《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第十八章

作者 巴克禮普世版小組 2014.02.02

Iâ-so͘ Hông Tshut-bē Lia̍h Khì (Mt 26:47-56;Mk 14:43-50;Lk 22:47-53)
1 Iâ-so͘ án-ne kî-tó liáu-āu tsiū kah bûn-tô͘ tshut-khì, kuè-khì Khip-lûn-khe hit-pîng. Tī hia ū tsi̍t-khu hn̂g, Iâ-so͘ kah bûn-tô͘ ji̍p-khì. 2 Beh tshut-bē Iâ-so͘ ê Iû-tāi mā tsai-iáⁿ hit-ê só͘-tsāi, in-uī Iâ-so͘ kah bûn-tô͘ siông-siông tī hia tsū-tsi̍p. 3 Iû-tāi tshuā tsi̍t tuī Lô-má-ping, kah hiah-ê tsè-si-tiúⁿ í-ki̍p Huat-lī-sài-phài ê lâng só͘ phài lâi ê sìng-tiān kíng-uē, gia̍h ting, hué-pé kah bú-khì lâi-kàu hia. 4 Iâ-so͘ tsai I só͘ beh tú-tio̍h it-tshè ê tāi-tsì, tsiū kiâⁿ tsìn-tsîng kā in kóng, "Lín teh tshuē siáⁿ-lâng?" 5 In ìn kóng, "Ná-sat-li̍k-lâng Iâ-so͘." Iâ-so͘ kā in kóng, "Guá tsiū-sī." Tshut-bē Iâ-so͘ ê Iû-tāi mā kah in tsò-hué teh khiā. 6 Iâ-so͘ tsi̍t-ē kā in kóng, "Guá tsiū-sī." in tsiū tò-thè, pua̍h-tó tī thô͘-kha. 7 Iâ-so͘ koh mn̄g in tsi̍t pái, " Lín tshuē siáⁿ-lâng?" In koh ìn kóng, "Ná-sat-li̍k-lâng Iâ-so͘." 8 Iâ-so͘ ìn kóng, "Guá í-king kā lín kóng, Guá tsiū-sī. Lín nā sī teh tshuē Guá, tsiah-ê lâng tio̍h pàng in khì." 9 Tse sī beh ìng-giām Iâ-so͘ tsá-tsîng kóng ê uē, " Lí hō͘ Guá ê lâng, Guá bô sit-lo̍h kah tsi̍t-ê." 10 Se-bûn Pí-tik ū tuà to, tsiū pui̍h khí-lâi tuì tsè-si-tiúⁿ ê lô͘-po̍k phut lo̍h-khì, kā i tsiàⁿ-pîng ê hīⁿ-á siah khí-lâi. Hit-ê lô͘-po̍k ê miâ-kiò-tsò Má-li̍k-kó͘. 11 Iâ-so͘ kā Pí-tik kóng, "Kā to siu ji̍p-khì to-siù. Thiⁿ-Pē hō͘ Guá ê khó͘-pue, Guá kám ē-tàng bô lim?" 12 Iâ-so͘ Hông Ah-khì Tsè-si-tiúⁿ Bīn-tsîng Jiân-āu, hit tuī Lô-má-ping kah iâⁿ-tiúⁿ, í-ki̍p Iû-thài-lâng ê kíng-uē lâi lia̍h Iâ-so͘, kā I pa̍k khí-lâi. 13 In sing kā I ah khì hō͘ A-ná, in-uī i sī bîn-kan tsun-tsông ê tsè-si-tiúⁿ, koh sī hit nî (kuaⁿ-phài) tsè-si-tiúⁿ Kai-a-huat ê tiūⁿ-lâng. 14 Tsit-ê Kai-a-huat tsîng bat tuì Iû-thài-lâng kiàn-gī kóng, "Lîng-khó hō͘ tsi̍t-ê lâng lâi thè tsìng-lâng sí khah hó."

