《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第十九章

作者 巴克禮普世版小組 2014.02.09

1 Jiân-āu, Pí-lia̍p-to kiò lâng kā Iâ-so͘ tshuā tshut-khì īng piⁿ phah. 2 Hiah-ê ping-á īng tshì-á pīⁿ-tsò tsi̍t-tíng bián-liû, kā i tì tī Iâ-so͘ ê thâu-khak, koh kā I mua tsi̍t-niá tsí-sik ê tn̂g-phàu. 3 In lâi-kàu Iâ-so͘ ê bīn-tsîng, kóng, "Iû-thài-lâng ê ông, Pîng-an! " Koh-tsài siàn Iâ-so͘ ê tshuì-phué. 4 Pí-lia̍p-to koh tshut-khì guā-bīn kā in kóng, "Lín khuàⁿ, guá tshuā I tshut-lâi hō͘ lín, hō͘ lín tsai guá tshâ-liáu kiat-kó, I bô tsuē." 5 Iâ-so͘ tì tshì-á ê bián-liû, mua tsí-sik ê tn̂g-phàu, tshut-lâi guā-bīn. Pí-lia̍p-to kā in kóng, "Lín khuàⁿ, tsit-ê lâng tī tsia!" 6 Tsè-si-tiúⁿ kah sìng-tiān ê kíng-uē khuàⁿ-tio̍h Iâ-so͘ tsiū tuā-siaⁿ huah: "Kā I tìng si̍p-jī-kè! Kā I tìng si̍p-jī-kè!" Pí-lia̍p-to kā in kóng, "Lín ka-kī tshuā I khì tìng, in-uī guá tshuē bô lí-iû kā I tīng-tsuē." 7 Hiah-ê Iû-thài-lâng ìn kóng, "Guán ū lu̍t-huat, tsiàu lu̍t-huat I ing-kai sí, in-uī I tsū-tshing ka-kī sī Siōng-Tsú ê Kiáⁿ." 8 Pí-lia̍p-to thiaⁿ-tio̍h in án-ne kóng tsiū koh-khah kiaⁿ. 9 I koh ji̍p-khì tsóng-tok-hú mn̄g Iâ-so͘ kóng, "Lí tuì tó-uī lâi?" M̄-koh Iâ-so͘ bô ìn. 10 Pí-lia̍p-to kā I kóng, "Lí m̄ kah guá kóng ho͘h? Lí Kám m̄-tsai guá ū kuân thang pàng Lí, mā ū kuân kā Lí tìng si̍p-jī-kè?" 11 Iâ-so͘ ìn kóng, "Nā m̄-sī Siōng-Tsú sù lí kuân-pìng, lí bô kuân thang pān guá, só͘-í tsiong Guá kau hō͘ lí ê lâng, i ê tsuē koh-khah tāng." 12 Pí-lia̍p-to thiaⁿ-tio̍h tsiah-ê uē tsiū jú siūⁿ-beh pàng Iâ-so͘, m̄-koh hiah-ê Iû-thài-lâng koh tuā-siaⁿ huah: "Lí nā pàng tsit-ê lâng, tsiū m̄-sī Lô-má hông-tè ê pîng-iú, in-uī nā hong ka-kī tsò ông tsiū-sī puē-puān Lô-má hông-tè." 13 Pí-lia̍p-to thiaⁿ-tio̍h tsiah-ê uē tsiū tshuā Iâ-so͘ tshut-lâi, ka-kī tsē tī sím-phuàⁿ-si̍k. Hit-ê só͘-tsāi kiò-tsò " Pho͘-tsio̍h-tē". Hi-pik-lâi-uē kiò-tsò " Lik-pa-tāi". 14 Hit ji̍t sī Puâⁿ-kuè-tseh ê tsîng tsi̍t ji̍t, tsha-put-to tiong-tàu ê sî. Pí-lia̍p-to tuì hiah-ê Iû-thài-lâng kóng, "Lín khuàⁿ, tse sī lín ê ông!" 15 In tuā-siaⁿ huah: "Hō͘ I sí! Hō͘ I sí! Kā I tìng si̍p-jī-kè." Pí-lia̍p-to kā in kóng, "Lín ài guá kā lín ê ông tìng si̍p-jī-kè sī-bô?" Tsiah-ê tsè-si-tiúⁿ ìn kóng, "Lô-má hông-tè í-guā, guán bô ông."

