《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第十一章

作者 巴克禮普世版小組 2013.12.15

Lia̍p-sat-lō͘ ê Sí-bông
1 Ū tsi̍t-ê pēⁿ-lâng, miâ-kiò Lia̍p-sat-lō͘, i tuà tī Pik-tāi-nî, tsiū-sī Má-lī-a kah i ê a-tsé Má-tāi ê tsng-siā. 2 Tsit-ê Má-lī-a tsiū-sī bat īng phang-iû buah Tsú ê kha, koh īng i ê thâu-mn̂g kā i tshit, i ê sió-tī Lia̍p-sat-lō͘ phuà-pēⁿ. 3 In nn̄g-ê tsí-muē tsiū tshe lâng khì tshuē Iâ-so͘, kóng, "Tsú ah, Lí só͘ thiàⁿ ê lâng teh phuà-pēⁿ." 4 Iâ-so͘ thiaⁿ-tio̍h tsiū kóng, "Tsit-ê pēⁿ bē tì-kàu sí. Tse sī uī-tio̍h beh hián-bîng Siōng-Tsú ê îng-kng, hō͘ Siōng-Tsú ê Kiáⁿ tuì tsit-ê tāi-tsì tit-tio̍h îng-kng." 5 Iâ-so͘ tsin thiàⁿ Má-tāi kah i ê sió-muē, í-ki̍p Lia̍p-sat-lō͘. 6 Iâ-so͘ thiaⁿ-tio̍h Lia̍p-sat-lō͘ phuà-pēⁿ, kè-sio̍k tī hit só͘-tsāi koh tuà nn̄g ji̍t. 7 Āu-lâi tsiū kā bûn-tô͘ kóng, "Lán koh lâi khì Iû-thài." 8 Bûn-tô͘ kā I kóng, "Lāu-su, kīn-lâi Iû-thài-lâng ài beh īng tsio̍h-thâu kā Lí tìm. Lí kám beh koh khì hia?" 9 Iâ-so͘ ìn kóng, "Ji̍t-sî kám m̄-sī ū tsa̍p-jī tiám-tsing? Lâng nā ji̍t-sî kiâⁿ-lō͘ tsiū bē pua̍h-tó, in-uī ū khuàⁿ-kìⁿ tsit sè-kan ê kng. 10 M̄-koh lâng nā àm-sî kiâⁿ-lō͘, tsiū ē pua̍h-tó, in-uī bô kng thang tsiò lō͘." 11 Iâ-so͘ kóng tsiah-ê uē liáu-āu koh kā in kóng, "Lán ê pîng-iú Lia̍p-sat-lō͘ teh khùn, Guá beh lâi-khì kā i kiò tshéⁿ." 12 Bûn-tô͘ kóng, "Tsú ah, i nā sī teh khùn, tsiū ē hó khí-lâi." 13 Iâ-so͘ sī kóng Lia̍p-sat-lō͘ í-king sí-khì, m̄-koh in lia̍h-tsún sī kóng i tsin-tsiàⁿ teh khùn. 14 Só͘-í Iâ-so͘ bîng-pi̍k kā in kóng, "Lia̍p-sat-lō͘ sí-khì à. 15 Guá mā uī-tio̍h lín huaⁿ-hí, in-uī guá bô tī hia sī beh hō͘ lín sìn Guá. Taⁿ lán lâi khì i hia." 16 Kiò tsò siang-seⁿ-á ê To-má kā bûn-tô͘ tâng-phuāⁿ kóng, "Lán mā lâi khì, thang kah I tsò-hué sí."

