《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第一章

作者 巴克禮普世版小組 2014.03.02

1 Kìng-ài ê Thê-o-hui-lô tāi-jîn, tī guá siá ê thâu tsi̍t-pún tsheh ū tsiong Iâ-so͘ tuì khí-thâu só͘ tsò kah só͘ kà-sī ê tāi-tsì, 2 it-ti̍t kàu I thong-kuè Sìng-Sîn ê tuā-lîng kà-sī só͘ kíng-suán ê sù-tô͘ liáu-āu, I siū tsiap tsiūⁿ-thiⁿ ê ji̍t. 3 Iâ-so͘ siū-hāi liáu-āu, ū īng tsin-tsē tsìng-kì hián-bîng I teh ua̍h. Tī sì-tsa̍p ji̍t ê tiong-kan, I hián-hiān hō͘ sù-tô͘ khuàⁿ, tuì in kóng khí Siōng-Tsú Kok-tō͘ ê tāi-tsì. 4 Iâ-so͘ kah sù-tô͘ tsò-hué ê sî, huan-hù in, kóng, "M̄-thang lī-khui Iâ-lō͘-sat-líng, tsiàu Guá tsîng kā lín kóng ê, tio̍h thìng-hāu Thiⁿ-Pē ê ìng-ín. 5 Iok-hān īng tsuí kā lâng sé-lé, m̄-koh koh bô kuí ji̍t, lín ē siū Sìng-Sîn ê sé-lé."

Iâ-so͘ Siū-tsiap Tsiūⁿ-thiⁿ
6 Sù-tô͘ kah Iâ-so͘ tsū-tsi̍p ê sî, mn̄g kóng, "Tsú ah, Lí beh tī tsit-má huê-ho̍k Í-sik-lia̍t ê ông-kok sī-bô?" 7 Iâ-so͘ ìn kóng, "Thiⁿ-Pē kuat-tīng ka-kī kuân-pìng ê sî-kan kah ki-huē m̄-sī lín ē-tàng tsai-.ê. 8 M̄-koh Sìng-Sîn lîm-kàu lín ê sî, lín ē tit-tio̍h lîng-li̍k, tī Iâ-lō͘-sat-líng, Iû-thài tsuân-tē kah Sat-má-lī-a, ti̍t-kàu thiⁿ-piⁿ hái-kak uī Guá lâi tsò kiàn-tsìng." 9 Tsiah-ê uē kóng suah, in teh khuàⁿ ê sî, Iâ-so͘ siū tsiap tsiūⁿ-thiⁿ. Ū hûn tsiap I khì, in tsiū bô khuàⁿ-kìⁿ I. 10 In iáu-teh tsù-ba̍k khuàⁿ Iâ-so͘ tsiūⁿ-thiⁿ ê sî, hut-jiân ū nn̄g-ê tshīng pe̍h-saⁿ ê lâng khiā tī in sin-piⁿ, 11 kóng, "Ka-lī-lī-lâng ah, lín ná-ē khiā tī tsia teh khuàⁿ thiⁿ? Tsit-uī lī-khui lín siū tsiap tsiūⁿ-thiⁿ ê Iâ-so͘, lín khuàⁿ I án-ne tsiūⁿ-thiⁿ, I mā ē tsiàu án-ne koh lâi."

Tshú-tāi Iû-tāi ê Tsit-bū
12 Jiân-āu hiah-ê sù-tô͘ tuì hit-ê kiò-tsò Kan-ná-suaⁿ ê só͘-tsāi tńg-khì Iâ-lō͘-sat-líng. Tsit-ê só͘-tsāi lī Iâ-lō͘-sat-líng iok tsi̍t kong-lí, sī An-hioh-ji̍t ē-tit kiâⁿ ê lō͘-tsām. 13 In ji̍p-siâⁿ liáu-āu, tsiū peh khí-lih in tuà ê lâu-tíng tuā-thiaⁿ. Tī hia ū Pí-tik, Iok-hān, Ngá-kok, An-tik-lia̍t, Hui-li̍k kah To-má, Pa-to-lô-mái kah Má-thài, A-li̍k-hui ê kiáⁿ Ngá-kok kah Se-lô-tí ê Se-bûn, kah Ngá-kok ê kiáⁿ Iû-tāi. 14 Tsiah-ê lâng, kah kuí-nā-ê hū-jîn-lâng, í-ki̍p Iâ-so͘ ê lāu-bú Má-lī-a, tsham I ê hiaⁿ-tī, lóng tâng-sim ha̍p-ì pik-tshiat kî-tó. 15 Bô kuí-ji̍t āu, tsha-put-to tsi̍t-pah jī-tsa̍p lâng ê sìn-tô͘ teh tsū-tsi̍p ê sî, Pí-tik khiā khí-lâi kóng, 16 Hiaⁿ-tī tsí-muē ah, Sìng-Sîn thong-kuè Tāi-pi̍t ê tshuì só͘ ī-giân kuan-hē Iû-tāi tshuā lâng lia̍h Iâ-so͘ ê tāi-tsì it-tīng tio̍h ìng-giām. 17 Iû-tāi pún-lâi sī guán tiong-kan ê tsi̍t-ê, koh ū hūn kah guán tsò-hué kang-tsok." 18 Taⁿ tsit-ê lâng īng i tsò put-gī ê tāi-tsì só͘ tit-tio̍h ê kang-tsîⁿ bé tsi̍t-tè tē, i tò-thâu-tsai sí tī hia, pak-tó͘ piak-li̍h, tn̂g-á-tō͘ lóng lâu tshut-lâi. 19 Tuà tī Iâ-lō͘-sat-líng ê lâng lóng tsai tsit-hāng tāi-tsì, só͘-í tsiàu in ê uē kā hit-tè tē kiò-tsò A-kik-tāi-má, tsiū-sī ' Hueh-hn̂g' ê ì-sù. 20 In-uī Si-phian ū kì-tsài: Hō͘ i ê tshù pha-hng, Bô-lâng tī hia tuà.( tsù: SPh 69:25) Koh ū kì-tsài:

Tio̍h hō͘ pa̍t-lâng lâi tāi-thè i ê tsit-bū.( tsù: SPh 109:8)
21 " Só͘-í tio̍h tī thâu kàu bué kah lán tsò-hué ê lâng tiong-kan, suán tsi̍t-ê lâi kah guán tàu-tīn tsò Iâ-so͘ koh-ua̍h ê kiàn-tsìng-jîn. 22 Hit-ê lâng tio̍h tuì Iok-hān sé-lé khai-sí, kàu Iâ-so͘ lī-khui lán siū tsiap hit ji̍t, lóng ū siông-siông kah guán tsò-tīn ê lâng." 23 In tsiū thê-miâ nn̄g lâng, tsiū-sī kiò-tsò Pa-sat-pa mā kiò-tsò Iû-sū-to͘ ê Iok-sik, koh tsi̍t-ê sī Má-thê-a. 24 Tsiū kî-tó, kóng, "Tsú ah, Lí tsai ta̍k-lâng ê sim, kiû Lí tsí-sī tsit nn̄g lâng tiong-kan tó tsi̍t-ê sī Lí kíng-suán ê, 25 beh lâi tam-tng sù-tô͘ ê tsit-hūn, in-uī Iû-tāi hòng-khì tsit-ê tsit-hūn, khì kiâⁿ i ka-kī ê lō͘." 26 Jiân-āu in liam-khau liam-tio̍h Má-thê-a. I tsiū ka-ji̍p tsa̍p-it-ê sù-tô͘ ê hâng-lia̍t.