Iâ-so͘ Hông Tìng Si̍p-jī-kè (Mt 7:32-44;Mk 15:21-32;Lk 23:26-43)
16 Jiân-āu, Pí-lia̍p-to tsiong Iâ-so͘ kau hō͘ in khì tìng si̍p-jī-kè. In tsiū kā Iâ-so͘ ah-khì. 17 Iâ-so͘ giâ ka-kī ê si̍p-jī-kè tshut-khì, lâi-kàu tsi̍t-ê kiò-tsò " Thâu-khak-uáⁿ" ê só͘-tsāi. Hi-pik-lâi-uē kiò-tsò " Kok-kok-thaⁿ". 18 In tī hia kā Iâ-so͘ tìng si̍p-jī-kè, koh ū nn̄g lâng kah I tsò-hué tìng, tsi̍t pîng tsi̍t-ê, Iâ-so͘ tī tiong-ng. 19 Pí-lia̍p-to siá tsi̍t-tè tsuē-tsn̄g hē tī si̍p-jī-kè tíng-bīn, siá kóng, "Ná-sat-li̍k-lâng Iâ-so͘, Iû-thài-lâng ê Ông." 20 Iâ-so͘ siū tìng ê só͘-tsāi kīn-uá Iâ-lō͘-sat-líng-siâⁿ, só͘-í ū tsin-tsē Iû-thài-lâng tha̍k-tio̍h tsit-ê tsuē-tsn̄g. Hit-ê tsuē-tsn̄g koh sī īng Hi-pik-lâi-bûn, Lia̍p-ting-bûn, Hi-lia̍p-bûn siá-.ê. 21 Iû-thài-lâng hiah-ê tsè-si-tiúⁿ kā Pí-lia̍p-to kóng, "M̄-thang siá,' Iû-thài-lâng ê ông'. Tio̍h siá, ' I ka-kī kóng, Guá sī Iû-thài-lâng ê ông.'" 22 Pí-lia̍p-to ìn kóng, "Guá siá lo̍h-khì tsiū hó à." 23 Ping-á kā Iâ-so͘ tìng si̍p-jī-kè liáu-āu, the̍h I ê guā-phàu lâi pun tsò sì hūn, tsi̍t lâng tsi̍t hūn. In koh the̍h I ê lāi-saⁿ, tsit-niá lāi-saⁿ bô kap-tsuā, sī tíng-ē sio-thàu tsit-tsò tsi̍t-tè. 24 In tsò-hué tsham-siông kóng, "M̄-thang thiah-li̍h, lán tio̍h lâi liam-khau, khuàⁿ siáⁿ-lâng tit-tio̍h kui niá." Tse sī beh ìng-giām Sìng-king só͘ kóng: In tsò-hué pun Guá ê guā-phàu, Uī-tio̍h Guá ê lāi-saⁿ lâi liam-khau.( tsù: SPh 22:18) Ping-á kó-jiân tsiàu án-ne tsò. 25 Iâ-so͘ ê lāu-bú, I ê a-î, Kik-liû-pa ê bó͘ Má-lī-a, kah Bua̍t-tāi-lia̍p ê Má-lī-a lóng khiā tī Iâ-so͘ ê si̍p-jī-kè piⁿ. 26 Iâ-so͘ khuàⁿ-tio̍h lāu-bó kah só͘ thiàⁿ ê bûn-tô͘ khiā tī piⁿ-á, tsiū tuì lāu-bó kóng, "A-bú ah, khuàⁿ, lí ê kiáⁿ!" 27 Koh tuì hit-ê bûn-tô͘ kóng, "Khuàⁿ, lí ê lāu-bú!" Tuì hit sî khí, hit-ê bûn-tô͘ tsiū kā Iâ-so͘ ê lāu-bú tsiap tńg-khì in tau.

