《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第二十一章

作者 巴克禮普世版小組 2014.02.23

Iâ-so͘ Tuì Tshit-ê Bûn-tô͘ Hián-hiān
1 Tsiah-ê tāi-tsì í-āu, Iâ-so͘ tī Thê-pí-lī-a ê hái-piⁿ, koh hián-bîng ka-kī hō͘ bûn-tô͘ khuàⁿ; I ê tshut-hiān kì tī ē-té. 2 Ū Se-bûn Pí-tik, kiò-tsò "siang-seⁿ-á" ê To-má, Ka-lī-lī-síng ê Ka-ná lâng Ná-tàn-gia̍p, Se-pí-thài ê nn̄g-ê kiáⁿ, iáu ū bûn-tô͘ nn̄g-ê lóng tsò-hué tī hia. 3 Se-bûn Pí-tik kā in kóng, "Guá beh khì lia̍h-hî." In kā i kóng, "Guán mā beh kah lí khì." Tsiū tshut-khì, tsiūⁿ-tsûn; hit mê lóng lia̍h bô hî. 4 Thiⁿ phú-kng, Iâ-so͘ khiā tī huāⁿ-tíng, m̄-koh bûn-tô͘ jīn bē tshut I sī Iâ-so͘. 5 Iâ-so͘ kā in kóng, "Siàu-liân-lâng ah, lín lia̍h ū hî bô?" In kóng, "Bô puàⁿ-bué." 6 Iâ-so͘ kā in kóng, "Kā bāng pha lo̍h-khì tsûn ê tsiàⁿ-pîng, tsiū ē pha-tio̍h hî." In pha lo̍h-khì, in-uī pha-tio̍h tsin-tsē hî, hî-bāng suah thua bē khí-lâi. 7 Iâ-so͘ só͘ thiàⁿ hit-ê bûn-tô͘ kā Pí-tik kóng, "I sī Tsú." Se-bûn Pí-tik tsi̍t-ē thiaⁿ-tio̍h sī Tsú, in-uī thǹg-pak-theh, tsiū kuáⁿ-kín mua guā-saⁿ, thiàu lo̍h-khì tsuí-ni̍h. 8 Kî-tha ê bûn-tô͘, in-uī lī huāⁿ bô hn̄g, tsha-put-to saⁿ-tsa̍p tn̄g, īng sè-tsiah tsûn-á lâi kā hî-á muá-muá ê bāng thua tsiūⁿ-huāⁿ. 9 In tsi̍t-ē tsiūⁿ-huāⁿ, khuàⁿ-tio̍h ū teh to̍h ê hué-thuàⁿ-hué, tíng-bīn ū hî, koh ū piáⁿ. 10 Iâ-so͘ kā in kóng, "Tú-tsiah pha-tio̍h ê hî, lia̍h kuí-bué-á lâi." 11 Se-bûn Pí-tik tsiū peh khí-lih tsûn-tíng, kā bāng thua tsiūⁿ-huāⁿ, kui bāng tuā-bué hî muá-muá, tsóng-kiōng tsi̍t-pah gō͘-tsa̍p-saⁿ bué; hî sui-jiân hiah-tsē, bāng mā bô phuà-li̍h. 12 Iâ-so͘ kā in kóng, "Lâi tsia̍h tsá-tǹg." Bûn-tô͘ bô-lâng káⁿ kā I mn̄g, "Lí sī siáⁿ-lâng?" in-uī in tsai I sī Tsú. 13 Iâ-so͘ kiâⁿ uá-lâi, the̍h piáⁿ pun hō͘ in, hî mā sī án-ne pun hō͘ in. 14 Iâ-so͘ tuì sí-lâng tiong koh-ua̍h liáu-āu, tshut-hiān hō͘ I ê bûn-tô͘ khuàⁿ-tio̍h, tse sī tē-saⁿ pái.