Pí-tik M̄-jīn Iâ-so͘ (Mt 26:69-70;Mk 14:66-68; Lk 22:55-57)
15 Se-bûn Pí-tik kah līng-guā tsi̍t-ê bûn-tô͘ tuè Iâ-so͘ khì. Tsit-ê bûn-tô͘ kah tsè-si-tiúⁿ ū si̍k-sāi, só͘-í kah Iâ-so͘ ji̍p-khì kàu tsè-si-tiúⁿ ê lāi-tiâⁿ. 16 M̄-koh Pí-tik khiā tī mn̂g-guā. Hit-ê kah tsè-si-tiúⁿ si̍k-sāi ê bûn-tô͘ tshut-khì kā kò͘-mn̂g ê tsa-bó͘-lâng kóng tsi̍t siaⁿ tsiū tshuā Pí-tik ji̍p-khì. 17 Kò͘-mn̂g ê lí-pī kā Pí-tik kóng, "Lí mā sī tsit-ê lâng ê bûn-tô͘ ho͘h?" Pí-tik kóng, "M̄-sī." 18 Tsiah-ê lô͘-po̍k kah kíng-uē in-uī kuâⁿ, khí hué-thuàⁿ-hué teh hang-sio. Pí-tik mā kah in tsò-hué khiā teh hang-sio.

Tsè-si-tiúⁿ sím-mn̄g Iâ-so͘ (Mt 26:59-66; Mk 14:55-64; Lk 22:66-71)
19 Tsè-si-tiúⁿ(A-ná) tsiū sím-mn̄g Iâ-so͘ kuan-hē I ê bûn-tô͘ kah I ê kà-sī. 20 Iâ-so͘ ìn kóng, "Guá lóng sī kong-khai tuì sè-kan-lâng kóng-uē. Guá siông-siông tī huē-tn̂g kah Iû-thài-lâng tsū-tsi̍p ê sìng-tiān kà-sī lâng. Guá m̄-bat tī pì-bi̍t ê só͘-tsāi kóng sím-mi̍h. 21 Lí ná-ē teh sím-mn̄g Guá? Lí khì mn̄g thiaⁿ-kuè Guá kóng-uē ê lâng, khuàⁿ Guá án-tsuáⁿ tuì in kóng. In lóng tsai-iáⁿ Guá só͘ kóng-.ê." 22 Iâ-so͘ kóng suah, khiā tī piⁿ-á ū tsi̍t-ê kíng-uē kā Iâ-so͘ siàn tshuì-phué, kóng, "Lí ná-ē káⁿ án-ne ìn tsè-si-tiúⁿ?" 23 Iâ-so͘ ìn kóng, "Guá nā kóng m̄-tio̍h, lí thang kā Guá tsí-tsìng. Nā bô kóng m̄-tio̍h, lí ná-ē kā Guá phah?" 24 Jiân-āu A-ná iû-guân kā Iâ-so͘ pa̍k teh, ah I khì kau hō͘ tsè-si-tiúⁿ Kai-a-huat ê só͘-tsāi.

Pí-tik Koh-tsài M̄-jīn Iâ-so͘ (Mt 26:71-75;Mk 14:69-72;Lk 22:58-62)
25 Hit sî Se-bûn Pí-tik iáu khiā tī hia teh hang-hué. Ū-lâng mn̄g i kóng, "Lí mā sī I ê bûn-tô͘ ho͘h?" Pí-tik m̄ sîng-jīn, kóng, "M̄-sī." 26 Ū tsi̍t-ê tsè-si-tiúⁿ ê lô͘-po̍k, sī hō͘ Pí-tik siah hīⁿ-á hit-lâng ê tshin-tsiâⁿ, kóng, "Guá ū khuàⁿ-tio̍h lí kah I tī hn̂g-lāi?" 27 Pí-tik koh-tsài m̄ sîng-jīn. Hit sî ke suî-sî thî.

