《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第十章

作者 巴克禮普世版小組 2013.12.08

Iûⁿ-tiâu ê Phì-jū
1 " Guá si̍t-tsāi kā lín kóng, beh ji̍p-khì iûⁿ-tiâu nā bô tuì hit-ê mn̂g, tuì pa̍t só͘-tsāi puâⁿ kuè-khì ê sī tsha̍t, sī kiông-tō. 2 Tuì mn̂g ji̍p-khì ê tsiah sī iûⁿ ê bo̍k-tsiá. 3 Kò͘-mn̂g ê kā bo̍k-tsiá khui mn̂g, iûⁿ ē jīn-tit bo̍k-tsiá ê siaⁿ. Bo̍k-tsiá tsiū kā ka-kī ê iûⁿ tsi̍t-tsiah tsi̍t-tsiah kiò miâ, kā in tshuā tshut-lâi. 4 Bo̍k-tsiá kā ka-kī ê iûⁿ lóng pàng tshut-khì liáu-āu, kiâⁿ tī iûⁿ-kûn ê thâu-tsîng. Iûⁿ tsiū tuè bo̍k-tsiá kiâⁿ, in-uī in ē jīn-tit i ê siaⁿ. 5 Iûⁿ it-tīng bē tuè tsheⁿ-hūn-lâng khì, tian-tò ē siám-phiah, in-uī in bē jīn-tit tsheⁿ-hūn-lâng ê siaⁿ. 6 Iâ-so͘ kā in kóng tsit-ê phì-jū, m̄-koh in m̄-tsai I teh kóng sím-mi̍h.

Iâ-so͘ Sī Hó Bo̍k-tsiá
7 Só͘-í Iâ-so͘ koh kā in kóng, "Guá si̍t-tsāi kā lín kóng, Guá tsiū-sī iûⁿ-tiâu ê mn̂g. 8 Só͘-í pí Guá khah tāi-sing lâi ê sī tsha̍t, sī kiông-tō, m̄-koh iûⁿ bô thiaⁿ in. 9 Guá tsiū-sī mn̂g, tuì guá tsit-ê mn̂g ji̍p-lâi ê ē tit-tio̍h kiù, ē-tàng tshut-tshut ji̍p-ji̍p, mā ē tshuē-tio̍h bo̍k-tsháu. 10 Tsha̍t lâi, it-tīng sī beh thau-the̍h, beh thâi, beh huí-bia̍t. Guá lâi sī beh hō͘ in tit-tio̍h hong-sīng ê ua̍h-miā." 11 Guá sī hó ê bo̍k-tsiá. Hó bo̍k-tsiá uī-tio̍h iûⁿ lâi pàng-sak sèⁿ-miā. 12 Hō͘ lâng tshiàⁿ tsò-kang ê lâng m̄-sī bo̍k-tsiá, iûⁿ mā m̄-sī ka-kī ê iûⁿ; i khuàⁿ-tio̍h tshâi-lông lâi, tsiū kā iûⁿ pàng-sak khì tô-tsáu, tshâi-lông kā hiah-ê iûⁿ, koh kā in kuáⁿ-suàⁿ. 13 I án-ne tô-tsáu, sī in-uī i sī hō͘ lâng tshiàⁿ ê kang-lâng, tuì iûⁿ lóng bô kuan-sim. 14 Guá sī hó ê bo̍k-tsiá. Guá bat ka-kī ê iûⁿ, hiah-ê iûⁿ mā bat Guá. 15 Tshin-tshiūⁿ Thiⁿ-Pē bat Guá, Guá mā bat Thiⁿ-Pē. Guá koh uī-tio̍h iûⁿ pàng-sak sèⁿ-miā. 16 Guá iáu ū kî-tha bô sio̍k tsit-ê iûⁿ-tiâu ê iûⁿ. Guá it-tīng tio̍h khì kā in tshuā lâi. In mā ē thiaⁿ Guá ê siaⁿ lâi tsiâⁿ-tsò tsi̍t kûn, kui-sio̍k tsi̍t-ê bo̍k-tsiá." 17 " Só͘-í Thiⁿ-Pē thiàⁿ Guá, in-uī Guá pàng-sak ka-kī ê sèⁿ-miā, thang koh tit-tio̍h sèⁿ-miā. 18 Bô-lâng tshiúⁿ Guá ê sèⁿ-miā, sī Guá ka-kī tsū-guān pàng-sak. Guá ū kuân thang pàng-sak, mā ū kuân thang koh tit-tio̍h. Tse sī Guá tuì Thiⁿ-Pē niá-siū ê bīng-līng." 19 In-uī Iâ-so͘ kóng tsiah-ê uē, Iû-thài-lâng koh khí hun-lia̍t. 20 Kî-tiong tsin-tsē lâng kóng, "I hō͘ siâ-sîn hū-sin teh khí-kông, ná-tio̍h thiaⁿ I ê uē?" 21 Koh ū-lâng kóng, "Tse m̄-sī hō͘ siâ-sîn hū-sin ê lâng só͘ kóng ê uē, kám kóng kuí ē khui tsheⁿ-mê lâng ê ba̍k-tsiu?"

