《台語chit條路》

 | | | 轉寄

《台語tsit條路》--建立台語文ê文學批評─林央敏訪問(十）

作者 謝瑞華 2008.12.21

林：對台語文運動覺醒ê人認真做，不管是灰心失志iah是啥貨，mā愛koh做，算做你失望，uan-ná愛提出勇氣做落去。有ê人認為伊ê用字khah tio̍h，我認為無需要按呢。tī咱傳播力iahbue7強以前，正確無正確m̄是主要＝e。只要有心，雖然kap我無仝我mā tsiok愛kā鼓勵。mài講beh做頭，mài kā人潑冷水，不管beh領導啥，攏愛有giâ旗仔棍仔ê黨工精神，互相鼓勵，放棄本位主義。現步咱ê台文團體是愛按呢lah！

進一步，tsia ê台文團體若結合起來，字無統一無要緊，結做一ê力量，咱來遊說立委、地方人士、做官＝e，hō͘ in一寡壓力，尚好是hō͘ in了解、覺悟tsit種運動ê重要性，tsit種壓力變做in家治hō͘ in家治ê。若對外beh推廣ê時tsūn，無論按怎逐家腳步愛一致，看咱tsit-má ê目標是toh一縣，iá是toh一ê所在，看beh推廣啥麼，逐家有力盡力。

我個人想beh做＝e，bat建議過，是想beh招一kuá人做陣－若我家治一ê人是無能力－咱用接近表演ê方式，有表演、演講、唱＝e，tsia ê方式，buē輸咱有一ê戲團、劇團，著是咱來全台灣街頭、室內巡迴，目的是表演、傳播，用表演、演講ê方式傳播台灣文化、台灣文學、政治理念、台灣民族意識。譬如講咱tsia是一ê團、劇團，你加減會曉演戲、演詩、朗詩、唱歌，咱有啥麼人才著表現啥麼，福佬話可能是主體，有客話伊也會凍表演，伊會曉客話、客人出身ê uan-ná有義務來演kuá客人ê物件。類似演劇，趣味、輕鬆、嚴肅性＝e，一階段一階段。

咱若正式成立，訓練了會使a，第一年看咱beh表演啥，第二年咱道換一套劇也無一定，來街頭、各庄頭、都市巡迴。咱khah無teh要求報酬，因為咱ê出發點是tī leh beh推廣hia ê方面，若有錢加減一寡報酬mā會使。若有tsit-ê團ê時tsūn，發展若好，beh通俗化mā有法度做，beh精緻mā會凍做，你若精緻ê時，無定著有人會請咱表演，tse道愛收入。咱若來街頭，mā會凍bo̍k款，是beh演ê中間kap beh演煞bo̍k款，iah是普通時仔梨去tshuē有tsit種熱心ê人，無的確伊teh做生理，無法度按呢做，但是伊願意出一寡錢做咱ê經費。我想tse mā是一種推廣ê方式，因為干taⁿ用文章寫、報紙刊也是tsiok少＝e，所以應該用嘴kap咱ê身軀去hō͘人看，去hō͘台灣人直接接觸、感動。中央咱uan-ná有演講，hō͘伊理念，若感覺tsit-ê方式buē bái道來招看mài，tse是一點。

卵：你kám bat王振義老師？伊講幾ā pái＝a，看外tsē人，各鄉鎮攏愛去走，khah重要＝e做一寡田野調查、一寡記錄。總是tsit-ê計畫講tsiok久＝a。

林：tse若是會使li，mā愛聯絡地方政治人物kā咱tàu相kāng。我希望推廣，尚無逐家會曉用各語族家治ê語言以外，咱需要一ê本土性ê普通話，可能是tsit-má講台語，福佬話。有ê人講北京話雖然是過去錯誤壓迫推廣出來e，既然已經變做台灣ê普通話，準算道好。我感覺tse無符合台灣民族ê傳統kap tsit塊土地。母語tsit種物件若無普通化，咱tsiok tsē物件一定會消失去，一定uan-ná加減會變種去。tsit-má已經變種tsiâⁿ tsē去＝a，意識ê部分愛kā換倒tńg來正種台灣人，若無完全m̄是正種＝e。

凰：正種＝e beh按怎定義？

林：台灣人道是講tī文化上台灣＝e，有tsit-ê傳統＝e。尚kài簡單ê表徵道是語言hit-ê思考方式，尚少會凍用大多數台灣人ê語言、思考方式，若tī各語族內面由各族自由發展。