Iâ-so͘ ê Sí-bông (Mt 27:45-56; Mk 15:33-41; Lk 23:44-49)
28 Tsit-ê tāi-tsì í-āu, Iâ-so͘ tsai it-tshè ê tāi-tsì lóng uân-sîng ā. Uī-tio̍h beh ìng-giām Sìng-king ê uē tsiū kóng, "Guá tshuì-ta." 29 Tī hia ū tsi̍t-ê té muá sng-tshò͘ ê pân. In tsiū the̍h hái-mî tsìm tshò͘, pa̍k tuà gû-tshik-tsháu bué, tu khì kàu Iâ-so͘ ê tshuì. 30 Iâ-so͘ tam tshò͘ liáu-āu tsiū kóng, "Taⁿ it-tshè lóng uân-sîng ā." Án-ne kóng suah, thâu tsiū tàm lo̍h-khì, khuì tn̄g.

Iâ-so͘ ê Hing-khám-piⁿ Siū Tsha̍k
31 Hit ji̍t sī pài-gō͘, Iû-thài-lâng bô ài tī keh-tńg-ji̍t ê tuā An-hioh-ji̍t lâu sin-si tī si̍p-jī-kè tíng, só͘-í in kiû Pí-lia̍p-to kiò lâng kòng-tn̄g siū-hîng-jîn ê kha-kut, thang tsiong sin-si siu lo̍h-lâi. 32 tsiū khì, tsiong kah Iâ-so͘ tsò-hué tìng si̍p-jī-kè hit nn̄g lâng ê kha-kut kòng-tn̄g. 33 Lâi-kàu Iâ-so͘ hia, khuàⁿ-tio̍h I í-king sí, tsiū bô kòng-tn̄g I ê kha-kut. 34 M̄-koh ū tsi̍t-ê ping īng tshiuⁿ tsha̍k Iâ-so͘ ê hing-khám-piⁿ, hueh kah tsuí suî-sî lâu tshut-lâi. 35 Tshin-ba̍k khuàⁿ-kìⁿ ê lâng í-king ū tsò kiàn-tsìng, sī beh hō͘ lâng siong-sìn. I ka-kī tsai tsit-ê kiàn-tsìng sī tsin, I só͘ kóng ê lóng sī sū-si̍t. 36 Tsit-ê tāi-tsì ê uân-sîng sī beh ìng-giām Sìng-king só͘ kóng: I ê kut bô tsi̍t-ki ē hō͘ lâng phah-tshuì.( tsù: CAK 12:46) 37 Koh ū līng-guā tsi̍t-kù Sìng-king kóng: Lâng ē gióng-bōng in só͘ tsha̍k ê lâng.( tsù: SKL 12:10)

Iâ-so͘ ê Bâi-tsòng (Mt 27:56-61; Mk 15:42-47; Lk 23:50-56)
38 Tsiah-ê tāi-tsì liáu-āu, ū tsi̍t-ê A-lī-má-thài-lâng Iok-sik. I in-uī kiaⁿ Iû-thài-lâng tsiah thau-thau-á tsò bûn-tô͘. I lâi kiû Pí-lia̍p-to tsún i khì siu Iâ-so͘ ê sin-si. Pí-lia̍p-to ín-tsún. Iok-sik tsiū khì siu Iâ-so͘ ê sin-si. 39 Koh ū tsîng bat àm-sî lâi kìⁿ Iâ-so͘ ê Nî-ko-tí-bó͘ mā lâi. I tuà tsha-put-to saⁿ-tsa̍p kong-kin ê bu̍t-io̍h tshiau tîm-hiuⁿ ê phang-liāu lâi. 40 In nn̄g lâng tsiong Iâ-so͘ ê sin-si siu lo̍h-lâi. Tsiàu Iû-thài-lâng bâi-tsòng ê kuàn-lē kā sin-si buah phang-liāu koh īng iù-tē-pò͘ pau khí-lâi. 41 Iâ-so͘ tìng si̍p-jī-kè ê só͘-tsāi ū tsi̍t-khu hn̂g. Hn̂g-lāi ū tsi̍t-ê iáu m̄-bat tsòng kuè lâng ê sin bōng. 42 Hit ji̍t sī Iû-thài-lâng tsún-pī tseh ê ji̍t, bōng koh bô hn̄g. In tsiū kā Iâ-so͘ bâi-tsòng tī hia.