Iâ-so͘ Hō͘ Iû-thài-lâng Khì-sak
22 Tī tang-thiⁿ sî, Iâ-lō͘-sat-líng ū teh khìng-tsiok hiàn-tiān ê tseh. 23 Iâ-so͘ tī sìng-tiān ê Só͘-lô-bûn tsáu-lông teh kiâⁿ. 24 Iû-thài-lâng uî-luî uá-lâi kā I kóng, "Lí beh hō͘ guán ê sim giâu-gî kàu tang sî? Lí nā sī Ki-tok, tio̍h tsiàu-si̍t kā guán kóng." 25 Iâ-so͘ ìn kóng, "Guá bat kā lín kóng, m̄-koh lín m̄ sìn. Guá hōng Guá ê Thiⁿ-Pē ê miâ só͘ tsò ê tāi-tsì, lóng sī teh uī Guá tsò kiàn-tsìng. 26 M̄-koh lín m̄ sìn, in-uī lín m̄-sī Guá ê iûⁿ. 27 Guá ê iûⁿ thiaⁿ Guá ê siaⁿ, Guá bat in, in mā tuè Guá. 28 Guá koh siúⁿ-sù in ū íng-uán ê ua̍h-miā, hō͘ in íng-uán bē tîm-lûn. Bô-lâng ē tuì Guá ê tshiú kā in tshiúⁿ-khì. 29 Kā hiah-ê iûⁿ siúⁿ-sù hō͘ Guá ê Thiⁿ-Pē pí it-tshè lóng khah uí-tāi. Bô-lâng ē-tàng kā in tuì Thiⁿ-Pē ê tshiú tshiúⁿ-khì. 30 Guá kah Thiⁿ-Pē tsiâⁿ-tsò tsi̍t-thé." 31 Iû-thài-lâng koh the̍h tsio̍h-thâu beh tìm Iâ-so͘. 32 Iâ-so͘ ìn kóng, "Thiⁿ-Pē ài Guá tsò ê tsin-tsē hó-sū, Guá lóng tsò hō͘ lín khuàⁿ. Lín sī uī-tio̍h tó tsi̍t-hāng tāi-tsì, beh īng tsio̍h-thâu kā Guá tìm?" 33 Hiah-ê Iû-thài-lâng ìn kóng, "Guán īng tsio̍h-thâu kā Lí tìm, m̄-sī uī-tio̍h Lí tsò hó-sū, sī in-uī Lí siat-to̍k Siōng-Tsú. Lí put-kò sī tsi̍t-ê lâng, iáu-koh ka-kī tsū-tshing-tsò Siōng-Tsú." 34 Iâ-so͘ ìn kóng, "Lín ê lu̍t-huat kám bô kì-tsài: Siōng-Tsú kóng, ' Guá kóng lín sī sîn-bîng'?( tsù: SPh 82:6) 35 Sìng-king ê uē íng-uán bē kái-piàn. Kì-jiân Siōng-Tsú tshing-ho͘ hiah-ê tsiap-siū Siōng-Tsú ê uē ê lâng tsò sîn-bîng. 36 Taⁿ Thiⁿ-Pē kā Guá hun-piat88 tsò sìng, koh tshe-phài Guá ji̍p sè-kan. Sī án-tsuáⁿ Guá kóng, ' Guá sī Siōng-Tsú ê Kiáⁿ', lín tsiū kóng Guá teh siat-to̍k Siōng-Tsú? 37 Guá nā m̄-sī teh tsò Thiⁿ-Pē ê tāi-tsì, lín m̄-bián sìn Guá. 38 Guá nā teh tsò Siōng-Tsú ê kang, lín sui-jiân m̄ sìn Guá, mā tio̍h sìn Guá só͘ tsò ê tāi-tsì, án-ne thang hō͘ lín tsai, Thiⁿ-Pē tī Guá ê lāi-bīn, Guá mā tī Thiⁿ-Pē ê lāi-bīn." 39 In koh-tsài siūⁿ-beh lia̍h Iâ-so͘, I tsiū thuat-lī in ê tshiú lī-khui hia. 40 Iâ-so͘ koh khì Iok-tàn-hô ê tuì-huāⁿ, kàu Iok-hān tsá-tsîng kā lâng sé-lé ê só͘-tsāi, tsiū tuà tī hia. 41 Ū tsin-tsē lâng koh lâi kìⁿ Iâ-so͘, kóng, "Iok-hān lóng bô kiâⁿ sîn-jiah, m̄-koh i só͘ kóng kuan-hē tsit-ê lâng ê tāi-tsì lóng sī tsin-si̍t." 42 Tī hia ū tsin-tsē lâng sìn Iâ-so͘.