâng m̄ sìn, siáⁿ-lâng beh kā I tshut-bē. 65 Iâ-so͘ koh kóng, " In-uī án-ne, Guá bat kā lín kóng, nā m̄-sī Thiⁿ-Pē ín-tsún, bô-lâng ē-tàng lâi Guá tsia." 66 In-uī án-ne, bûn-tô͘ tiong-kan ū tsin-tsē lâng lī-khui, bô koh tuè Iâ-so͘ kiâⁿ. 67 Iâ-so͘ tsiū tuì tsa̍p-jī sù-tô͘ kóng, " Lín mā beh lī-khui sī-bô?" 68 Se-bûn Pí-tik ìn kóng, " Tsú ah, Lí ū íng-uán ua̍h-miā ê uē, guán tio̍h koh khì tuè siáⁿ-lâng? 69 Guán í-king sìn, koh khak-si̍t tsai Lí sī Siōng-Tsú ê Sìng-tsiá." 70 Iâ-so͘ ìn kóng, " Guá kám m̄-sī kíng lín tsa̍p-jī lâng? M̄-koh lín tiong-kan ū tsi̍t-ê sī mô͘-kuí?" 71 Iâ-so͘ kóng án-ne sī teh tsí Ka-lio̍k-lâng Se-bûn ê kiáⁿ Iû-tāi. I sī tsa̍p-jī sù-tô͘ ê tsi̍t-ê, teh-beh tshut-bē Iâ-so͘.