Iâ-so͘ Kah Pí-tik
15 In tsia̍h tsá-tǹg liáu-āu, Iâ-so͘ kā Se-bûn Pí-tik kóng, "Iok-hān ê kiáⁿ Se-bûn, lí ū pí tsiah-ê lâng khah thiàⁿ Guá bô?" Pí-tik ìn-kóng, "Tsú ah, ū, Lí tsai guá ū thiàⁿ Lí." Iâ-so͘ kā i kóng, "Lí tio̍h ióng-tshī Guá ê iûⁿ-á-kiáⁿ." 16 Iâ-so͘ tē-jī pái mn̄g i kóng, "Iok-hān ê kiáⁿ Se-bûn, lí ū pí tsiah-ê khah thiàⁿ Guá bô?" Pí-tik ìn-kóng, "Tsú ah, ū, Lí tsai guá ū thiàⁿ Lí." Iâ-so͘ kā i kóng, "Lí tio̍h tsiàu-kò͘ Guá hiah-ê iûⁿ." 17 Iâ-so͘ tē-saⁿ pái kā i mn̄g, "Iok-hān ê kiáⁿ Se-bûn, lí ū pí tsiah-ê khah thiàⁿ Guá bô?" Pí-tik in-uī Iâ-so͘ tē-saⁿ pái án-ne mn̄g, tsiū tsin iu-būn, kā Iâ-so͘ kóng, "Tsú ah, Lí ta̍k-hāng lóng tsai, Lí tsai guá ū thiàⁿ Lí." Iâ-so͘ kā i kóng, "Lí tio̍h ióng-tshī Guá hiah-ê iûⁿ." 18 Guá si̍t-tsāi kā lí kóng, lí siàu-liân ê sî ka-kī pa̍k khò͘-tuà, suî-piān khì lí ài khì ê só͘-tsāi; m̄-koh kàu nî-lāu ê sî, lí tio̍h tshun-tshiú hō͘ lâng kā lí pa̍k, kā lí thua-kàu lí bô-ài khì ê só͘-tsāi." 19 Iâ-so͘ kóng tsiah-ê uē sī tsí Pí-tik ē án-tsuáⁿ sí lâi îng-kng Siōng-Tsú, án-nikong2 suah, Iâ-so͘ kā i kóng, "Lâi tuè Guá."

Iâ-so͘ Kah I Só͘-thiàⁿ ê Bûn-tô͘
20 Pí-tik ua̍t-tńg-sin, khuàⁿ-tio̍h Iâ-so͘ só͘-thiàⁿ ê bûn-tô͘ tuè tī in ê āu-piah. I tsiū-sī tsîng tī buán-tshan ê sî, khò-uá Iâ-so͘ ê hing-khám kóng, "Tsú ah, sī siáⁿ-lâng beh tshut-bē Lí?" 21 Pí-tik khuàⁿ-tio̍h tsiū mn̄g Iâ-so͘ kóng, "Tsú ah, tsit-ê lâng ē án-tsuáⁿ?" 22 Iâ-so͘ kā i kóng, "Guá nā ài i ua̍h kàu Guá koh lâi, kah lí ū sím-mi̍h kuan-hē? lí tio̍h lâi tuè Guá." 23 Tsit-kù uē tsiū án-ne tī bûn-tô͘ ê tiong-kan liû-thuân, kóng, "Tsit-ê bûn-tô͘ bē sí." Kî-si̍t Iâ-so͘ m̄-sī kóng i bē sí, sī teh kóng, "Guá nā ài i ua̍h kàu Guá koh lâi, kah lí ū sím-mi̍h kuan-hē?" 24 Tsit-ê bûn-tô͘ tsiū-sī uī-tio̍h tsiah-ê tāi-tsì tsò kiàn-tsìng, koh tsiong tsiah-ê tāi-tsì siá lo̍h-lâi ê lâng, lán tsai i ê kiàn-tsìng sī tsin-si̍t.

Kiat-lūn
25 Iâ-so͘ koh ū tsò tsin-tsē hāng tāi-tsì. Nā beh tsiong tsiah-ê tāi-tsì tsi̍t-hāng tsi̍t-hāng siá lo̍h-lâi, guá siūⁿ tsuân-sè-kài mā bô só͘-tsāi thang té hiah-ê kì-lo̍k ê tsheh.