Iâ-so͘ Sī Koh-ua̍h, Sī Ua̍h-miā
17 Iâ-so͘ khì kàu-uī ê sî, Lia̍p-sat-lō͘ í-king bâi-tsòng tī bōng-ni̍h sì ji̍t kú ā. 18 Pik-tāi-nî lī Iâ-lō͘-sat-líng iok saⁿ kong-lí. 19 Ū tsin-tsē Iû-thài-lâng in-uī Lia̍p-sat-lō͘ sí-khì lâi an-uì Má-tāi kah Má-lī-a. 20 Má-tāi thiaⁿ-tio̍h Iâ-so͘ lâi, tsiū tshut-khì gîng-tsiap. Má-lī-a iû-guân tsē tī tshù-lāi. 21 Má-tāi tuì Iâ-so͘ kóng, "Tsú ah, Lí nā tī tsia, guán sió-tī tsiū bē sí. 22 Taⁿ guá mā tsai, Lí tuì Siōng-Tsú kiû sím-mi̍h, Siōng-Tsú it-tīng ē hō͘ Lí." 23 Iâ-so͘ kā i kóng, "Lí ê sió-tī ē koh-ua̍h khí-lâi." 24 Má-tāi ìn kóng, "Guá tsai tī bua̍t-ji̍t koh-ua̍h ê sî, i ē koh-ua̍h khí-lâi." 25 Iâ-so͘ kā i kóng, "Koh-ua̍h kah ua̍h-miā sī tsāi-tī Guá. Sìn Guá ê lâng sui-jiân sí-khì, iáu-koh ē ua̍h khí-lâi. 26 Só͘-í tsit-má teh ua̍h lâi sìn Guá ê lâng íng-uán bē sí. Lí ū án-ne sìn bô?" 27 Má-tāi ìn kóng, "Tsú ah, guá sìn Lí sī Ki-tok, Siōng-Tsú ê Kiáⁿ, sī teh beh lâi sè-kan ê Hit-uī."

Iâ-so͘ Lâu Ba̍k-sái
28 Má-tāi kóng tsiah-ê uē liáu-āu tsiū tńg-khì, kiò i ê sió-muē Má-lī-a lâi, su-hā kā i kóng, "Lāu-su lâi ā, I teh kiò lí." 29 Má-lī-a thiaⁿ-tio̍h tsiū kuáⁿ-kín khí-lâi, tsáu khì Iâ-so͘ hia. 30 Hit sî Iâ-so͘ iáu-buē ji̍p-khì tsng-siā, iáu tī Má-tāi gîng-tsiap I ê só͘-tsāi. 31 Hiah-ê kah Má-lī-a tī tshù-lāi teh an-uì i ê Iû-thài-lâng khuàⁿ-tio̍h i kuáⁿ-kín khí-lâi tshut-khì, tsiū tuè i khì, siūⁿ-kóng i beh khì bōng-ni̍h thî-khàu. 32 Má-lī-a lâi-kàu Iâ-so͘ hia, khuàⁿ-tio̍h I tsiū phak tī I ê kha-tsîng, kā I kóng, "Tsú ah, Lí nā tī tsia, guá ê sió-tī tsiū bē sí-khì." 33 Iâ-so͘ khuàⁿ-tio̍h i teh thî-khàu, kah i tsò-hué lâi ê Iû-thài-lâng mā teh thî-khàu, tsiū tsin tsheh-sim, thò͘ tsi̍t-ē tuā-khuì, 34 mn̄g in kóng, "Lín kā i tsòng tī sím-mi̍h só͘-tsāi?" In tsiū kā I kóng, "Tsú ah, lán lâi-khì khuàⁿ." 35 Iâ-so͘ lâu ba̍k-sái. 36 Hiah-ê Iû-thài-lâng kóng, "Lí khuàⁿ, I hiah-ni̍h thiàⁿ tsit-ê lâng!" 37 Kî-tiong ū kuá lâng kóng, "I bat hō͘ tsheⁿ-mê-.ê koh khuàⁿ-kìⁿ, kám bē-tàng hō͘ tsit-ê lâng mài sí?"

Iâ-so͘ Hō͘ Lia̍p-sat-lō͘ Koh-ua̍h
38 Iâ-so͘ lâi-kàu bōng-ni̍h iū-koh tsin pi-siong. Hit-ê bōng sī tsio̍h-tōng, ū tsi̍t tè tsio̍h-thâu that teh. 39 Iâ-so͘ kóng, "Suá-khui hit-tè tsio̍h-thâu. Sí-lâng ê a-tsé Má-tāi kā I kóng, "Tsú ah, i í-king sí sì ji̍t à, taⁿ it-tīng tsin tshàu." 40 Iâ-so͘ kā i kóng, "Guá kám bô kā lí kóng, lí nā sìn tsiū ē khuàⁿ-tio̍h Siōng-Tsú ê îng-kng?" 41 In tsiū kā hit-tè tsio̍h-thâu suá-khui. Iâ-so͘ gia̍h thâu ǹg thiⁿ, kóng, "Thiⁿ-Pē ah, Guá kám-siā Lí, in-uī Lí í-king ū thiaⁿ Guá ê kî-tó. 42 Guá tsai Lí put-sî to ū teh thiaⁿ Guá ê kî-tó, m̄-koh Guá án-ne kóng, sī uī-tio̍h khiā tī sì-tsiu-uî ê kûn-tsiòng, hō͘ in sìn kóng Lí ū tshe-phài Guá lâi." 43 Iâ-so͘ kóng suah tsiū tuā-siaⁿ huah, kóng, "Lia̍p-sat-lō͘, tshut-lâi!" 44 Hit-ê sí-lâng tsiū tshut-lâi, kha-tshiú īng pò͘ pau teh, bīn īng kin-á tà teh. Iâ-so͘ kā in kóng, "Kā i tháu-khui, hō͘ i kiâⁿ-lō͘."