Iâ-so͘ Tī Pí-lia̍p-to Bīn-tsîng Siū Sím-phuàⁿ (Mt 27:1-2,11-14;Mk 15:1-5;Lk 23:1-5)
28 Thiⁿ phú-kng ê sî,in tuì Kai-a-huat ê só͘-tsāi ah Iâ-so͘ khì kàu tsóng-tok-hú. In ka-kī bô ji̍p-khì tsóng-tok-hú, kiaⁿ khì bak-tio̍h lah-sap suah bē-tàng tsia̍h Puâⁿ-kuè-tseh ê buán-tshan. 29 Só͘-í Pí-lia̍p-to tshut-lâi guā-bīn mn̄g in kóng, "Lín kò tsit-ê lâng sím-mi̍h tsuē?" 30 In ìn kóng, "Tsit-ê lâng nā bô tsò pháiⁿ tāi-tsì, guán bē tsiong I kau hō͘ lí." 31 Pí-lia̍p-to kā in kóng, "Lín ka-kī tshuā I khì, tsiàu lín ê lu̍t-huat khì kā I sím-phuàⁿ." Iû-thài-lâng kā i kóng, "Guán bô kuân thang kā lâng phuàⁿ sí-hîng." 32 Tse sī beh ìng-giām Iâ-so͘ tsîng só͘ kóng ê uē, piáu-bîng I ka-kī ē án-tsuáⁿ lâi sí. 33 Pí-lia̍p-to koh ji̍p-khì tsóng-tok-hú, tiàu Iâ-so͘ lâi mn̄g kóng, "Lí sī Iû-thài-lâng ê ông sī bô?" 34 Iâ-so͘ ìn kóng, "Lí kóng tsit-ê uē sī tshut-tī lí ka-kī ê ì-sù, á-sī pa̍t-lâng ū tsiong Guá ê tāi-tsì kā lí kóng?" 35 Pí-lia̍p-to ìn kóng, "Guá kám sī Iû-thài-lâng? Lí pún-tso̍k ê lâng kah hiah-ê tsè-si-tiúⁿ tsiong Lí kau hō͘ guá. Lí tàu-té ū tsò sím-mi̍h tāi-tsì?" 36 Iâ-so͘ ìn kóng, "Guá ê kok-tō͘ m̄-sī sio̍k tsit sè-kan. Guá ê kok-tō͘ nā sio̍k tsit sè-kan, Guá ê pō͘-hā it-tīng ē uī Guá tsing-tsiàn, bián-tit Guá siū tshut-bē hō͘ Iû-thài-lâng, m̄-koh taⁿ Guá ê kok-tō͘ m̄-sī sio̍k tsit sè-kan." 37 Pí-lia̍p-to tsiū mn̄g I kóng, "Án-ne, Lí sī ông sī-bô?" Iâ-so͘ ìn kóng, "Lí kóng Guá sī ông. Guá uī-tio̍h án-ne lâi tshut-sì, uī-tio̍h án-ne lîm-kàu sè-kan, beh uī tsin-lí tsò kiàn-tsìng. Sio̍k tsin-lí ê lâng lóng ē thiaⁿ Guá ê siaⁿ."

Iâ-so͘ Hông Phuàⁿ Sí-hîng (Mt 27:15-31; Mk 15:6-20; Lk 23:13-25)
38 Pí-lia̍p-to kóng, "Tsin-lí sī sím-mi̍h?" Kóng suah, koh tshut-khì kā hiah-ê Iû-thài-lâng kóng, "Guá tshâ bô I ū huān sím-mi̍h tsuē. 39 M̄-koh lín ū tsi̍t-ê kuàn-lē, kàu Puâⁿ-kuè-tseh, guá tio̍h pàng tsi̍t-ê kaⁿ-huān hō͘ lín. Taⁿ lín ài guá pàng Iû-thài-lâng ê ông hō͘ lín sī-bô?" 40 In koh tuā-siaⁿ huah: "M̄-thang pàng tsit-ê, tio̍h pàng Pa-lia̍p-pa!" Tsit-ê Pa-lia̍p-pa sī tsi̍t-ê thó͘-huí.