Sat-hāi Iâ-so͘ ê Im-bô͘ (Mt 26:1-5;Mk 14:1-2;Lk 22:1-2)
45 Lâi teh an-uì Má-lī-a ê Iû-thài-lâng khuàⁿ-tio̍h Iâ-so͘ só͘ tsò ê tāi-tsì, tsin-tsē lâng tsiū sìn I. 46 Ū kuá lâng khì tshuē Huat-lī-sài-phài ê lâng, kā in pò-kò Iâ-so͘ só͘ tsò ê tāi-tsì. 47 Tsiū án-ne, hiah-ê tsè-si-tiúⁿ kah Huat-lī-sài-phài ê lâng tiàu-tsi̍p khui-huē, kóng, "Taⁿ tsit-ê lâng kiâⁿ hiah-tsē sîn-jiah, lán tio̍h án-tsuáⁿ lâi tuì-hù?. 48 Lán nā pàng I án-ne kè-sio̍k tsò lo̍h-khì, kûn-tsiòng ē khì sìn I. Lô-má-lâng ē lâi huí-bia̍t lán ê sìng-tiān, koh siau-bia̍t lán ê bîn-tso̍k." 49 Kî-tiong tsi̍t-ê lâng kiò-tsò Kai-a-huat, sī hit nî ê tsè-si-tiúⁿ, kā in kóng, "Lín m̄-tsai puàⁿ-hāng, 50 mā bô siūⁿ khuàⁿ-māi lè, lîng-khó hō͘ tsi̍t-ê lâng thè tsìng-lâng sí, tsiah bián hō͘ tsuân bîn-tso̍k bia̍t-bông, án-ne tuì lín khah ū iú-lī." 51 I án-ne kóng m̄-sī tshut-tī ka-kī ê ì-sù, sī in-uī hit nî i tsò tsè-si-tiúⁿ, teh ī-giân Iâ-so͘ ē uī-tio̍h tsit-ê bîn-tso̍k lâi sí. 52 M̄-nā uī-tio̍h tsit-ê bîn-tso̍k, mā sī beh tsiong Siōng-Tsú sì-suàⁿ ê kiáⁿ-jî tsū-tsi̍p tsò tsi̍t-ê. 53 Tuì hit ji̍t khí, hiah-ê Iû-thài-lâng tsiū kè-bô͘ beh thâi Iâ-so͘. 54 In-uī án-ne, Iâ-so͘ bô koh kong-khai tī Iû-thài-lâng ê tiong-kan tshut-ji̍p. I tsiū lī-khui hia, khì uá-kīn khòng-iá ê só͘-tsāi, kàu tsi̍t-ê kiò-tsò Í-huat-liân ê siâⁿ, kah bûn-tô͘ tī hia tuà. 55 Iû-thài-lâng ê Puâⁿ-kuè-tseh teh-beh kàu; tseh-kî tsìn-tsîng, tsin-tsē lâng tuì tsng-siā tsiūⁿ lâi Iâ-lō͘-sat-líng, beh siú kiat-tsīng-lé. 56 In teh tshuē Iâ-so͘, koh khiā tī sìng-tiān lāi, hō͘-siōng mn̄g kóng, "Lín siūⁿ án-tsuáⁿ? I it-tīng ē lâi kuè tseh ho͘ⁿh?" 57 Tsiah-ê tsè-si-tiúⁿ kah Huat-lī-sài-phài ê lâng ū huat-tshut bīng-līng, nā ū-lâng tsai Iâ-so͘ tī tó-uī, tio̍h lâi pò-kò, hō͘ in thang khì kā I lia̍h khí-lâi.